YOHANET 8

Apùnì nen, he aike pailak hagatenem hasukwasik, Yesùt oba wolok wagaukwa wene

1It apùnì amanogo laga kolek he, at Yesùt tom Saitun oba lagasike. 2Lagasikesik, ohealekokwe hùp siak hogo pi wagaikesik, Ala awì wùrì'mo wagaikeat. Wagaikesik ouma kisikomo re, apùnì apigat at oba wagaukwama, at ebe hù'lagaikesik he, wene yakùlisasike. 3Wene yakùlisiko were'ma, it ap Ala ane esewerek mene mel, Parisi mene mel en, he aike pailak hagatonem ineileken hasukwasik, Yesùt oba wolok wagaukwasik, he a'nogo ebe tùlem menhìlìk he, 4Yesùt mel yogosukwa:

“Noe. He yì re, pailak hagatenem hakhogosik en hoba wolok wago o. 5#Im.20:10; Ul.22:22-24 At Musa nen wene Ala nen ninasuk wasike wene a'nogo ba, helal wanhì logolìk, it hìmì nen, at yì hagate atì hak hagato halok, helep oba inebe motok inoasusak o, ìlùk yogonisasikomo wene palek werek atì re, hat en nìkì'nogo yogonisegein,” ìlùk yogosukwa. 6Wene atì'nogo yogosukwa atì re, Yesùt ape ba wene oko ikenem ekalì warogo ùkùm oba houogolùk isukwa meneat he, at ot soma ìlìk eki tùm en kweang oba helal wanho kamo isike. 7Atì'nogo halolotsìlìk werek kolek, it en he,

“Yogonisan o,” ìlùk yogoto motok hagatì lagaukwama re, at ot le'lagaikesik, mel yogoisasike:

“Hit welagep ya mene, ap aike weak hagatì'lek welagarek mene halok, at en tak he yì helep oba tung hogo wasuak o,” ìlùk, 8yogoisasikesik he, hobuk apotkwe ot soma ìlìk eki tùm en kweang oba helal wanhì lagaikeat. 9Atì'nogo wanho kolek, it amanogo wene yogoisasike mene a'nogo inasuk holhukwasik he, it inalùgetek tak wùlùpukwama, hobuk inebe obogat omakìtek lìlìng-lelong pùgùlhukwama, at Yesùt he a'nogo eperak inaligat logolìk he, 10at Yesùt a'nogo ot le'lagaikesik, at he a'nogo mel yogosike:

“He yì sa. Nerei e. Ap amanogo re? It en ùkùm hoba haga a'nogo, ap aike nen hoate a? Lek a,” ìlùk yogotì lagaikomo, 11at en he,

“Noe. Motok lek o,” ìlùk, yogosikomo, Yesùt en he, mel yogosike:

“An hogo re, ùkùm hoba hìlìk hoasigin legat o. Hebe haua lano. Lìlìk he, hùlì yogotak oba nen hobuk weak aike hagatì logogùn o,” ìlùk yogosikesik he, aua lakhesike.]

Yesùt en, “Apùnì lìarinapìrek he, anat o,” ìlùk yogoisasike wene

12Hobuk he, at Yesùt en it apùnì amanogo wene aike mel yogoisasike:

“Apùnì lìarinapìrek atì, anat o. Sa nen an nopolik nìkì logogin halok he, an nebe lìa logolìk inelugurinapìrek mene a'nogoat wo'nabigin atì nen he, at atì o mùmmo nìkì logogin lek o,” ìlùk ìkì lagaikomo, 13it ap Parisi mene amanogo nen he,

“Hat he, habok inelu asuagalùk, hokawerek enat yogoisìkì lagen atì hapeliak enat ìkì lagen o,” ìlùk yogosukwama, 14at Yesùt en he, mel yogoisasike:

“An wagagi mene mel, legein mene mel, hit hinokot meneat he, an enek he, nebe o atoma nen wagagi, nen hobuk o atoma legein, ìlùk nelu atì nen he, an nabok inelu asuagalùk nokawerek enat yogoisìkì lagì atì re, wene atì eberogoat yogoisìkì lagì o. 15Hit en he, ùkùm noba hìkì lagep atì re, hit apùnì-apùnì ùkùm inoba hìgìk, kotìk, egesep hagat noba hìkì lagep meneat he, an enek he, apùnì ùkùm inoba hìgìrek motok lek o. 16Mene re, an nen ùkùm inoba heilema re, atì an naligat en hùk. Nopase nen lakhani wagaike mene a'nogo neperagat logolìk ìkì lagì atì nen he, ùkùm higit hogoat apùnì inoba heile o. 17#Ul.17:6, 19:15 Wene, Ala nen ninasuk wasike wene atì ba mel isike:

