Yele-za-pɛr-tib 3
3
A Sore Naaŋmɩn diw nɩ a nɩsaal bɛr a Edɛn zaadɛ̃ pʋɔ
1A wɛ-dʋn za a Sore Naaŋmɩn na tɩ maalɩ a pʋɔ a, a waab'ʋ#3:1 Waab: A waab ɩ n dʋ̃-bɩɛ na na tʋ̃ɔ́ mɩ́ sãw a nyɔ-vʋʋrʋ bɛr, ʋ na tɛr lɔw ɛ́ mɩ́ tʋ̃ɔ́ fow a ʋ gán a ƴãw. Nyɛ̃ Sɔr-n 21, 2Na 18.4, 2Ko 11.3, Yel-w 12.9. tɩ kpɛ yã zuo a za. Ʋ tɩ sowr'ɩ a pɔw: «Sɩza n'a a Naaŋmɩn yel nyɩ: “Nyɩ taa dɩrɛ a zaadɛ̃ tɩ-wɔm kãw za ɩ?”» 2A pɔw sɔw a waab: «Tɩ na tʋ̃ɔ́ na dɩrɛ a zaadɛ̃ tɩ-wɔmɛ. 3Ɛcɛ a tɩɛ ʋl na àr a zaadɛ̃ sɔwlɩsɔw a wɔmɛ ƴãw a, a Naaŋmɩn yel tɩ na: “Nyɩ kʋ̃ dɩ a ɩ, nyɩ kʋ̃ tɔ a ɩ, alɛ bɛ ɩ lɛ nyɩ na kpi na.”» 4A waab tɩ sɔw nɩ a pɔw: «Towtow! Nyɩ bɛ kpiir ɛ. 5Ɛcɛ a Naaŋmɩn bãwnɩ a na k'aa ʋlɩ bibir nɛ nyɩ nãà wa dɩ a a, nyɩ na nyɛrɛ na, nyɩ na ɩ na mɛ̃ Naaŋmɩn a, mɩ́ tʋ̃ɔ́ bãw a vla nɩ a faa.»
6A pɔw tɩ nyɛ̃ nɩ a tɩ-wɔmɛ a vɩɛl a jɩ́rʋ ɩrɛ nʋ̃ɔ̀, ɛ́ a sɛw k'aa nʋmɛ, ɛ́ a dɩb ɩrɛ vʋla yel-yaga bãwfʋ ƴãw. Ʋ tɩ pɔr'ɩ a wɔm kãw dɩ. Al pùorí ʋ kʋ̀ ʋ a ʋ sɩr na tɩ be a ʋ zie a ʋ mɩ̀ dɩ. 7Lɛ n'a bɛ za ayi tɩ zaw nyɛ̃ bãwnɩ bɛ na ɩ baw-zawlɛ a. Bɛ tɩ sɛ n kãkãw váar ɓã taa a ɩ gàn a bɛ zie.
8A Sore Naaŋmɩn na tɩ dɛnɛ a zaadɛ̃ pʋɔ a zaanʋɔra, sɛsɛble na tɩ fure a, a dɛb nɩ a pɔw tɩ wõ n a Sore Naaŋmɩn kɔkɔr, ɛ́ sɔwlɩ a ʋ niŋé a zaadɛ̃ tɩɩr pʋɔ. 9A Sore Naaŋmɩn tɩ bʋɔl'ɩ a dɛb sowr'ʋ: «Nyɩnɛ n'a fʋ be?» 10Ʋ sɔw: «Ɩ̃ wõ na fʋ na cere a zaadɛ̃ pʋɔ a, ɛ́ zɔ̃ dɛ̃bɩ̃ɛ ɩ̃ na ɩ baw-zawla a ƴãw, alɛ n'a so ɩ̃ sɔwlɩ.» 11A Sore Naaŋmɩn tɩ sowr'ʋ na: «Ãa n'ʋ yel kʋ̀ b kɛ́ fʋ ɩ n baw-zawla? Fʋ dɩ n a tɩ-wɔm ɩ̃ na diw fʋ bɛr kɛ́ fʋ taa dɩrɛ a bɩɩ?» 12A dɛb sɔw: «A pɔw fʋ na kʋ̀ m k'ʋʋ be a ɩ̃ zie a, ʋlɛ n'ʋ kʋ̀ m a tɩ-wɔm ŋa ɩ̃ dɩ.»
13Lɛ n'a a Sore Naaŋmɩn tɩ yel a pɔw: «Bʋ̃ʋ n'ɩ à à ŋá fʋ na ɩ a?» A pɔw sɔw: «A waab'ʋ bɛ̀lɩ mɛ̃ ƴãw ɩ̃ dɩ a tɩ-wɔm#3:13 Nyɛ̃ 2Ko 11.3, 1Tim 2.14..»
