Isaías 5
5
Wain yanimak kidika laih Judá wayani
1Kaltalyang tanit yamni yangna ayangni kidika dutik unbauki,
bahang kidika laih wainki yamak kidika yakat unbauki.#Mt 21:33; Mk 12:1; Lc 20:9.
Kaltalyang yamni yangna kidika wain yamak as duwa dai
sau as yamni di minik yamni yakwa pāni kat.
2Sau kidika yamni tukwi dawi kipala balna bitik yakmukna dai,
dawakat sulani balna tanit yamni kidika dahna dai.
Di dahna papusyakat makau kilwi talnin pāni yamna dai,
dawak wain yamnin pāni bik as yamna dai.
Yang kaltalyang yamni yangna kidika wain minik dadamni tahana dai,
kaunah wainni kidika minik yakna kat sapapahni dai.
3Waradika laih Jerusalén dawak Judá muihni balna,
yultanauh wais dutni yamna daih,
wainki yamak kidika awaskat yang yamna yang daih.
4¿Wainki yamak yakat di as baisa yamtas yang daih?
¿Yang di as yamna yang daih kidika yakat?
Yang tahana yang dai wain minik dadamni kalahna atnin,
¿bahang amput dawak wain minik sapapahni kalahna yah?
5Yamni ki, bahang yang manayulki
yang wainki yamak kidika ais yamki kidik:
daklana yang kidika yakpamki, daukalpamna atnin yulni;
dawak kal kau bik atakna atnin yulni;
6ruhmtik dana awaki.
Tingni rahni balna kidik klin yayamwas karang
dawak wakal dawi wah karak ukukusna karang.
Mukus yak pakna awaki
kidika minit yak was launin awas.
7Dawan parasni nuhni wainni yamak kidika,
witing yanimak palni kidika
kidika laih Israel sauni,
Judá tawanni.
Dawan witingna yakat tahana dai lāni balna kidik kulna atnin,
kaunah muih iyang balna manah kalpakna dai;
lakat yamnin kidika tahana dai,
kaunah dalani wauhwi sararahwa balna manah tapani yakat dakana dai.#Jr 2:21; Os 10:1; Lc 13:6-9.
Muih dutni niningna kauh yaklauna
8¡Alakaih manna ū manas bakanta mana kidika
dawak sau bik manas bakanta mana kidika,
pa as bik datas mana muih ūk dunin,
dawak kidika sauni yakat manna manah kapat kaldakamana!
9Dawan parasni nuhni duwa kidika witing ayangni kau yakwi yayulna:
“U manas laih dau kalna karang;
nuhni yaksasihn karang bik
muih as bik kakawas karang.
10Hectarea bas wain dadahna karang
bik tank bin aslah yayakwarang wain wasni.
Di dahnin minik balna bik salap kidik kaupak,
plawar bik aslah yayakwarang.”
11¡Alakaih manna puktakau lawa wasak ditamana
kidika wain wasni daihni mana buswak pukta kat yawamana!
12Unbauwa bitik kidika laih paswi yakisda dini kau manah ki,
drum, bara,
kaput bik laih kidika alasnina yakat laih wain manas palni ki;
kaunah Dawan yamwa yakat laih tatalwas ki,
witing warkni balna kidika laih kukulwas ki.
13Kidika bahang, witingna amanglakih diawas bahang,
yang tawanki kidika muih sauni ūk yakat kiuna karang.
Muih balna bitik, dawak tanituna balna karak,
bahang yakat laih yuh, was dikih diawak dadauwarang.
14Nawah anyang as kapat, sau ū kidika tinpas wakahwarang,
muih balna dawak tanituna balna karak libitwi dalna atnin,
kidika muihni balna alasna manah yayamwa kidika.
15Muih balna kidika laih kalni dinit yakat manah bubukwarang;
witingna manah kapat kaldakakawa balna kidika miniknapa sau yakat tatalwarang.
16Dawan parasni nuhni duwa kidika, la yamwarang yakat, witing nuhni kidika lāih yakwarang;
Papang holi kidika lāih yakwarang, la kat kidika yamwi.
17Tawan nunuhni balna kidika daukalna karang#5.17 Tawan nunuhni balna kidika daukalna karang: kaput wirlana kidika yamni ki. Hibru kau laih amangladaski.
bahang kidika pāni yakat sīp dawak kuts balna#5.17 Kuts balna: kaput ulna kidika yamni kapat ki. Hibru kau laih yulwi muih pini pa dis balna kidika (nómada). kidika yakat dibasta kakaswarang.
18¡Alakaih manna, alas yulta, dutni kidika murtamana,
dutni balna kidika murtamana, sihm truk kau sitwi murwa kapat!
19Manna yultamana kidika: “Papang witing yamnin duwa kidika bainah yamwak taldanang;
Israel Papangni maisihni dis kidika baina warkni balna kidika yamwang,
bahang mayang amanglana atnin.”
20¡Alakaih manna, di yamni kidika dutni talamana kidika,
dawak di dutni kidika di yamni talamana kidika;
yaringni kidika puksani yakat wirlatamana
dawak puksani kidika yaringni yakat wirlatamana,
dawak tapalhni kidika damni yakat wirlatamana, dawak damni kidika tapalhni yakat wirlatamana!
21¡Alakaih manna, sins nuhni dutamana kapat kaldakamana kidika,
dawak sinsmana yudutni kapat kaldakamana!
22¡Alakaih manna, wasak dibin laih bayakna ahalni mana,
muih as bik mamatna bayakwas ki wāsak yamnin!
23Manna lalah yulni muih dutni yamna kidika dutni yamwaski timana,
dawak muih dutni yamwas kidika rahmni kalatasmana.
24Kidika bahang, kuhpau dibasta buswa kapat,
dibasta buhlana kat buswa kapat
manna bik manabuswarang,
pan rikni dutlawak kapat
dawak puluni balna kidika diswi di yahamni kapat.
Amput dawak yamnin pakna dawak sumalna balna kidika dauh kultamanah
Dawan parasni nuhni bitik duwa kidika, Israel Papangni holi kidika.
25Kidika bahang Dawan kulnin daukalna dai witing tawanni karak,
dawak tingni dulauna wah kalana atnin.
Asang balna kidika diyukna dai,
muih dadauna balna kidika bubuh kapat tawan pasyakat wauhdai.
Kaput kaunah Dawan kulnin daukalna kidika sanni kalwas bandai;
witing baisa niningna yakat yaklauna.#Is 9:12,17,21; 10:4.
26Dawan plakin dulauwi
wiuhwak sau naikaupak muih uinin yulwi witing yakat,
dawak pa tanit naikaupak uiwi, sirihni palni;
27kidika balna pasyakat muih as bik parasni dis kapat awaski,
dawak kalsuhna kapat bik awaski, muih as bik kamalik kapat awaski,
muih as bik banimak yamni sitwas kapat awaski,
muih as bik susni wahni dakna kapat bik awaski.
28Sīninabang kidika baini ki,
lasnina bik yamni iswi sitna.
Aninaras susni kidika kipala kapatki,
dawak truknina wīlni kidika wing kapat ki;
29witingna sararahwa kidika, layan ihwa kapatki,
witing di laihwarang sakkat,
laihwa kidika muih as bik sip dakyakwas ki.
30Kidika pāni yakat, ma āna kidika kiwi kawakat ihna karangki,
sihm kuma kapat, Israel nining yakat;
dawak muih as sau yakat talwarangkat,
puksani manah talwarang ki,
yaringni kidika puksani kalna karangki mukus kidika yulni.
Atualmente Selecionado:
Isaías 5: SUMU
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
