MATÌÙT 12
12
Apùni Yahuri mene Ala hesik welegat werek kolek, Yesùt agoromì gandum eken palogo nìlìk lagaukwa wene
(Mrk.2:23-28; Luk.6:1-5)
1O atem sat he, it apùnì Yahurì mene ineki sabìt oba Ala hesik welegat werek kolek, at Yesùt agoromì ane wanhì lagaukwa mene amanogo inom gandum yagokwe laga logolìk, agoromì sùpùrùk nele nen he, gandum eken palogo nìlìk nìlìk lagaukwa. 2Palogo nìlìk laganem he, it ap Parisi mene nen ineileken isìlìk he, Yesùt mel yogosukwa:
“Lakhan! Nineki sabìt oba Ala hesik welegat logolìk he,
Atì'nogo hagasusak lek, ìlùk wene palek werek meneat he, hat hagoromì gandum eken palogo nìlìk wagaika yì rì,” ìlùk yogosukwama re, 3at Yesùt en he:
“At Taùt agoromì opolik lagaukwa mene inom sùpùrùk inaik hesikomo, at en hagasike mene Ala ane ba helal waganek a'nogo hit en etage salhì'lek welagep nogo? Etage salhesebat o. 4At Taùt Ala awì wùrì'mo kisikesik he, sùpùrùk horotì mene Ala hesik hisagarek mene it ap Ala esewerek mene inaligat enek nasak. Meneat he, at Taùt ebe mel, it ap at opolik lagaukwa mene mel, inom, it nasak lek mene wanhukwasik nasukwa ìlùk helal waganek a'nogo hit etage salhì'lek welagep nogo? 5Nen, nineki sabìt oba Ala hesik welegat logolìk yì mene tì mene hagatì'lek welegat logousak meneat he, it ap Ala esewerek mene nek, Ala awì wùrì'mo kìlìk, it hagasusak mene hagatenem ùkùm inoba hagarek lek, ìlùk Ala ane helal waganek werek a'nogo etage salhì'lek welagep nogo? 6Halok he, an nen wene yì yogohisak. Ala awì wùrìk atì mea negen. Meneat he, an yoma welagì yì nek he, motok esin negenat o. 7#Hos.6:6 Ala ane helal waganek a'nogo ba, wene mel ìlùk werek:
An Ala na'la re, apùnì nen inako wa'netarek atì nabìt o. We, it apùnì aike inebe inetawìrinapi logousak atìat walok o,
ìlùk isike mene atì, hit en hùthelepma re, it yoma weak hagatì'lek meneat ùkùm inoba heilop lek o. 8Nineki sabìt oba Ala hesik welegat welagorek atì, esewerek he, an abat ta'lasi wagagi nebe yìat o,” ìlùk yogoisasike.
Ala hesik welegat werek kolek, Yesùt en ap aike eki hapelek mene hagasike wene
(Mrk.3:1-6; Luk.6:6-11)
9-10At Yesùt o atoma nen lagaikesik he, o it apùnì Yahurì mene sapan egarek oba kìlìk, ap aike eki o'moko hapelek mene were'ma eileken hasikomo, it ap he'nakìt en ùkùm Yesùt oba houogolùk anema wanhì logolìk he, mel yogosukwa:
“Ala hesik welegat logolìk ou hagarinabumo re, elok nogo?” ìlùk yogosukwama re, 11at Yesùt en he,
“Hit Ala hesik welegat logolìk he, ap hit mene aike ako topa wam omakeat enek were'ma, ebe kìlìngla pumo re, lisogo lìakhei wesusak lek nogo? Lìakhei wesusagat o. 12Mene re, wam topa atì mene mea negen o. Apùnì inebe atì oko hùkoat o. Halok he, Ala hesik welegat logolìk, hano hagarinabumo, elogat o,” ìlùk yogoisasike. 13Atì'nogo yogoisasikesik he, ap a'nogo mel yogosike:
“Heki kothan,” ìlùk yogosikomo, eki a'nogo kothikenem he, eki o'moko eperak higirat hano motok agaike. 14Atì'nogo hagasikomo re, it ap Parisi mene amanogo olilu wùlùpukwasik he, Yesùt wasuogolùk weim abok isukwa.
