LUKAT 15

“Wam nalhìlìk hobuk herakìlìk, ina'la hai hakagarek,” ìlùk oba lìrogo yogoisasike wene

(Mat.18:12-14)

1Atì'nogo yogoisasikesik, hobuk ineki aike sapùl he, it ap pemerintah hesik uang kìno ilik atogotarek mene mel, weak hagatarek mene mel, inebe obogat Yesùt ane inasuk holuogolùk he, ha wagaukwa. 2Atì'nogo wagaukwa mene re, it ap Parisi mene mel, it ap Ala ane helal waganek esewerek mene mel, ineileken isìlìk he, inane ngùlùk-habuk ìkì logolìk he, mel isukwa:

“Ap yì nen apùnì weak hagarì'lùgì mene woginaperesik sùpùrùk inom omakìma nekarek atì, nayùk e!” ìlùk isukwama re, 3at Yesùt en wene oba lìrogo mel yogoisasike:

4“Ap hit mene aike ako topa warn 100 nen were'ma re, omakeat aike nalaga halok he, 99 aremnogo o leimo hisalùk he, omakeat nalasigin mene atì heraksìgì'lek motok herarìk pùgùlìk nìkì lagaresik en, arat herakikerek a'nogo lek? 5Atì'nogo arat herakalùk a'la hai hakìlìk ot oba sakìnogo wolok he, 6oe agot mel, apùnì aike inawì sili omakìma mene mel, obogat waisìlìk he,

An nako nalaga mene a'nogo arat herakalùk wagì atì nen, nina'la hai hakùok o, ìlùk yogoisikerek a'nogo lek? 7Atì hak, apùnì inebe 99 mene atì nen he,

An weak aike hagatìrìk nogo nen he, noabùt hebelasigin nogo? Lek o, ìlùk, inoabùt hebelasusak lek en he, it pogot oba welagaikarek mene atì ina'la hai hakogoin lek o. Meneat he, it apùnì weak hagatarek mene omakeat aike nen oabùt hebelhe halok, it pogot oba welagaikarek mene atì ina'la hai apik hakogoin o, ìlùk yogohisìgì,” ìlùk yogoisasike.

“He aike nen uang sen mene nalagaike mene herasike,” ìlùk oba lìrogo yogoisasike wene

8Atì'nogo yogoisasikesik he, wene aike mel yogoisasike:

“He aike uang sen mene ebe 10 nen hesogo were'ma omakeat aike nalaga halok he, heraksìgì'lek esage kìalhìlìk he, o hùlùkwe lelem motok wulakhìlìk tegelhì logolìk he, arat herakikerek a'nogo lek? 9Atì'nogo arat herakìlìk he, hìmì, at aksùmì mel, inawì sili omakìma welagaikarek mene mel, waesikenem atogosi waganem he,

Nauang sen mene nalaga mene urat herakìgì atì nen he, nit obogat nina'la hai hakùok o, ìlùk yogoisikerek a'nogo lek? 10Atì hak, apùnì weak hagatarek mene omakeat aike oabùt hebelhe halok he, it malaikat Ala nen yoko laksa wagarek mene amanogo ina'la hai apik hakogoin o, ìlùk eberogoat yogohisìgì,” ìlùk yogoisasike.

“Ap aike aput nalagaike mene apotkwe wagaike,” ìlùk oba lìrogo yogoisasike wene

11Atì'nogo yogoisasikesik he, wene aike mel yogoisasike:

“Ap aike againapùrì ap inebe pìre welagaukwa. 12Mene re, ap elabo mene nen opase yogotì logolìk he, mel yogosike:

Nopase! Hat wa'lasumo hamìnìng wo'nesusak mene hùgì, wo'nom o, ìlùk yogosikomo re, at inopase a'nogo nen he, at amìnìngeke sùpùrogo asusak mene higit hogoat heleleng hogo apùrì eperak sùpùrogo wogisasike. 13Atì'nogo sùpùrisasikomo, aput elabo mene a'nogo eki aike inom welagì'lek, yì mene tì mene, at agaike mene hùgì motok heleleng hogo oko abarogo auang helalùk he, o walegat atoma lagaike. Lagaikesik atoma logolìk he, a'la ebetì'lek, we, yùgùnat hagarìk nìkì logolìk auang amanogo motok nalek-halek hogo hagasike. 14Motok nalek-halek hogo hagarogo hìlìk were'ma, o atoma sùpùrùk motok no apik agaikomo re, ap a'nogo sùpùrùk nele apik agaike. 15Sùpùruk nele apik agaikomo re, ap a'nogo a'la nen he,

Ap awìwerek mene aike eyabu hagatenem napùrùk mela'netì logouak en ìlùk, oba legein, ìlùk lagaike. Lagaikomo re, ap awìwerek a'nogo nen he, o ìgawìla ako serogo logouagalùk lakhesike. 16Lakhesikomo atoma logolìk he, a'la nen he,

