Luka 24

Guwuga ni gu gwela ga Jesu Ndzadzini

(Matewu 28:1-10; Marko 16:1-8; Johane 20:1-10)

1Litshigu nya guhegule nya semana, ni mambagugya, vanyamayi vale va di hongola thowotunu ni mafura va nga bani va dongisede. 2Va diya mana giwindri na gi rindrividzidwe hwindzo ni lithowo; 3va di bela, aholu kha va mana girumbi gya Pfhumu Jesu. 4Na va nga gu liwuga esi, va di tumbulugedwa khu vama vavili na va ambade dzingandzu nya gungangamele. 5Kha nga ulo va nga bani va tsitside dzithamo khu hwanga, vama vale va di va embela, khavo: “Khu ginani mu vbwetago vbakari nya va nya gufa uye a vbanyago? 6Mwalo avba, wugide! Dundrugani iso a nga mi embela na nga romo Galileya, khuye: 7#Wona gambe: Mat 16:21; 17:22-23; 20:18-19; Mark 8:31; 9:31; 10:33-34; Luk 9:22; 18:31-33. Mwamana wa Muthu emede gu ningedwa mandzani nya sighohi si mu khokhothela, aholu khu litshigu nya wuraru a na wuga.”

8Khavbo avbo, vanyamayi va di dundruga magana yaye. 9Na va wide khu thowotunu, va diya tivisa satshavbo sesi ga vapostoli vatshavbo vale nya likhumi na moyo ni ga vatshavbo vambe va nga bani vari navo. 10Vanyamayi vava a diri Mariya wa Madhalene, Jowana ni Mariya, mayi wa Jakobe. Vambe vanyamayi va nga bani vari navo, va di fakaza navo silo sesi ga vapostoli. 11Aholu vapostoli kha va nga khodwa khu magana yawe, va di ma wona kha nga milotelote. 12Ambari ulo, Pedro a di hongola thowotunu khu mazambo. Na nogide a holela, a di wona basi sidzingelo. A di wuya gaya, na gu liwuga iso si nga dugelelago.

Jesu a ngu gimbila ni vapizane ndzilani ga Emawusi

(Marko 16:12-13)

13Litshigu lolo la limwedo, vavili vawe va di phara ndzila nya guhongole talalani nya gupwani Emawusi, gu nga bani gu khalela gipimo nya likhumi dzikilometro vbavbandze ga Jerusalema. 14Va di gu bhula khu esi satshavbo si nga dugelelago. 15Na varomo vbakari nya libhulo ni gu ganedzisana, Jesu a di gimbidzisa aya va manela, a gu longoloka navo. 16Aholu maho yawe ma di segegide va si mu tuguli.

17A di va wudzisa, khuye: “Libhulo muni ilolo mu gu nalo vbakari nya ndzila?” Va di ema, na va tade khu wusiwana. 18Khavbo avbo, moyo wawe, nya gupwani khu Keleyofasi, a di hakha, khuye: “Ina khuwe basi u gu pfhumba, u hangwago khiso si nga dugelela tigoni momu ga Jerusalema matshigu yaya, gani?” 19Jesu a di va wudzisa, khuye: “Gasi ginani gi nga giregago?” Va di mu embela, khavo: “Iso si nga dugelelago Jesu wa Nazareta, muprofeti nya sigiro ni magana nya tshivba mahoni ga Nungungulu ni mahoni nya vathu vatshavbo. 20Idzo a nga ningedwago khidzo khu vakhongolo nya vaphasi nya mhamba ni vathangeli vathu a songwa, vaya khu gu mu khokhothela vbagihambanotunu. 21Hi di khethu mwendro khuye a natago ata vbanyisa Israyeli, aholu eli khu litshigu nya wuraru hwane nya gu bani si dugelede satshavbo sesi. 22Vomo vanyamayi nya gikwata gyathu va ngata hi thusa, kholu va diya thowotunu, ni mambagugya; 23na va yide vaya hamuga girumbi gyaye, va di wuya vata khavo va di tumbulugedwa khu dzingilozi dzi nga va embelago khidzo a ngu vbanya. 24Khavbo avbo, vambe va na gyathu va di hongola thowotunu vaya mana satshavbo kha nga idzo vanyamayi vale va nga bani va ganede khidzo. Aholu, uye wutumbu, kha va mu wona.”

25Khavbo avbo, Jesu a di va embela, khuye: “Mapeminu, nya mihungo nya gulemele, mu si vbiredzeligo gu khodwa khu satshavbo si nga ganedwago khu vaprofeti! 26Gasi Kristo a di si emeli gu saniseka, afela gu bela wudhumoni gwaye, gani?” 27Khavbo avbo, a di va tshamusela milowo yatshavbo yi nga bani yi ganela khu uye, guphela khu Mosi kala gu vbedza vaprofeti vatshavbo.

