MATÌÙT 8
8
At Yesùt en ap aike henako hake inayùk mene were'ma ou hagasike wene
(Mrk.1:40-45; Luk.5:12-16)
1At Yesùt tom oba nen pi wagaikomo re, apùnì apik esa logolegat at opolik lagaukwa. 2Laganem he, ap aike oumo henako hake inayùk mene oba welagaike mene oba wagaikesik he, eitep awì yakhìlìk, mel yogosike:
“Yesùt noe. Hat en hano haga'nabigin akegen halok he, elok hano haga'nabusagat o,” ìlùk yogosike. 3Atì'nogo yogosikomo re, at Yesùt en ap a'nogo eki hakìlìk he,
“An nen hano hagathabigìlùk ìkì lagì. Halok he, hoba hano ame o,” ìlùk yogoto kolek aremnogoat oumo henako hake inayùk mene a'nogo motok lek arìk ebe hano agaike. 4Hano agaikomo re, at Yesùt en he, mel yogosike:
“Hat en he, Yesùt en tì'nogo haga'nape, ìlùk, apùnì aike motok yogoisagùn o. We, ap Ala esewerek mene nen eileken heoak en oba lìlìk mel haga'no o. At Musa nen, ìkì logolìk he,
Apùnì inoba hano arìk, Ala hesik tì'nogo hisasak o, ìlùk isike higit hogoat hisikenem hùtheoak en he, aike hisa lano o,” ìlùk yogosike.
Yesùt en ap tentara mene inoe atitigeke aike ou hagasike wene
(Luk.7:1-10)
5Atì'nogo yogo'lùk he, o Kaperenagùm kikenem he, ap tentara mene inoe kain aike Yesùt oba wagaikesik he, mel yogosike:
6“Noe! An natitigeke aike eki esok wat warek ouma weitek logolìk he, heinet apik warì'logo,” ìlùk yogosikomo, 7at Yesùt en he,
“An nen hano hagasi wesigin o,” ìlùk yogosikomo re, at ap tentara mene inoe kain a'nogo nen he, 8“Eige! Noe. An ap yekeregatma, hat an naua ki lasak mea o. Halok he, hebe ya nen hane nek healumo re, an natitigeke mene atì hano asigin o. 9An hogo re, nogogì kaintek inawe a'ma logolìk inane holhìk, nen, an nagoromì tentara mene nawe a'ma logolìk nane holhìk, hagatoresi'mo re, an nen, at aike
Lan o, ìlùk yogotì halok he, lagaregat. Nen aike,
Hat eme o, ìlùk yogotì halok he, wagaregat o. Nen, natitigeke aike,
Yì haga'no, yogotì halok he, hagateregat o,” ìlùk yogosikomo 10at Yesùt asuk holhikesik he, apùnì at opolik lagaukwa mene amanogo mel yogoisasike:
“Egi! Ap yì etaùken noba eberogoat hìpìrethike atì hake, it apùnì Isirael mene aike inetaùken atì'nogo hìpìrethikenem isìgìrek lek mene nayùk e, ìlùk eberogoat yogohisìgì o. 11“Nen, aike yì yogohisak. Apùnì inebe apik poloma nen, maloma nen, Ala awe a'ma kìlìk he, Aberaham ho, Isak ho, Yakùp ho, inom isago nùogolùk atogosi wesugun. 12Mene re, it apùnì Isirael mene atì re, o atoma irat esewerek asusak meneat he, eta'ma o mùm hikakse'ma atoma laksamo re, inaik hùnogo lì ago le ago motok logogun o,” ìlùk yogoisasike. 13Atì'nogo yogoisasikesik he, ap tentara mene inoe kain a'nogo mel yogosike:
“Hebe lan o. Hat hetaùken noba hìpìrethìlìk, ha'la nen he,
Tì'nogo hano haga'nesusak ìlùk akegen atì hagat haga'lasuak o,” ìlùk yogoto kolek aremnogoat he, atitigeke mene a'nogo oba hano asi lagaike.
He Peterùt eamal mel, apùnì he'nakìt mel, Yesùt en ou hagarinapike wene
(Mrk.1:29-34; Luk.4:38-41)
14Atì'nogo hagasikesik he, at Yesùt Peterùt aua lagaikesik hìthasike hùake, he Peterùt eamal oba agaken apik en he, weitek were'ma eileken hasike. 15Hìlìk he, eki at he atì eki ba hakasikomo re, oba agaken apik welagaike a'nogo lek agaike. Lek agaikomo, he a'nogo melagaikesik he, at Yesùt lebethìkì lagaike.
16Atì'nogo hagato kolek, o arat hìmaganekokwe agaikomo re, apùnì mokareke inoabùt weak mene ina'la kìlì'mo welagaukwa mene wogisek Yesùt oba wagaukwama re, at ane omake hesigat mokareke inoabùt weak mene ina'la kìlìk were'ma henogo wulaksìgìk, ou weak mene aike hagarinapìk, isike. 17#Yes.53:4 Atì'nogo hagasike atì re, at Yesaya Ala ane yogoisìkì lagaike mene a'nogo nen helal wanhì logolìk he:
“Nit yì ou tì ou wanhorek mene atì at en wanìk legetsìgìk, ninomame li'-lek arìk maben agorek mene atì haga'ninapìk, ike o,”
ìlùk isike atì higit hogoat hagasike atì.
