MATÌÙT 23
23
“It ap Ala ane helal waganek esewerek mene mel, ap Parisi mene mel, inoabùt waganogo hagatì logogùp,” ìlùk yogoisasike wene
(Mrk.12:38-40; Luk.11:37-54, 20:45-47)
1At Yesùt en atì'nogo yogoisasikesik he, hobuk apùnì apik atogorek welagaukwa mene amanogo mel, at ane wanhì lagaukwa mene amanogo mel, inom mel yogoisasike:
2“It ap Ala ane helal waganek esewerek mene mel, ap Parisi mene mel, inom en he, at Musa nen wene Ala nen ninasuk wasike wene a'nogo yogoisìkì lagaike atì hak, obùlù'mo re, it en yogohisìlì'lùgì atì nen he, 3it en yì mene tì mene hagasuagalùk yogohisiko halok he, atìat hesogo logolìk hagatì logoino o. Meneat he, it hagatì'lek logolìk, it en he,
Hit enek haga'ni, ìlùk yogohisìlì'lùgì atì re, it hagarì'lùgì atì hak inoabùt waganogo hagatì logogùp o. 4Sukwe ekin mene hele homagasogo inokawerek ineki hakahùk logolìk apùnì aike inomolo ba wanuagalùk yogoisagarek atì hak, it atì nen inokawerek hagatì'lek logolìgat, it aike nen hagasuagalùk wene ekin mene inoba hìlì'lùgì atì. 5It en yì hake tì hake hagarì'lùgì atì obogat he,
Apùnì nen ye'nisek logouak, ìlùk, ina'la akìkì logolìk hagarì'lùgì o. It en he,
Sapan ìkì lagì, ìlùk, Ala ane sùesika ba helal waganogo ineilha ba homatarek a'nogo, it en hùkorogo homatìk, su etakwe mene hùnogoat labetarek a'nogo, it en su o'lu uan hogo karogo labetìk, 6nen, apùnì pesta hùko isago nikenem, it ap kaintek hù'lagaikarek oba yegelogo hu'lagìk, o apùnì Yahurì mene sapan egarek oba atoma tùlem yegelogo hù'lasi kìgìk, 7apùnì nen,
Guru nopase, ìlùk hai warinapìk, pasar oko wanhare'ma atoma apùnì nen inane agauk hogo yogoisìgìk, ìkì logouagalùk atoma lagìk, ìkì logou walok welagaikarek atì. 8Meneat he, hit hinopase re, guru wene yakùlhisikerek mene omakeat enek werek atì nen he, hinerùgì hinagaiya'lak hinom higit halok, it aike nen,
Guru noe, ìlùk yogohisasak motok lek o. 9Nen, hinopase pogot oba mene omakeat welagarek atì nen he, ap kweangma mene aike yogotì logolìk,
Nopase, ìlùk yogosusak motok lek o. 10Nen, hinoe wene hinasuk watìrek he, an Karìsùt naligat halok he, it apùnì aike nen,
Kain noe, ìlùk, hit yogohisasak motok legat o. 11Halok he, hit ya re, sa nen aike kain werek halok, at atì hinatitigekeat asuak o. 12Ap sa nen okawerek en,
An kain, ìlùk melasigin halok he, Ala nen ebe sebek hogo inawe a'ma hegein o. Nen, at sa okawerek en it aike inawe a'ma negen logogin halok he, Ala nen ebe hesak hogo hegein o,” ìlùk yogoisasike. 13Atì'nogo yogoisasikesik he, it Ala ane helal waganek esewerek mene mel, Parisi mene mel, inom mel yogoisasike:
“Hit ap Ala ane helal waganek esewerek mene yì mel, hit Parisi mene yì mel, hinogat oba nek hano salek logolìk hinetaùken pìre mene yì rì! Hit atì apùnì Ala awe a'ma kinogo ìlùk he, hit enat kwe yagatì lagep yoma rì! Hit hinokawerek kìgì'lek logolìk he, it aike kuogolùk ikenem, hit en he,
Kusak lek o, ìlùk wene palhì lagep yoma rì! 14Hit ap Ala ane helal waganek esewerek mene mel, Parisi mene mel, hinogat oba nek hano salek hinetaùken pìre yì rì! Ala nen weagathinabigin o. Hit he, hìmì soge mene inawì wurìk mel, inagarok mel, sebelìkì logolìgat he, apùnì nen, inasuk holìk,
