LWIKHI 24

Jezwi chan khúnɔn mɛn fe

(Ɔ́n wú Mat 28.1-10; Ɔ́n wú Mák 16.1-8; Ɔ́n wú Jan 20.1-10)

1Dimánsi njuju fítaan tɛɛ, ńmie khwɛn wo bhwebi ásɔ́n yɔ́n khɛ́n wo tɛtre ɔ́nmɔn lo álínɔn tho. 2Ábhú aphu nɔn mɛ́n si, wo wu salé wo bwa ká njɛ; 3wo hɛn nɔn mɛn, khɛ́n wo le wu Hwánthe Jezwi phɔ nánmí. 4Ló wo le wú lóbhwe hɛ́nmɛn, lóka hromɛn nɔn néphan mɔn khɛ́n asɔ ntráliɛ́ phónpho édri áthándi ya wo hɛ́nmɛn. 5Wo khúsó hrómɛn, wo hɔ bhwalé ya, ló néphan mɔn lókɔn ébhi wo sa:

– Bítɛ khɛ́n ɔ́n ma khúmán thethé hɔ́n énɛn lephan abha mɛpɔ́ ɛ? 6Ńnɛn ma krɛn; ńchan khúnɔn mɛn fe. Mɛ́n ka ńma Galile ɔn, ábhwe khɛ́n ńkránman hɔ́n, tɛmɛ lóbhwe odi hɔ́n mwanhɛ́n salé: 7“Áyɔn se salé ohɔ́n Lephan Mi sé nemán ochɛ́ nkɛ há áyábhletre phɔ, lókhɛ́n ácí asi ńcíbhí bhwaliá, ansáji má mɛpɔ́.”

8Ló Jezwi bhwe lókɔn atɔ, ádi wo mwanhɛ́n. 9Lótɛ wo chan línɔn tho féne, ló wo lo lɛ lómɛ́n se yíchwɛmán áwɔ́-brɛ le néphan nánkhɛ ɔ́nmɔn ye. 10Ńmie alo lóne nɔn ali Mari achan Madala, Janɛn le Jakhi man Mari. Ńmie nankhɛ abha wo hromɛn lɔ lo lɛ lómɛ́n se Krisi-mranchɛ́mán ye. 11Lókhɛ́n Krisi-mranchɛ́mán bhu salé ńnájú bhwe bɛn nɔn nkɔn étɔ, lóhɛ́nthé wo le bhu nkɔn mímí. 12Lótɛ khɛ́n Piɛ-ɛ fe wa lo álínɔn mɛ́n, ńsulé, ló ńwu kandanman phɛ́nphɛ́n pán, áchɛ lóbhwe tɛn hɛ́nmɛn kpɛ́ɛ́n, ló ńsáji no bháthó.

Emaúsi sitó yí atɛ

(Ɔ́n wú Mák 16.12-13)

13Lócí brɛ hromɛn tɛɛ, yíchwɛmán mɔn eló ákhúbhɛ́ bɛn óche Emaúsi, ló le Jeruzalɛ́mɛn ɔ́nmɔn thethé fɔn bhɛ́lé li khilomɛ́trɛn áwɔ́-brɛ. 14Wo ékan áyí khúnbrɛn atɛ bha hɛn phɔ hwan. 15Lóka wo ékan hwan ɔ́nmɔn lo, khɛ́n wo étalí bhwe, lótɛ Jezwi bha ka wo thethé, ló ńgɛ wo ɔ́nmɔn thobhɛ́ ánno. 16Wo ewú nkɛ, lókhɛ́n áyíbɛn le dɛn wo yɛ́n nkɛ. 17Ló Jezwi ébhi nkɔn sa:

– Ébí bhwe hɔ́n étali ɔ́nmɔn lo ɛ?

Áphɔgbɔ́n ka wo phɔ, ló wo dɔnya.

18Lóbɛn óche Kleophási, bhi nkɛ sa:

– Wú hɛ brɛ nɔn ɛli lephan abha Jeruzalɛ́mɛn khɛ́n ale yɛn áyí atɛ ácído lókɔn hromɛn?

19– Ló ńmi nkɔn lée, ébí yábhɛ tɛ ɛ?

