Lukas 18

Umpama tentang hakim satu deng janda satu

1Abis itu, Yesus bilang umpama satu pa Dia pe murit-murit supaya dorang turus-turus berdoa pa Tuhan Allah deng jang dong ilang smangat untuk minta tolong pa Dia. 2Yesus bilang bagini, “Di kota satu, ada hakim satu, yang tara tako pa Tuhan Allah, deng dia tara hormati pa sapa-sapa. 3Di kota itu, ada lagi janda satu yang turus-turus datang pa hakim itu kong bilang, ‘Bapa hakim, tolong pa kita ka! Biking adil pa kita di kita pe musu pe muka.’

4Hakim itu salalu tolak janda itu pe mau, tapi lama-lama dia bilang di dia pe dalam hati bagini, ‘Biar kita tara tako pa Tuhan Allah deng tara hormati pa sapa-sapa, 5tapi karna janda ini turus baganggu pa kita, lebe bae kita urus suda dia pe masala itu deng adil, supaya jang dia turus-turus datang kong biking susa pa kita.’ ”

6Turus Tuhan Yesus bilang, “Perhatikan bae-bae apa yang hakim tara adil itu bilang! Itu jadi pelajaran pa ngoni. 7Kalu orang tara adil macam itu mo tolong janda itu, lebe-lebe lagi Tuhan Allah pasti mo tolong pa Dia pe umat yang Dia pili, yang siang malam minta tolong turus-turus pa Dia. Tara mungkin Dia mo tunda-tunda turus untuk tolong pa dorang. 8Kita bilang pa ngoni, pasti deng capat-capat Dia mo biking yang adil pa dorang. Tapi nanti waktu Anak Manusia yang dari sorga datang ulang, apa masi dapa orang percaya di dunia ini?”

Umpama tentang orang yang sombong deng orang yang rasa dia pe diri tara arti

9Yesus kase carita umpama satu pa orang-orang yang anggap dong pe diri butul deng yang pandang enteng pa orang laeng. Yesus bilang, 10“Ada dua orang pigi di Ruma Ibada Pusat la berdoa. Orang yang satu itu dia dari aliran Farisi, deng yang satu lagi dia itu tukang tagi pajak. 11Orang dari aliran Farisi itu badiri basandiri kong dia berdoa#18:11: Atau pe arti laeng bagini, ‘Dia badiri kong dia berdoa dalam hati’. bagini, ‘Ya Tuhan Allah, kita bilang tarimakasi, karna kita bukang orang berdosa sama deng orang laeng. Kita ini bukang orang yang suka rampas orang laeng pe barang, kita bukang orang yang tara butul, kita bukang orang yang jaga baku suka deng orang pe bini, deng kita bukang lagi sama deng tukang tagi pajak ini. 12Kita bapuasa satu minggu dua kali, deng kita salalu kase perpuluhan dari samua kita pe hasil karja.’

13Tapi tukang tagi pajak itu, dia badiri jao-jao. Dia tara barani mangada di langit, tapi dia sapu-sapu dia pe dada tanda manyasal, kong babilang, ‘Ya Tuhan Allah, kasiang ka pa kita. Kita ini orang berdosa.’

14 # Mat. 23:12; Luk. 14:11 Jadi ini yang Kita mo bilang pa ngoni: tukang tagi pajak itu pulang pa dia pe ruma, kong Tuhan Allah biking dia jadi orang yang tara sala pa Tuhan Allah pe muka, tapi orang dari aliran Farisi itu, tarada. Barang, sapa saja yang baangka diri, Tuhan Allah mo biking dia jadi orang yang tara arti apa-apa. Tapi sapa yang anggap dia pe diri tara arti apa-apa pa Tuhan Allah pe muka, Tuhan Allah mo angka pa dia jadi orang yang penting.”

Yesus berkati pa ana-ana kacil

(Mat. 19:13-15; Mrk. 10:13-16)

15Satu kali, ada orang-orang datang bawa dong pe ana-ana yang masi kacil pa Yesus. Dorang bawa ana-ana itu supaya Yesus taru Dia pe tangan di atas pa dorang kong kase berdoa pa dorang. Pe lia itu, Yesus pe murit-murit mara pa orang-orang itu. 16Tapi Yesus pangge ana-ana itu kong bilang pa Dia pe murit-murit, “Kase biar suda ana-ana itu datang pa Kita. Jang ngoni larang pa dorang, karna orang-orang yang tara sombong deng yang capat percaya sama deng ana-ana kacil ini, dorang itu yang kase dong pe diri pa Tuhan Allah la Dia Berkuasa sebagai Raja pa dorang pe hidup. 17Inga bae-bae yang Kita mo bilang pa ngoni ini: sapa yang tara tarima pa Tuhan Allah sama deng ana yang tara sombong, dia tara akan jadi Tuhan Allah pe umat yang Dia Berkuasa sebagai Raja pa dia pe hidup.”

Orang kaya susa mo jadi Tuhan Allah pe umat

(Mat. 19:16-30; Mrk. 10:17-31)

18Ada satu pemimpin agama Yahudi, dia tanya pa Yesus, “Guru yang bae, kita musti biking apa supaya kita bole dapa hidup deng Tuhan Allah slama-lamanya?”