It hano, ìlùk akoagalùk sapan uan-aban lìthalùk lagasep atì'nogo hagatì'lek logoilepma re, Ala nen ùkùm hamùlùgat hinoba hìlìk logoilep. Mene re, atì'nogo hagatesep atì nen, ùkùm ekin mene hinoba hìlìk weagathinabigin o. 15Hit ap Ala ane helal waganek esewerek mene yì mel, hit Parisi mene yì mel, hinogat oba nek hano salek logolìk hinetaùken pìre mene yì rì! Hit hinane wanhì logouagalùk apùnì heraginabìk, i laut yekelek aik ìlì ba wùlìpìk, o yìi awì tì awì lagìk, nìkì lagep mene atì, Ala nen ùkùm hit hinoba hìlìk etu ai'mo atoma hikegein atì hake, it hinane holì'lùgì mene atì Ala nen ùkùm atì'nogoat eki pìre ba sirogo inoba houagalùk ìkì lagep atì nen, weagathinabigin o. 16Apùnì ineileken mùm mene nen it aike yogoisìkì logolìk,
Kwe yùkwe lùok! ìlùk u hak, hit en he,
Ala awì wùrìk etage hopuk palhep halok, atì se negen. Meneat he, emas Ala awì wùrì'mo welagarek mene atì nek, etage hopuk palumo re, eberogoat sage asusak lek o, ìlùk yogoisegesep atì kolo o! 17Hinetaùken motok lek logolìk hineileken mùm yoma rì! Kì mene esin akegep. Emas atì mene esin akegep a? Ala awì wùrìk atì nen, emas atì mene Ala hesik hesukwa mene, ìlùk, awì wurìk atìat esin akegep a. 18Hit en he, wene aike yì egesep:
Ala awì wùrì'mo yì mene tì mene e talek oba Ala hesik hisagarek oba, obùlùk etage hopuk palho halok he, se negen o. Mene re, Ala ebe hisagarek atì mene etage hopuk palho halok he, sùge asusak lek o, ìlùk yogoisegesep atì kolo o! 19Hineileken motok mùm yoma rì! Yì mene tì mene Ala hesik hisagarek atì esin akegep a? Ì a, at he, yì mene tì mene e talek atì ba hisagarek atì nen, Ala meneat o, ìlùk, egarek atì nen, e atì esin hake akegep a. 20Sa nen e talek yì mene tì mene Ala hesik hisagarek oba atì etage hopuk palho halok he, e talek ebe atì mel, yì mene tì mene oba hisagarek mene atì mel, lapuk hogo etage hopuk palì'logo o. 21Nen, sa nen Ala awi wùlrìk atì etage hopuk palho halok he, o wùrìk atì mel, Ala ebe o wùrìk esewerek welagarek atì mel, inomat etage hopuk palì'logo o. 22Nen, sa nen pogot etage hopuk palho halok he, Ala kain welagarek oba obùlùk atì mel, at ebe mel, inom at etage hopuk palì'logo o. Hit kolo ìkì lagep atì nen Ala nen Weagathinabigin o.
23“Hit ap Ala ane helal waganek esewerek mene mel, Parisi mene mel, hinogat oba nek hano salek logolìk hinetaùken pìre mene yì rì! Ala hesik hagatì logousak esin hake re, higit hogo hagatarek atì mel, apùnì aike inetaùken hutìk welagaikarek atì mel, inoabùt lenurogo welagaikarek atì mel, werek kolegat he, atì'nogo hagatì'lek logolìk, hit en labet eka hake mel, heite hake mel, su'li ka hake mel, hineki wenagasogo hinomolo ba asi waganem, omakeat aike Ala hesik hisìkì lagep atì hisasak meneat, wene ebe abelma mene atì hano hagatì lagep meneat he, wene esin mene hagatì'lek heraksìkì lagep atì kolo o! 24Apùnì ineileken mùm mene nen he, it aike yogoisìkì logolìk he,
Kwe yùkwe lùok, ìlùk u hak, hit en he, elugeke hamùlùk mene i hinagasogo hakegesep oba a'la kìlì'mo enagat hìlìk wulaksegesep meneat he, wam unta hùko mene hinaik sagalhì'lek haum hogo nìkì lagep atì nen, Ala nen weagathinabigin o.
25“Hit ap Ala ane helal waganek esewerek mene yì mel, Parisi mene mel, hinogat oba nek hano salek hinetaùken pìre mene yoma rì! Hinageisoak mel, hinapirìng mel, etakwe nek he, lorogo sobalhì lagep meneat he, a'lakwe re, apùnì inagarok hineki abusak helegesep mene atì inom,
An enek wo'ne'lep, ìlùk akegesep mene atì inom, motok peserek werek atì kolo o! 26Hit ap Parisi mene hineileken motok mùm mene yì rì! Hinageisoak atì eilemkwe tak hanorogo sobalino o. Atì'nogo hagatep halok he, etakwe elok sobalasiginat o. Hit kolo hagatì lagep atì nen Ala nen weagathinabigin o.
