Sélimɛ 23

Abirahami n nyangbaa syɔɔ Sara tɔ́nni kéele na

1Sara sìíw yɛ̀ʔɛlɛ nyɔ́ɔ n pye togoye kɔrɔni ní kɔrɔsiin, 2á wi kùu Kiiriyati-Haariba ni, ki lè Heburɔn, Kanaan tári ni. A Abirahami pan bi ba Sara kùúgi kpéʔele, si nyɛni wi kéeli na. 3Koro kàdoʔo ma a Abirahami yìri wi céw kúcere taana n kári n sáà joo ní Hɛti yòdaʔayi ní níì jo: 4#Heb 11:9,13 «Mii i nyɛ nibɔɔn ní i nyɛ wodɛ́ɛɔn ní yele níngi ni. Ki n yɛlɛ ye fɔ̀lɔ ye nyangbaa kaan mii ma wi pye mii wóo, koro ga pye mii í mii céw láa núngo niyɛɛ daana bi sa tɔ́n yaà beè.»

5A Hɛti yòdaʔayi Abirahami yari: 6«Ki n yɛlɛ mi lóʔo wolo ma, ni kàfɔlɔ. Ncan mɔ i nyɛ Kolocɔlɔɔ syɛɛnkpɔɔɔ wolo níngi ni. Ki n yɛlɛ mi mɔ céw tɔ́n wolo nyányi tɛɛcànga ni. Wolo wàa faala a tée cée mɔ ma wi nyanga na mɔ céw tɔ́nnɔ na í.»

7A Abirahami fala n yìri níì too n cíbele tári bee syɛ̀ɛnnɛ yɛ́ʔɛ ma, gee bee n jo Hɛti yòdaʔayi yɛ́ʔɛ ma, 8níì be pye: «Kapye yele n fɔ̀lɔ gi na kányɛʔɛ mii í mii céw láa núngo niyɛɛ daana bi tɔ́n, ki n yɛlɛ ye lóʔo mii ma, yé Sohari jáaw Efurɔn nyɛ́ɛri mii ma. 9Ye wi pye wi Makpela nyanbeweegi kaan mii ma ki nyɛ lè woro wógi, ní i nyɛ woro ségi láʔala na. Wi gi kaan mii ma ki lɔ́ri tiimaa na koro ga pye gi pye mii kútɔndɛɛgi yele níngi ni.»

10Efurɔn wi da pye lè Hɛti yòdaʔagaa, wi maa pye yaà wodɛ́ɛɔn ní Hɛti wóbèle bele nínge ni, a wi fala n gi joo Abirahami ma Hɛti yòdaʔayi wozanya nyɛ́nɛ na yi da ni sɔ̀lɔ́ ni jǐn wi kěgi kpàánweele ni lè níì jo: 11«Ni kàfɔlɔ, ànbée ban í, lóʔo mii ma, mii n ségi kaan mɔ ma n fàra nyanbeweegi na ki yaà lè. Mii n tɔ̀nɔ n gi kaan mɔ ma mii syɛ́ɛnbèle nyɛ́nɛ na. Sa mɔ céw tɔ́n yaà.»

12A Abirahami too n cíbele tári bee syɛ̀ɛnnɛ yɛ́ʔɛ ma 13níì joo ní Efurɔn ní tári bee syɛ̀ɛnnɛ nyɛ́nɛ na níì jo: «Ee! Mɔ ga fɔ̀lɔ mii wógi na, mii a ségi lɔ́rɔ kaan mɔ ma, ki n yɛlɛ mi di syɔɔ mii ma, koro ga pye mii í sa mii céw tɔ́n yaà.»

14A Efurɔn si Abirahami yari: 15«Ki n yɛlɛ mi lóʔo mii ma, ni kàfɔlɔ, tári di lè wálifiio támabéle saala siin woro wi nyɛ nyàʔá mii ní mɔ níngi ni? Sa mɔ céw tɔ́n yaà dɛ.»

16A Abirahami fɔ̀lɔ Efurɔn syɛ́ɛnri na. Wáli nyɔ́ɔgee wi joo Hɛti pìíbèle nyɛ́nɛ na lè, a Abirahami wee bee cáan cúlow na n kaan wi ma. Wálifiiw támabéle saala siin, n yɛlɛ ní jàgiw wáli kánma ní. 17#Kap 7:16 Kánmi bee na Efurɔn ségi gi pye lè Makpela ma, ki lè Mamire zǐnmi na, ségi bee, ní gi nyanbeweegi, ní tíiree myɛ di nyɛ lè ki kákow na, 18a toro pye Abirahami wóro. Hɛti yòdaʔayi myɛ yi da pan n baa pye yaà lè kěgi kpàánweele na, a yoro pye gi séera.

19Koro kàdoʔo ma a Abirahami náà wi céw Sara tɔ́n Makpela ségi nyanbeweʔe ni, Mamire zǐnmi na, koro gi nyɛ Heburɔn wi nyɛ lè Kanaan tári ni. 20Ségi bee n fàra nyanbeweegi na gi pye yaà lè, a toro yiri Hɛti yòdaʔayi kɔ́yɔ ni n kòro Abirahami wóro n pye wi ma kútɔndɛʔɛ, gee wi syɔɔ Hɛti yòdaʔayi ma lè lɔrɔ na.

Atualmente Selecionado:

Sélimɛ 23: CB10

Destaque

Copiar