Naanearü ügüchiga 14
14
Abráü̃ rü Loxü̃ nayapu
1Rü yexguma Mamrégu naxãchiü̃gu ga Abráü̃, rü Amrapé rü ĩane ga Chináxarü ãẽ̱xgacü nixĩ, rü Arióx rü ĩane ga Eracháxarü ãẽ̱xgacü nixĩ, rü Queduraúme rü ĩane ga Eráü̃arü ãẽ̱xgacü nixĩ, rü Tidáx rü ĩane ga Goíü̃arü ãẽ̱xgacü nixĩ.
2Rü guxü̃ma ga yema ãẽ̱xgacügü rü nügü nadai namaxã ga Béra ga ĩane ga Chodómaarü ãẽ̱xgacü, rü Bícha ga ĩane ga Gomóraarü ãẽ̱xgacü, rü Chiná ga ĩane ga Axmáxarü ãẽ̱xgacü, rü Chemébex ga ĩane ga Cheboíü̃arü ãẽ̱xgacü, rü norü ãẽ̱xgacü ga ĩane ga Belá ga Chóagu ãégane.
3-4Rü yema 5 ga ãẽ̱xgacügü rü doxonexü̃ ga Chidíü̃gu ga Már ga Ngearü Maxü̃ã́xü̃ íngexmaxü̃gu nananutaque̱xegü ga norü churaragü nax yemaacü Queduraúmemaxã nügü nada̱i̱xü̃ca̱x. Yerü nüma ga Queduraúme rü 12 ga taunecü rü yema 5 ga ãẽ̱xgacügümaxã inacua̱x, natürü yexguma norü 13 ga taunecüwa nanguxgu rü naxme̱xwa nügü ínanguxü̃xẽẽchaü̃.
5Rü gumá taunecüwena rü nüma ga Queduraúme, rü ñu̱xũchi yema ãẽ̱xgacügü ga nawa ügüxü̃, rü Atarú Canaíü̃anewa naxĩ. Rü yexma nayadai ga Refátanüxü̃. Rü ñu̱xũchi Ámgu nayadai ga Chúxtanüxü̃ rü Chabé-quiriataíü̃gu nayadai ga Éntanüxü̃.
6Rü Cheíarü ma̱xpǘneanegu nayadai ga Oréutanüxü̃, rü ñu̱xũchi nawe nangegü ñu̱xmata nawa nangugü ga Paráü̃arü doonexü̃ ga taxúema íxãpataxü̃arü ngaicamawa yexmaxü̃.
7Rü yexguma nataeguxgu ga Queduraúme namaxã ga yema nawa ügüxü̃ ga ãẽ̱xgacügü, rü nawa nangugü ga guma ĩane ga En-michapáx ga Cadégu ta ãégane. Rü nanapuxü̃ ga guxü̃ma ga yema Amaréxtanüxü̃arü naane. Rü yexgumarüxü̃ ta nanapuxü̃ ga norü naane ga yema Amoréutanüxü̃ ga Achechóü̃-tamáanewa maxẽxü̃.
8-9Rü yexguma yema 5 ga ãẽ̱xgacügü ga Chodómaarü ãẽ̱xgacü, rü Gomóraarü ãẽ̱xgacü, rü Axmáxarü ãẽ̱xgacü, rü Cheboíü̃arü ãẽ̱xgacü, rü ñu̱xũchi Beláarü ãẽ̱xgacü rü Chidíü̃arü doxonewa naxĩ nax nügü nada̱i̱xü̃ca̱x namaxã ga yema 4 ga ãẽ̱xgacügü ga Queduraúme ga Eráü̃arü ãẽ̱xgacü, rü Tidáx ga Goíü̃arü ãẽ̱xgacü, rü Amrapé ga Chináxarü ãẽ̱xgacü, rü ñu̱xũchi Arióx ga Eracháxarü ãẽ̱xgacü.
10Natürü ga yema Chidíü̃arü doxonewa rü namu ga puchu ga o̱xwümaxã ixããcuxü̃. Rü yexguma nabuxmügu ga Chodómaarü ãẽ̱xgacü, rü Gomóraarü ãẽ̱xgacü rü gumá puchugu nayicu. Natürü ga yema togü ga ãẽ̱xgacügü ga namücügü ixĩgüxü̃ rü ma̱xpǘnegüwaama nabuxmü.
11Rü yema rüporamaegüxü̃ ga ãẽ̱xgacügü rü nayana ga guxü̃ma ga Chodóma rü Gomóracüã̱xgüarü nabü rü yemaxü̃gü. Rü yemaacü ínixĩ.
12Rü guma Abráü̃mágü ga Lox rü ta nayagagü wüxigu namaxã ga guxü̃ma ga norü yemaxü̃gü, yerü nüma rü ta Chodómagu naxãchiü̃.
