JAN 4

Jezwi le Samari bhie bɛn ɔ́nmɔn

1-3 Fariziɛnnɛ́n yɛn salé Jezwi ehá néphan nduhɛ́n brɛn Jan, ló mɛ́n yíchwɛmán ethúbhɔ brɛn Jan hwannɛ́n. (Lókhɛ́n mímí, Jezwi le ha lephan brɛ nduhɛ́n.) Mɛ́n yíchwɛmán nɔn ehá néphan nduhɛ́n. Lóhɛ́nthé lóka Jezwi eyé ábhwe yábhɛ lókɔn néphan étɔ, ńchan Jude gotho féne, ló ńsáji ma Galile gotho. 4Lóka ńma ásitó ánno, énɛn salé ansakhɔ́ Samari gotho.

5Lóka ńdi Samari gotho, ńno ákhúbhɛ́ bɛn óche Sicha, lóne gbali ábithe bɛn Jakɔ́phu bho se mɛ́n bhi Jozɛfu. 6Jakɔ́phu bɔn ndu bɛn lóne. Lóka Jezwi nɛnsi áyí brɛn mɔ́n, ló ńjran chethé ńdu lókɔn mɛ́n, lóka lókɔn ácɛ́nmɛ ya bháca.

7 Samari khúbhɛ́ bhie bɛn bha ekhɔ́ ndu, ló Jezwi ékrɛnmɛn lée:

– Se mɛn ndu mɛn nán.

8(Lóka lókɔn, mɛ́n yíchwɛmán lo ákhúbhɛ́ hrómɛn ephɛ́ nɛn bhá.) 9Ló bhie lókɔn kranman Jezwi lée:

– Ɛli Jwifu sɛ, mɛn-ɛ mɛn ni Samari bhie, ló kalósi ɛ́cu khɔ́ sá mɛn ndu e?

(Áli ábhwe mímí, Jwifunɛ́n le Samari khúbhɛ́nɛ́n ɔ́nmɔn le lí.) 10Ló Jezwi kranman bhie lée:

– Kasé ɛyɛ́n áyí lókɔn Yankan bhó sé néphan, ló kasé ɛyɛ́n mɛn lephan yábhɛ mɛn ni, hɛ nɔn ɛ́bha saya sá mɛn ndu, ló mɛn mán sé hɛ ndu bɛn ásé lephan mɛpɔ́bhá.

11Bhie kranman Jezwi lée:

– Yíliéwo, ɛle pɛ segbeyí obhó khɔ́ ndu, saji ńdu lókɔn ájwan, ló bánne nɔn ɛbhá khɔ́ gɛ ndu lókɔn ásé lephan mɛpɔ́bhá ɛ? 12Lo jisɛ Jakɔ́phu nɔn abɔn ńdu lókɔn se lo, mɛ́n nbrɛn lɔ ńnan ńdu lókɔn, ló mɛ́n miɔn le mɛ́n nbranmán, wo khúnbrɛn wo nan ndu lókɔn. Ló ɛbhú salé ɛbanbrɛn lo jisɛ Jakɔ́phu?

13Ló Jezwi ékranmán bhie lée:

– Lephan khɛ́n ábha nán ńdu lókɔn, ńdukro bha cu hɔ́n-ɛn npɔ, 14lókhɛ́n lephan ábha nán ndu mɛn mán se, ńdukro bha lé cu hɔ́n-ɛn npɔhɔ́n. Ló ńdu lókɔn mɛn mán se annán, mɛ́n hrómɛn, ábha jrɛn ádubhɛ, lóne nɔn ńmɛpɔ́bhá álephú bha chán bie lo.

15Bhie kranman Jezwi lée:

– Yíliéwo, se mɛn hɛ ndu lókɔn mɛn nán, ló ńdukro olé cu hɔ́n mɛn, ochɛ́sé mɛn nɛ́n cu má krɛn man khɔ́ ndu.

16Jezwi krɛnmɛn lée:

– Lo che hɛ ca obhá.

17Ló bhie kranman Jezwi lée:

– Mɛn nɛn phɛn sɛ.

Jezwi krɛnmɛn lée:

– Mímí hɛ bhwe yɔn, ńmwá ɛ́tɔlé ɛle phɛn sɛ; 18ɛphrɛ phɛn nsɛ mwannán, ló sɛ lókɔn thénthé hɛ le mɛ́n ɔ́nmɔn ɔ́n máne ɔn, léli hɛ ca. Ló bhie étɔlé ábhwe mímí nɔn ɛtɔ.