Ló wo tɔ sa:

– Yán áyí atɛ Jezwi Nazarɛ́thi sɛ ɛ! Ńni bhwetɔ́tréwo bɛn apɛ sɛ́npɛ́ júmánlí le ábhwetɔ́ ɔ́nmɔn hrómɛn. Ló Yankan le aféchwe pasá ɔ́nmɔn hɛ́nmɛn, ńchɛ lo yɛn mɛ́n sɛ́npɛ́ lókɔn. 20Lo nphahamán-óthemánhɔn le lo khúbhɛ́-óthemánhɔn ɔ́nmɔn hɔn nkɛ phɛli, sa obhɔ́ nkɛ pɔn, owɛn, ló wo chɛ nkɛ ha áyábhletre phɔ. 21Lo bhu salé mɛ́n nɔn ńni lephan ábha do Izraɛ khúbhɛ́nɛ́n ká. Khɛ́n lóyí lókɔn atɛ ɔn, ncɛ́n etɛ́ ncíbhí bhwaliá nbrɛn nɔn ali lókɔn. 22Mímí, ńmie fe abha lo hromɛn bha tɔ hɛ́nmɛntán bhwe bɛn se lo ye. Ńjuju fítaan, wo lo álínɔn tho, 23khɛ́n wo le wu nkɛ nánmí si aka. Wo bha kranman lo lée wo wu Yankan-mranchɛ́mán dɔnbɛn, khɛ́n nkɔn kranman wo gbée salé nkɛ bha mɛpɔ́. 24Lo jɔn fe lo álínɔn tho, ló ńmie bhwe tɛɛ atɔ ɔn, lóyí nɔn wo lɔ wo wu, khɛ́n mɛ́n nbrɛn-ɛ wo le wu nkɛ.

25Lótɛ Jezwi kranman nkɔn sa:

– O, néphan khɛ́n ále phrɛ bhú bhwetɔ́trémán bhwe khúnbrɛn atɔ mímí! 26Wú áleyɔn salé Mesi olí gbre yábhɛ nɛn khɛ́n anká mɛ́n nguhá hrómɛn?

27Lómánji, mɛ́n phɔ bhwe khúnbrɛn tɛɛ wo tɔ abha Yankan hrɔ́ khúnbrɛn hrómɛn, ńnɛ lóthé se nkɔn ye, achan Moyízi hrɔ́ hrómɛn, kábrɛ kábrɛ ádi bhwetɔ́trémán hrɔ́ khúnbrɛn hrómɛn.

28Lóka wo di ákhúbhɛ́ si wo élo, Jezwi énɛn abhó sitó pɛ ló hɛ́nmɛn. 29Khɛ́n wo do nkɛ pɛ, ló wo kranman nkɛ sa:

– Tɛmɛ ɛgɛ lo ɔ́nmɔn chré, lée ácí eló thé, sa gú águ phu a.

Ńnɛ nkɔn hwan, ló ńgɛ nkɔn ɔ́nmɔn chre.

30Ńgɛ nkɔn ɔ́nmɔn anní nɛn. Ńmo kpánhɔn, ńna Yankan nansi, ló ńthwɛ se nkɔn. 31Ló wo mɛbhí lɛ, wo yɛn nkɛ, khɛ́n ńya wo hɛ́nmɛn nia. 32Ló wo ya wo hromɛn wo étɔ sa:

– Lóka khɛ́n ántɔ bhwe sé lo ásitó hrómɛn, khɛ́n ánnɛ Yankan hrɔ́ hrómɛn bhwe thé se lo yé ɔn, wú ále tɛsa áyíbɛn bha lo thɛ́n hrómɛn ethɔ́n sa átɛn si ákhɔ́ thɔ́n?

33Lóyámɛ́n wo saji lo Jeruzalɛ́mɛn. Wo gɛ yíchwɛmán áwɔ́-brɛ bhurɛhɛ́n, 34wo le wo jɔn ɔ́nmɔn, ló nkɔn ékranmán wo sa:

– Mímí nbrɛn, Hwánthe chan khúnɔn mɛn fe, ló Simɔn wui!

35Ló wo lɔ, áyí atɛ ásitó hrómɛn se wo wu ɔn, wo tɔ lóbhwe, le lósi wo khɔ yɛn Jezwi, lóka nkɛ thwɛ kpánhɔn se wo.

Jezwi bho mɛ́n nbrɛn lie yíchwɛmán

(Ɔ́n wú Mat 28.16-20; Ɔ́n wú Mák 16.14-18; Ɔ́n wú Jan 20.19-23; Ɔ́n wú Júm 1.6-8)

36Wo bhwe tɛɛ wo étɔ ɔ́nmɔn lo, lópán Jezwi nbrɛn bha ya wo thethé, ló ánkranmán nkɔn sa:

– Ńthɛ́nkhwálé ogɛ hɔ́n!

