YOHANET 15
15
At Yesùt en he, “Hele anggur ero an nebeat o,” ìlùk yogoisasike wene
1At Yesùt en wene atì'nogo yogoisasikesik, hobuk aike mel yogoisasike:
“Hele anggur ero ebe mene re, an nebeat o. Nen ebe esewerek he, an nopaseat o. 2Hele ekisok ebe lopok, an noba hutik logolìk eken ìtì'lek halok, tek hogo laksegein o. Meneat he, ekisok ebe lopok eken ite halok he, aike inom hogo ìtì logouagalùk obùseka palogo wusa yogoligin o. 3Nen, hit he, an nen wene yogohisìgìrek atì nen he, hinobùseka hake palogo wusa yogologo hikasigimo welagep o. 4Atì'nogo hinobùseka hake palek welagep atì re, hit an ninom hutik, nen, an hit ninom hutik, logouok o. Hele ekisok atì re, ebe ba hutik lek halok, eken isusak motok mea o. We, ebe ba hutik halok, eken ìterek atì hak, hit an ninom hutik logogun lek halok he, hano mene hagasusak mea o. We, an nebe ba hutik halogat, hano hagasusak o. 5Hele ebe anat o. Nen, nekisok hirat o. Hit an ninom hutik lek, we, kopolek logolìk, yì mene tì mene aike hagasusak motok mea atì nen he, at sa nen an neperak hutik, nen, an at neperak hutik, logogun halok he, at atì eken apik isu hak, hano mene hùkorogo hagasigin o. 6Nen, hele ekisok palogo laksagarek mene pùk aganem he, apùnì nen nomologo hìlìk etumo po laksikenem etu nikerek atì hak, at sa nen an neperak hutik lek, kopolek halok he, atì'nogoat palogo lakhoumo ebe etu negein o. 7Hit an ninom hutik logolìk nane hina'la werek halok, we, nena mene hit walok mene an kìno yogonesumo wokhisamo helogoinat o. 8Hit hineken apik isu hak hano mene hùkorogo hagasugun halok, apùnì nen an napase hogorasugun o. Hit hinebe ebe nagoromì nane wanhì lagep mene logolìk, atì'nogoat hagatì logogun o,” ìlùk yogoisasike.
9At Yesùt en wene atì'nogo yogoisasikesik aike mel yogoisasike:
“Nopase nen an etaùken hutik welagarek atì hak, an nen hit netaùken hutik welagì o. Atì'nogo hit netaùken hutik logoik en he, an ninom hutigat logoino o. 10Nen, an nopase nen,
Yì'nogo haga'no, tì'nogo haga'no, ìlùk nasuk warogo gonesike mene atì, an nen at ane hologo hagatenem, at en an etaùken hutik welagarek atì hak, hit atì'nogoat, an nen hit hinasuk warogo,
Yì'nogo haga'no, tì'nogo haga'no, ìlùk yogohisìkì lagì mene atì, hit en an nane hologo hagatì logogun halok he, an nen hit netaùken hutik logogin o. 11Nen, an na'la hai hakìgìrek atì hak, hit hina'la hai hakìkì logolìk, hobuk hina'la hai hùkorogo hakìkì logouageip en ìlùk, wene atì obogat yogohisìgì o. 12Hit en hagatì logouageip en ìlùk, wene ebe yìat hinasuk warogo yogohisak:
An nen hit netaùken hutik welagì atì hak, hit en atì'nogoat hit-hit netawì-hetawìrogo logouageip en ìlùk yogohisìgì o. 13It he'nakìt inagaiya'lak inetaùken hutik he, mea negen meneat he, ap aike agaiya'lak etaùken hutik en, it hesik wa'lasigin atì nek he, motok esin o. 14Nen, an nen hinasuk warogo,
Yì'nogo haga'no, tì'nogo haga'no, ìlùk yogohisìkì lagì mene atì, nane hologo hagatì logogun halok he, hit an nagaiya'lagat o. 15It apùnì inatitigeke mene atì, inogogì hagatarek mene inokot atì nen he, an nen hùlì yogotak yì ba nen,
Hit an natitigeke, ìlùk yogohisegein lek o. Yì wene tì wene nopase nen yogonesike mene obogat yogohisìkì lagì atì nen he,
Nagaiya'lak, ìlùk yogohisìkì lagì atì o. 16Hit en an wena'napigip hùk. We, an nen hit wenakhinapigi atì, e eken ìterek atì hak, motok logogin mene hagasi loageip en ìlùk, hinebe wenakhinabìk menhikasigi. Atì nen he, we, nena mene, hit walok mene an netage palogo nopase kìno yogosugun halok he, at en wokhisegeinat o. 17Nen, an nen wene yogohisìgì atì, ebe esin he,
Hit-hit netawì-hetawìrogo logoino o, ìlùk yogohisìgì atìat o,” ìlùk yogoisasike.
