MATÌÙT 15
15
“Hinapu hinopalak hagatì lagaukwa higit hogo hagatì lagep,” ìlùk yogoisasike wene
(Mrk.7:1-13)
1Atì'nogo hagato were'ma, it ap Parìsi mene he'nakìt mel, it ap Ala ane helal waganek esewerek mene he'nakìt mel, o Yerusalem en Yesùt oba wagaukwasik he, wene yì'nogo yogosukwa:
2“It ap hat hagoromì hane wìlì'lùgì mene yoma nen, ninapu ninopalak hagatì lagaukwa higit hogo hagatì'lek sagalogo heraksìlìk ineki bakwe horatì'lek sùpùrùk nìlì'lùgì atì nahalok,” ìlùk yogosukwa. 3Atì'nogo yogosukwama, at Yesùt en he,
“Halok he, hit hogo re, Ala nen,
Yì'nogo haga'no, tì'nogo haga'no, ìlùk ninasuk wasike wene sagalogo heraksìlìk, hinapu hinopalak hagatì lagaukwa higit hogo hagatì lagep atì nahalok. 4#Kel.20:12; Ul.5:16; Kel.21:17; Im.20:9 At Ala nen ìkì logolìk he,
Hinopase hinagosalak agaugerinapì logoino o,
ìlùk isikesik he, aike mel isike:
Sa nen opase agosa abok weak palhe halok he,
at atì ebe motok wasusak o,
5ìlùk ninasuk wasike meneat he, hit en he, mel yogoisìkì lagep:
Sa nen opase he a, agosa he a, yogotì logolìk he,
An mene yì mene tì mene hat wokhesusak meneat he, Ala hesik hisìgìrì'mo o, ìlùk yogoisìkì logouagalùk yakùlisìkì lagep atì. 6Atì'nogo yakùlisìkì lagep atì nen he, it atì'nogo hagatenem, it inopase inagosalak agaugerinabì'lùgì lek atì o. Atì'nogo ìkì lagep atì ba, hit hinapu hinopalak hagatì lagaukwa wene atì hesogo logolìk he, Ala ane sagalogo heraksìkì lagep atì. 7Hit hinogat oba nek hano salek logolìk hinetaùken pìre yì rì! At Yesaya nen Ala ane yogoisìkì logolìk wene mel isike atì, hit hesik higit hogo isike hìgì:
8 #
Yes.29:13 Ala nen he,
It apùnì yoma re, we, inape ba nen an hogo'napì logolìk, inetaùken noba ebetì'lek wele'ma ebesi lìlì'lùgì.
9Wene apùnì inane meneat he, an nen isigi mene negen yakùlisìlì'lùgì atì nen he, we tùlemat hogo'nabì'lùgì o,
ìlùk isikomo, Yesaya nen helal waganogo hesikomo werek atì, hit hesik higit hogoat isike o,” ìlùk yogoisasike.
