YOHANET 21

I Tiberiat mogoma at Yesùt ebe, it agoromì inebe 7 mene nen ineileken hoagalùk inelokoma melagaike wene

1At Yesùt en atì'nogo hagasikesik oba nen, i Tiberiat mogoma, at agoromì ane wanhì lagaukwa mene amanogo hobuk inelokoma melagaikeat. Inelokoma melagaike atì, wene ebe re, yì'nogo. 2Ineki aike sapùl he, at Simon etage aike Peterùt egaregat a'nogo mel, Tomat etage aike Hùlìpmìomene egarek a'nogo mel, Nataniel aua o Kalilea tokwe o etage Kana mene mel, Sepeteùt againapùrì mel, Yesùt agoromì inebe pìre aike mel, atogosukwa. 3Atì'nogo atogosukwasik he, Simon etage aike Peterùt egaregat a'nogo nen, it he'nakìt mel yogoisasike:

“An yogotak he, ikan wani lagalùk,” ìlùk isikomo, it he'nakìt amanogo nen he,

“Nit ninomat lùok o,” ìlùk isukwasik he, inom lìlìk so ha kisukwasik lagaukwa mene re, o yìbako-hùako ikan omakeat halok aike motok wanhì'lek. 4Atì'nogo wanhì'legat were'ma, o we iko kolek, at Yesùt lagaikesik, i esakoma metek welagaike meneat he, it agoromì ane wanhì lagaukwa mene amanogo nen he,

“Arì Yesùt ebeat o,” ìlùk hùthìgì'lek. 5Atì'nogo hùthìgì'lek were'ma, at Yesùt en mel yogoisasike:

“Ap sanì. Nagoromì. Ikan aike wanhep a?” ìlùk yogoisasikomo, it en he,

“Motok lek o,” ìlùk yogosukwama, 6at Yesùt en he, mel yogoisasike:

“Hinayoge su arì, so abeleken hineki ebekwe higit hogo pelakheni. Atì'nogo pelabumo ikan wanugun o,” ìlùk yogoisasikomo inayoge su a'nogo ima pelakhesukwama ikan motok apik kalagaikomo re, lisogo wanusak mea agaike. 7Atì'nogo mea agaikomo logolìk, at Yesùt agoromì mene aike, at etaùken hutik mene a'nogo nen he, Peterùt mel yogosike:

“Peterùt, ap arì ninoe Etagepogot a'nogoat o,” ìlùk yogosike. At Yesùt agot a'nogo nen,

“Ap arì ninoe Etagepogot a'nogoat o,” ìlùk Peterùt yogotenem asuk holhikesik he, asu etakwe mene nokologo hesikesik nokolek welagaike mene hepok-hepok laberasikesik he, ima pok pisike. 8Atì'nogo piko kolek, Yesùt agoromì he'nakìt amanogo it welagaukwa ba nen hùlì i aik oba re, walegat he, lek. We horogat, 100 meter hake atì nen he, ikan apik su yoge su apem hesoksek a'nogo lisogo wolok so warogo i aik oba wùlìbi wagaukwa. 9Arat wùlìbi wagaukwasik so a'la nen pi wagaukwa hak he, ikan mel, sùpùrùk horoti mene mel, werago etu eken oba louksek were'ma ineileken hasukwa. 10Atì'nogo hasukwama, at Yesùt en he, mel yogoisasike:

“Nagoromì. Ikan kerat wanhep amanogo he'nakìt wolok we'ni o,” ìlùk yogoisasikomo, 11Simon etage aike Peterùt egaregat a'nogo so a'la kisikesik he, ikan hùkotek motok ebe 153 nen su yoge su apem hesoksek a'nogo lisogo wolok he, i aik oba wùlìbi wagaike. Ikan motok apik meneat he, yoge su a'nogo hamùlùgat halok aike lìbìlagì'lek, we, hano welagaike. 12Su atì'nogo wolok wùlìbi wagaikomo, at Yesùt en he, mel yogoisasike:

“Nagoromì. Sùpùrùk nùok en we'ni o,” ìlùk yogoisasike. Atì'nogo yogoisasikomo, it at agoromì amanogo nen he,

“Yì ninoe Etagepogot ebeat o,” ìlùk enagat hasukwasik nogo nen he, at aike nen,

“Hat sa,” ìlùk inayù'lek hogo hinok wokhìgì'lek kamo isukwa. 13Atì'nogo kamo isukwasik werek kolek, at Yesùt en hobuk inoba horok hogo hìgìlha lagaikesik he, sùpùrùk horoti mene a'nogo wanhikesik, it sùpùrisìlìk he, ikan a'nogo atì'nogoat sùpùrisasike. 14At Yesùt atì'nogo hagasike atì re, at ebe wa'lagaikesik en apotkwe eluk agaikesik oba nen, eki pìre ba agoromì inelokoma melagaikesik en aike hobuk melagaike atì.