19Bhie kranman Jezwi lée:

– Yíliéwo hɛ lókɔn, mɛn wú ɛli bhwetɔ́tréwo. 20Lo jisɛmánhɔn ali Samari khúbhɛ́nɛ́n, wo la Yankan ábhóbhó lókɔn tho, lókhɛ́n hɔ́n Jwifunɛ́n, hɔ́n étɔlé Jeruzalɛ́mɛn brɛ nɔn ali si óla Yankan.

21Jezwi kranman bhie lée:

– Yípɔman, tɛmɛ ɛbhú mímí lée, cíbɛn abha le lí ábhóbhó lókɔn tho nɔn néphan bha la lo The Yankan, saji abha le lí Jeruzalɛ́mɛn khúbhɛ́. 22Hɔ́n Samari khúbhɛ́nɛ́n, ɔ́n ne yɛn lóyí hɔ́n éla, lókhɛ́n lo Jwifunɛ́n, lo-ɛ lo yɛn lóyí lo éla, átɛsalé néphanmiɔn swa bhwetɔ́, áchan Jwifunɛ́n yé. 23Lókhɛ́n ácí ebhá, ló mɛn mú salé ábha phu. Lóka lókɔn, néphan ali néphan mímí éla Yankan, wo bhá la lo The Yankan, nánnánmi le ábhwe mímí ɔ́nmɔn hrómɛn. Ló wo néphan yábhɛ lókɔn nɔn lo The Yankan énɛn. 24Yankan li Nánnánmi, ló énɛn salé néphan élɛ, wo lɛ nánnánmi le ábhwe mímí ɔ́nmɔn hrómɛn.

25Bhie kranman Jezwi lée:

– Mɛn yɛn salé Mesi (óche Krisi) bha bhá. Ló lóka ńma, ánman tɔ bhwe thé khúnbrɛn sé lo yé.

26Ló Jezwi krɛnmɛn lée:

– Mɛn lókɔn tɛɛ khɛ́n mɛn le hɛ ɔ́nmɔn lo étɔ bhwe ɔn, mɛn nɔn mɛn ni lólephan.

27Lóka yábhɛ lókɔn, Jezwi yíchwɛmán sáji bha, ló etán wo hɛ́nmɛn salé Jezwi gɛ bhie ɔ́nmɔn étɔ bhwe. Lókhɛ́n wo hromɛn álepɛ lephan brɛ ábhi Jezwi lée: “Bí bhwe nɔn ɛ́bhi bhie lókɔn ɛ?” saji álepɛ lephan brɛ ábhi lée: “Bí bhwe nɔn hɛ le bhie lókɔn ɔ́nmɔn hɔ́n étɔ ɛ?”

28Bhie yɔ mɛ́n bhwe ka ndu mɛ́n, ló ńsáji no bháthó ánkranmán néphan lée:

29– Ɔ́n ma wú lephan bɛn atɔ mɛn phɔ bhwe khúnbrɛn phu. Lephan lókɔn wú léli Mesi?

30Ló néphan chan bháthó wa bha gɛ Jezwi.

31Lóka thethé mɛn lókɔn, Jezwi yíchwɛmán éla Jezwi olí nɛn, ló wo étɔlé:

– Yíliéwo, tɛmɛ ɛlí yí bhri bɛn!

32Ló Jezwi ékranmán wo lée:

– Mɛn pɛ nɛn bɛn ɔ́n ne yɛn.

33Ló mɛ́n yíchwɛmán ya wo hromɛn ébhi wo bɛn nbrɛn sa:

– Wú lephan bɛn bha se yí ńni?

34Ló Jezwi kranman nkɔn lée:

– Mɛn nɛn mɛn ní, lónɔn ali sa lephan achɛ mɛn ma, mɛn tɛ́ mɛ́n thɛ́npɔ́ yí, ló mɛ́n júmán ńse mɛn, mɛn ní lókhúnbrɛn ophú. 35Wú ɔ́n ne bháne ɔ́n tɔlé: “Ákha pɛ bhwelí tɛɛ wo bhá bwan nyámí.” Lókhɛ́n mɛn-ɛ mɛɛ́n kranmán hɔ́n lée, tɛmɛ ɔ́n gbɛnɛ́n wú ńgɔn khúnbrɛn abha bithe. Ńyámí khúnbrɛn abha lóhrómɛn ánɔn, ló ádi bwán! 36Lephan abha ngɔn ébwan nyámí, átɛsa ńgɛ mɛ́n pɛnsɔ́n ka mɔ́n mɛn, ló ángba nyámí khúnbrɛn murɛhɛ́n sé ńmɛpɔ́bhá álephú. Ló cíbɛn, lephan khɛ́n éha nyámí le lephan ébwan nyámí, wo mɔ́nmɔn wo bhá grɛ lí phɔhá lócí míbrɛ. 37Yandran lókɔn wo bhu khɛ́n étɔlé: “Bɛn éha nyámí, lókhɛ́n lójɔ ébwan ɔn”, áli mímí. 38Mɛn chɛ hɔ́n no bwan nyámí ńgɔn si khɛ́n ɔ́n ne bho mɔ́n li júmán. Néphan nankhɛ nɔn ali júmán lóne, lókhɛ́n hɔ́n-ɛ hɔ́n elí wo júmán nɛn, hɔ́n enán wo júmán ndu.

