MAREKÙT 2

Ap eki esok wùt warek mene Yesùt en hagasike wene

(Mat.9:1-8; Luk.5:17-26)

1At Yesùt eki hamùlùgat o atoma welagaikesik he, hobuk o Kaperenagùm ki wagaike. Ki wagaikesik, ouma kisikomore, apùnì nen he:

“At ebe ouma werek o,” ìlùk ikenem inasuk holhukwa. 2Inasuk holìlùk he, apùnì inebe logolegat atogosi wagaukwa. Wagaukwama re, ouma peserogo re, seleponmakwe inom pese isikomo re, hano wene a'nogo yogoisasike. 3Yogoisikenem he, ap aike eki esok wùt warek motok welagaike mene ap inebe 4 en, e yerogo wolok Yesùt oba wagaukwa. 4Wolok wagaukwasik he, Yesùt oba wolok kuogolùk isukwa mene re, apùnì peserek en, nìkì'nogo ku heat agaikomo o tùm oba lagasukwasik, Yesùt ebe welagaike higit hogoat tùm talogo nen, ap eki esok wùt warek mene a'nogo alit nogo ìkì lagaike mene ba earogo pelakhesukwa. 5Atì'nogo pelakhesukwama, at Yesùt eileken hìlìk he, mel isike:

“Ap yì inetaùken an noba hìpìrethagasik en wolok wagaika hìgì,” ìlùk, eileken enagat isìlìk he, ap eki esok wùt Warek mene a'nogo mel yogosike:

“Naput e. Hat weak hagatì lagen mene re, an nen sagalogo legetsìgì o,” ìlùk yogosike. 6Atì'nogo yogosikomo, it ap Ala ane helal waganek esewerek mene aike atoma hùrek logolìk he, it-it ina'la nen he:

7“Ap yì wene ike atì, nahalok ike. Nit apùnì weak hagatì lago mene atì, it apùnì aike nen elok sagalogo legetsasak nogo? We, at Ala aligat en elok sagalogo legetsikerek meneat he, at yì nen Ala a'la meathìlìk etage weagathìlì'logo,” ìlùk ina'la akasukwa. 8Atì'nogo akasukwama, at Yesùt en it ina'la akasukwa mene enagat hùrisìlìk he, mel yogoisasike:

“Hit hina'la atì'nogo akìkì lagep atì nenahalok. 9An nen ap eki esok wùt warek mene yì, wene yogosusak he, se hake kì akegep.

Hat weak hagatì lagen mene atì arat sagalogo legetsìgì, ìlùk yogotì atì se hake mene yogotì akegep a? Ì a, at he,

Hebe melarìk he, halit talogo nogo ìkì lagen mene yì helalùk lan o, ìlùk yogosusak se hake akegep a. Lek o. Hebe melarìk lan, ìlùk yogosumo ekinat o. 10Ekin meneat he, an abat ta'lasi wagagi a'nogo kweangma yoma logolìk, apùnì yì weak tì weak hagatarek mene an nenat sagalogo legetsìkì logouagalùk, Ala nen esewerek hanhike mene atì hùthanuageip,” ìlùk yogoisasikesik, ap eki esok wùt warek mene a'nogo mel yogosike:

11“Hebe melarìk he, halit talogo nogo ìkì lagen mene arì helalùk he, haua lan o,” ìlùk lakhesike. 12Atì'nogo lakhesikomo re, ap a'nogo mel agaikesik he, aremnogoat alit a'nogo helalùk it apùnì amanogo obogat ineilhanem wùlìpike. Atì'nogo hagasikomo, it apùnì amanogo obogat en he, mel isukwa:

“Egi! Nayùk e. Nit yoma alebat apùnì aike nen yì'nogo aike hagatenem hogorek lek mene hagate yì nayùk e,” ìlùk Ala hogorasukwa.

Yesùt en Lewi ayoko hesikomo opolik lagaike wene

(Mat.9:9-13; Luk.5:27-32)

13Atì'nogo haga'lùk hobuk he, at Yesùt i yekelek a'nogo esakoma lagaike. Laganem he, apùnì logolek at oba atogosi lagaukwama re, wene yakùlisasike. 14Yakùlisalùk laga logolìk he, ap Alepeùt aput etage Lewi, kantor uang pemerintah hesik kìno ìlìk wanharek oba hùrek were'ma eileken hìlìk he,

“An nopolik eme o,” ìlùk yogosikomo melagaikesik he, opolik lagaike. 15Lagaikesik, at aua Yesùt eperak kisukwasik, apùnì apik, it ap uang pemerintah hesik kìno ìlìk wanhì lagaukwa mene aike inebe logolegat mel, it aike weak hagatì lagaukwa mene mel, Yesùt opolik lagaukwasi'mo nogo nen he, at Yesùt ebe mel, at agoromì ane wanhì lagaukwa mene amanogo mel, sùpùrùk nùogolùk hu'laganem, it inom nùogolùk hù'lagaukwaat. 16Atì'nogo niko were'ma, it ap Parisi Ala ane helal waganek inelu mene aike nen ineileken kelagisasukwa. It aike weak hagatì lagaukwa mene mel, it ap uang pemerintah hesik kìno ìlìk wanhì lagaukwa mene mel, Yesùt inom sùpùrùk nikenem ineileken kelagisìlìk, it ap Yesùt agoromì ane wanhì lagaukwa mene amanogo mel yogoisasukwa:

“At Yesùt ap uang pemerintah hesik kìno ìlìk wanharek mene mel, it aike weak hagatarek mene mel, inom omakima sùpùrùk nìlì'lùgì aroma nahalok,” ìlùk yogoisasukwa. 17Atì'nogo yogoisikenem he, at Yesùt asuk holhikesik he, mel yogoisasike:

“It apùnì inoba hano mene, loktet lak en hagarinabuagalùk inayoko housak nogo? Lek o. We, inoba ou werek halogat loktet lak inayoko housak o. Ati hak, an apùnì hano hagatarek mene inayoko heigìlùk wagagi hùk. We, apùnì weak hagatarek mene atì inayoko heigìlùk wagagi o,” ìlùk yogoisasike.