Nalabut ning uak en he, sùpùrùk asing ìbìlìk wam nikerek mene atì nìkì logoile o, ìlùk akasike meneat he, wogotì lagaukwa lek en, 17welegat logolìk oabùt hebelarìk he,

Eigo! An nopase a'nogo aua atitigeko mane eyabu hagatarek mene amanogo inebo logolegat sùpùrùk apik titelogo hìgìk niko kolegat he, an yì nek he, sùpùrùk nele nen wa'lasigin yì! 18Halok, an hobuk yoma nen nopase oba lìlìk he, mel yogosigin:

Nopase! At Ala pogot oba mene atì mel, hat mel, hineil salogo weak motok hagatìma. 19Atì'nogo weak hagatìri'mo re, hat en he,

Yì an naput, ìlùk hobuk usak motok mea o. We, hat hatitigeke meneat haninok o, ìlùk yogosi legein, ìlùk a'la akasike. 20Atì'nogo akìlìk, o welagaike ba a'nogo hebisalùk he, opase a'nogo oba wesigìlùk oan waganem, at opase a'nogo nen walegat waga kolek eileken lakhìlìk he, etaùken abolok ìlìk, humusek lìlìk he, oake holuk hogo hai ape saluk-saluk wasike. 21Atì'nogo hagasikomo, at aput a'nogo nen he, mel yogosike:

Nopase! An he, at Ala pogot oba mene a'nogo mel, hat mel, hineil salogo weak hagatì o. Atì'nogo hagatìrì'mo re,

Yì an naput, ìlùk hobuk usak motok mea o, ìlùk yogosike. 22Atì'nogo yogosike meneat he, at opase a'nogo nen atitigeke mene amanogo waisasikesik mel yogoisasike:

Lìlìk he, su hano mene a'nogo wolok hepok labethei wagìk, sekan hano mene ekimo ìkhei wagìk, sepatu eso'ma ìkhei wagìk, hepok ini o. 23Atì'nogo ìlìk he, wam sapi eak otolik hano mene a'nogo waganogo, at hesik nina'la hai hakìkì logolìk aganeke warogo isasuok o. 24An naput yì wa'laga akogo mene eluk a'lùk waga yì! Motok nalaga meneat he, hobuk herakogo yì, ìlùk, ina'la hai apik hùkasukwa.

25“Atì'nogo hagato kolek aremnogoat, at oe a'nogo yabumo welagaikesik wagaike hak he, gitar watì logolìk etawì watenem inane asuk holhike. 26Holhikesik he, opase atitigeke amanogo mene omakeat aike waesikomo wagaikomo re, mel yogosike:

Inane ouma atoma nìkì'nogo hagarì'lùgì, ìlùk, hinok wanhikomo, 27at a'nogo nen he,

Lek o! Hagot a'nogo wagama o. At ebe oba ou lek hano motok wagama re, hopase nen ako sapi eak otolik hano mene a'nogo watesik hagarì'lùgì o, ìlùk atì'nogo isikomo, 28at ap makusa mene a'nogo a'mage apik lagalìk he, aua kusak a'la motok pùk agaikesik were'ma, opase a'nogo wùlìbi wagaikesik he, ane lìok hogo,

Ki lù o, ìlùk yogosike. 29Yogosikomo aput a'nogo nen opase yogorìk he, mel isike:

Hasuk holin? An he, yì tahun tì tahun hat hesik heyabu motok apik hagatìrek o. Atì'nogo hagatì logolìk he, hat en,

Yì'nogo haga'no, tì'nogo haga'no, ìlùk yogonetetek mene a'nogo aike nabìt ìgì'legat hagatìrek meneat he, wam eak omakeat aike an nagaiya'lak ninom nina'la hai hakìkì logolìk isago noagalùk wo'netì'legat. 30Meneat he, hat haput arì hìmì yùgùnat haksìlìk nìkì logolìk hat wa'lasumo hamìnìngeke ese mene asusak mene higit hogo wogoten mene a'nogo motok nalek-halek hogo hebisalùk waga mene arì nek he, wam sapi eak otolik hano mene a'nogo warogo aganeke isaten yì rì! ìlùk yogosikomo, 31at opase a'nogo nen he,

Naput e! Hat neperak welagorek mene yì re, an nagarok yì mene tì mene obogat he, hat meneat o. 32Meneat he, hat hagot yì re, wa'laga akogo mene re, eluk a'lùk waga o. Nalaga mene herakogo o, atì nen he, nina'la hai hakìkì logolìk hagasusak meneat hagatì lago, ìlùk yogosike,” ìlùk Yesùt en yogoisasike.

Atualmente Selecionado:

LUKAT 15: LAIDNI

Destaque

Copiar