MATÌÙT 25
25
Wene hìlìmìkìrùgì inetaùken werek mene mel, lek mene mel, inoba lìrogo yogoisasike wene
1At Yesùt en atì'nogo yogoisasikesik he, wene aike mel yogoisasike:
“Ninopase Ala nen awe a'ma hisikere'ma atoma eperak higit he, hìlìmìkìrùgì inebe 10 nen lampu kìalogo wolok ap aike agwe ìkagalùk waganem elokoma lagaukwa atì hakeat o. 2It inebe 10 atì, 5 o'moko re, inetaùken werek. Nen, 5 o'moko re, inetaùken lek mene welagaukwa. 3It inetaùken lek mene atì lampu wolok lagaukwa meneat he, minyak lek aganem hesik aike hinago wolok lagì'lek. 4Nen, it inetaùken werek mene aremnogo nek he, lampu mel, sogoloak aike minyak hinago mel, wolok lagaukwa. 5Meneat he, at agwe ìkìke werek atì ebe wagì'lek motok abìak werek en he, it amanogo inebe obogat arat nogo ineil agaikomo atoma nogo isukwa. 6Atì'nogo nogo iko kolek, hùp pùlem it apùnì nen he,
Ap agwe ìkìke werek a'nogo ebe waga a'lì. Elokoma we'ni o, ìlùk, inane hùkorogo isukwama, 7it hìlìmìkìrùgì amanogo ineluk agaukwasik he, lampu agale agauak hagarogo kìalìk lagaukwa. 8It inetaùken lek mene amanogo nen, it inetaùken werek mene amanogo yogoisìkì logolìk he,
Lampu nit mene nogoilarì'logo. Halok he, minyak hit mene aike wo'nisanì o, ìlùk, kìno yogoisasukwama, 9it hìlìmìkìrùgì inetaùken werek mene amanogo nen he,
Lek o. Ato mìkìlogo hit wokhisìgìk, aike nit helìgìk, umo re, lek asigin o. Halok he, oko palì'lùgì ba atoma aike oko pala lani o, ìlùk yogoisasukwama, 10oko pala lagaukwama re, at ap agwe ìkìke werek mene a'nogo arat wagaikesik he, it inetaùken werek mene tegelogo hakìlìk welagaukwa mene amanogo inom pesta isago nùogolùk wogisek ouma kisikesik kwe yagasike. 11Kwe yagarogo kìlìk were'ma, it hìlìmìkìrùgì o'moko amanogo wagaukwasik he,
Nopase, nit kwe hù'nisan o, ìlùk yogosukwama, 12at en he,
Hit atì sanì. Hinebe an nokot o, ìlùk, eberogoat Yogohisìgì,” ìlùk yogoisasike. 13Yesùt en atì'nogo yogoisasikesik he,
“Atì hak, an wesigin atì, hit en,
O tì sat, jam tì ba wesigin, ìlùk, hinokot atì nen he, se'narek logolìk hinepe hebelogo logoino o,” ìlùk yogoisasike,
“Ap aike nen, uang ineki ba halak lagaike,” ìlùk, oba lìrogo yogoisasike wene
(Luk.19:11-27)
14At Yesùt en atì'nogo yogoisasikesik he, aike mel yogoisasike:
“Ala nen awe a'ma hisikere'ma atoma, eperak higit he, ap aike o walegat hùnogoma lagalùk ìkì logolìk, at atitigeke mene waisasikomo wagaukwama re, at agarok yì mene tì mene it hesogo logouagalùk ineki ba hùlùk lagaike atì hakeat o. 15It inoabùt palogo inebe lopok wogisasak higit hogoat wogisìlìk lagaike. Uang hùko emas mene ap aike 5.000 nen wogotìk, nen, ap aike 2.000 nen wogotìk, nen, ap aike 1.000 nen wogotìk, isike. Atì'nogo wogisalùk he, o hùnogoma walegat lagaike. 16Lagaikomo re, ap 5.000 nen wanhike mene a'nogo uang atì ba abarogo yì mene tì mene wanhì logolìk, hobuk 5.000 aike inom mangorogo hesike. 17Nen, ap aike 2.000 nen wanhike mene a'nogo atì'nogoat hobuk 2.000 aike inom mangorogo hesikeat. 18Meneat he, ap aike 1.000 nen wanhike mene a'nogo wolok lagaikesik he, uang oe kain mene atì kweang habulogo salogo hinakhei lagaike. 19Atì'nogo kweangma salhìlìk were'ma re, inoe a'nogo welagaikesik en hobuk wagaikesik,
