LUKA 15
15
Kechiriet ne kibet
1Ak kirikyi inendet taagikab aisurut tugul ak kiptengeginik si kobiit kogas inendet. 2Ak kiing’unyng’ung’so Parisaik ak sirik, kole, Taachei chichi kiptengeginik, ak koamisiei tugul. 3Ak kimwachi ichek kalewenoni, kolenji, 4Ng’o chi eng’ okwek, ne tinyei kechirek bogol, ak ngobeet agenge eng’ choto, ko tos mabagaktoi choto tamanwogik sogol ak sogol eng’ surkwen, ak kwo kocheng’at noto kabet, agoi konyor? 5Ak ye kigonyor, konde tigikyennyi, ak kobaibait. 6Ak ye kagoit ga, koguur choronokyik koboto bikab kokwennyi koyumgei, ak kolenji, Ongeboiboitu tugul, amu kaanyoru kechiriennyu ne koga bet. 7Amwawok ale, egu ko u noto tun agine boiboiyet eng’ kipsengwet agobo kiptengekyot agenge ne kasik, ne siirei bik che bo iman tamanwogik sogol ak sogol, che mamage kiy sigunet.
Fedaiyat ne kbet
8Ng’o kobogoriot ne tinyei fedaisiek taman, ak ngobeet fedaiyat agenge, kotos mainaami tait ak kobuch got, ak kocheng’ mising’ agoi konyor? 9Ak ye kagonyor, koguur anyun choronokyik koboto bikab kokwennyi koyumgei ak kole, Ongeboiboitu tugul, amu kaanyoru fedaiyandennyu ne koga kobet. 10U noto anyun, amwawok ale, mi boiboiyet eng’ taitab malaikaisiekab Jehovah eng’ kiptengekyot agenge ne kasik.
Werit ne kibetot
11Ak kimwa kole, Kimi chi anum ne kitinyei werik aeng’: 12ak kilenji werit ne ming’in kwandanyi, Aba, kona tuguk che ka tatun bunjina. Ak kipchechi ichek tugukyik. 13Ak kingobata betusiek che matia koyum weroto ming’in tugukyik tugul, ak kwo emet ne loo; kwo koserser eng’ oloto tugukyik eng’ atepto ne ya. 14Ak kingo kagogesta tugul, konyo rubet ne o emonoto; kotoi anyun kobanan. 15Ak kiwa kogakta chito age ne bo emonoto; ak kiiyokto kwo koyaga torok eng’ mbaret. 16Ak kimachei mising’ kole kobiyo metetek che kiamei torok: amu ma igochi chi kiy. 17Ak kingobwat, komwa kole, Tia otwogik che bo baba che tinyei amitwogik che yamei kot kosiir, ago ane, ko kabara rubo eng’ yu! 18Ang’eete ak awe oldab baba, alenji, Baba, kiachalwogenji kipsengwet ak kiachalwogen eng’ taing’ung’: 19ma ko nyoljina kota keguurena wering’ung’: ingaek ko u age eng’ otwogiguk. 20King’eet anyun kwo oldab kwandanyi. Ago, ye kita komi ole loo, kogeer inendet kwandanyi, ak korire inendet, ak kilabat kwo kosuub kaatit, ak kong’utut.
21Ak kilenji werit, Baba, kiachalwogenji kipsengwet, ak kiachalwogen eng’ taing’ung’: ma ko nyoljina kota keguurena wering’ung’. 22Ago kilenji kwanda otwogikyik, Oibu ochogune ngoriet ne kararan ne siirei tugul, ak olaakyi; ak ondechi peteit mornennyi, ak olaakyi kweonik: 23ak ogetu moita ne nerat, ak oeny, si keam, ak keboiboitu: 24amu werinnyu ni, ne kiga kome, ago kagosob kogeny; kiga kobet, ak kagobiit. Kitoi anyun koboiboitu.
25Ak kimi werinnyi ne o mbar: ak kingorik ye negit got, kogas cheetab tiendo ak ureriet. 26Ak kiguur age eng’ otwogik, ak koteebe kole, nee tuguchu. 27Ak kilenji, Kagoit ng’etab komet; ak kagoeng’ji kwandang’ung’ moita ne nerat, amu kagotaach inendet kochamegei. 28Ago kinerech, ak kiesio kwo go: ak kimong’ sang’ kwandanyi, kogaigai. 29Ago kiwolji kwandanyi kolenji, Keero, kiaotin eng’ kenyisiechu chang’, ama abut ng’atutieng’ung’: ak kima igona arua, si keboiboitu ak choronokyuk: 30ago ye kangonyo weritang’ung’et, ne kigoam tuguguk ak chepkugonik, ieng’ji anyun moita ne nerat. 31Ak kilenji, Weri, kimi tuwai kotugul, ak tugukyuk tugul ko cheguk. 32Ago kanyolu keboiboitu ak kigasge: amu kiga kome weri otupche, ago kagosob kogeny; kiga kobet, ago kagobiit.
Atualmente Selecionado:
LUKA 15: BUKUIT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
God's word open for all
©Bible Society of Kenya, 2020