Apùnì Yesùt opolik lagaikarek wene
(Luk.9:57-62)
18Apùnì apigat Yesùt eilhanem wagaukwama eileken yerisìlìk he, at agoromì ane wanhì lagaukwa mene amanogo mel yogoisasike:
“Nit so warogo i aik ìlì bakwe wùlìbi lùok o,” ìlùk yogoisasiko. 19Atì'nogo yogoisasikesik were'ma, it ap Ala ane helal waganek esewerek mene aike Yesùt oba wagaikesik he, mel yogosike:
“Noe. An he, hat komakwe lagen halok he, hopolik motok nìkì logogin o,” ìlùk yogosike. 20Atì'nogo yogosikomo, at Yesùt en he,
“Lo yeke atì re, awì wùrìk akola welagarek. Nen, sùe purogo nikerek mene atì, awì wùrìk welagaregat. Mene re, an abat ta'lasi wagagi atì nek he, nogo ìkì logousak oba nawì wùrìk he, motok lek o,” ìlùk yogosike. 21Atì'nogo yogosikomo re, ap at ane wanhì lagaukwa mene aike nen he, mel yogosike:
“Yesùt noe. An nopase wa'lagasik werek yìnaga tak kweangma sali lak en he, hat en,
Lan o, ìlùk yogonom o,” ìlùk yogosike. 22Atì'nogo yogosikomo, at Yesùt en he, mel yogosike:
“Heraksalùk he, an nopolik eme. Warek mene halok, it apunì inebe warek mene hake werek atoma nenat salinapì logouak o,” ìlùk yogosike.
Yesùt en i ha'labu apik mene hapuguthesike wene
(Mrk.4:35-41; Luk.8:22-25)
23Atì'nogo ìlùk he, at Yesùt ebe so a'la kisikomo re, at agoromì ane wanhì lagaukwa mene amanogo inomat kisukwa. 24Kisukwasik so a'la laganem he, sogoi aninirogo hunha wagaikomo i ha'labu nen so watì logolìk a'la yekeli kiko kolek, at Yesùt he, nogo ìkì lagaike. 25Nogo ikenem, agoromì era'lu wìrìk eluguthìkì logolìk he, mel yogosukwa:
“Yesùt. Nit i logoin yoma re, telninabumo re,” ìlùk yogosukwa. 26Atì'nogo yogosukwama, at Yesùt en he,
“Nenahalok hinayùk aga lagep? Hinetaùken an noba hìpìrìk logohùk yì rì!” ìlùk ane ìlìk ìlìk melagaikesik he, sogoi a'nogo mel, i ha'labu a'nogo mel,
“Habolok,” ìlùk wenagasikomo, abolok motok hapuk isike. 27Atì'nogo hagasikomo re, it agoromì ane wanhì lagaukwa mene amanogo nen hogoratì logolìk he, mel isukwa:
“Egi! Ap yì sa akegep. Sogoi mel, i ha'labu mel, at ane hologo lek aga atì nayùk e!” ìlùk hogorasukwa.
Ap inebe pìre ina'la mokareke inoabùt weak mene kìlìk were'ma Yesùt en henogo wulaksasike wene
(Mrk.5:1-20; Luk.8:26-39)
28Hobuk, i aik ìlì ba apùnì o Katara mene inaua wùlùpukwa hak he, it ap inebe pìre mene ina'la mokareke inoabùt weak mene kisikomo welagaukwa mene, apùnì warek hisagarek oba atoma nen Yesùt oba wagaukwa. It ap atì inoabùt motok weak en, apùnì it inayùk en kwe atìkwe motok laga lagaukwa lek meneat he, Yesùt wagaikomo re, oba wùlìbi wagaukwasik he, 29inane hùkorogoat mel yogosukwa:
“Ala aput yì. Hat en he, nit nìkì'nogo haga'ninabigìlùk wagen. Nit ninoasusak oba oan werek kolegat he, hat tak ninoasigìlùk wagen yoma rì!” ìlùk yogosukwa. 30Atì sat o atoma era'lu horogat wam motok apik inamisang wanhì lagaukwa. 31Wanho were'ma, mokareke inoabùt weak mene it ap inebe pìre aremnogo ina'la logolìk he, mel yogosukwa:
“Yesùt. Hat he, ninebe wulakhinagalùk halok be, wam apik inamisang wìlì'lùgì a'loma ina'la kalasi lagùkwe re, lakhinan o,” ìlùk inane lìok hogo yogosukwa. 32Atì'nogo yogosukwama re, at Yesùt en he,
“Halok he, lani o,” ìlùk yogoisasike. Yogoisasikomo, it mokareke inoabùt weak mene ap aremnogo ina'lakwe nen honogo wùlìbi lìlìk he, wam apik inamisang wanhì lagaukwa amanogo ina'la kalasi lagaukwama, wam amanogo motok heleleng hogo i kat oba nen lùrogo i yekele'ma kìlìk i motok lagaukwa. 33Atì'nogo lagaukwama re, it apùnì wam serogo welagaukwa mene inayùk arìk,
“Yì'nogo haga'laga o,” ìlùk yoko o kota humusek lagaukwasik he, it ap inebe pìre aremnogo inabok inomat pìlìngìrogo yogoisasukwa. 34Atì'nogo yogoisa lagaukwama re, it apùnì o atoma welagaukwa mene Yesùt ha Wagaukwasik he,
“Hat hebe o yoma logousak lek. Lasak o,” ìlùk inane lìok hogo yogosukwa.
Atualmente Selecionado:
MATÌÙT 8: LAIDNI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
