JAN 2
2
Ńkhú wo chre Kana khúbhɛ́
1Ńcíbhí mɔn hrómɛn, lephan bɛn échre nkhú Kana khúbhɛ́ abha Galile gotho. Jezwi man lo lóne, 2ló wo do Jezwi le mɛ́n yíchwɛmán ɔ́nmɔn lónkhúchre mɛ́n. 3Lóka divɛn phu, ló Jezwi mɛ́n man ékrɛnmɛn lée:
– Wo divɛn phu.
4Ló Jezwi kranman mɛ́n man lée:
– Bhie, ɛyɔ́ mɛn kálé jɛɛn, mɛn ka mɛn mó tɛ́ yí, áka bha.
5Ló Jezwi man kranman nɛnkhwɛ́nmán lée:
– Mɛ́n bhwe khúnbrɛn tɛɛ ánman tɔ, tɛmɛ ɔ́n tɛ́ lóyí.
6Jwifunɛ́n pɛ bidí búdúbúdú se wo mɔ́n chó le wo nta chó, lóhɛ́nthé wo khwɛn ńmwe khónkhó ákhwá tre lóne, ńmwe lókɔn ábhú wo bho than ló ábhwe brɛ, ágɛ lí lítre ya. 7Ló Jezwi kranman nɛnkhwɛ́nmán lée:
– Ɔ́n há ndu osí ńmwe khúnbrɛn lókɔn.
Ló wo ha ndu si lókhúnbrɛn. 8Ló ńkránman nkɔn sa:
– Thénthé tɛmɛ ɔ́n mó yí khɔ́ ndu bhrí bɛn lókɔn lo sé lephan wo bho yí khúnbrɛn ha mɔ́n mɛn.
Wo khɔ ńdu ajrɛn divɛn lo se lephan lókɔn, 9ló ńhɔn dɔn mɛ́n. Lephan wo bho yí ha mɔ́n mɛn, ńnɛn yɛn divɛn lókɔn lósi achan, (lókhɛ́n nɛnkhwɛ́nmán akhɔ ndu bha, wo-ɛ, wo yɛn divɛn lókɔn lósi achan). Lóhɛ́nthé lephan lókɔn ńche bhiepɔ nca bha, 10ló ánkranmán nkɛ lée:
– Lephan khúnbrɛn ńdɛ mímí nɔn wo phrɛ sé néphan nán. Lóka néphan abha yí mɛ́n nán ndɛ ábrɛn wo mɔ́n, lómánji khɛ́n osé wo ńdɛ nankhɛ khúnbrɛn. Lókhɛ́n hɛ ékɛ, ɛhɔn ńdɛ mímí tre mánji áhɛn kanɛn.
11Jezwi tɛ mɛ́n hɛ́nmɛntányí lókɔn athwasi Kana khúbhɛ́ abha Galile gotho. Lóne nɔn ńmo mɛ́n nguhá thándi, ló mɛ́n yíchwɛmán khúnbrɛn bhui mímí.
12Lómánji, Jezwi do mɛ́n man, mɛ́n hɔnsɛ́nhɔn le mɛ́n yíchwɛmán khúnbrɛn lo Kapɛnaúmɛn khúbhɛ́ ló wo chre lóne áli ńcíbhí mɔ́nbɛn.
Jezwi bha Yankan-khúthé
(Ɔ́n wú Mat 21.12-13; Ɔ́n wú Mák 11.15-17; Ɔ́n wú Lwik 19.45-46)
13Jwifunɛ́n fɛ́thi óche Phákhe ágbali phɔ, lóhɛ́nthé Jezwi lo Jeruzalɛ́mɛn. 14Lóka ńka Yankan-khúthé, ńgɛ jɛmán khwalé ephɛ́ jɛ, wo ephɛ́ ndwa, ńgbankhran le la-ndrɛ́n ɔ́nmɔn lí, saji ńgɛ jɛtɛn-jrɛ́nmán lɔ chre wo tábrɛ mɛ́n éjrɛn jɛtɛn. 15Ńkhwɛn ńmɛ́ akhwa lóne, lóka ńgba phu, ló ńmo si wo khúnbrɛn thándi ngbophro, wo le wo gbankhran, le wo ndwa khúnbrɛn, ńkhwɛn jɛtɛn-jrɛ́nmán jɛtɛn fɔn khwalé yítathé, ńda nkɔn tábrɛ halé, 16ló ánkranmán néphan ephɛ́ la-ndrɛ́n lí salé:
– Tɛmɛ ɔ́n khwɛ́n yí khúnbrɛn lókɔn yɛn krɛn! Ɔ́n ne hɔ́n mɛn Nthe nkhú tɛ́ hɔ́n jɛ́gɔn!
17Ló Yankan hrɔ́ bhwe atɔ ɔn, ádi yíchwɛmán mwanhɛ́n, lónɔn ali salé: “Hwánthe, hɛ bháthó júmánlí éfrimán mɛn, ló ethɔ́n mɛn sa átɛn a.”
18Ló Jwifunɛ́n-óthemánhɔn ébhi Jezwi sa:
– Ébí hɛ́nmɛntányí ɛ́bha gɛ tɛ́ lie lo salé ɛgɛ mɔ́nsi ɛtɛ́ áyí yábhɛ lókɔn ɛtɛ́ ɛ?
19Jezwi kranman nkɔn sa:
– Tɛmɛ ɔ́n ca Yankan-nkhú lókɔn khwálé, ló mɛn man mó ńcíbhí bhwaliá tɛɛ thán ká tho.
20– Ló wo kranman Jezwi lée: ńpá grebhɛ nɔn wo bho than Yankan-nkhú lókɔn, ló hɛ, ɛbhá bhó ńcíbhí bhwaliá tɛɛ thán ká tho?
21Lókhɛ́n Yankan-nkhú lókɔn Jezwi étɔ lóphɔ bhwe ɔn, lónɔn ali mɛ́n phɔ nánmí. 22Lóka Jezwi chan khúnɔn mɛn fe, ló ádi mɛ́n yíchwɛmán mwanhɛ́n salé ńphrɛ tɔ ábhwe lókɔn. Ló Yankan hrɔ́ bhwe atɔ, wo bhu mímí, saji Jezwi bhwe atɔ, lólɔ wo bhu mímí.
Jezwi yɛn lephanmi thɛ́n hrómɛn bhwe
23Lóka Jezwi bha Jeruzalɛ́mɛn Phákhe fɛ́thi hromɛn, néphan búdúbúdú bhui mímí lóka wo wu mɛ́n hɛ́nmɛntányí ńtɛ. 24Lókhɛ́n néphan lókɔn Jezwi le bho mɛ́n mwasrui tre wo tho, átɛsalé ńyɛn wo khúnbrɛn simɛ́n. 25Ló áleli lephan bɛn nɔn ábha tɔ néphan phɔ bhwe se anyé, lókhɛ́n mɛ́n nbrɛn ńyɛn ábhwe abha néphan thɛ́n hrómɛn.
Atualmente Selecionado:
JAN 2: ENT96
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Ebrié New Testament © Bible Society of Côte D'Ivoire, 1996.
