MATHIE 3
3
Yankan bhwe Jan-Nduhɛ́nháwo tɔ
(Ɔ́n wú Mák 1.1-8; Ɔ́n wú Lwik 3.1-18; Ɔ́n wú Jan 1.19-28)
1Lóka lókɔn ɔn, Jan-Nduhɛ́nháwo bha Jude gotho ánánkhuthé étɔ Yankan bhwe, ló ántɔ sa:
2– Tɛmɛ ɔ́n jrɛn hɔ́n yítɛ́, lée Átho Bhringbi khúbhɛ́ gbali phɔ!
3Jan li lephan khɛ́n bhwetɔ́tréwo Ezayi phrɛ tɔ mɛ́n phɔ bhwe tre sa:
“Jan nɔn ali átɔ́ bɛn édɛn
ánánkhuthé khɛ́n étɔlé:
Tɛmɛ ɔ́n cɔ Hwánthe sitó tɛ́,
ló ɔ́n tɛ́ mɛ́n sitó oyali!”
4Frímú khókho-ngbɔwo yɔnmrɛ nɔn obho tɛ Jan ntráliɛ́ asɔ, ló ńmɔn ńnánhrɔ́ kpakpa thé. Ántha ńgɔgɔmán, ló anní ábithe nhoyá nɔ́n. 5Jeruzalɛ́mɛn khúbhɛ́nɛ́n, Jude gothonɛ́n le Judɛn ndubhɛ jɛ́ njɛnɛ́n khúnbrɛn ebhá nkɛ yé. 6Wo lu wo ne ápasá hɛ́nmɛn, ló Jan ha wo nduhɛ́n Judɛn ndubhɛ hromɛn.
7Lóka Jan wu salé Fariziɛnnɛ́n le Sadusenɛ́n ɔ́nmɔn ebhá mɛ́n yé bha há nduhɛ́n, lótɛ ńkránman nkɔn sa:
– Ńmɛmán hóthóbhɛ́ gbemán! Yankan thɛ́nyan lókɔn atre ebhá ɔn, abɛn nɔn akranman hɔ́n lée ɔ́n gɛ chán lóhrómɛn féne ɛ? 8Tɛmɛ ɔ́n tɛ́ yí khɛ́n élie salé ɔ́n jrɛn hɔ́n yítɛ́. 9Ló ɔ́n ne bhú salé ɔ́n ma tɔ sé hɔ́n bɛn nbrɛn pán salé: “Ábrahámɛn li lo jisɛ.” Lókhɛ́n mɛɛ́n kranmán hɔ́n lée, Yankan gɛ khwɛ́n mú lókɔn jrɛn Ábrahámɛn jímiɔn! 10Lóka-áan wo bho áhɔn ka áyá mɛ́lu thé tre: áyá tɛɛ ále sómí bhwá, óbha kɔ́ há, ló óbha hɔ́n fɔ́nká átɛn hromɛn. 11Mɛn-ɛ, ńdu nɔn mɛn mo mɛn há hɔ́n hɛ́n, ochɛ́ ɔ́n jrɛn hɔ́n yítɛ́, khɛ́n lephan abha mɛn mánji ebhá, mɛ́n-ɛ, ánman mó Nánnánmi Créncré le átɛn ɔ́nmɔn há hɔ́n hɛ́n. Ńpɛ sɛ́npɛ́ brɛn mɛn: mɛn nɛn ni lephan apriman khɛ́n ágɛ sán mɛ́n ngbawa. 12Nfa óca nbie bha mɛ́n mɔ́n mɛn, lónɔn ánman mó ca nbie yɛn nyámí hrómɛn, ánman khwɛ́n nyámí bhwá há mɛ́n kɔ́ mɛn, lókhɛ́n ánman khwɛ́n lónbie há átɛn atre ále nɔ́n hrómɛn.
Wo ha Jezwi nduhɛ́n
(Ɔ́n wú Mák 1.9-11; Ɔ́n wú Lwik 3.21-22)
13Ló Jezwi chan Galile gotho bha Judɛn ndubhɛ mɛ́n, ńman gɛ Jan sa nkɛ hɛ nduhɛ́n. 14Jan le dɛn, ló ńkránman Jezwi sa:
– Hɛ nɔn ɛ́gɛ há mɛn nduhɛ́n o, lókhɛ́n hɛ-ɛ, ɛcu ɛbhá mɛn yé!
15Khɛ́n Jezwi kranman nkɛ sa:
– Thénthé ékɛ lókɔn ɔn, tɛmɛ ɛdɛn otré yábhɛ nɛn. Lósi yábhɛ énɛn salé okhɔ́ tɛ́ Yankan yí énɛn é.
Lótɛ Jan dɛn. 16Lóka oha Jezwi nduhɛ́n phu, ńchan ndu hrómɛn thandi. Lóyámɛ́n, átho phwan kɛ lé: ló ńwu Yankan Nánnánmi chantho ebhá mɛ́n tho sa bhwebhwe a. 17Ló átɔ́ bɛn chantho dɛn ebhá, ló étɔ sa:
– Mɛ́n lókɔn nɔn ńni mɛn Bhi mɛn pɔ, ló mɛn mo mɛn phɔhá khúnbrɛn tre mɛ́n tho.
Atualmente Selecionado:
MATHIE 3: ENT96
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Ebrié New Testament © Bible Society of Côte D'Ivoire, 1996.