Ala nen, “Yesùt an nen ayoko hìlìk lakhei wagagi,” ìlùk isike wene
15Weim abok atì'nogo ikenem, at Yesùt en inoabùt enagat hùrisìlìk he, o atoma nen laganem apùnì inebe apik, at opolik lagaukwa. Lagaukwama re, ou weak mene obogat hagarinapikesik he,
16“An nen hagathinapì yì re, nabok apùnì aike motok yogoisagùp o,” ìlùk inasuk warogo yogoisasike. 17Atì'nogo hagasike atì re, at Yesaya Ala ane yogoisìkì lagaike mene a'nogo nen mel isike higit hogoat haga'lasuagalùk hagasike atì. 18#Yes.42:1-4 At Ala nen he:
“Hìthani! At atì re, an natitigeke logouagalùk nokawerek en weteberogo menhìgì. Netaùken hutìk noba lìoksek, at atìat o. An Nareagùn at wogosumo oba louk umo re, an nen apùnì ùkùm inoba hìgìk, kotìk, higit hogoat igin atì hesik, at en it apùnì etakwe mene wene pak hogo yogoisìkì logogin o.
19At an apùnì inom wene serep agìk, ane pùk weak wenagisìgìk, apùnì kwe hùko yagokwe laganem ane holuagalùk hùkorogo yogoisìgìk, ìkì logogin lek o.
20O wùrep oba at en ùkùm apùnì inoba hìgìk, kotìk, higit hogoat ìkì logolìk, at omame asigin atì oan werek kolek, heiteka oak sigilik mene, at en hukaligin lek o. Nen, esage amulok lagagì'lek hule nek lagaike halok he, at en nogoligin legat o.
21Nen, it apùnì etakwe mene nen at etage ìlìk,
At en hano'ninabigin o, ìlùk ugun,”
ìlùk isike mene werek atì higit hogoat haga'lasuagalùk hagasike atì.
“At Yesùt atì, Peelsepùl oba loukse'ma hagarìk niko,” ìlùk isukwa wene
(Mrk.3:20-30; Luk.11:14-23)
22Atì'nogo hagasikesik oba nen, hobuk ap aike mokareke oabùt weak mene a'la kisikomo nen eileken mùm agìk, ane lek agìk, isike mene Yesùt oba wolok wagaukwama re, at en hanorogo hagasikomo eileken mùm mene hano agìk, ane lek mene huak ìgìk, isike. 23Atì'nogo hagasikomo re, it apùnì era'lu atogorek welagaukwa mene nen he,
“Egi! Taùt aput wesigin ìlùk ìkì lagaukwa a'nogo ebe yì he a,” isukwa. 24Atì'nogo ikenem, it ap Parisi mene amanogo inasuk holhukwasik he, mel isukwa:
“Ap yì mokareke oabùt weak mene inoe kain etage Peelsepùl a'nogoat at oba louksek were'ma nogo nen he, mokareke at agoromì negen inoabùt weak mene apùnì ina'la kìlìk were'ma henogo wulaksìlì'logo,” ìlùk ikenem he, 25at Yesùt en it ina'la akasukwa mene enagat hùrisìlìk he, mel yogoisasike:
“Ap kaintek inetagepogot inagoromì inawe a'ma hagisek welagaikarek obakwe lopok, it-it inom hùlìthakìlìk, inom weak logogun halok he, maben asugun o. Nen, apùnì inawì sili lopok omakeat mene mel, ap inebe lopok inagainapùrì mel, inom hùlìthakìlìk inom weak logogun halok, weak asugunat o. 26Atì hak, at Ibilit okawerek agoromì mokareke inoabùt weak mene inom hùlìthakìlìk, o'moko nen o'moko mùk hogo wulakselepma, at agoromì hagisek welagarek mene nìkì'nogo omame logoilep. Mea o. 27An nen Peelsepùl atì omame ba, at agoromì inoabùt weak mene apùnì ina'la kìlìk were'ma henogo wulaksìkì lagì halok he, hit hinagoromì nen mokareke inoabùt weak mene it aike ina'la kìlìk were'ma henogo wulaksìlì'lùgì atì, sa omame ba henogo wulaksìlì'lùgì akegep. Hinagoromì nen atì'nogo hagarì'lùgì atì ba, it en he,
Wene at Yesùt hesik egep atì re, kolo egep o, ìlùk ùkùm hinoba hou hak hagarì'lùgì o. 28Meneat he, an nen nopase Areagùn omame ba mokareke inoabùt weak mene atì apùnì ina'la kìlìk were'ma henogo wulaksìkì lagì halok he, Ala nen awe a'ma hisegein a'nogo arat hinoba hakok i waga o. 29Ap aike omame apik mene eki hele warogo hìgì'lek he, agarok yì mene tì mene ineki abusak elok wani kusak akegep? Mea o. We, eki hele warogo hìlìk enek he, elok wani kusak o.
