LUKA 19
19
Sakayo
1Kimong’ji anyun Jeriko ak kobun kwenut. 2Ak ogeero, chito ne kiguure Sakayo; ak ki ne o inendet eng’ taagikab aisurut, ak ki magorio. 3Ak kicheng’ei kole kogeer Jesu si konai kole ng’o inendet; ago kima imuch amu tuiyet, amu ki nwach. 4Ak kilabat kondo, kwo kolany mogoiywet si kogeer inendet: amu kinyo kosiirtoe oranato. 5Ak ye kingoit Jesu yoto, konyal ketoto, ak kolenji, Sakayo, choruge, chogu; amu kanyolja aru gong’ung’ ra. 6Ak kichok, kochorgei, ak kotaach inendet eng’ boiboindo. 7Ak ye kingogeer bichoto, kong’unyng’ung’so tugul, kole, Kawa kotebi eng’ gotab chito ne kiptengekyo. 8Ak kitonon Sakayo, ak kolenji Kiptaiyat, Keero, Kiptaiyandani, agochini kibananok kebebertab tugukyuk; ak ngo kiaibe chi age tugul kiy eng’ ng’alset, aweekyini konyil ang’wan. 9Ak kilenji Jesu, Kagonyo yetunet rani goi, amu weritab Abraham agine inendet. 10Amu kinyo Weritab chi kocheng’ ak kosor ne kiga kobet.
Kalewenet agobo fedaisiek
11Ak ye kingota kogasei ichek tuguchu, kotes komwa kalewenet, amu ki negit Jerusalem, ak kiibwati icheget kolen toogu bounatetab Jehovah ngunoto. 12Kimwa anyun kole, Kiwa chi anum ne toogunot emet ne loo, kwo konam bounatet kobunji, ak koweek. 13Yeityo koguur otwogikyik taman, ak kogochi fedaisiek taman, ak kolenji, Oboisie agoi tun aitu. 14Ago kiwech inendet bikab emennyi, koyokto ng’olyot kosube inendet, kole, Magimache chichi koboiywech.
15Ak ye kingoweek kogeny, ko kagonam bounatet, kong’at keguur otwogichoto, chu kiga kigochi fedaisiek, kobwa ole mi inendet, si kobiit konai che kinyor bichoto eng’ boisiet. 16Ak kinyo tainnyi chito ne bo tai, kole, Kiptaiyandani, kigonyor fedaiyandeng’ung’ fedaisiek alak taman. 17Ak kilenji inendet, Kiiyai ne mie, otwogindoni mie: amu kiiegu ne kiyani eng’ kit ne ming’in mising’, bou nganasok taman. 18Ak kinyo ne bo aeng’, kole, Kiptaiyandani, kigonyor fedaiyandeng’ung’ fedaisiek mut alak. 19Ak kilenji noto agine, Bou nganasok mut aginye.
20Ak kinyo age, kole, Kiptaiyandani, keero, ineni fedaiyandeng’ung’ ne kigaratyi anget ak agonor: 21amu kiaiywein, amu i chi ne kolgol: inemu ne kima inde ng’ony, ak igese che kima igol. 22Kolenji anyun inendet, Aruogun agobo ne kemwa eng’ kuting’ung’, otwogindoni ya. Kiingen ile a chi ne kolgol, anemu ne kima ande ng’ony, ak agese che kima agol; 23kilya anyun si mende fedaisiekyuk ole kiwalawale, ta kaanyoru ko kaitu koboto che kitesak? 24Ak kimwachi ichek che kitonondos eng’ ye negit, kolenji, Orebe inendet fedaiyat, ak ogochi inendet ne tinye fedaisiek taman. 25Ak kilenji ichek inendet, Kiptaiyandani, tinyei inendet fedaisiek taman. 26Amwawok ale, chi age tugul ne tinyei, kigochin; ago inendet ne matinyei, kerebe agot ne tinyei. 27Ago omutu anyun bunichuchuk kobwa yu, che machamei aboi, si obar eng’ tainnyu.
Kowendi Jesu Jerusalem kilosunoti
28Ak ye kiga komwa ko u noto, kwo kondo, kotogostoi Jerusalem. 29Ak ye kingo kagorikta Betpage ak Betania, eng’ tulwet ne kiguure tulwetab Emitik, koyokto aeng’ che bo alamalyennyi, 30kolenji, Oba agoi oit nganaset ne mi taing’wong’; ak ye oit ogeer moitab sigiriet ne ratat, ne tom kolany chi: otiach, ak ogetu. 31Ak ngo teebenak chi age tugul, kole, Kalya si otiach? Olenji anyun, Makyingei Kiptaiyat.
32Koba anyun che kaga kiyokto, ak konyor ko u ye kaga mwachi inendet ichek. 33Ak ye kita kotiachi moitab sigiriet, kolenji bikab kobo, Kalya si otiach moitab sigiriet? 34Ak kilenji, Makyingei Kiptiyat. 35Ak kiget konyo ole mi Jesu: yeityo koiito ngoroikwak eng’ moata bo sigiriet, ak koganapchi Jesu barak. 36Ak ye kiwendi, koiitoot ngoroikwak eng’ oret.
37Ak kingorikta tegeiyatab tulwetab Emitik, kotoi tuiyet tugul ne bo alamalyet koboiboitu ak kolos Jehovah eng’ kutit ne o agobo boisionik tugul che bo kamuktaet che kiga kogeer; 38kolen, Iberurot Laitoriat ne nyonei eng’ kainetab Kiptaiyat: kalyet eng’ kipsengwet, ak lilindo eng’ ole toror mising’.
39Ak kilenji Parisaik alage che bo tuiyet inendet, Konetindoni, ker kong’ alamalyeng’ung’. 40Ak kiwolji kolenji, Amwawok ale, ngot kosisyo chu, koboldos koik.
Korir jin Jesu Jerusalem
41Ak kingorik, kogeer nganaset ak korirji, 42kolen, Nda kengen eng’ betuni, agot inye, tuguk che bo kalyet! Ago nguno ko kagoung’ogis eng’ konyeguk. 43Amu tun bwanjinin betusiek che teechei buniguk irimet koyiemin komoswek tugul, ak kogerjin go eng’ komosta age tugul, 44ak kowirjin ng’ony, ak lagoguk che mi oring’ung’; ama bagagun agot koita agenge ne mi baragutab age; amu kima inai betutab rutochineng’ung’.
Kotilili Jesu hekalut
45Ak kiwa hekalut orit, ak kotoi koon komanda che kialdoisiei, 46kolenji ichek, Kigisir kele, Egu gonnyu gotab saet: ago kaoyai koek kebenetab rebik.
47Ak kiinetisiei betut age tugul eng’ hekalut. Ago kicheng’ tisiik che eechen ak sirik ak che toogunotin eng’ bik, kobar inendet: 48ak manyor kit ne kiimuchi koyai; amu kiepchin it bik tugul inendet mising’.
Atualmente Selecionado:
LUKA 19: BUKUIT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
God's word open for all
©Bible Society of Kenya, 2020
