Isaías 7
7
Isaías yul tatuna sihwadai kidika Acaz yakat
1Siria kingni Rezín, dawak Israel kingni Peka, Remalías walanibis witing Jerusalén nining yakat kiwi kalbauna, dawak kawi dunin kulna kaunah sip awas dana dai. Adika dini kalahna dai Acaz Jotam walanibis, Uzías mani king dai kidika Judá sauni yakat.#2 Re 16:5; 2 Cr 28:5-6. 2Kidika mani balna dai yakat adika yulni king Acaz wanaihni balna yakat diyulna dai: “Sirio balna kidika Efraín karak aslah kalalahna dai.” King dawak tawan muihni balna kidika diyukna sihm pan wing laihwa kapat.
3Kaput dawak Dawan yaklau Isaías yakat kalyulna: “Walamabis Sear-jasub#7.3 Hibru kau Sear-jasub, kidika tanka laih, sutni bubin watna bangkidika nawatwi aiwarang ki. karak king Acaz yakat yawa kalpaktah was daklana tangtawa nining yakat, asna susuhwa pāni kau kiunin tāni yakat, 4dawakat kalyultah:
‘Amungtalah, kaunah muihsak-dauwinih;
yamaduwinih dawak bapuh kalwinih kuh anansar bu dahlwa kidika yulni,
Rezín dawak Sirio balna karak Remalías walanibis karak,
kulninna daukalwi dahlwa rau kidika.
5Sirio balna dawakat Efraín muihni balna karak,
Remalías walanibis al yakarak dutni yamnin kukulna.
Bahang aput yuyulna:
6Judá yakat mawi bilninalaudang;
mawi mahawi dudi Tabeel walanibis al kidika king adahng.
7Kaunah Dawan yulwi:
¡Kidika sip kaput kalahwas karang!
8-9Siria tawanni nuhni tunan kidika laih Damasco,
dawak Rezín laih Damasco kingni;
Efraín tawanni tunan nuhni kidika laih Samaria,
dawak Remalías walanibis laih Samaria kingni;
kaunah kurih 65 kat,
Efraín kidika diskarang ki;
dawak manna kidika rahm kulnin lani parasni dutas awanama kat,
kalmana kau bik lawa ataktas awanama.’ ”
Yul wat bu yakat sihna kidik: Emanuel batahn dawarang yulni
10Dawan yaklauwi aput bik kalyulna Acaz yakat: 11“Man Papangma Dawan yakat kalyultang di taldas dini as yamwi namangkawang dawak kidika laih man yak sain as karang, sau dinit yakat bik kidik awas kat maluihni tanit maluihni yakat.”
12Acaz yaklauwi nangnitlana: “Dikah, yang Dawan yakat sain as kalyultik traini talas awaki.”
13Kaput dawakat Isaías yaklauwi kalyulna:
“Manna dakanauh, Devid ūni kau bangmana kidika.
¿Di dauh kapat talamanah muih al kau usnin kidika,
dawakat yang Papangki yakat usnin kultamana kidika?
14Dawan witing palni yaklauwi sain as manawarang:
Wahma#7.14 Wahma: Hibru kau laih kaput yulwi. Grik kau laih aput wirlawi, sirau (al kalpakwas). (Talah Mt 1:23.) kidika muih karuk ki bahang muih bin as duwarang ki,
ayangni paknin karang Emanuel.#7.14 Hibru kau Emanuel, tanka laih Papang mayang karak ki.,#Mt 1:23.
15Muihbin kidika kurihni tatuna balna yakat witing
kasna karang tāwas yaklakna dawakat amak karak.
16Kaunah muihbin kidika baisa di amanglawas tanit kau,
sau bu kingni balna bilmalalauwa kidika diruhmwi dana karang.
17“Dawan yamwa kat man mamatyak kaiwarang,
tawanma minityak kaiwarang dawakat king ūni minit yak bik kaiwarang,
Efraín, Judá kaupak dakwi kalahna mani kaupak di aput as kalahwas kidika kalahna karang.”
(Adika laih Siria kingni yak kalyulna.)
18Kidika mani balna Dawan yaklauwi yamwak aiwarang markisah kapat Egipto wasni naikau yalalahwa balna yak,
dawak bik kalawak kaiwarang baba Asiria kau yalalahwa balna minitna yakat.
19Witingna bitik aiwi was binina pas yakat kawi panina duduwarang,
dawak bik kipala sulihni yak kakawarang,
damasni wakal manah pasyak kakawarang,
kaput bik, turuh was didiwa pāni yakat bik.
20Kidika mani Dawan yaklauwi yusyamwarang Asiria kingni yakat irisar as linkalahna kapat Éufrates wasni tanit yakau,
dawak Israel balna tunanina kahrwarang,
kungninabas bik, dawak muihnina bitik.
21Kidika mani muih as turuh yal as muhwarang dawak sīp bu muhwarang kat 22taniwas mahni yakwarang bahang sipkarang taniwas kidika diwi dawak lakwi kaswarang. Kidika sauni yakat dutni balna kaiwa kidika dauwas yaklalawarang kat, witingna sip karang tāwas dinin, lakwi kasnin dawak amak bik diwarang.
23Kidika mani, muhni lau wain yamak as kidika tausin wain pāni duwadai bahang minit kidika laih lalah dadasni tausin dai, bahang kidika pāni balna damasni wakal manah kalwarang. 24Kidika pāni yakat sip karang sibangkau manah kawi di ina atnin, kat kidika sauni yakat laih damasni wakal manah kalwarang bahang. 25Muhnilau yakat asang ububulni balna yakat tukwi di dadahwa dai, kaunah waralaih damasni wakal manah kalwarang muih as bik yakat kiwaskarang. Bahang kidika pāni yakat laih turuh dawak sīp balna manah dibasta kakaswarang.
Atualmente Selecionado:
Isaías 7: SUMU
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
