ILOOWALI 5
5
Wali mai lei Adamu
(Boh. Taw. 1:1-4)
1Uti-utieelo daputali lowali mai lei Adamu. [Tou̒ Allahu Taa̒ala lopowali mai manusia, pilopowali-Lio timongolio debo odelo Allahu Taa̒ala lohihilao. 2Pilopowali-Lio mai timongolio talolai̒ wau taabua. Bilalakatia-Lio timongolio wau iluntee-Lio timongolio “Manusia”.] 3Tou̒ tei Adamu o umulu ngohetuto tolopulu lotaunu, tio loo̒tapu walao̒ talolai̒ u mohaamawa wolo batangalio, tulusi yilohialio tanggula Set. 4Lapatao̒ uito tei Adamu donggo tilumumula mola walu lohetuto taunu wau donggo loo̒tapu mai mongo walao̒ wewo. 5Tio yilate to umulu tio lohetuto tolo pulu lotaunu.
6Tou̒ tei Set o umulu ngohetuto limo lotaunu, tio loo̒tapu walao̒ talolai̒ tanggulio Enos. 7Lapatao̒ uito tei Set donggo tilumumula mola walu lohetuto pitu lotaunu wau donggo loo̒tapu mai mongo walao̒ wewo. 8Tio yilate to umulu tio lohetuto mopulaa dulo taunu.
9Tou̒ tei Enos o umulu tio lopulu lotaunu, tio loo̒tapu walao̒ talolai̒, tanggulio Kenan. 10Lapatao̒ uito tei Enos donggo tilumumula mola walu lohetuto mopulaa limo lotaunu wau donggo loo̒tapu mai mongo walao̒ wewo. 11Tio yilate to umulu tio lohetuto limo lotaunu.
12Tou̒ tei Kenan o umulu pitu lopulu lotaunu, tio loo̒tapu mai walao̒ talolai̒, tanggulio Mahalaleel. 13Tei Kenan donggo tilumumula mola walu lohetuto wopato pulu lotaunu wau donggo loo̒tapu mongo walao̒ wewo. 14Tio yilate to umulu tio lohetuto mopulu lotaunu.
15Tou̒ tei Mahalaleel o umulu wolomo pulaa limo lotaunu, tio loo̒tapu walao̒ talolai̒, tanggulio Yared. 16Lapatao̒ uito tei Mahalaleel donggo tilumumula mola walu lohetuto tolo pulu lotaunu wau donggo loo̒tapu mai mongo walao̒ wewo. 17Tio yilate to umulu walu lohetuto tio lopulaa limo lotaunu.
18Tou̒ tei Yared o umulu ngohetuto wolomo pulaa dulo taunu, tio loo̒tapu walao̒ talolai̒ tanggulio Heno. 19Lapatao̒ uito tei Yared donggo tilumumula mola walu lohetuto taunu wau donggo loo̒tapu mai mongo walao̒ wewo. 20Tio yilate to umulu tio lohetuto wolomo pulaa dulo taunu.
21Tou̒ tei Heno o umulu wolomo pulaa limo lotaunu, tio loo̒tapu walao̒ talolai̒ tanggulio Metusala. 22Lapatao̒ uito tei Heno tilumumulo todelomo himbunga wolo Allahu Taa̒ala ngotilonggadu tolo hetuto taunu. Wau loo̒tapu mai mongo walao̒ wewo 23wau umululio loo̒oma tolo hetuto wolomo pulaa limo lotaunu. 24Sababu tei Heno laito tumu-tumulo modudulaa daa̒ wolo Allahu Taa̒ala, yi tio yilooli kalana hilamaa lo Allahu Taa̒ala.
25Tou̒ tei Metusala o umulu ngohetuto walu lopulaa pitu lotaunu, tio loo̒tapu walao̒ talolai̒, tanggulio Lame. 26Lapatao̒ uito tei Metusala donggo tilumumula mola pitu lohetuto walu lopulaa dulo taunu wau donggo loo̒tapu mai mongo walao̒ wewo. 27Tio yilate to umulu tio lohetuto wolomo pulaa tio lotaunu.
28Tou̒ tei Lame o umulu ngohetuto walu lopulaa dulo taunu, tio loo̒tapu mai walao̒ talolai̒. 29Tei Lame loloi̒ya, “Walao̒ botie mamoo̒ heelo tou̒ ito mokalaja tio̒opatea motolokela-kela huta u yilaa̒nati lo Eeya.” Kalana uito tei Lame lolanggulao̒ walao̒ boito Noho. 30Lapatao̒ uito tei Lame donggo tilimumula mola limo lo hetuto tio lopulaa limo lotaunu. Tio loo̒tapu mai mongo walao̒ wewo, 31wau yilate to umulu pitu lohetuto pitu lopulaa pitu lotaunu.
32Lapatao̒ tei Noho o umulu limo lohetuto lotaunu, tio loo̒tapu mai walao̒ mongo lolai̒ toulota, deu̒yito-yito tei Sem, Yapet wolei Hamu.
Atualmente Selecionado:
ILOOWALI 5: LAIGOR
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