Apùnì ùkùn inoba hìkì logousak halok he, ap wene ero hagata inelu mene inebe pìre nen inane eperak higit enek iko halok he, wene atì eberogoat usak o,

ìlùk isikomo helal waganogo hesukwa. 18Atì hak he, an nabok, nokawerek en ìgìk, nopase lakhani wagaike mene nen ìgìk, yogohisìkì lago atì,” ìlùk ìkì lagaikomo, 19it en he,

“Hat hopase atì koma werek,” ìlùk yogosukwama, at Yesùt en he,

“An noba yì mel, nopase mel, hinokorat o. An nebe hinolu logoilepma re, nopase atì hineluat logoilep o,” ìlùk yogoisasike. 20Wene atì'nogo yogoisasike atì re, at ebe Ala awì wùrì'mo peti uang Ala hesik hisagarek oba era'lu logolìk iaike. Atì'nogo ikenem, at ebe hakhousak oba oan asi wagì'lek werek kolek nogo nen he, it apùnì amanogo aike nen hakhìgì'lek kamo isukwa.

Yesùt en, “O an legeinmo atoma, hit lasak mea,” ìlùk yogoisasike wene

21Atì'nogo kamo isukwama re, at Yesùt wene hobuk aike it amanogo mel yogoisasike:

“An nebe hobuk legeinat o. Lìlìk atoma werek kolek, hit an hera'nabugun meneat he, o an legeinmo atoma hit lasak mea atì nen he, hit weak hagatì lagep mene ùkùm hinoba werek kolegat hinebe wa'lasugun o,” ìlùk yogoisasikomo, 22it ap kaintek Yahuri mene nen he, mel isukwa:

“Ap yì nen yogonisìkì logolìk he,

O an legeinmo atoma hit lasak mea o, ìlùk yogonisike atì re, at okawerek en waragalùk ìlì'logo he a,” ìlùk isukwama, 23at en mel yogoisasike:

“An nebe re, pogot abel pokwe mene wagagisik welagì o. Mene re, hit enek he, abel makwe yoma mene. Hinawì ero kweangma yomaat o. Mene re, an nawì ero kweangma yoma lek o. 24Atì nen he, an nen wene alep yogohisìkì logolìk he,

Weak hagatì lagep mene ùkùm hinoba werek kolek wa'lasugun o, ìlùk yogohisìgì a'nogo re, mel hesik ìgì. Hit en an hesik he,

At ebe esok motok welagarek meneat o, ìlùk hinetaùken noba hìpìrethogoin lek halok he, ùkùm hinoba werek kolegat wa'lasugun atì nen ìgì o,” ìlùk yogoisasike. 25Atì'nogo yogoisasikomo, it en he,

“Hat hebe sa nogo,” ìlùk oba hinok wokhasukwama, at en he, mel yogoisasike:

“Tùlemat atì, hobuk nenahalok yogohisegein. 26An nen yì wene tì wene apigat yogohisìgìk, ùkùm hinoba hìgìk, kotìk, usak elok meneat he, at lakhani wagaike mene a'nogo ane eberogoat enek ikerek atì nen, at en ikenem nasuk holhì lagì mene atìat hit kweangma mene yoma yogohisìkì lagì o,” ìlùk yogoisasike. 27Atì'nogo yogoisasike meneat he, it en he,

“At opase Ala hesik abok yogonisìlì'logo,” ìlùk wene atì hùthìgì'lek welagaukwa. 28Atì'nogo hùthìgì'lek werek kolek, at en he, mel yogoisasike:

“An abat ta'lasi wagagi a'nogo, hit en an nebe e ba menhanugun atì sat, hit en he,

Esok motok welagarek mene a'nogo ebe yìat o. At en wene yogonisìkì logolìk he, a'la nen kagalogo ìgì'lek. We, at opase nen yakùleterek mene nek yogonisìkì lagama, ìlùk, hinelu asugun o. 29At lakhani wagaike mene a'nogo, oba lìok ikerek mene nek hagatìrek atì nen he, at en an nebe kopologo herakhanhì'lek neperak hutik motok welagorek o,” ìlùk yogoisasike. 30Yesùt en wene atì'nogo yogoisìkì lagaikomo, apùnì inebe logolegat inetaùken at oba hìpìrethesukwa.