Sapan uogolùk sùpùrùk nìkì'lek welagaikarek wene

(Mat.9:14-17; Luk.5:33-39)

18Hobuk ineki aike sapùl he, at Yohanet agoromì ane wanhì lagaukwa mene mel, it ap Parisi mene inagoromì inane wanhì lagaukwa mene mel, sapan uogolùk he, sùpùrùk nìkì'lek welegat welagaukwa. Atì'nogo werek kolek, it apùnì he'nakìt Yesùt oba wagaukwasik he, mel yogosukwa:

“Yesùt. It Yohanet agoromì ane wìlì'lùgì mene ho, it ap Parisi mene inagoromì inane wìlì'lùgì mene ho, sapan uogolùk sùpùrùk nìkì'lek werek kolegat he, hat hagoromì hane wìlì'lùgì mene aroma nek he, atì'nogo hagatì'lek sùpùrùk nìlì'lùgì atì nahalok,” ìlùk yogosukwa. 19Atì'nogo yogosukwama, at Yesùt en he, mel yogoisasike:

“Ap aike agwe ìkìkì logolìk, at erùgì agaiya'lak inayoko hegein mene inom logolìk wam mel, sùpùrùk mel, nìkì'lek welegat logousak nogo? Lek o. Ap atì inom logolìk, atì'nogo nìkì'lek welegat logousak lek. 20Meneat he, ap atì erùgì agaiya'lak hisalùk ebe wolok logoin oba weregat o. Ati'nogo wolok lamo atem sat enek he, it atì ineki aike sùpùrùk nìkì'lek logogunat o,” ìlùk yogoisasike. 21Atì'nogo yogoisasikesik aike mel yogoisasike:

“Apùnì nen, su alep laberì'lùgì mene lìbìlaga halok, kain ket mene ba hìkìn katarek lek. Atì'nogo kato halok he, kain ket mene hesùmùrogo kìkì logolìk, su atì hùkoat lìbìlarìk lasak o. 22Ati hak, apùnì nen anggur eken herelogo amusu ket mene isoak wam ogat mene hageat hagarek mene a'la hinatarek lek. Atì'nogo hinato halok he, amusu atì nen isoak atì sup hogo re, amusu kesalogo alema'lagìk, isoak yekalagìk, inogo ìlùk he, anggur eken herelogo amusu ket mene isoak ket mene ba hinatarek o,” ìlùk yogoisasike.

Apùnì Yahuri mene Ala hesik welegat werek kolek, Yesùt agoromì gandum eken palogo nìlìk lagaukwa wene

(Mat.12:1-8; Luk.6:1-5)

23Apùnì Yahuri mene ineki sabìt oba Ala hesik welegat welagaikarek a'nogo ba aike sapùl he, at Yesùt ebe mel, agoromì ane wanhì lagaukwa mene amanogo mel, inom gandum yagokwe laga logolìk, agoromì nen gandum eken palìk palìk lagaukwa. 24Palìk lagaukwama re, it ap Parisi mene nen he, Yesùt mel yogosukwa:

“Lakhan! It yì nineki sabìt oba Ala hesik welegat logolìk he,

Atì'nogo hagasusak lek, ìlùk wene palek werek meneat ho, nahalok palìk wagaika,” ìlùk wene yogosukwa. 25Atì'nogo yogosukwama re, at Yesùt en mel yogoisasike:

“Ap Taùt agoromì opolik lagaukwa mene inom sùpùrùk inaik hesikomo ebe lek en he, at en hagasike mene Ala ane ba helal waganek a'nogo hit en etage salhì'lek welagep nogo? Etage salhesebat o. 26At Taùt en he, ap Abiatat it ap Ala esewerek mene inoe kain logolìk Ala awì wùrì'mo Ala hesik hagatenem oba kìlìk he, sùpùrùk horoti mene Ala hesik hisagarek mene yùgùnat nasak motok lek. We, it Ala esewerek mene enek nasak, ìlùk wene palek meneat he, at Taùt en nasikesik he, agoromì opolik lagaukwa mene amanogo wogisasikomo nasukwaat, ìlùk helal waganek werek a'nogo etage salhì'lek welagep nogo?” ìlùk yogoisasikesik wene aike mel yogoisasike:

27 # Kel.20:10 “Ala nen he:

Hineki sabìt oba an hesik welegat logoino,

isike atì re, wene atì esinetheìgìlùk inebe weinamerinapike hùk. We, apùnì inebe esinethisìlìk he,

Hineki sabìt oba an hesik welegat logoino, ìlùk inebe hesigat isike atì. 28Atì'nogo isike atì nen, nineki sabìt oba Ala hesik welegat welagorek atì, esewerek he, an abat ta'lasi wagagi nebe yìat o,” ìlùk yogoisasike.

Atualmente Selecionado:

MAREKÙT 2: LAIDNI

Destaque

Copiar