28Na va gu vboha talalani va nga bani va gu hongola umo, a di gira gu khwatshi a gu vbweta guvbindra. 29Gasi avo va di mu khadzisa, khavo: “Khala ni ethu, kholu lidambo li hwidwe, wutshigu wu nguya na wu hidzimela.” A di bela, gasi guya khala navo. 30Na khade vbamezatunu, a di dzega gibaba, a gi kategisa, a gi kabanisa, a va ninga. 31Khavbo avbo, maho yawe ma di tulega, va mu tugula; aholu uye a di mwalalega mahoni gwawe. 32Va di phela gu embeledzelana, khavo: “Ina kha ha nga bani hi pwa myonyo yathu na yi dzura gikhati a nga bani a gu ganela ni ethu ndzilani, a hi tshamusela Milowo, gani?”

33Va di bwelela khu guvbiredza va hongola Jerusalema, iyo va ngaya manago vale nya likhumi na moyo vapostoli ni vangana vawe na vari danga mwedo, 34avo va di va embela, khavo: “Khu lisine Pfhumu wugide! A dzi wonegiside ga Simoni!” 35Avo navo va di ya va tivisa, iso si nga va dugelelago ndzilani, ni idzo Jesu a nga dzi wonegisago khidzo vbagupilatunu nya gibaba.

Jesu a ngu dzi wonegisa ga vapostoli nya likhumi na moyo

(Matewu 28:16-20; Marko 16:14-18; Johane 20:19-23; Mithumo 1:6-8)

36Na va nga guganela esi, Jesu a di dzi wonegisa vbakari gwawe, a gu va embela, khuye: “Gurula gu na khale ni enu!” 37Na va tade khu guthuruga ni hwanga, va di pimisa nya gukhavo githusa va gi wonago. 38Aholu a di va embela, khuye: “Mwa gu thavela ginani? Khu ginani mu gu ni gukanakana gogo myonyoni gwanu? 39Khedzani mandza yangu ni migondro yangu. Kheni kamwe. Nyi phareni; dzitini nya gukhenu githusa gi mwalo nyama ni marambo kha nga esi mu si wonago khenu nyi naso.”

40Na gu ganela esi, a di va yeyedza mandza ni migondro. 41Kha nga ulo va nga bani vari vbakari nya guliwuge ni gukanakana, khu kotani nya gunengele, Jesu a di va wudzisa, khuye: “Mu na ni gilo nya guhodze avbovbo, gani?” 42Va di mu ninga gipandre nya ndzandzi nya guvawudwe. 43A di dzega a gu hodza mahoni gwawe.

44Khavbo avbo, a di va embela, khuye: “Khayo aya magana nyi nga mi embelani na nyi ngari nanu, gikhati nyi nga, kheni: Womo fanelo nya gutadzisege satshavbo si nga lowago khu Mosi, khu Vaprofeti ni Dzindzimo, na si gu ganela khu eni.”

45Khu vbale, a di va tula mapimo, gasi va pime Milowo, 46#Wona gambe: Isa 53:1-12; Hos 6:2. a gu va embela, khuye: “Gu lovidwe pwani Kristo emedwe khu gusaniseka, aholu khu litshigu nya wuraru a na wuga khu ga vafudego; 47ni gupwani, khu lina laye, gu na hevbudzwa mayigoni gwatshavbo gu vbindrugedza mavbanyelo ni tsetselelo nya sighoho, gukhugela Jerusalema. 48Enu mu dzifakazi nya silo sesi. 49#Wona gambe: Mith 1:4. Eni nyi na mi rumelani igyo nyi nga thembiswa khu Babe wangu. Aholu indra bani mu khala dhoropani kala mu gu hakha tshivba ya vbatshani.”

Gu gwela ga Jesu Ndzadzini

(Marko 16:19-20; Mithumo 1:9-11)

50Hwane nya matshigu, a di hongola navo Bhetaniya, na va vbohide, a di khusedza mandza a va kategisa. 51Na gu va kategisa, a di hambana navo, a gu khusega aya Ndzadzini. 52Gasi avo, na va mu khozede, va di bwelela Jerusalema na va tade khu gunengela. 53Va di khala gikhati gyatshavbo Nyumbani ga Nungungulu va gu rungudza Nungungulu.

Atualmente Selecionado:

Luka 24: BGG2014

Destaque

Copiar