27“Hit ap Ala ane helal waganek esewerek mene mel, Parisi mene mel, hinogat oba nek hano salek hinetaùken pìre mene yì rì! Hit he, hinebe mel hake. Apùnì wa'lagaikarek mene kweangma salinaparek oba atoma etakwe nek he, motok tegelek lorek werek kolegat he, a'la re, apùnì inoak apen sìlìng-selongsek welagarek atì hake welagep o. 28Atì hak he, apùnì nen hit hinogat etakwe yì yethisikenem hano akìlì'lùgì meneat he, hinetaùken pìre logolìk, hina'la re, yì weak tì weak hagatesep atì mene motok peserek welagep atì nen Ala weagathinabigin o!
29“Hit ap Ala ane helal waganek esewerek mene mel, Parisi mene mel, hinogat oba nek hano salek hinetaùken pìre mene yì rì! Hit en he, ap alep Ala ane yogoisìkì lagaukwa mene inebe warek salinapukwa ba apoloba o wùrogo hisìgìk, it ap ebalep inoabùt higit hagatì lagaukwa mene warek salhisìlìk apùnì aike ina'la eberek logouogolùk hìbìl wanhì lagaukwa ba hobuk wanhì logolìk, hit en he,
30Nit ninebe yì re, it ninapu ninopalak ebalep welagaukwa atem ninom logoiloma re, nit ninom en he, it ap Ala ane yogoisìkì lagaukwa mene atì inoa'lo lek o, ìlùk, 31hinokawerek en ìkì lagep atì,
Nit ninebe re, it ap holoat Ala ane yogoisìkì lagaukwa mene nit ninapu ninopalak en inoasukwa atì nen tagokwe welago, ìlùk u hagat ìkì lagep o. 32Halok he, hinapu hinopalak ero ba nen hagatì lagaukwa atì hak, hit wùrep oba atì'nogoat hagarìkì logoni re! 33Hit walo nen tagokwe mene hinebe waloat welagep yoma rì! Apùnì Ala nen ùkùm inoba hìlìk etu aik api'mo laksikenem, hit hese wùlùbugun nogo? Mea o. 34Halok hinasuk hanorogo holini. An nen ap Ala ane yogoisagarek mene mel, ina'la kagalek mene mel, Ala ane helal waganek esewerek mene mel, laksa wesigin mene atì, hit en he'nakìt e ba menhisìlìk inoatìk, he'nakìt o hit sapan egesep obakwe kìlìk tùgì wiik-weak hogo inoatìk, he'nakìt mùk hogo mak hogo o kota aike nen o kota aike laksìgìk, hagarinabugun o. 35Atì halok he, it ap inoabùt higit hagatì lagaukwa mene, inamep wulagasogo inoarìk wagaukwa atì, hùlì ero Habel oabùt higit hogo hagatì lagaike mene oe nen wasike atì ba nen pìkìt, hùlì wùrep oba, at Perekiya aput Sakaria atì Ala awì wùrìk hokolek, Ala ako warogo etu loletì lagaukwa ba hokolek, tùlem wasigip atì hùlì, it obogat inamep hit hinoba lopok hineke ba werek o. 36Hit yogotak welagep mene yì re, ùkùm yì obogat hirat hinoba ekin logogin, ìlùk, eberogoat yogohisìgì o,” ìlùk yogoisasike.
Yesùt en apùnì o Yerusalem mene etawìrinapike wene
(Luk.13:34-35)
37At Yesùt en atì'nogo yogoisasikesik he, aike mel yogoisasike:
“Eigo! Hit apùnì o Yerusalem mene yì netawì lak e! Hit enat ap Ala ane yogoisagarek mene inebe inoatìk, ap Ala nen inayoko hìlìk laksa wagarek mene helep en tamuk-tamak hogo inoatìk, egesep atì netawì lak e. Sùe ayam eagwì ogolabi a'ma atogorogo hisikerek atì hak, an nen ninhùp-nanhùbat hit o yoma welagasep mene obogat atì'nogoat atogorogo hikagalùk ìlùk akìgìrek meneat he, hit en,
Ninabìt, egesep atì, netawì lak e. 38Atì nen he, Ala nen hit hinebe herakhikamo, hinawì wurìk atì somongat logogin o. 39#Mzm.118:26 Hùlì yogotak en he, an nebe hineileken nììgì'lek logopik en, hobuk hit en he,
Ninopase Etagepogot Ala nen lakhagei wagama wagen yì, at enat hanothabuak o,
ìlùk hobuk yogonesugun atì hùlì hineileken neogoin o,” ìlùk yogoisasike.
Atualmente Selecionado:
MATÌÙT 23: LAIDNI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