“Apùnì wene ina'la nen kagalogo lagai waganem egarek atì, weagarinaperek ebe atìat,” ìlùk yogoisasike wene
(Mrk.7:14-23)
10Atì'nogo yogoisasikesik he, hobuk at Yesùt en apùnì apik amanogo waisasikomo wagaukwama re, aike mel yogoisasike:
11“Wene igin yì hit hùthoageip en he, hinasuk hanorogo holini o. Yì mene tì mene inapema kelaparek atì nen inebe weagarinaperek lek o. Mene re, inape ba nen wene egarek atì baat weagarinaperek o,” ìlùk yogoisasike. 12Atì'nogo yogoisasikomo, at agoromì ane wanhì lagaukwa mene amanogo oba wagaukwasik he, mel yogosukwa:
“Wene yogonisegen a'nogo, it ap Parisi mene nen inasuk holhasik he,
At weak ike, ìlùk inabìt heega atì hùrisegen a? Lek a,” ìlùk yogosukwa. 13Atì'nogo yogosukwama at Yesùt en he,
“Yì mene tì mene an nopase pogot oba mene nen awì yatì'lek mene halok he, motok henogo laksegeinat o. 14Ineileken mùm logolìgat he, kwe lisìlì'lùgì atì hebisani o. At aike eileken mùm mene nen, at aike atì'nogo eileken mùmat mene yogotì logolìk he,
Kwe yìkwe lù, ìlùk eki hagasogo wolok legein halok he, eperagat holugu i kaluk wagane'ma pile wo'laka pugun o,” ìlùk yogoisasike. 15Atì'nogo yogoisasikomo, at Peterùt en he, mel yogosike:
“Noe. Wene oba lìrogo yogonisegen atì, ebe pak hogo yogonisan o,” ìlùk yogosike. 16Atì'nogo yogosikomo, at Yesùt en he,
“Hit hogo re, it hinom higirat wene atì oan hùthìgì'lek welagep a? 17Yì mene tì mene nikenem, inapelekwe nen he, pìkìt inalabut a'la pìlìk, hobuk inamise wusi lagaikarek ìlùk hit hùthìgì'lek a? 18Mene re, wene inape ba nen wulaparek atì re, ina'la nen kagalogo lagai wagarek atì nenat inebe weagarinaperek o. 19Ina'la nen wene weak mene ebetìk, apùnì inoatìk, hìmì ap inagagwì mene pailak haksìgìk, hìlìmìkìrùgì pailak haksìgìk, yogot wanhìk, inapeliagat it aike ùkùm inoba hìgìk, inabok wiik-weak hogo palhìk, egarek atì re, ina'la nenat kagalogo lagai waganem wulaparek o. 20Wene ina'la nen kagalogo lagai wagarek atì nen inebe weagarinaperek. Mene re, ineki bakwe horatì'lek sùpùrùk nekarek atì nen weagarinaperek lek o,” ìlùk yogoisasike.
He o Kana'an mene nen etaùken Yesùt oba hipirethesike wene
(Mrk.7:24-30)
21At Yesùt en wene atì'nogo yogoisalùk he, o atoma hebùlùk o Tìrùt Siron atoma lagai wagaike. 22Lagai waganem he, he aike o Kana'an atoma awìwerek mene Yesùt oba wagaikesik ane hùkorogo mel yogosike:
“Taùt en tagokwe mene noe. An neak helekerek mene mokareke oabùt weak mene a'la kikesik weak werek. Halok he, hetawì nean o,” ìlùk yogosike meneat he, 23at Yesùt en oko motok yogotì'lek kamo isikomo re, it ap at ane wanhì lagaukwa mene amanogo wagaukwasik he,
“He yì ninopolik waga logolìk ane motok apik ninoba sabelìk wìrì'logo yì re, wele'ma hela loak en laksan o,” ìlùk yogosukwa. 24Atì'nogo yogosukwama, at Yesùt en he, mel yogoisasike:
“Ala nen,
It apùnì Isirael mene inebe re, wam topa wam nalagarek atì hak werek atì nen, it enek isa lan ìlùk lakhani wagama o,” ìlùk yogoisasike. 25Atì'nogo yogoisasikomo werek kolek, at he a'nogo Yesùt oba wagaikesik he, eitep awì yagasogo hai watì logolìk he, mel yogosike:
“Eigo! Noe. Hano haga'ne'nok a,” ìlùk ane elageik ane yogosikomo, 26at Yesùt en he,
“Yekerùgì inapùrùk mene wìlìk, yeke noagalùk po lagasumo mea o,” ìlùk yogosike. 27Atì'nogo yogosikomo, at he a'nogo nen he,
“Ì, noe. Eberogoat egen meneat he, at ayeke esewerek atì sùpùrùk e meja talek oba nikenem, eken weagarogo kweangma pike halok he, yeke atì nen nikeregat o,” yogosike. 28Atì'nogo yogosikomo, at Yesùt en he,
“He yì nerei e. Hat en he,
At en hagasigin, ìlùk hetaùken noba motok hìpìrethegen atì nen he, ha'la akegen atì hagat higit hogo hagathesigin o,” ìlùk iko kolek aremnogoat, eak a'nogo hano agaike.