30“Nen, sa nen ebe an werekwe agì'lek halok he, at atì an neperak weim palek meneat o. Nen, sa nen an neperak apùnì atogorìnapì lago lek mene halok he, at atì nenat pùgùlogo wulaksìlì'logo o,” ìlùk yogoisasike.
31Atì'nogo yogoisasikesik wene aike mel yogoisasike:
“Wene atì'nogo egep atì nen, an wene yì yogohisak. Apùnì nen yì weak tì weak hagarì'lùgì mene mel, ina'la nen it aike meatsìlìk inane ba nen inabok palì'lùgì mene mel, at Ala nen elok sagalogo legetsasak meneat he, Ala Areagùn atì nek ina'la nen meathìlìk abok palho halok he, elok sagalogo legetsasak motok lek o. 32Sa nen an abat ta'lasi wagagi a'nogo a'la meathanìk nabok aike weak palho halok he, weak hagasigin mene atì Ala nen elok sagalogo legetsasak meneat he, Ala Areagùn atì a'la meathìlìk abok weak palho halok he, weak hagasigin mene atì, Ala nen yogotak mel, o wùrep oba arat haga'larìk oba nen logogun oba mel, sagalogo legetsasak motok lek o,” ìlùk yogoisasike.
“E eken ìterek oba nen ero enagat hùthegesep,” ìlùk yogoisasike wene
(Luk.6:43-45)
33Atì'nogo yogoisasikesik aike mel yogoisasike.
“E eken hano mene ero hano mene nenat ìterek. Nen, e eken weak mene atì, ero weak mene nenat ìterek. Atì'nogo ìterek atì ba, e eken yì hano mene eken ìgìk, yì weak mene eken ìgìk, enagat hùthegesep o. 34Hit hinebe walo nen tagokwe mene yoma sanì! Apùnì nen yì wene tì wene inapema nen egarek atì re, ina'la peserek logolìk kagalogo lagai waganem egarek atì nen he, hit he, hinoabùt weagat logolìk wene hano mene ìkì logousak nogo? Mea o. 35Apùnì inoabùt hano mene re, ina'la hano mene peserek logolìk, kagalogo lagai waganem he, wene hano meneat wulabi wagaikarek o. Mene re, apùnì inoabùt weak mene, ina'la weak mene peserek logolìk, kagalogo lagai waganem he, wene weak meneat wulabi wagaikarek o. 36Halok he, an wene yì yogohisak. Hobuk Ala nen manema waganogo ùkùm inoba hìgìk, kotìk, igin atì sapùl he, apùnì inane we tùlemat egarek mene atì hesik ùkùm inoba hegeinat o. 37Hit hinokawerek hinane egesep mene higit hogoat Ala nen ùkùm hinoba hìgìk, kotìk, iginat o,” ìlùk yogoisasike.
“Nit en hùthagagùkwe, hat en elalin mene aike hagasin o,” ìlùk yogosukwa wene
(Mrk.8:11-12; Luk.11:29-32)
38Atì'nogo isikomo re, it ap Ala ane helal waganek esewerek mene aike mel, it ap Parisi mene aike mel, inom en Yesùt mel yogosukwa:
“Noe. Nit en hùthagagùkwe, hat en elalin mene aike hagatenem nineileken hasak walok en yogoheto,” ìlùk yogosukwama re, 39at Yesùt en he,
“Hit apùnì o yogotak welagep mene yoma re, hinoabùt weak enek hagarìk nìkì logolìk Ala hinom lopok hogo logohùk yoma rì! Atì'nogo logolìk, hit en he,
Nit en hùthagagùkwe re, hat en elalin mene aike hagasin he, ìlùk yogonetì lagep meneat he, an nen elalin hùnogoat mene aike hagasigin lek o. We, at Yùnùt Ala ane yogoisìkì lagaike mene nen apùnì aike hùthoagalùk elalinat hagasike atì hak enek an nen hobuk aike hagatenem hineileken neogoin o.