14Lɛ n'a a Sore Naaŋmɩn tɩ yel a waab:
«Fʋ na faa ɩ à à ŋá a, ɩ̃ ŋmɩɛr'a ƴãwn fʋ.
A yir dʋn za nɩ a wɛ-dʋn za pʋɔ a,
vub'a fʋ na vure nɩ a fʋ púor,
ɛ́ mɔwr tanɛ a fʋ bibi-vɩɛrɩ za.
15Ɩ̃ na ƴãw nɩ dɔ̃ fʋ̃ʋ nɩ a pɔw cara pʋɔ,
a fʋ bʋʋrɛ nɩ a ʋ bʋʋrɛ cara pʋɔ.
A ʋ bʋʋrɛ na mɩ́ ƴɛ́r'ɩ a fʋ zu ŋmɛr,
ɛ́ fʋ dʋ̃ a ʋ bʋʋrɛ gbɛnakɔr.»
16Al pùorí a Sore yel a pɔw:
«Ɩ̃ na ɩ na fʋ mɩ́ tɛr a pʋɔ nyɛ̃ nɩ wʋ̀ʋr yaga,
ɛ́ dɔw bibiir wõ n tuo.
A fʋ sɩr vʋla na mɩ́ tɛr fʋ na,
ʋʋ na tʋ̃ɔ́ fʋ na.»
17Al pùorí ʋ yel a dɛb: «Fʋ na bɛr wõ a fʋ pɔw ƴɛ̀rʋ, ɛ́ dɩ a tɩ-wɔm ɩ̃ na diw fʋ bɛr kɛ́ fʋ taa dɩrɛ a,
fʋ̃ʋ n'ʋ so ɩ̃ ŋmɩɛr ƴãwn a tẽsɔw.
Fʋ na mɩ́ hanɩ nɩ yaga,
ɛ́ páw a fʋ nʋɔr-dɩb a ʋ pʋɔ
a fʋ nyɔ-vʋʋrʋ daar za.
18A tẽsɔw na búle nɩ gɔ̀-pɛ-bʋʋrɛ za kʋ̀rɛ fʋ.
A na fɛr'a fʋ dɩrɛ a alɩ bome nɛ
na búle a póru pʋɔ a.
19A fʋ niwn na mɩ́ ɩ n hanʋ mɛb,
ɛ́ fʋ páw a fʋ nʋɔr-dɩb,
ɛ́ gù fʋ wa tɩ lɛb kpɛ a tẽsɔw pʋɔ,
ʋl pʋɔ na n'a fʋ yi a!
Bʋ̃ʋ n'ʋ vɛ̃, fʋ ɩ n úuru,
ɛ́ na lɛb lɩɛbɩ a úuru.»
20A nɩsaal, a Adama, tɩ por'ɩ a ʋ pɔw yúor kɛ́ Awa, a pɛr lɛ kɛ́ Nyɔ-vʋʋrʋ. Bʋ̃ʋ n'ʋ vɛ̃, ʋlɛ n'ɩ a nɩ-vʋʋrɩ za mã. 21A Sore Naaŋmɩn tɩ maal'ɩ gamɛ kparɩ a Adama nɩ a ʋ pɔw ƴãw ɛ́ su bɛ. 22Al pùorí ʋ tɩɛr ʋ pʋɔ: «A nɩsaal'ɩ ŋan ɩ mɛ̃ Naaŋmɩn a: ʋ bãw nɩ a vla nɩ a faa. Ƴɛrɛŋa a, ʋ ta mɩ̀ páw vuo dɔl nũu pɔr'ɩ a nyɔ-vʋʋrʋ tɩɛ wɔm dɩ vʋʋrɛ kʋralɛ ɩ.» 23Lɛ n'a a Sore Naaŋmɩn tɩ diw a nɩsaal bɛr a Edɛn zaadɛ̃ pʋɔ k'ʋʋ tɩ kʋɔr a tẽsɔw, a ʋl pʋɔ bɛ na ír ʋ a. 24A Sore na wa diw a nɩsaal bɛr baar'a, ʋ ƴãw nɩ seribɛ̃ mɩnɛ a Edɛn zaadɛ̃ saa-pɛrɩ́. Bɛ tɩ tɛr'ɩ zɛbr-sɔ-kpɛ̃ɛ na ɩ vũu ɛ́ lɩɛbɛ a ziir za a gù n a nyɔ-vʋʋrʋ tɩɛ sɔ́r.
Atualmente Selecionado:
Yele-za-pɛr-tib 3: DBDC
Destaque
Compartilhar
Copiar
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fpt.png&w=128&q=75)
Quer salvar seus destaques em todos os seus dispositivos? Cadastre-se ou faça o login
La Bible en Dagara © Alliance Biblique du Burkina Faso, 2013.