Johane 4
4
Mahungu ya Jesu ma vbohide Samariya
1Vafarisi va pwide mahungu nya gupwani Jesu a ngu mana vapizane nya vangi ni gu bhapatisa guvbindra Johane. 2Ambari a nga bani a siri Jesu abune a nga bani a gu bhapatisa, aholu vapizane vaye. 3Na pwide mahungu yoyo a di khuga Judheya a guya nyaluphye tigoni ga Galileya. 4Gu di vbwetega guvbindra khu Samariya. 5#Wona gambe: Gen 33:19; Jos 24:32. A di vboha dhoropani nya gukari ga Samariya, gu ranwago Sikari, vbafuvbi ni gipeto gile Jakobe a nga ningago mwanaye Josefe. 6Avbo wu nga bani wu romo nambo wa Jakobe. Na garade khu ndzila, Jesu a di khala bambe nya nambo. Gu diri mihani gikhati nya midiya.
7A di vboha nyamayi moyo nya Musamariya, ata rega mati, Jesu a di mu lomba, khuye: “Nga nyivba mati nyi sela.” 8Vapizane vaye, va di hongode dhoropani vaya renga guhodza. 9#Wona gambe: Ezek 4:1-5; Neh 4:1-2. Nyamayi a di mu phindrula, khuye: “Khu ginani uwe nuri Mujudha u nyi lombago mati eni nyi gu Musamariya?” Kholu Vajudha va di si pwanani ni Vasamariya. 10Jesu a di mu hakha, khuye: “Nari pwani u ngu wuti wuhigo wa Nungungulu ni oyu a gukhuye: ‘Nyivbe mati nyi sele’, uwe khuwe u nga vbweta gu mu lomba, uye na gu ninga mati nya guvbanye.” 11Nyamayi a di khuye: “Pfhumu, u mwalo purumwa, nari gu nambo khongolo; ayo mati uma thulago nya guvbanye wa gu ma mana hayi? 12Ina kamwe uwe u khongolo guvbindra babe wathu Jakobe, a nga hi ningago nambo yoyu, a gu umo a nga bani a gu rega nuye mati, a sela gumogo ni sanana ni sifuyo saye, gani?” 13Jesu a di hakha, khuye: “Oyu a selago mati yaya a napwa gambe lidora; 14gasi oyu a selago mati nyi na mu ningago gima kha napwa gambe lidora, ma na mu gira gifefe nya mati nya guvbanye nya gupindruge.” 15Nyamayi a di khuye: “Pfhumu, nyivbe mati yoyo, gasi nyi sipwi gambe lidora, nyi si bweleli gambe avba nyita rega.” 16Jesu a di mu embela, khuye: “Indra rana mwama wago u wuya naye.” 17Nyamayi a di phindrula, khuye: “Nyi mwalo mwama.” Jesu a gu hakha, khuye: “U ganede gwadi gukhuwe u mwalo mwama, 18kholu u gimbide ni livbandre vama; ni oyu u gu naye olu khandri wago. Khu kharato u ganede lisine.”
19Nyamayi a di mu embela, khuye: “Pfhumu, nyi ngu wona gukheni u muprofeti. 20Vababe vathu va khozede gigomoni momu. Aholu enu mwari khenu gu vbwetega guya khozela Jerusalema.” 21Jesu a di mu embela, khuye: “Khodwa gwangu, nyamayi. Gi ngu vboha gikhati mu no khozelago Babe wangu nasiri gigomoni momu, mwendro saye Jerusalema. 22Enu mwa gu khozela igyo mu si gitigo, gasi ethu ha gu khozela igyo hi gitigo, kholu guvbanyiswa gwa guta khu ga Vajudha. 23Aholu, gi na vboha gikhati, kha nga gi vbohidego, avbo vakhozeli nya lisine va na khozelago Babe khu Liphuvbo ni lisine, kholu khavo vakhozeli va vbwetwago khu Babe. 24Nungungulu Liphuvbo, khu kharato, vakhozeli vaye gu vbwetega va mu khozela khu Liphuvbo ni lisine.”
25Nyamayi a di hakha, khuye: “Nyi ngu dziti nya gukheni Mesiya (a ranwago Kristo), a ngu vbweta gu vboha. Gikhati a na vbohago a nata hi tivisa satshavbo.” 26Jesu a di mu embela, khuye: “Kheni nyi ganelago nago.”
27Na varomo vbakari nya libhulo, va di vboha vapizane, va liwuga ngudzu khu gu mu mana na gu ganela ni nyamayi. Aholu, mwalo a nga tiya gu mu wudzisa, khuye: “Ginani u gi vbwetago?” Mwendro saye, khuye: “Khu ginani u ganelago naye?”