Yesùt en, “Apùnì kweangma mane nen inabìt motok hagathinapì logogun,” ìlùk yogoisasike wene
18At Yesùt en wene atì'nogo yogoisasikesik, hobuk aike mel yogoisasike:
“It apùnì kweangma mene nen inabìt motogat hagathinapa halok he, emakum an tak inabìt motok haga'napukwa a'nogo hina'la ebe'no o. 19Hit hinebe apùnì kweangma mene logoilepma re, it apùnì kweangma mene nen he,
It he, nit ninagoromì, ìlùk inetaùken hutik hagathinabilep meneat he, hit hinebe it apùnì kweangma mene were'ma wenakhinapigisik wokhinapigisi'mo re, hinebe it mene welagep hùk. Atì nen he, inabìt motok hagathinabì'lùgì o. 20Nen, ap kain aike inawe a'ma negen werek kolek, at atitigeke mene esin negen welagarek lek o, ìlùk yogohisasigi a'nogo hina'la ebe'ni o. It en an weaga'napa halok he, hit atì'nogoat weagathinabugunat o. Nen, it en an nane hologo hagata halok he, hit hinane hologo hagasugunat o. 21Atì'nogo meneat he, it en, at an lakhani wagaike mene a'nogo ebe inokot atì nen he,
It yì at agoromì, ìlùk, wene yogohisìgì atì obogat hagathinabugun o. 22An wagagisik, wene obogat atì it yogoisìgì'lek logoilema re, it weak ìlùk ùkùm inoba hìlìk logoilep lek akìgì. Meneat he, yogotak, wene yogoisa wagì atì nen, it en,
An weak hagatì'lek, ìlùk, ùkùm inoba mene nokolasak meaat aga o. 23At sa nen an apsìrì'niike halok, an nopase ebeat apsìrìthike o. 24It apùnì he'nakìt en hagatarek motok lek mene, yì wene tì wene ineilhanem hagatì lagagi a'nogo hagatì logoile le'ma re,
It weak, ìlùk ile lek o. Atì'nogo meneat he, an nen wene atì obogat hagatenem ineileken neasukwasik en, an nopase neperak inapsìrì motok haga'ninabì'lùgì o. 25#Mzm.35:19, 69:4=TB 69:5 Atì'nogo meneat he, Ala nen,
Yì'nogo haga'no, tì'nogo haga'no, ìlùk inasuk wasike wene atì ba, ane yì'nogo helal waganek werek:
Wene ero le'maat, it en an inapsìrìthanhukwa,
ìlùk isikomo, helal waganogo hesukwa mene atì ebe asuagalùk atì'nogo hagarì'lùgì o.
26“Hit lebethisìkì logouagalùk Ala Areagùn ebe wene yogoisoagalùk wagarek mene atì, an nen nopase were'ma nen hit hinoba lakhei waganem he, at en an nabok pak hogo yogohisìkì logogin o. 27At en an nabok atì'nogo iko kolek, hit hogo re, an hit ninom alebat en welagorek atì nen he, hit en an nabok pak hogo yogoisìkì logogunat o,” ìlùk yogoisasike.
Atualmente Selecionado:
YOHANET 15: LAIDNI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
