Naanearü ügüchiga 15
15
Tupana rü Abráü̃maxã inaxuneta rü tá poraãcü nüxü̃ narüngü̃xẽxẽ
1Rü yemawena ga Abráü̃ rü Cori ya Tupana rü nanango̱xetüxẽxẽ rü namaxã nidexa rü ñanagürü nüxü̃: —¡Taxuca̱xma cumuü̃, Pa Abráü̃! Erü choma nixĩ i curü poxü̃ruxü̃. Rü ngẽma ngü̃xẽxẽ i tá cuxna chaxãxü̃ rü tá nataxüchi —ñanagürü.
2-3Natürü ga Abráü̃ rü Cori ya Tupanaxü̃ nangãxü̃ rü ñanagürü nüxü̃: —¿Ta̱xacüwa choxü̃́ name i ngẽma ngü̃xẽxẽ i chomaxã nüxü̃ quixuxü̃? Erü meama nüxü̃ cucua̱x nax nataxuxü̃ma ya chaune. Rü ngẽmaca̱x i ngẽma tá chowena nayaxuxü̃ i chorü ngẽmaxü̃gü rü yimá chorü ngü̃xẽẽruxü̃ ya Eriéche ya Damácucüã̱x tá nixĩ —ñanagürü.
4Natürü nüma ga Tupana rü nanangãxü̃ rü ñanagürü: —Ngẽma tá cuwena nayaxuxü̃ i curü ngẽmaxü̃gü rü cunexüchi tá nixĩ rü tama wüxi i duü̃xü̃ i to i nachixü̃anecüã̱x ixĩxü̃ —ñanagürü.
5Rü ñu̱xũchi ga Cori ya Tupana rü düxétüwa Abráü̃xü̃ naga, rü ñanagürü nüxü̃: —¡Dücax, mea daxũgu nadawenü rü yaxugü ya ẽxtagü ega cuxü̃́ natauxchagu nax cuyaxugüxü̃! Rü ngẽxgumarüxü̃ tá ta nixĩ nax namuxü̃ i cutaagü —ñanagürü.
6Rü nüma ga Abráü̃ rü aixcüma nayaxõ ga yema Cori ya Tupanaarü ore, rü yemaca̱x nixĩ ga Tupana namaxã naxueguxü̃ nax aixcümacü yixĩxü̃.
7Rü Tupana rü ñanagürü nüxü̃: —Choma nixĩ i Cori ya Tupana chixĩxü̃. Rü choma nixĩ ga cuxü̃ íchamuxũchixü̃ ga Úrwa ga Cadéutanüxü̃güarü ĩanewa nax cuxna chanaxãxü̃ca̱x i ñaa naane nax guxü̃gutáma cuxrü yixĩxü̃ca̱x —ñanagürü.
8Rü yexguma ga Abráü̃ rü Cori ya Tupanaxü̃ nangãxü̃ rü ñanagürü: —¿Ñuxãcü tá nüxü̃ chacuáxü̃ nax aixcüma choxrü tá yixĩxü̃ i ñaa naane? —ñanagürü.
9Rü Tupana nanangãxü̃ rü ñanagürü: —¡Nua naga i naxü̃nagü i tomaepü̱xarü taunecüã̱xchigüxü̃ rü wüxi i woca i ngexü̃ rü wüxi i cabra rü wüxi i carnéru! ¡Rü nua naga ta i wüxi i muxtucu rü ñu̱xũchi wüxi i naxacü! —ñanagürü.
10Rü yexguma ga Abráü̃ rü yéma Tupanape̱xewa nanagagü ga guxü̃ma ga yema naxü̃nagü. Rü ngãxü̃gu nanadategü rü ñu̱xũchi nügügu nananga̱xgüchipanü. Natürü ga muxtucugü rü tama nanadategü.
11Rü yexguma ga yema ẽxchagü, rü ínarüxĩgü ga nax yangõ̱xgüãxü̃ca̱x, natürü ga Abráü̃ rü nüxü̃ naxãneta.
12Rü yexguma noxri nachütagu ga Abráü̃ rü yéma poraãcü nipeãchi. Rü ínapeyane, rü ngürüãchi wüxi ga waanexü̃ yexma nangu, rü yemaca̱x poraãcü namuü̃.
13Rü yexguma ga Cori ya Tupana rü ñanagürü nüxü̃: —Cumaxã nüxü̃ chixu rü ngẽma cutaagü rü to i nachixü̃anewa tá namaxẽ. Rü ngémacüã̱xgü rü tá norü puracütanüxü̃ nayaxĩgüxẽxẽ. Rü ngẽmaãcü tá chixri namaxã nachopetü i 400 ya taunecü.
14Natürü choma rü tá ta chanapoxcu i ngẽma nachixü̃anecüã̱xgü i chixri cutaagümaxã chopetüxü̃. Rü ngẽmawena rü tá íchananguxü̃xẽxẽ i cutaagü, rü tá namuarü ngẽmaxü̃ã̱xgü i ngẽxguma ngéma ínachoxü̃gu.
15Natürü i cuma rü tá mea curüyae, rü taãẽãcü tá cuyu nax ngẽmaãcü wüxiwa curü o̱xigümaxã cungexmaxü̃ca̱x.
16Rü ngẽxguma 400 ya taunecüguwena rü cutaagü rü tá ñaa naaneca̱x nawoegu. Erü ngẽma duü̃xü̃gü i Amoréutanüxü̃ i ñu̱xma ñaa naanegu ãchiü̃güxü̃ rü taxũta nangupetüxüchi i ngẽma norü chixexü̃ nax chanapoxcuexü̃ca̱x —ñanagürü ga Tupana.
17Rü yexguma marü nachütagu rü guxü̃wama naxẽanegu, rü ngürüãchi yéma nango̱x ga wüxi ga buetare ga üxüã́xü̃ ga yéma icaixquexü̃. Rü nango̱x ta ga wüxi ga omüema ga iyauraxü̃ ga yema naxü̃na ga dategüxü̃tanüwa gopetüemaxü̃.
18Tupana rü yematama ngunexü̃gu Abráü̃maxã inaxuneta rü ñanagürü nüxü̃: —Choma tá cutaagüna chanaxã i guxü̃ma i ñaa naane i Equítuanearü natüwa inaxügü rü ñu̱xmatáta ngẽma natü i Eufrátewa nangu.
19-21Rü ngẽma naanegü i tá nüxna chaxãxü̃ rü Quenéutanüxü̃arü naane, rü Quenétanüxü̃arü naane, rü Camunéutanüxü̃güarü naane, rü Itítanüxü̃güarü naane, rü Ferechéutanüxü̃güarü naane, rü Refátanüxü̃arü naane, rü Amoréutanüxü̃güarü naane, rü Canaáü̃tanüxü̃güarü naane, rü Guerguechéutanüxü̃arü naane rü Yebuchéutanüxü̃güarü naane tá nixĩ i ngẽma cutaagüna chaxãxü̃ —ñanagürü ga Tupana.
Atualmente Selecionado:
Naanearü ügüchiga 15: tcaP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2022, Wycliffe Bible Translators, Inc. All rights reserved.