28Nyamayi a di diga khali yaye, a gu hongola dhoropani aya embela vathu, khuye: 29“Hongoleni muya wona mwama a nga nyi embela satshavbo nyi giridego. Ina khandri uye Kristo, gani?” 30Avo va di duga khu dhoropani gasi guya wona Jesu.
31Gasi vapizane va di gu mu gurumedza, khavo: “Hodza Rabi.” 32Aholu, uye a di va hakha, khuye: “Nyi na ni guhodza mu si gutigo.” 33Vapizane va di wudzisana khu gyawe, khavo: “Nari mani a nga mu reselago guhodza?” 34Jesu a di va embela, khuye: “Guhodza gwangu khu gu gira guhaladza ga wule a nga nyi rumelago ni gu gira mithumo yaye.
35“Ina kha mu tali guganela, khenu: Ndrani nya migima mina yi na vboha nango nya guvbwere, gani? Khu kharato, eni neni nyi ngu mi embelani, nya gukheni: Khusedzani maho mu wone: Dzimbewu dzi vidzidwe, dza guvbweta gu vbwerwa. 36Muvbweri phede gu hakha, gambe a ngu havela mihandro nya guvbanye gu si vbeligo, gasi muyali a tsaka gumogo ni muvbweri. 37Khidzo kharati ma tadzisegago magana yale nya gukhayo: Muyali khu muyali; muvbweri khu muvbweri. 38Nyi mi rumedeni guya vbwera iso mu ngamba si thuma; vomo va si thumidego, gasi enu mwa gu londrola tshivba yawe.”
39Vasamariya nya vangi va dhoropani mule va di khodwa gwaye khu kotani nya lito lile nyamayi a nga li ganelago, khuye: “A nyi embede satshavbo esi nyi giridego.” 40Khu kharato, gikhati va nga mu yela, va diya mu lomba gu a khale navo. A di khala navo matshigu mavili. 41Va na mu pwide, nya vangi ngudzu va di khodwa gwaye; 42va di embela nyamayi, khavo: “Olu kha hi khodwi khu kotani nya magana yago; hi diya khu gupwa habune; hi ngu dziti nya gukhethu uye khu lisine khuye Kristo Muvbanyisi nya litigo.”
Jesu a ngu vbanyisa gyanana gya ndruna
43Na ma vbindride matshigu mavili, a di khuga khu vbale aya Galileya. 44#Wona gambe: Mat 13:57; Mark 6:4; Luk 4:24. Uye mune Jesu a di ganede, khuye: “Muprofeti kha thedwi kota tigoni gwawe.” 45#Wona Joh 2:23. Na vbohide Galileya, a di hakhwa khu Vagalileya va nga bani va wone satshavbo iso a nga girago Jerusalema litshigu nya buzo, kholu avo navo va di hongode buzotunu.
46 #
Joh 2:11. Khavbo avbo, a di vboha nyaluphye tigoni ga Khanani gwa Galileya, iyo a nga vbindrugedza mati ma khala wadwa. Avbovbo, a diya mana mwama moyo a nga bani ari githumi nya mufumo, uye a diri ni gyanana gi nga bani gi dwala tigoni ga Kafarinawume. 47Na pwide gupwani Jesu vbohide Galileya, na guta khu Judheya, a di mu khinga aya mu lomba gu a hongole gaya gwaye aya hawulugisa mwanaye a nga bani a gu hadza gufa. 48Jesu a di mu embela, khuye: “Mwamba wonani siyeyedzo ni siliwugiso kha mu khodwi!” 49Mwama wule a di hakha, khuye: “Pfhumu, relela, na si gufi mwamana wangu.” 50Jesu a di mu embela, khuye: “Indra, mwanago a ngu vbanya.” Mwama wule a di khodwa khu magana ya Jesu, a gu hongola. 51Ndzilani a di manana ni sithumi saye si nga bani si gu mu landra, khiso: “Mwanago vbanyide.” 52A di va wudzisa, khuye: “Gikhati muni a nga girago tshukwana?” Va di mu hakha, khavo: “Vbanova, ni mihani omu nya gikhati nya guhegule nya silambo, khavbo a nga khalago tshukwana.” 53Babe wule a di wona nya gukhuye khigyo kamwe gikhati gile Jesu a nga khuye: “Mwanago a ngu vbanya.” A di khodwa uye ni vatshavbo va ndrangani gwaye.
54Khigyo egi giliwugiso nya wuvili a nga girago Jesu, gikhati a nga wuyago khu Judheya ata Galileya.
Atualmente Selecionado:
Johane 4: BGE2014
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
A Bíblia em Gitonga © Bible Society in Mozambique, 2014.