40 # Yun.1:17 At Yùnùt atì ikan alabut a'la werek kolek, o hi ìgìk, we ìgìk, iko kolek eki hinagan welagaike
atì hak he, an abat ta'lasi wagagi a'nogo re, kweang a'la o hi ìgìk, we ìgìk, iko kolek, neki hinaganat logogin o. 41At Yùnùt atì nen it apùnì o Niniwe mene atoma Ala ane yogoisìkì lagaikomo re, inoabùt hebelarìk, yì weak tì weak hagatì lagaukwa mene heraksasukwa o. Mene re, at Yùnùt atì etage lek negen. We, an yoma welagì yì nek he, esinat nogo nen he, o elùgùn oba Ala nen apùnì ùkùm inoba hìgìk, kotìk, igin atì sat he, apùnì o Niniwe mene atoma inebe melarìk, hit apùnì o yogotak welagep mene yì mel yogohisogoin:
Hit weak, hinekalì, ìlùk yogohisogoin o. 42Atì hak, at he kain mene awì o i apùtmo higit o pogot erokwe walegat atoma nen at ap Salomo atì a'la motok kagalek logolìk hagatì lagaike wene atì asuk holigìlùk wagaike. Mene re, at Salomo atì mea negen. Meneat he, an yoma welagì yì nek he, motok esin nogo nen he, hobuk o elùgùn oba Ala nen apùnì ùkùm inoba hìgìk, kotìk, ìgìn atì sat, at he kain atì ebe melarìk he, hit o yogotak welagep mene yì mel yogohisegein:
Hit weak, hinekalì, ìlùk yogohisegein o,” ìlùk yogoisasike.
“Mokareke oabùt weak mene apotkwe wagarek,” ìlùk yogoisasike wene
(Luk.11:24-26)
43Atì'nogo yogoisasikesik aike mel yogoisasike:
“Mokareke oabùt weak mene atì apùnì ina'la nen wùlùperesik he,
An naua komakwe logoik en wo'lakak he, ìlùk set walogo logousak oba obùlùk herarìk, lei pùparekwe i motok le'ma atoma nikerek nikerek he, heraterek motok lek. 44Motok lek en, at en he, mel ikerek:
An naua ebalep welagì ba a'nogo napotkwe lìlìk kigin o, ìlùk wagarek. Wagaresik kikerek he, o a'nogo inebe lek, somong meneat he, lelem wulagasogo tegelek were'ma ha wagaresik he, 45hobuk apotkwe wùlìbi lagaresik, mokareke aike inoabùt at oabùt hake lek. At he, inoabùt motok weak mene inebe 7 nen, inayoko lagaresik, wogisek o a'nogo ki wagaresik, ap atì a'la kagaresik welagaikarek o. Atì'nogo kìlìk were'ma re, ap atì alep he, oabùt hano negen welagaike meneat he, hobuk oabùt motok weagat haga'lagarek. Atì hak he, hit apùnì o yogotak ya hinoabùt motok weak hagatì lagep mene yì, atì'nogoat hagasugun o,” ìlùk yogoisasike.
Yesùt agosa mel, agoromì mel, at ebe herarìk wagaukwa wene
(Mrk.3:31-35; Luk.8:19-21)
46At Yesùt apùnì apik inom logolìk wene yogoisiko were'ma re, at agosa mel, agoromì mel, wene yogosuogolùk oba wagaukwasik he, olilu welagaukwa. 47Were'ma re, ap aike nen he,
“Yesùt, lakhan! Hat hagosa mel, hagoromì mel, wene yogohesuogolùk herakhabìk wagaikasik olilu werek o,” ìlùk yogosikomo re, 48at Yesùt en he,
“An nagosa nagoromì atì sanì nogo,” ìlùk yogosikesik,
49it ap agoromì ane wanhì lagaukwa mene amanogo eki him inoba hìlìk he,
“An nagosa nagoromì, it yìat o. 50Sa nen an nopase pogot oba mene a'la akikerek mene higit hogo hagaterek halok, at atì an nagot, nerei, nagosa werek o,” ìlùk yogosike.
Atualmente Selecionado:
MATÌÙT 12: LAIDNI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