19Yesus bilang pa dia, “Tarada satu orang yang bae, cuma Tuhan Allah saja yang bae. Tapi bikiapa kong ngana bilang Kita bae? 20#Kel. 20:12-16; Ul. 5:15-20 Ngana tantu so tau to, Tuhan Allah pe parenta-parenta yang bagini: jang baku suka deng orang pe laki atau orang pe bini, jang bunu orang, jang pancuri orang pe barang, jang jadi saksi tara butul, deng ngana musti hormati ngana pe papa deng ngana pe mama.”

21Kong orang itu bilang, “Samua parenta itu kita so biking mulai dari kita masi muda lagi.”

22Pe dengar itu, Yesus bilang, “Tapi masi ada satu yang ngana bolong biking. Ngana jual samua ngana pe harta kong kase bage-bage doi itu pa orang-orang miskin. Kalu ngana biking bagitu, ngana dapa harta di sorga. Abis itu, kamari suda la iko pa Kita.” 23Pe dengar Yesus bilang bagitu, dia jadi sedi deng hati susa, barang dia kaya skali.

24Yesus haga pa dia kong tau dia sedi. Turus Yesus bilang bagini, “Pe susa skali orang kaya kase dia pe diri la Tuhan Allah Berkuasa sebagai Raja pa dia pe hidup. 25Barang, masi lebe gampang unta satu ekor maso di lobang jarum, daripada orang kaya mo kase diri la Tuhan Allah Berkuasa sebagai Raja pa dia pe hidup.”

26Orang-orang yang ada dengar Yesus bilang bagitu, dong tanya pa Yesus, “Ii, kalu bagitu, sapa yang dapa slamat?”

27Yesus jawab, “Apa yang manusia tara bisa biking, Tuhan Allah bisa biking. Jadi cuma Tuhan Allah saja yang bisa kase slamat pa manusia.”

28Turus Petrus bilang, “Torang ini so kase tinggal samua yang torang punya kong so iko pa Guru.”

29Yesus jawab, “Inga bae-bae yang Kita bilang pa ngoni ini. Tiap orang yang kase dia pe diri la Tuhan Allah Berkuasa sebagai Raja pa dia pe hidup, sampe dia so kase tinggal dia pe ruma, dia pe bini atau dia pe sudara, dia pe orang tua atau dia pe ana-ana, 30orang itu akan tarima di dunia ini lebe-lebe lagi dari apa yang dia so kase tinggal itu. Kong nanti dia mo dapa hidup deng Tuhan Allah slama-lamanya.”

Yesus kase tau yang ketiga kali Dia akan mati

(Mat. 20:17-19; Mrk. 10:32-34)

31Yesus kase kumpul pa Dia pe dua blas murit, kong bilang pa dorang, “Dengar e! Skarang torang mo pigi ka atas di kota Yerusalem. Di sana, samua yang nabi-nabi so tulis tentang Anak Manusia yang dari sorga itu mo jadi. 32Anak Manusia akan dapa serakan pa orang-orang yang bukang Yahudi. Orang-orang itu mo ejek-ejek, mo hina-hina, deng mo luda pa Dia. 33Dorang mo pukul pa Dia pake tali yang ada barang tajam di dia pe ujung, kong dong mo bunu pa Dia. Tapi di hari yang ketiga, Dia akan hidup ulang.”

34Biar Yesus bilang bagitu, Dia pe murit-murit tetap tara mangarti sama skali, karna arti dari yang Yesus ada bilang tadi itu masi tasambunyi, kong dorang tara tau apa Dia pe maksut.

Yesus kase sembu orang buta

(Mat. 20:29-34; Mrk. 10:46-52)

35Waktu Yesus so mo sampe di kota Yerikho, ada orang buta satu yang dudu minta-minta di pinggir jalang. 36Orang buta itu dengar ada banya orang lewat di situ, kong dia tanya, “Ada apa itu?”

37Turus dorang kase tau pa dia, “Yesus, orang Nazaret itu ada lewat.”

38Kong orang buta itu bataria, “Yesus, raja Daud pe turunan, kasiang pa kita ka!”

39Orang-orang yang ada bajalang di Yesus pe muka, dorang togor pa orang buta itu supaya dia badiam. Tapi orang buta itu bataria lebe kuat lagi, “Bapa, raja Daud pe turunan, kasiang pa kita ka!”

40Kong Yesus berenti, turus suru bawa orang buta itu pa Dia. Bagitu orang buta itu so sampe, Yesus tanya pa dia, 41“Ngana mau Kita biking apa pa ngana?”

Orang buta itu jawab, “Bapa,#18:41: Di teks asli bahasa Yunani, kata kurios, pe arti, ‘Bapa’ atau ‘Tuhan’. Lia kata ‘Tuhan’ di kamus. kita minta supaya kita bisa dapa lia!”

42Turus Yesus bilang, “Sembu suda ngana! Ngana so bisa dapa lia karna ngana percaya pa Kita.” 43Waktu itu suda, orang buta itu so bole dapa lia, turus dia iko pa Yesus deng puji-puji pa Tuhan Allah. Orang banya yang lia hal itu, dorang samua puji-puji pa Tuhan Allah.

Atualmente Selecionado:

Lukas 18: PB MMU

Destaque

Copiar