37Ákhwíthá ka wo hromɛn, ló wo esókhú, wo bhu sa nɔ́nkrwan. 38Ló Jezwi bhi nkɔn sa:

– Bítɛ ńthɛ́n éjan hɔ́n ɛ? Ló bítɛ khɛ́n hɔ́n ébhu mwanhɛ́n hɔ́n thɛ́n hrómɛn yábhɛ nɛn ɛ? 39Ɔ́n wu mɛn mɔ́n le mɛn nta ɔ́nmɔn a: mɛɛ́n nbrɛn nɔn mɛn ni lókɔn! Ɔ́n pá mɛn pɛ wú, nɔ́nkrwan le lé nánmí, saji ńnɛn pɛ nchwe sa mɛn pɛ khɛ́n hɔ́n nbrɛn lɔ hɔ́n ewú a.

40Lóka ńtɔ bhwe lókɔn, ló ńkhwɛn mɛ́n mɔ́n le mɛ́n nta ɔ́nmɔn nie nkɔn. 41Lónian mɛn khɛ́n áli áphɔhá khóo le hɛ́nmɛntán ɔ́nmɔn sé wo ɔn, áchɛ́ wo le wúsi khɔ́ bhú mímí, lóhɛ́nthé ánmi nkɔn sa:

– Wú ɔ́n pɛ yíbɛn olí bháne?

42Wo bho ácɔn bɛn ofɔn se nkɛ. 43Ńmo, ló ńya wo hɛ́nmɛn tɛɛ ántha. 44Lómánji ńkránman nkɔn sa:

– Mɛn ka mɛn ma hɔ́n thethé ntɔ́nyán, mɛn tɔ bhwe bɛn se hɔ́n, lónɔn ali salé: mɛn phɔ bhwe khúnbrɛn tɛɛ wo lrɛ bha Moyízi bidí hrómɛn, ló abha bhwetɔ́trémán hrɔ́ hrómɛn le ló abha Sómu hrɔ́ hrómɛn ɔn, lóyí khúnbrɛn bha tɛ́.

45Lóka lókɔn nɔn ńphwan wo bhweyɛ́n, ochɛ́sé wo yɛ́n Yankan hrɔ́ hrómɛn bhwe thé, 46ló ńkránman nkɔn sa:

– Ábhwe wo lrɛ tre nɔn ali salé: Mesi bha lí gbre, khɛ́n ńcíbhí bhwaliá, ánman chán khúnɔn mɛn fe, 47ló áyɔn salé obhó mɛ́n hɛ́n pɛ tɔ Yankan bhwe aféchwe khúnbrɛn hrómɛn, ochɛ́sé néphan ojrɛn wo yítɛ́, oyɔ́ wo ne phɔ́ wo, ló Jeruzalɛ́mɛn nɔn óbha chán bhɔ́hɛ́n tɔ ɔ́nmɔn lo. 48Hɔ́n nɔn ɔ́n ni lóphɔ ndalefɛlímán. 49Ló áyí khɛ́n mɛn Nthe tɔ lóbhwe tre salé mɛ́n man sé mɛn, áyí lókɔn, man mó sé hɔ́n lɔ. Khɛ́n áyɔn salé ɔ́n chré ákhúbhɛ́ hrómɛn, kábrɛ kábrɛ ńsɛ́npɛ́ ochántho bha ká hɔ́n phɔ khɛ́n.

Jezwi pha eló tho

(Ɔ́n wú Mák 16.19-20; Ɔ́n wú Júm 1.9-11)

50Ló Jezwi do wo chan ákhúbhɛ́ hrómɛn thandi lo Betani khúbhɛ́ njɛ, lóne nɔn ńkhwɛn mɔ́n jetho, ló ńmɔ wo ndu. 51Lóka anmɔ́ nkɔn ndu, lónɔn ńchan nkɔn thethé féne, ló ńpha no tho. 52Wo-ɛ, wo la nkɛ, ló wo saji lo Jeruzalɛ́mɛn, áphɔhá khóo hrómɛn. 53Ló ákakhúnbrɛn wo bha Yankan-khúthé wo élri Yankan hwa.

Atualmente Selecionado:

LWIKHI 24: ENT96

Destaque

Copiar