मत्ती 10
10
येशूका को-न (१२) सीसिपामिमलाई थु़र्मीडिम
(मर्कूस ३:१३-१९; ६:७-१३; लूका ६:१२-१६; ९:२-६)
1येशूका को-न (१२) उनी सीसिपामिमलाई येट्मिडी, मा मुनाङ कोल्पा, मा खोत्ले सोमोरी नुङ नो़सी सबेट्पा साखाम मेर्मिमलाई ग्वाम्डी।
2मे को-न (१२) थु़र्मामिम ओर्मिमङा सो़: पत्रुस र्वाक्मा सिमोन ङादो, मेरामकु तारापा ल्वाक अन्द्रियास, जब्दियाकु तारापाचो़ याकूब नुङ याकूबकु ल्वाक यूहन्ना, 3फिलिप नुङ बारथोलोमाइ, थोमा नुङ कर फक्पा मत्ती, अल्फयसकु तारापाचो़ याकूब, थेदियस, 4सिमोन कनानी#१०:४ कनानी र्वाक्मा त्वाकु नेब्दी रिखाम बेसाका रोमीकु कोर्थो़लाम बक्पा कनान इलाकाडाम मु़चु़मिम, येशूलाई भ्रेट्पा यहूदा इस्करियोत।
5येशूका मे को-न (१२) थु़र्मामिमलाई आरे बेम्डिमा थु़र्मिडी, “वाङसामामिमकाडा मेलक्नी, मा सामरीमिमकु शहरडा मेहुनी। 6लावो दाम्पा भेन्दामिम होप्माम इस्राएलीमिमकाडा लक्नी, 7मा मेर्मिमकाडा लनिलो #लूक १०:४-१२; मर्क १०:८-११; लूक ९:३-५‘पाह्री-किब्दी फार्डाङा रोक्फाड्डाम बु’ र्वाक्निमा थो़बेट्नी। 8नो़पा मु़चु़मिमलाई सबेट्नी, मा सिपा मु़चु़मिमलाई सिमुलामका फक्नी, जोन बेट्पा मु़चु़मिमलाई सेपा दु़म्बेट्नी, मुनाङमिमलाई कोल्नी। मेडेङा गानी ल्वान्नी, मेडेङा वाङमिमलाई वो ग्वाक्नी। 9सो़ना, मतो नुङ वाताकु खउलुङ इनी गोल्माडा मेकुर्नी। 10गानी लाम्दिनिलो फाजी, अन्सिक्पा माक्ते, सो़लो़प नुङ डु़लु़म्चो़ मेकुर्नी। हेङालोने खारीचो़ उमा पोमु-डुमुकाम लागि घ्रेट्पा दु़म।#१ कोर ९:१४; १ तिमो ५:१८
11“उहेम शहरडा लोवो देलडा लोवो गानी लनिलो मेसिन्डा गानीलाई हुनाखाना बोमु घ्रेट्पा मु़चु़ माल्नी, मा मेलामका मेलाम्दिनिमिमसम्म मेराम नेमडाङा बानी। 12मेराम नेमगोनो हुनिलो ‘इनी न-भ्रसिनु़’ बेनी। 13मेराम नेमडाम मु़चु़मिम न-भ्रम्सिमु घ्रेट्पा बुमी माला मेर्मिमकु न-भ्रसी, मेएँ माला मेर्मिमकु न-भ्रसी ख्लोसिमा इनीमाडाङा रो। 14कोङनिम मु़चु़का गानीलाई हुनाखाना मेबेनिमिवा, गानी र्वानिमिम मेथो़मिवा माला मेराम नेम, शहरलामका लुनिलो इनी खेलडाम फुर्कु थेम्जो़ल्नी।#१०:१४ माम्चु़नीका मेर्मिमलाई मेद्वामी, मा देन्दे ग्वामी र्वाक्पा रेम्बोमु#थु़र्मा १३:५१ 15आच्छाङा गो गानीलाई र्वाङु, माम्चु़नीका निया बोमिमिमनेम सदोम नुङ गमोरा शहरडाम छु़ल बेपा मु़चु़मिमका ल्वापाडाम वो इम्मु मेझापा देन्दे मेराम शहरडाम मु़चु़मिमका ल्वामी।#१०:१५ सदोम नुङ गमोरा: उत १८:१७–१९:२९ रेप्नी
सीसिपामिमकु थो़मतेर्मी र्वाक्साका येशूका र्वाम्डिम