Yesùt en, “An nako topa hanorogo serisek logoino,” ìlùk Peterùt yogosike wene

15Sùpùrùk atì'nogo arat nasukwama, at Yesùt en Simon etage aike Peterùt egaregat a'nogo anema wokìkì logolìk he,

“Simon Yohanet aput nagot e. It hagaiya'lak he'nakìt yoma re, an inetaùken hutik he, mea negen meneat he, hat enek he, an hetaùken tùlem negen welagen a?” ìlùk yogosikomo, at Peterùt en he,

“Ì o, noe. An nen hat hebe netawìat o,” ìlùk yogosikomo, at Yesùt en he, mel yogosike:

“Halok he, nako topa ena mene hanorogo serisek logoino o,” ìlùk yogosike. 16Emakum atì'nogo yogosikesik, hobuk aike inom anema mel wokhasike:

“Simon Yohanet aput nagot e. Hat en an hetaùken tùlem welagen a?” ìlùk yogosikomo, at en he,

“Ì o. Noe. An nen hat hebe netawì welagì atì, hat heluat o, noe,” ìlùk yogotì lagaikomo, at Yesùt en he,

“Halok he, an nako topa mene konhì logoino o,” ìlùk yogosike. 17Anema eki pìre ba wokhasikesik hobuk anema aike mel wokhasike:

“Simon Yohanet aput nagot e. Hat en an nebe hetawì a?” ìlùk, anema atì'nogo eki pìre ha wokhasikesik en, hobuk aike ba,

“Hat en an nebe hetawì welagen a?” ìlùk yogosike atì nen he, a'la kolo agaikomo, at en Yesùt mel yogosike:

“Noe. Hat he, yì wene tì wene obogat helu o. Halok, an nen noe hebe netawì welagì atì, hat helu o,” ìlùk yogotì lagaikomo, at Yesùt en he, mel yogosike:

“Halok he, an nako topa hanorogo serisek logoino o,” ìlùk yogosike. 18Atì'nogo yogosikesik he, wene aike mel yogosike:

“Alebat, hat hebe elege logolìk he,

An o atoma legein, ìlùk pagaluk hokawerek enat ning hogo ikìlìk laga lagag'in meneat he, hobuk hat hebe yaman arìk, heki pisarogo lakhikenem he, it aike nen hat heki hele ning hogo wathabìk he, o hat lasak habìtmo wokharek logoin o, ìlùk eberogoat yogohetì,” 19ìlùk wene atì'nogo yogosike atì re, at Peterùt hobuk tì'nogo hagarogo wasugun oba Ala hogorasugun mene hesik yogosike atì. Atì'nogo arat yogosikesik he, aike mel yogosike:

“An nopolik nìkì logoino,” ìlùk yogosike.

Yesùt en at agoromì mene aike etaùken hutik mene hesik abok yogoisasike wene

20At Yesùt en wene atì'nogo yogosikomo, at Peterùt elokwe hebek hogo eileken apotkwe lakhasike hak he, Yesùt agot aike etaùken hutik mene a'nogo inopolik waganem lakhasike. At atì ebe re, alebat sùpùrùk nìkì logolìk Yesùt era'lu horok hogo hùrek logolìk, at en he,

“Yesùt noe. Sa nen noe Hetagepogot hoasuagalùk yoko legein,” ìlùk oba hinok wokhasike mene a'nogo. 21At Peterùt en ap atì eileken lakhìlìk he, Yesùt mel yogosike:

“Noe. At ap arì hobuk nìkì'nogo hagasigin akegen,” ìlùk yogotì lagaikomo, 22at en he,

“An na'la nen he, ap arì ebe elugat were'ma, an hobuk wesigin akìgì halok he, hat en hagasusak mene hùk. An noba lopok o. Atì'nogo meneat he, hat enek he, an nopolik nìkì logoino o,” ìlùk wene atì'nogo yogosike mene atì, 23it Yesùt agoromì ane wanhì lagaukwa mene nen he,

“Yesùt en he,

Nagot arì ebe hobuk wa'lasigin motok lek o,” ìlùk ike salek, abok wìagathesukwa. Meneat he, at Yesùt en he,

“An nagot arì hobuk wa'lasigin motok lek o,” ìlùk ìgì'lek. We,

“An na'la nen, ap arì ebe elugat were'ma an hobuk wesigin akìgì halok he, hat en hagasusak mene hùk. An noba lopok o,” ìlùk wene atì mane hesik isike meneat, ati'nogo isukwa atì.

24Wene Yesùt agot aike hesik isike atì, nebe anat o. An neileken hasigi mene nenat pak hogo yogohisa hak, helal palogo hìgì yì. Wene atì an neileken hasigi mene nenat pak hogo yogohisìgì eberogoat, ìlùk, nit obogat ninelu.

Wene elùgùn warogo helal wanhìke wene

25At Yesùt en yì wene tì wene he'nakìt hagatì lagaike mene apik werek meneat he, wene obogat omakìtek-omakìtek pìlìng-palang hogo helal waganogo heilema re, o kweangma yoma peserogo re, obùlùk koma hou heat haga'la'lep akìgì.

Atualmente Selecionado:

YOHANET 21: LAIDNI

Destaque

Copiar