TOBLEISIA TI WIEHINDEISIA 8
8
Sɔɔl Lɔ Yesu Mableisia Yakpɛma A Nyamu
1Sɔɔl lumangɔ yɛla Stivin waalɛi ma. Folo yakpei na ma, nungeisia ti tɔtoilɔ a kpalɛ nyamunyamu lala Yesu mableisia nasia ma ti yɛ Jelusalɛm. Nasia kpɛlɛɛ ti langɔ yɛla a Yesu, kɛ lekee tobleisia, ti vayɛilɔ Judia lɔlei hu Samelia kɛɛ tateisia hu gbi. 2Ngewɔ vɛliblaa lɛɛngaa ti Stivin gbɔwuilɔ, ti ngi wɔɔwo gbouŋ.
3 #
Tow 22.4-5; 26.9-11 Kɛɛ Sɔɔl i yɛlɔ a lapi Yesu hindei hunyaniva, a wuangua pɛleisia bu, a Yesu mableisia yeehinga kɛɛ yeenyahangaa gɛndɛ, a pie ta ti wu kpindiwɛlei bu.
Filip Lɔ Ngowili Yekpei Lema Samelia
4Yesu mablei nasia ti ti huvayani Jelusalɛm ti lewetewelɔ hu gbi ta Ngowili Yepkei le nungaa ma. 5Filip i lini Samelia yeetaa wai hu lɔ i Ngowili Yekpei le nungei nasia ma ti yɛ na. 6Fahii gbi ti woloilɔ pandawanda na ma i ndeni. Ti gbi ti woloilɔ ngi ma tawao ti kabande hindei nasia lɔilɔ i yɛ pie. 7Ngafa nyamuisia ti gbuɛilɔ numu gboto hu ta yele waa gula; tawao kpɔɔkpɔblaa kɛɛ nɛmublaa gboto bɛɛ ti bawoilɔ. 8Faale nungaa ti goohu nɛngɔ waa yɛla Samelia.
9Taamɔ yila yɛlɔ yeetaa wai na hu ngi laa a Saimɔn. Ngi lɛmbingɔ yɛla saha yeetei na hu, a njoso hindei wie tawao i pielɔ Sameliablɛisia ti wuhu i wu a yeenjoso hindei na. I yɛlɔ a nde yɛ numu waa lɔ a ngie, 10tawao numui gbi lekee ti yɛ taa wai na hu, numu waawangaa kɛɛ yeegbamɛisia, ti woloilɔ pandawanda ngi ma. Ti yɛlɔ a nde tɛɛ, “Ngewɔ gbayei na ta toli a ‘Kpaya Wai’ tamia a ngie.” 11Ngi lɛmbingɔ waa yɛla ti wuhu wuma a ngi yoso hindei, na hii ti wolongɔ waa yɛla ngi ma. 12Kɛɛ kia ti lani a Ngowili Yekpei na Filip i hugɛni a tie kɔlooni Ngewɔ Mahayɛi ma kɛɛ Yesu Kristi biyɛi, ti ti wuɛilɔ, yeenyahangaa. 13Saimɔn vulii bɛɛ i lɛilɔ a Yesu tawao kia ti ngi wuani, i vɛfɛilɔ Filip ma tawao ngi wuhu i wuilɔ waa ji i yɛ kabande hinda waawai nasia lɔ Filip i yɛ pie.
14Toblei nasia ti yɛ Jelusalɛm ti mɛnilɔ kɛ Sameliablɛisia ti Ngewɔ yiɛi gulunga; faale ti Pita tia Jɔn loilɔ ti gama. 15Kia ti foni na ti Ngewɔ vɛlilɔ nasia va ti lani a Yesu aako Ngewɔ Yafei i yei ti ma. 16Ajifa Ngewɔ Yafei ii yɛ yeini ti yilayee bɛɛ ma; ti wuangɔ yɛla lekee Ndemɔi Yesu biyɛi hu. 17Na wooma Pita tia Jɔn ti ti lokoisia wɛleilɔ ti ma kɛ Ngewɔ Yafei i yeinga ti ma.
18Saimɔn i tɔilɔ kɛ Ngewɔ i ngi Yafei venga ti wɛ ji tobleisia ti ti lokoisia wɛlɛni ti ma. Faale i navoo gɛilɔ a Pita tia Jɔn 19yɛ, “A kpayei ji ve nya bɛɛ wɛ aako numu gbi lekee ngi nya lokoi wɛlɛngaa ngi ma i Ngewɔ Yafei majɔɔ.”
20Kɛɛ Pita i poteilɔ i nde ngi ma yɛ, “Wua bi navoei wa haalɔ fɔ, ajifa biaa gilima kɛ kpayei na a pie Ngewɔ Yafei a yei nungaa ma gbama ba ngeyalɔ a navoo! 21Bi nda gbi ii mu yengei ji ma, ajifa bi lii ii wɔnani Ngewɔ yaama. 22Faale wounve nyamui na ma bi kaanga bi lii hu, bi Ndemɔi vɛli aako i manu bi ma giliva a hinda bondei ji. 23Ajifa ngi tɔnga kɛ tolo nyamunyamu mia bi kpuama Yesu mableisia ma tawao jumbui luwɔ mia a bie.”