(मर्कूस १३:९-१३; लूका २१:१२-१७)
16“रेप्नी, गो गानीलाई बडिमिमकु थेतेडा भेन्दामिमलाई होङङा थु़र्तोङा लेनिनी। मेम्मिमका गानी ब्लो होप्माम चङको चङको बाट्पा नुङ तुकतुकुर होप्माम मुमा मान्थिम जो़पा दु़म्नी।#लूक १०:३ 17मु़चु़मिमडाम चङचङया बानी। मेर्मिमका गानीलाई अदालतमिमबाडे लनी, मा उनी घ्रो़म्दीनेममिमबाडे कोक्तेकु रिबाका याल्नी। 18आमा दुथाम गानीलाई साखामचो़ नुङ हपमिमकाडा लनी। मेम्मा मेर्मिम मु़चु़ नुङ वाङसामा मु़चु़मिमलाई आमा दुथाम सो़पा गानी दु़म्नी। 19लावो गानीलाई चु़म्निलो हाम र्वामु, मा हेसाका जेमु र्वाक्साका मिम्ताम-सो़र्ताम मेबेनी। माम्चु़नीका गानीलाई जो़पा थारीका घ्रेट्पा सिजेम ग्वानी। 20हेङालोने जेपा ने गानी मेदु़म्नी, लावो माम्चु़नी इनीमा पापकु पेल गानीलामका जेमी।
21“वा-ल्वाकका वा-ल्वाकलाई सेन्मु लागि चु़म्बेन्मी। मेम्मा पापका उ चो़मिमलाई चु़म्बेडु़, मा चो़मिम उनी माम-पापकु कोर्थो़लाम बमिमा मेर्मिमलाई सेन्बेन्मी। 22गानी आमा चङचङ लाम्दिपा दु़म्निमका खोत्ले मु़चु़मिमका गानीलाई मेद्वानी। लावो उहेम मु़चु़ दिफुसम्म थो़रलु़होम बु, मेराम मु़चु़ सेल्सी।#मत्ती २४:९-१३ 23मु़चु़मिमका गानीलाई कोले शहरडा दु़खा ग्वानिलो कोङमी शहरडा स्वानी। हेङालोने आच्छाङा गो गानीलाई र्वाङु, मिनीचो़ मेयोक्थु़मसम्म इस्राएलडाम खोत्ले शहरडा खारी बोमु मेयु़न्सोनी।
24“सीसिपा, सीपाडाम डोक्पु मेदु़म, मा डु़ल्चो़, नेमहपडाम डोक्पु मेदु़म।#लूक ६:४०; यूह १३:१६; १५:२० 25सीसिपा, सीपा होप्माम नुङ डु़ल्चो़, नेमहप होप्मामङा दु़म्मु माला न-गो तिम्सिट्नी। मेर्मिमका नेमहप होप्माम गोलाई मुनाङमिमकु हप र्वामी माला आमा नेमडाम होप्माम गानीलाई हाङको मेजो़पा र्वामी।#मत्ती ९:३४; १२:२४; मर्क ३:२२; लूक ११:१५
26“मेम्मिमका मेर्मिमडाम मेङिनी। थक्साका जु़ल्मा मेल्वासिक्पा नुङ ख्रेप्साका जु़ल्मा रेम्मेबेसिक्पा हाम वो मिबु।#मर्क ४:२२; लूक ८:१७ 27ओर्मिम खोत्ले ल्वा गो गानीलाई कोङङा र्वाङु, लावो गानी ओराम ल्वा खोत्ले मु़चु़नुङ सो़नी। गो गानीनुङ सु़पील्वाका सो़उतोम ल्वा खोत्ले मु़चु़का थो़पा बेसाका नेमडलामका र्वाक्नी। 28इनी साम फ्याक्पा, इनी पेल ने पुयु़लुबेन्मु मेचापा मु़चु़डाम मेङिनी, लावो इनी साम फ्याक्पा, मा इनी पेललाई खादीगोयु़ घ्रोमु चापा माम्चु़नीडाम ङिनी। 29को पैसाडा नले भँगेरा मेभ्रेसी मा? मेमङा लोवो इनी पापका न मेबेथु़मसम्म मेर्चिपडाम कोले वो क्वाडा मेआल। 30इनीमा बुइडलाम सेम वो ङार्सिड्डाम बु। 31मेम्मिमका मेङिनी! सेर्पा भँगेराडाम ने माम्चु़नीकाम लागि गानी हापा थिकाम बुनी।