39Samari khúbhɛ́nɛ́n búdúbúdú abha ákhúbhɛ́ lókɔn hromɛn, wo bhu Jezwi mímí átɛsalé bhie kranman wo lée: “Lephan lókɔn, ńtɔ mɛn phɔ bhwe khúnbrɛn.” 40Lóhɛ́nthé, lóka Samari khúbhɛ́nɛ́n bha, wo éla Jezwi ogɛ wo ɔ́nmɔn chré, ló Jezwi gɛ wo ɔ́nmɔn chre lóne ńcíbhí mɔn. 41Ló mɛ́n bhwetɔ́ hrómɛn, néphan abhui mímí wo cu bhɔtho, 42ló wo ékranmán bhie lée:

– Thénthé lo bhu mímí, lókhɛ́n áleli hɛ bhwe ɛtɔ hɛ́nthé, átɛsalé lo bɛn nbrɛn lo ye mɛ́n míthé, ló lo yɛn salé mímí nbrɛn ńni áthéjinɛ́n Dókáwo.

Jezwi tɛ lephan khó bɛn mi phɔ jan

43Lóka ńchre lóne ńcíbhí mɔn, Jezwi chan lóne lo, ló ńma Galile gotho. 44Átɛsalé ńphrɛ tɔlé: “Bhwetɔ́tréwo ɔn, mɛ́n bɛn nbrɛn gothonɛ́n le ji.” 45Lóka ńdi Galile gotho, néphan abha lóne do-e mwámwá, átɛsalé wo nbrɛn lɔ wo lo Jeruzalɛ́mɛn Phákhe hromɛn, ló wo wu áyí khúnbrɛn Jezwi tɛ lóne.

46Jezwi saji bha Kana khúbhɛ́ abha Galile gotho, lósi ńtɛ ńdu jrɛn divɛn. Kapɛnaúmɛn khúbhɛ́, bhringbi hɛ́nmɛn lephan bɛn bháne, mɛ́n bhi lɔ́ ehɔ́n. 47Lóka ńye salé Jezwi chan Jude gotho bha hɛn Galile gotho, ló ńma ánna Jezwi oló Kapɛnaúmɛn khúbhɛ́ lo tɛ́ mɛ́n bhi phɔ jan, átɛsalé yípɔ lókɔn ńma ákhú hrómɛn. 48Jezwi krɛnmɛn lée:

– Hɔ́n, kasé ɔ́n ne wu hɛ́nmɛntányí, ɔ́n ne bhú mímí.

49Ló bhringbi hɛ́nmɛn lephan étɔlé:

– Yíliéwo, bha wú mɛn mi gbraa lée ánnɛn ankhú.

50Jezwi krɛnmɛn lée:

– Tɛmɛ ɛlo, hɛ bhi bha mɛpɔ́.

Lephan lókɔn, ńmu Jezwi bhwe atɔ mímí, lo ńsáji ánno. 51Lóka ńma sitó ánno, mɛ́n nɛnkhwɛ́nmán wa bha ywɛnli, ló wo ékranmán nkɛ lée:

– Hɛ bhi bha mɛpɔ́!

52Ló ńmi nkɔn sa:

– Lóka yábhɛ bɛn nɔn mɛn bhi phɔ jan ɛ? Ló wo krɛnmɛn lée:

– Npi, lóka ácí eló njuka wáchɛn brɛ hromɛn, lóka lókɔn nɔn mɛ́n phɔ khwalé.

53Ló ádi yípɔ nthe mwanhɛ́n salé lóka yábhɛ brɛ nɔn Jezwi ékrɛnmɛn lée: “Hɛ bhi bha mɛpɔ́”, lóhɛ́nthé, mɛ́n le mɛ́n bháthónɛ́n khúnbrɛn ɔ́nmɔn wo bhu Jezwi mímí.

54Hɛ́nmɛntányí lókɔn Jezwi tɛ, lónɔn asi ndɔn mɔn lóka ńchan Jude gotho ma Galile gotho.

Atualmente Selecionado:

JAN 4: ENT96

Destaque

Copiar