13Natürü nayexma ga wüxi ga yatü ga iñaxü̃ rü Abráü̃ ga Ebréutanüxü̃ ixĩcümaxã nüxü̃ nayarüxu ga yema ngupetüxü̃. Rü nüma ga Abráü̃ rü Mamrééga Amoréutanüxü̃ ixĩcüarü castañanecügu naxãchiü̃ ga yexguma. Rü nüma ga Mamré rü Ecúxenexẽ rü Anéxenexẽ nixĩ. Rü nümagü rü Abráü̃étüwa naxügü.
14Rü yexguma Abráü̃ nüxü̃ cua̱xgu ga namágü ga Loxü̃ nax yayauxgüxü̃, rü nanaxĩtaque̱xexẽxẽ ga norü duü̃xü̃gü ga naxü̃tawa yaexü̃. Rü 318 ga yatügü nixĩ ga guxü̃wama. Rü yemamaxã inaxũãchi nax yema ãẽ̱xgacügüwe nax nangegüxü̃ca̱x. Rü ĩane ga Dáü̃gu nüxü̃ inayangau.
15Rü yemaarü chütaxü̃gu rü Abráü̃ rü norü duü̃xü̃gümaxã yema ãẽ̱xgacügüxü̃ ínayabaixgü. Rü nawe ningẽxü̃tanü ñu̱xmata ĩane ga Obá ga Damácuarü nórtewa yexmanewa nangugü.
16Rü nüxna nanapuxü̃ ga guxü̃ma ga yema yanaxü̃. Rü yemaacü ga Abráü̃ rü namágü ga Loxü̃ nayapu wüxigu namaxã ga guxü̃ma ga norü yemaxü̃gü. Rü yexgumarüxü̃ ta tüxü̃ napuxü̃ ga guxema ngexegü rü yema togü ga duü̃xü̃gü.
Melquichedéx rü mexü̃ Abráü̃maxã naxuegu
17Rü yexguma Abráü̃ taeguxgu nawena nax nüxü̃ naporamaexü̃ ga Queduraúme rü yema togü ga ãẽ̱xgacügü ga naxümücügü, rü nüma ga Chodómaarü ãẽ̱xgacü rü Chabéarü doxrae ga Ãẽ̱xgacüarü Doxraegu ãégaxü̃wa Abráü̃ca̱x yéma niña nax norü taãẽmaxã naya̱u̱xãxü̃ca̱x.
18Rü yexgumarüxü̃ ta ga Melquichedéx ga ĩane ga Charéü̃arü ãẽ̱xgacü ga Tupana ya Guxü̃étüwa Ngẽxmacüarü chacherdóte, rü yematama namawa Abráü̃na nanaxã ga paũ rü bínu.
19-20Rü ñaa oremaxã mexü̃ Abráü̃maxã naxuegu rü ñanagürü: —¡Tupana ya Guxü̃étüwa Ngẽxmacü i daxũguxü̃ i naanearü üruxü̃ rü ñoma i naanearü üruxü̃ rü poraãcü mexü̃ cuwa naxü̱x! ¡Rü namecümaxüchi ya Tupana ya Guxü̃étüwa Ngẽxmacü ya curü uanügüxü̃ cuxü̃ rüporamaexẽẽcü! —ñanagürü. Rü yexguma ga Abráü̃ rü Melquichedéxna nanaxã ga norü diésmu natanüwa ga yema yemaxü̃gü ga napuxü̃xü̃.
21Rü yexguma ga gumá Chodómaarü ãẽ̱xgacü rü Abráü̃xü̃ ñanagürü: —¡Choxna namugü i ngẽma chorü duü̃xü̃gü, natürü ngẽma ngẽmaxü̃gü rü cuxrüxü̃ yixĩ! —ñanagürü.
22-23Natürü ga Abráü̃ rü nanangãxü̃ rü ñanagürü: —Choma rü marü Cori ya Tupana ya Guxü̃étüwa Ngẽxmacü i daxũguxü̃ i naanearü üruxü̃ rü ñoma i naanearü üruü̃maxã nüxü̃ chixu rü taxuxü̃táma i ta̱xacü choxrüxü̃ chayaxu i ngẽma cuxrü ixĩxü̃, rü bai ya wüxi ya tünüta, rü bai i wüxi i chapatutü̱xü, nax tagutáma choxü̃ quixuxü̃ca̱x nax cugagu yixĩxü̃ nax chamuarü ngẽmaxü̃ã́xü̃.
24Rü choma rü taxuxü̃ma chanaxwa̱xe nax choxrü yixĩxü̃. Rü ngẽma marü chorü duü̃xü̃gü ngõ̱xgüxü̃xica nixĩ i ngẽma chayaxuxü̃. Natürü ngẽma yatügü i choxü̃ íxümücügüxü̃ i Anéx, rü Ecú, rü Mamré rü tá nanayauxgü i ngẽma nüma nanaxwa̱xegüxü̃ —ñanagürü.
Atualmente Selecionado:
Naanearü ügüchiga 14: tcaP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2022, Wycliffe Bible Translators, Inc. All rights reserved.