32“मु़चु़मिमकु ङादोडा उहेमका गोलाई रङी, पाह्रीला आमा पापकु ङादोडा मेरामलाई वो गो आमा सीसिपा र्वाङु। 33लावो उहेमका गोलाई मु़चु़मिमकु ङादोडा मेरङी, पाह्रीला आमा पापकु ङादोडा गो वो मेरामलाई आमा सीसिपा मेर्वाङु।#२ तिमो २:१२
ख्रीष्ट योम्डिमका मु़चु़मिम मेदु़मी
(लूका १२:५१-५३; १४:२६-२७)
34“सुबुडा मु़चु़मिमकु न-भ्रसिबेड्डा गो योङडोम र्वाक्पा मेमिम्नी। मेर्मिमकु न-भ्रसिबेड्डा मेएँ, मेदु़बेड्डा योङडोम सो़। 35#मीका ७:६ हेङालोने तारापाचो़ उ पापकु कोर्थो़लाम, जाउमोचो़ उ मामकु कोर्थो़लाम, मा देल्मी उ वोचु़कु मामकु कोर्थो़लाम फप्डा गो योङडोम। 36मु़चु़कु स्वाक्चिमो मु़चु़ उ नेमडाम मु़चु़मिमङा दु़म्मी।
37“उहेमका गोडाम हापा उ मामलाई लोवो उ पापलाई लोवो रिखाम बु़, मेराम आमा सीसिपा दु़म्मु मेघ्रेडु़। उहेमका गोडाम हापा उ जाउमोचो़लाई लोवो तारापाचो़लाई लोवो रिखाम बु़, मेराम आमा सीसिपा दु़म्मु मेघ्रेडु़। 38उहेमका उ त्वाकु क्रूस कुर्साका आमा चङचङ मेलाम्दी, मेराम मु़चु़ आमा सीसिपा दु़म्मु मेघ्रेडु़।#१०:३८ उ क्रूस कुर्साका: येशूकाम लागि क्रो़म लु़, दु़खा रो मा सिमुङा बासी लोवो गुइ खोत्लेका इकी त्वापलाईङा माम्चु़नीकु ल्वाड्डा ग्वामु बासी।#मत्ती १६:२४; मर्क ८:३४; लूक ९:२३ 39उहेमका उ त्वाकु साम जु़ल्मु माल्लु़, मेरामका त्वारो़म मेल्वासु़। उहेमका गु गोनुङ लाम्दिडामका उ साम फ्याक्सु़, मेरामका त्वारो़म ल्वासु़।#मत्ती १६:२५; मर्क ८:३५; लूक ९:२४; १७:३३; यूह १२:२५
40“उहेमका गानीलाई रनी, मेरामका गोलाई रङी। मेम्मा उहेमका गोलाई रङी, मेरामका गोलाई थु़र्पा पापलाई रङु़।#मर्क ९:३७; लूक ९:४८; १०:१६; यूह १३:२० 41उहेमका माम्चु़नीलाम-जेपालाई माम्चु़नीलाम-जेपा होङङा रङु़, मेरामका माम्चु़नीलाम-जेपाकाम पुरस्कार ङा ल्वासु़। उहेमका माम्चु़नीकु ङादोडा जो़पा दु़म्पा मु़चु़लाई माम्चु़नीकु ङादोडा जो़पा दु़म्पा होङङा रङु़, मेरामका माम्चु़नीकु ङादोडा जो़पा दु़म्पाकाम पुरस्कार ङा ल्वासु़। 42मेम्मा कोङनिमका ओ याक्के मु़चु़मिमगोडाम कोलेलाई आमा सीसिपा मिम्साका को कान्चु़रे छक्पा कु कोङङा लोवो डुमु ग्वाकु़ माला, आच्छाङा गो गानीनुङ र्वाङु, मेरामका पुरस्कार ल्वासु़ङा।”
Atualmente Selecionado:
मत्ती 10: THUL
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