Yesùt en, “Ebe wene ba hinebe hele hikalogo hinalepma hikegein,” yogoisasike wene

31Inetaùken atì'nogo hìpìrethesukwama, at Yesùt en he, it ap Yahuri mene inetaùken at oba hìpìrethesukwa mene mel yogoisasike:

“Hit en, an nane hologo hagato logogun halok he, hinebe an nagoromì ebe mene nawe a'ma logolìk he, 32wene ebe wene hinelu asigin o. Hinelu asumo, wene ebe wene atì baat hinebe hele hikalogo hinalepma hikegein o,” ìlùk yogoisìkì lagaikomo, 33it en he, mel yogosukwa:

“Nit he, ap Aberaham en tagokwe mene nogo nen he, ninebe apùnì aike inatitigeke agì'lek mene nek welago. Meneat he, hat en ìkì logolìk he,

Hinebe hole hikalogo hinalepma hikegein o, ìlùk egen atì re, ha'la nìkì'nogo akegetik en egen,” ìlùk yogosukwama, 34at en he, mel yogoisasike:

“Apùnì weak hagaterek mane atì inebe lopok he, weak hagatarek atì atitigekeat, ìlùk eberogoat yogohisìgì o. 35Nen, it inatitigeke mene atì re, inogogì inom motogat welagaikarek lek meneat he, inagainapùrì ebe mene nek he, inom motogat welagaikarek o. 36Atì hak he, an Ala ebe aput en, hit hele hikalogo hinalepma hikìgì halok, eberogoat hele hikalek hinalepma logogun o,” ìlùk yogoisasike.

“Hinopase Ibilit at o,” ìlùk yogoisasike wene

37Atì'nogo yogoisasikesik, aike mel yogoisasike:

“Mene re, hit he, ap Aberaham en tagokwe mene welagep, atì an nelu o. Meneat he, hit hina'la nen an nane wanusak hinabìt atì nen he, hit enat an nebe noasuogolùk naweim kabelhì lagep atì. 38An he, nopase neperak logolìk neileken hìkì lagagi meneat yogohisiko kolek, hit enek he, hinopase a'nogo nen ikerek mene ane hologo hagatì lagep o,” ìlùk yogoisasike. 39Atì'nogo yogoisìkì lagaikomo, it en he,

“A! Nit ninopase Aberaham at o,” ìlùk isukwama, at en he, mel yogoisasike:

“Hit hinebe eberogoat Aberaham en tagokwe mene logoilepma re, Aberaham hagatì lagaike meneat hagatì logoilep o. 40Mene re, an wene ebe wene Ala nen ikenem nasuk holhigi meneat yogohisìkì lagì meneat he, hit en an nebe noasuogolùk naweim kabelhì lagep atì hak, at Aberaham en atì'nogo hagatì lagaike lek meneat hagatì lagep o. 41Hit he, hinopase a'nogo hagaterek mene hagatì lagep o,” ìlùk yogoisìkì lagaikomo, it en he, mel yogosukwa:

“A! Nit pailak holelogo ta'ninapa mene hùk. Nit ninopase Ala aligat o,” ìlùk yogosukwama, 42at en he, mel yogoisasike:

“Hit he, eberogoat hinopase Ala logoilepma re, an nabusak na'la nen kagalogo wagagi hùk. We, nebe ero Ala mane, at en lakhani wagaikomo wagagisik welagì atì nen he, an nebe hinetawìrogo logoilep o. 43Atì'nogo wagagisik, wene yogohisìkì lagì mene hit hùthìgì'lek welagep atì nahalok. Atì'nogo welagep atì re, an nane holek logousak hinabìt atì nen o. 44Atì'nogo hinabìt atì re, hit hinopase Ibilit atma, hit en at walok akikerek mene atìat walok en hagatì lagep atì. At Ibilit atì ero ba nenat apùnì inoaterek meneat o. At wene ebe wene a'la lek atì nen he, wene ebe wene ikenem inane legeterek lek atì. Ibilit apeliak ikerek atì re, at oabùt esogatma apeliagat ikerek atì o. Inapeliak egarek atì, ero arat o. 45Meneat he, an nen wene ebe wene yogohisìkì lagì atì nenat, hit en he,

Eberogoat, ìlùk hùthìkì lagep lek. 46An nen weak hagatenem, hit aike nen hineileken neegep halok he, yogone'ni ta. Lek o. An nen wene ebe weneat yakùlhisiko kolek, hùthìkì lagep lek atì nahalok. 47Sa nen ebe Ala mene halok, Ala ane atì asuk holherek meneat he, hit he, hinebe Ala mene hùk. Hùnogoat mene atì nen he, at ane hinasuk holusak hinabìt atì o,” ìlùk yogoisasike.