Uang wogisìgì amanogo, it en hobuk mìren mangorata, ìlùk, waisasikomo wagaukwama re, 20ap uang 5.000 nen wanhike mene a'nogo hobuk 5.000 nenat mangoratike mene wolok wagaikesik he,
Noe. Hat en 5.000 nen wo'nesigin a'nogo re, lakhan. An nen hobuk 5.000 nen aike inomat oba mangorogo hìgìma yì o, ìlùk yogosikomo, 21at oe a'nogo nen he,
Nagot wa! Hano motok. Hat hoabùt hùpùn nogo nen he, higit hogo motok hagatì lagenma hìgì o. Hamùlùgat meneat he, wokhetì mene hùpùn hogo hesogo welagen atì nen he, hobuk motok apik hesogo logoinok ìlùk, menhagalìk wokhesigin o. An hoe na'la hai hakìkì lagì atì hak, neperagat nina'la hai hakùok en, ki me o, ìlùk yogosike. 22Atì'nogo yogosikesik were'ma, hobuk ap uang 2.000 nen wanhike mene a'nogo oba wagaikesik he,
Noe. Hat en 2.000 nen wo'nesigin a'nogo re, lakhan. An nen hobuk 2.000 nen aike inomat oba mangorogo hìgìma yì o, ìlùk yogosikomo, 23at oe a'nogo nen he,
Nagot wa! Hano motok. Hat hoabùt hùpùn nogo nen he, higit hogo hagatì lagenma hìgì o. Hamùlùgat wokhetì mene, hoabùt hùpùn hogo hesogo welagen atì nen he, hobuk motok apik hesogo logoinok en ìlùk, menhagalìk wokhesigin o. An hoe na'la hai hakìkì lagì atì hak, neperagat nina'la hai hakùok en, ki me o, ìlùk yogosike. 24Atì'nogo yogoisasikesik were'ma, ap aike uang 1.000 nen wanhike mene a'nogo oba wagaikesik he,
Noe. Hat he, hoabùt motok weak nogo nen he, it aike nen awì heik lakhaga meneat he, eken heki abusagat palìgìk, it aike awì yata meneat he, eken heki abusagat holhìk, egetek a'nogo re, an hoabùt nelu o. 25Atì'nogo hagatetek atì nen, an nayùk en he, uang hat mene 1.000 a'nogo kweang habulogo hinakhei lagi o. Wo'nesigin mene a'nogo ebe yì! Helan o, ìlùk yogosikomo, 26at oe a'nogo nen he,
Hat hoabùt motok weak haberalì weak mene yì rì! An nen he, it aike heik lakhagarek mene eken palìgìk, it aike yatarek mene eken holìgìk, ìgìrek noabùt atì hat heluat akìgì. 27Atì'nogo helu halok he, an nauang atì it apùnì aike uang hesogo logolìk abarogo, aike inom oba louk hogo hìlì'lùgì mene wogiselenma re, an napotkwe wìrìk he, nauang ebe mene mel, oba labelogo mangorarì'lùgì mene mel, hela wesuagalùk wogisaem hagaten, ìlùk yogosikesik he, 28-29at agoromì aike mel yogoisasike:
It apùnì aike inagarok warek mene atì, hobuk aike inom oba louk hogo wogisikenem inagarok apik haga'lasigin o. Nen, it aike inagarok lek mene hamùlùgat logogin mene atì inekimo nen telogo helogoin atì nen he, ap arì atì'nogo hagatesi'mo atì re, uang 1.000 atì ekimo nen telogo ap aike 10.000 wanhe mene arì wogo'ni o. 30Halok he, at ebe an natitigeke logousak lek mene yì re, eta'ma o motok mùmmo inaik hùnogo lì agìk, le agìk, egare'ma atoma wulaksani o, ìlùk yogoisasike,” ìlùk Yesùt en yogoisasike.