24Saimɔn ndeilɔ Pita tia Jɔn ma yɛ, “Konɛɛ bɛɛ le, a Ngewɔ manɛnɛ nya va aako hindei jisia wu ndenga nya va aa nya wie.”
25Kia Pita tia Jɔn ti kpɔyɔni a na hugɛla ti kɔɔngɔ kɔlooni Yesu Kristi ma, ti yaama ti Ndemɔi Woowili le, ti yamɛilɔ Jelusalɛm. Ji ti yɛ lima pelei hu ti Ngowili Yekpei hugɛilɔ Samelia yeefula gboto hu.
Filip Tia Itiopia Yeegɔmɛtii Yengemɔi
26Ngewɔ malika yila i yɛpɛilɔ Filip gama yɛ, “Bi magbatɛ bi yei a kpundɔhu wee, bi hitɛ pelei na ma a gbua Jelusalɛm a li Gasa.” (Yeepelei ji i haanga wɔɔ.) 27-28Kɛ Filip i ngi magbatɛnga i li. Itiopia hindo yila i yɛ pelei hu lɔ a yaama ngi yee. Kenɛi ji yɛni a gɔmɛtii yengemɔi yeebaamayee lɔ, Itiopia Nyaha Mahɛi Kandesi ngi navoo hindei gbi loko i ngi yeya. I lini Ngewɔ vɛlima Jelusalɛm, tawao i yɛ na yamama, i heini kongoloi hu soisia ta ndala. I yɛ limaa a Ngewɔ lutui Aisaya gɔlɛi gaa. 29Ngewɔ Yafei i ndeilɔ Filip ma yɛ, “Li bi lo kongoloi na gbla.” 30Filip liilɔ a piimɛ kɛ i mɛninga taamɔi a Ngewɔ lutui Aisaya gɔlɛi gaa; kɛ i ngi mɔlinga yɛ, “Na bi kaama biaa yeembui gɔɔma?”
31Kenɛi i kpɛmboilɔ yɛ, “Nga yee gu ngi yeembui gɔ, kɛ numu i hugɛ a nge?” Kɛ i ndenga Filip ma yɛ, “Lɛ mua bie mu hei kongoloi hu.” 32Ngewɔ gɔlɛi yeemia i yɛ na gaa ta lɔ:
“Ngi gbuangɔ yɛla a mbalɛi na ti lima paama;
ngi gbuangɔ yɛla a mbalaloi na ɛɛ jɔlɛ
ji ta yɛ ngi yomboi wolema; ii njia yakpe
bɛɛ leni.
33Ti ngi yawufenga ti ngi gavanga Kotii hu.
Numu gbi ɛɛ gu aa ngi leengaa hinda hugɛ,
ajifa ti ngi waalɔ, ii ndeengaa loni.”
34Kɛ kenɛi i Filip mɔlinga yɛ, “Hugɛ lɛɛ a nge, ye lɔ Ngewɔ lutui i ji leni ngi va? I ndeni ta yekpe lɔ va ɔɔ numu weka?” 35Filip tɔtoilɔ a yɛpɛlaa, i tɔtoo Ngewɔ gɔlɛi ji vulii ma, i Ngowili Yekpei hugɛ kɔlooni Yesu ma. 36Kia ti lini sie a pelei, ti foeilɔ hinda yila njɛi i na, kɛ kenɛi i ndenga yɛ, “Njɛi gbe. Gbɔɔ na a nya wualei hunyani?” [ 37Filip ndeilɔ ngi ma yɛ, “Nga bi wualɔ ina bi langɔe a Ngowili Yekpei a bi lii gbi.” Kenɛi poteilɔ yɛ, “Nya langɔe la, nya langɔe la kɛ Ngewɔ Hindoloi mia a Yesu Kristi”]
38Kɛ kenɛi i ndenga kongolo jiamɔi ma yɛ i pie kongoloi i lo; kɛ kenɛi tia Filip veenjɔɔ ti hitɛnga ti yei njɛi hu, Filip i ngi wua. 39Kia ti gbuani njɛi hu, Ngewɔ Yafei i Filip gbuɛilɔ fulo yeehindei na. Kenɛi ii yaa ngi lɔni kɛɛ i liilɔ ngi yee ngi goohu nɛngɔ waa. 40Filip i ta yekpe lɔilɔ na lekee Ajotɔs tawao i jiɛilɔ tei kpɛlɛɛ hu a Ngowili Yekpei le nungeisia ma i lo hu i foo Siisaria.
Atualmente Selecionado:
TOBLEISIA TI WIEHINDEISIA 8: MENNT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Mende New Testament © The Bible Society of Sierra Leone, 2002.