“Aberaham oan ta'lagì'lek werek kolek, an nesogat welagìrek o,” ìlùk yogoisasike wene

48At Yesùt en wene atì'nogo yogoisasikomo, it ap Yahuri mene amanogo nen he, mel yogosukwa:

“Hat hebe ap Samaria mene yì rì! Mokareke oabùt weak mene ha'la kikesik werek o, ìlùk ìkì lago a'nogo eberogoat yogohetì lago hìgì,” ìlùk yogotì lagaukwama re, 49at en he, mel yogoisasike:

“An mokareke oabùt weak mene na'la kìgì'lek o. An nen nopase hogorato kolek meneat he, hit en an netage weak hagarogo hìkì lagep o. 50Mene re, an nokawerek hesik hogo'nabuagalùk hagatìrek hùk. Lek o. At he, an hogo'nabuagalùk, at aike nen ùkùm inoba hìgìk, kotìk, igin mene wank o. 51Nen, sa nen an nane hologo hagatì logogin halok he, wa'lagì'lek eluk motok logogin o, ìlùk eberogoat yogohisìgì,” ìlùk, yogoisìkì lagaikomo, 52it up Yahuri mene amanogo nen he, mel yogosukwa:

“Ap Aberaham mel, up Ala ane yogoisìkì lagaukwa mane amanogo mel, arat wa'larìk lagaukwa meneat he, hat en ìkì logolìk,

Sa nen an nane hologo hagatì logogin halok, wa'lagì'lek eluk motok logogin o, ìlùk egen atì nen he, mokareke oabùt weak mane eberogoat ha'la kikesik werek, ìlùk, hùthagago o. 53Nit ninopa Aberaham ebe wa'lagaike meme atì, ebe yekerek negen. Mene re, hat enek he, hebe kain a? It ap Ala ane yogoisìkì lagaukwa mene amanogo wa'larìk lagaukwa meneat he, hat hebe sa hak en ìkì lagen nogo,” ìlùk yogosukwama, 54-55at en he, mel yogoisasike:

“An nokawerek en hogorakìkì logoilema re, we tùlemat hogorakìkì logoile o. An nopase ebe nelu mene atì, hit en, at ebe hùthìgì'lek logolìk,

Nit ninopase Ala, ìlùk egesep a'nogo, at ebe nenat, hogo'nabì'logo. An nen,

At ebe nokot, ìlùk ilema re, hit hinapeliak egesep hagat ile o. Mene re, at ebe nelu nogo nen he, at ane hologo hagatì lagì o. 56Nen, hit hinopa Aberaham a'nogo nen, an wesigin hesik ìkì logolìk,

At waganem neileken hegein, ìlùk an naleik watì lagaikesi'mo nogo nen he, eileken arat neasikesik a'la hai hakasike,” ìlùk yogoisìkì lagaikomo, 57it ap Yahuri mene amanogo nen he, mel yogosukwa:

“Hat hebe ta'lagagitik oba nen 50 tahun oan haga'lagì'lek meneat he, Aberaham elok heileken hasigitik en ìkì lagen a? Mea o,” ìlùk yogosukwama, 58at en he, mel yogoisasike:

“An nane eberogoat yogohisak o. Ap Aberaham atì ebe oan ta'lagì'lek werek kolek, an nesok motogat welagìrek o,” ìlùk yogoisasike. 59Atì'nogo yogoisìkì lagaikomo, it ap amanogo nen he, at Yesùt ebe wasuogolùk helep inekim wanhukwa meneat he, Yesùt ebe hina'lagaikesik en, o Ala awì wùrì'mo herakhùlùk wele'ma lagaike.

Atualmente Selecionado:

YOHANET 8: LAIDNI

Destaque

Copiar