Apùnì inùkùl etage lopok ùkùm inoba hìgìk, ketìk, igin wene
31At Yesùt en atì'nogo yogoisasikesik he, wene aike mel yogoisasike:
“An abat ta'lasi wagagi a'nogo, apùnì nen hogo'napo kolek, it malaikat Ala nen pogot oba nen yoko pelaksa wagarek mene amanogo obogat ninom wìrìk, an hogo'napo kolek kain Netagepogot welagìrek oba logolìk, 32ap aike ako esewerek mene nen, topa wam halok alepma tegelogo hìgìk, kambing wam halok alepma tegelogo hìgìk, tegelinaperek atì hak, it malaikat atì nen apùnì inùkùl etage lopok an neilhanem atogorogo hisa waganem he, an nen atì'nogoat tegelinabigin o. 33Tegelinapì logolìk he, it apùnì topa wam hake mene halok he, neki ebekwe hisìgìk, nen, kambing wam hake mene halok, neki peikkwe hisìgìk, igin o. 34-36Atì'nogo tegelogo hisìlìk he, an nebe Netagepogorat nogo nen he, it neki ebekwe hisegein mene atì, wene mel yogoisegein:
An nopase nen hanothinapomo welagep. Halok, we'ni o. An sùpùrùk nele were'ma hit en mela'netìk, i nele were'ma hit en wo'netìk, an ap pogat were'ma hit en wo'napìk, nasu labere'lek were'ma hit en labethanìk, ou warek were'ma hit en nea wagìk, neki hele warek were'ma nea wagìk, isigip atì nen he, an nopase nen pogot kweang oan elalhì'lek logolìk, hit kain hinetage pogot logouageip ìlùk, wenagasogo hikasike mene yì hela we'ni o, ìlùk yogoisikenem, 37it Ala ane hologo hagatì logogun mene atì nen he,
Egi, noe! Nit en hat sùpùrùk nele were'ma melakhetìk, i nele were'ma wokhetìk, isugu atì re, mera nen isugu nogo. 38Nen, hat ap pogat were'ma wokhapìk, hasu labere'lek were'ma labethagagìk, isugu atì, mera nen isugu nogo. 39Nen, hat ou warek were'ma, hea lagìk, heki hele warek were'ma, hea lagìk, isugu atì re, mera nen isugu nogo, ìlùk yogonetenem, 40an ap kain Netagepogot nogo nen he, it apùnì amanogo mel yogoisegein:
Hit en an nagoromì inetage lek mene aike were'ma atì'nogo hagarinapì lagagip atì, anat haga'napì lagagip o, ìlùk, eberogoat yogohisìgì, ìlùk yogoisegein.
41-43“Nen, it neki peikkwe hisegein mene atì mel yogoisegein:
An nopase nen hit homan hikike mene yì rì! An sùpùrùk nele were'ma, hit en mela'netì'lek, i nele were'ma, hit en wo'netì'lek, ap pok were'ma hit en wo'napì'lek, su labere'lek were'ma hit en aike labethanhì'lek, ou warek were'ma mel, neki hele warek were'ma mel, nea lagì'lek hagatì lagagip o. Halok he, an nopase nen, at Ibilit agoromì inebe apik inom, etu aik api'mo logouagalùk inobùlùk hisasikomo atoma hela lani o, ìlùk yogoisegein. 44Atì'nogo yogoisikenem, it en he,
Eige! Noe! Hat sùpùrùk nele were'ma, i nele were'ma, ap pogat were'ma, hasu laberek lek were'ma, ou warek were'ma, heki hele warek were'ma, o mera nen lebethììgì'lek kamo ìkì lagagu nogo, ìlùk, yogonetenem, 45an nen he,
Hit en apùnì aike inetage lek mene halolotsìkì lagagip atì re, anat halolothanhì lagagip o, ìlùk yogoisìlìk he, 46it apùnì atì yì aik tì aik hìkì logogun oba motok logouagalùk laksegein o. Meneat he, it Ala ane hologo hagatì logogun mene atì ineluk motok logogunmo atoma hisegein o,” ìlùk, yogoisasike.
Atualmente Selecionado:
MATÌÙT 25: LAIDNI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
