Cantares 4
4
Al
1¡Amput nuhni yamni mahn, dalani matalayang kidika!
¡Amput nuhni mahn!
Mamakpa laih buhtuku bu ki
tunan mukwa pining yakat yakmaldana sakki;
basma laih kuts binina kapat ki
Galaad asangni kau yakisda kapat yamwa kidika.
2Anama balna kidika bitik laih yayamni manah,
sihm sīp uduhna as kapat ki
wisam palni waskanin pāni kaupak kalalahna kidika
ridi kidika butunina kahrnin.#Cnt 6:5-6. 3Kungmamak laih papauni ki,
sihm trit pauni kapat,
yulma balna kidika makulnik laihwi.
Muhma kihnimak balna laih granado minik upuna bu kapat ki
tunama muktaman piningkau kidika.
4Damamak kidika laih sihm kapatki
kipala pahrna karak, makau kilwi talnin pāni yamna kidika,
Devid dini yayamna kidika.
Kidika yakat, kalbauyang balna nanitna daknin tausin as alahna bangki,
kulninna parasni balna nanitna daknin.
5Man tama kidika sana binina bu kapat ki sūtki#Cnt 7:3. kapat,
dipulu paskau dibasta kakaswa kapat.
6Ma payahlawak,
ma sanni kidika kiri,
mirra asangni yakat yawaki,
dawak walapni bubuswa asangni ubulni yakat bik.
7¡Man laih nuhni yaksihn man, dalani matalayang kidika,
nuhni yaksihn man tunama kaupak kalma sutni kat!
¡Man muihma yakat wayakani as bik diski!
8Líbano kaupak yang karak lakyawa, yalki awama kidika;
yang karak lakyawah Líbano kaupak.
Langni kidika talah, Amana asangni tuna kaupak,
layan balna panina sulihni kaupak,
dawak nawah bulni balna asangnina kaupak bik.
9Yamalnaman ising kidika,
wirahki yal bin, yang yalki awama kidik;
yamalnaman ising kidik
wat aslah yatalnaman kamanah,
dawak alahma wahni, bani aslah kau.
10¡Ais ampat yamni yah laihta salapta umtaman kidika,
wirahki yal bin, yalki awama kidika!
¡Laihta salapta umtaman kidika kauh damni ki, wain karak dawakat,
dawak walapni kahtaman kidika tanit walapni auhni ki,
walapni ūk balna bitik pasyakat!
11Yalki awama kidika,
kungmamak kaupak amak manah kalahwi.
¡Amak dawak tāwas manah duwi tuma dinit yakat!
¡Líbano walapni duwa kapat
asmana kidika walapni duwi!
12Man wirahki yal bin, yalki awama kidik,
dipulu dahna pāni daklana kapat man,
wastuna putna kapat
dawak was burhwa putna kapatman;
13dipulu dahna pāni kaupak granado panan ukuswi kalahwa kidika
minik ahauhni;
dipulu dahna pāni kau alheña puluni#4.13 Hibru kau laih minitlakwi yulwi: nardos. duwa kidika,
14nardo dawak azafrán,
suku walapni dawak canela,
dawak pan satni balna kaupak busnin walapni yayakwa kidika;
¡walapni duduwa tanit yayamni balna bitik!
15Dipulu paskau wastuna kidika laih
pa kuhrna as ki, bahang kidika kaupak buhrwi kalahwi
wasni, Líbano kaupak yaklakwi kiwa kidika.
16Tingpal wingni, ¡sahmuta!
Wadah wingni, ¡akat aiwah!
¡Dikipulu dahnayang pāni yakat puhtang walapni kidika kalahwang!
Yal
Aiwah, dalani matalayang man, dimapulu dahna pasyakat,
dawak kasta minik auhni duwa kidika.
Atualmente Selecionado:
Cantares 4: SUMU
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998