At Yesùt en apùnì apigat ou hagarinapike wene
29Yesùt en atì'nogo haga'lùk, o atoma nen pisikesik, i Kalilea yekelek a'nogo aik obakwe laga lagaikesik he, ùkùl oba lagalìk atoma hù'lagaike. 30Hù'lagaikesik were'ma re, apùnì inebe apik at oba waga logolìk, inesok wùt warek mene mel, ineileken mùm mene mel, ineki inesok hapelek mene mel, inane lek mene mel, it he'nakìt inoba ou mene apigat mel, wogisek Yesùt oba wagaukwasik at awe a'ma hisìkì lagaukwama re, at en motok hano hagarinapike. 31Atì'nogo hagarìnapikomo re, it apùnì amanogo inane lek mene huak ìgìk, ineki inesok hapelek mene hano agìk, inesok wùt warek mene hano arìk kwe lagìk, ineileken mùm mene hano arìk lagisìgìk, ikenem ineileken hasukwasik he,
“Egi! Nit apùnì Isirael mene ninopase Ala nayùk e,” ìlùk, hogorasukwa.
Yesùt en apùnì logolek ap enek inebe 4.000 nen sùpùrùk seik-peik hogo wogisasike wene
(Mrk.8:1-10)
32Atì'nogo hagasukwasik oba re, at Yesùt en at ane wanhì lagaukwa mene amanogo waisasike. Waisasikomo wagaukwama re, at en he,
“Nagoromì yì sanì. It apùnì logolek yoma re, ninom motok logolìk nineki hinagan oba nogo ogosi'mo nogo nen he, inapùrùk motok lek agama nena mene nogoin heat werek atì nen, netawì nen netaùken hiselhe. Sùpùrùk motok nìkì'le'ma atì nen he, ebekwe laganem ya koranga ta koranga lanogo ìlùk, an nen laksasak nabìt hake,” ìlùk yogoisasikomo re, 33at agoromì ane wanhì lagaukwa mene amanogo nen he, mel yogosukwa:
“O leimo apùnì inawì wùrìk motok le'ma yoma apùnì apik atogorek yoma sùpùrùk horotì mene inalabut ning hogo noagalùk, ebe koma mene melagisasak,” ìlùk yogosukwa. 34Atì'nogo yogosukwama at Yesùt en he,
“Hit sùpùrùk horoti werago mene mìren hesogo welagep,” ìlùk hinok wogisasikomo re, it en he,
“We, ebe 7 nen. Nen, ikan eagwìtek mene, we, hamùlùgat enek werek o,” ìlùk yogosukwa. 35Atì'nogo yogosukwama, at en he, apùnì apik atogorek welagaukwa mene amanogo kweangma hù'lasuagalùk yogoisasike. 36Yogoisasikesik he, sùpùrùk horoti mene 7 nen aremnogo mel, ikan aremnogo mel, ekim wanhikesik, Ala hai warogo re, eki nen sùpùrùk horoti mene aremnogo kùrogo apùnì logolek amanogo sùpùrisoagalùk, at agoromì ane wanhì lagaukwa mene amanogo wogisasikomo, sùpùrisasukwa. 37Sùpùrisasukwama inalabut ning hogo nasukwasik, titelogo hesukwama re, mùl ugu 7 nen apem hesogothìgìk kalogo hesukwa. 38It sùpùrùk nasukwa atì re, hìmì yekerùgì inom ineki wenaginapì'lek. We, it ap inalùgetek enek he, inebe 4.000 nen wenaginapukwa. 39Nen, sùpùrùk nalùk he, at Yesùt a'nogo apùnì apik atogorek omanogo inauakwe lopok laksalùk he, at ebe i so a'la kìlìk warogo re, o Magatan wùlìbi wagaike.
Atualmente Selecionado:
MATÌÙT 15: LAIDNI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
