Yoh 7

Akasumi kakaba katakahikire Yesu kugenda Yerusaalemu

1Ebi obu byahoire, Yesu yatandika kugendagenda omu isaza Galiraaya; atagonze kuraba omu Buyudaaya, habwokuba Abayudaaya bakaba nibaserra kumwita. 2#Lev 23:34; Bir 16:13.Kandi obugenyi bw'Abayudaaya obw'Ensiisira bukaba buli haihi kuhika. 3Nukwo bagenzi be kumugambira bati: “Ruga hanu, ogende Buyudaaya, abeegesebwa baawe barole ebi orukukora. 4Omuntu obu aserra kumanywa burole, ebye tabikora omu nsita. Kandi iwe nkooku orukukora ebi byona, obyoleke abantu boona, babirole.” 5Nangwa n'abagenzi be bakaba batakamwikiriize. 6Nukwo Yesu kubagarukamu ati: “Akasumi kange tikakahikire, baitu akasumi kanyu kaikaraho butoosa. 7Inywe abantu tibasobora kubanoba, baitu banobere nyowe, habwokuba nimbooleka ebikorwa byabo nkooku biri bibi. 8Inywe nu, mugende ha bugenyi; nyowe tindukwija kugendayo habwokuba akasumi kange tikakahikiire kimu.” 9Obu yamazire kugamba ebi, yaikara Galiraaya.

Yesu naagenda Yerusaalemu ha kiro kikuru ky'Ensiisira

10Bagenzi be obu baamazire kugenda ha bugenyi, nawe yagendayo. Atagende abantu nibamurora, baitu omu nsereko. 11Abayudaaya bakaba nibamuserra ha bugenyi, nibeekaguza bati: “Ali nkaha?” 12Hakabaho okuhwehweterrangana kwingi omu bantu hali uwe. Abamu baagamba bati: “Muntu murungi”; abandi bati: “Nangwa, naahabisa abantu”. 13Baitu habw'okutiina Abayudaaya, busaho n'omu ayamubalizeeho bbwa.

Yesu naayegesa omunju ya Ruhanga

14Obugenyi obu bwahikire hagati, Yesu yaimuka, yagenda omunju ya Ruhanga, yatandika kwegesa. 15Abayudaaya baahunirra nibagamba bati: “Omuntu onu, amagezi ganu akagaiha nkaha kandi kunu takeegesebwaga?” 16Yesu nukwo kubagarukamu ati: “Ebi ndukwegesa tibiri byange, baitu by'Ogu ayantumire. 17Omuntu weena obu agonza kukora Ruhanga ebi asiima, naija kumanya ebi ndukwegesa obu biraaba nibiruga hali Ruhanga, rundi byange habwange. 18Anyakwegesa ebye habwe, aba naayeserurra ekitiinisa baitu arukuserra ekitiinisa ky'Ogu ayamutumire, nuwe w'amazima kandi ataina bugobya. 19Musa atabahe Biragiro? Baitu omuli inywe busamu n'omu arukubikwata. Nimuserurra ki kunyita?” 20Nukwo abantu kumugarukamu bati: “K'oina Sitaani! Nooha arukuserra kukwita?” 21Nandiki Yesu ati: “Nyowe nkakora ekintu ekyabahuniriize inywena. 22#Lev 12:3; Kub 17:10.Musa akabaragira okusarwa (tinukwo kugamba ngu: okusarwa kunu kukatandikira hali Musa, nangwa; baitu kukarugirirra kimu hali baisenkuru inywe kuruga ira); kandi na inywe musara omuntu ha Sabbato. 23#Yoh 5:9.Omuntu obu araaba naasarwa ha Sabbato, nukwo Ebiragiro bya Musa bireke kucwibwa, habwaki nimumbiihirirwa habw'okukiza omubiri gwona gw'omuntu ha kiro kya Sabbato? 24Muleke kucwa emisango nimurorra ha nzooka y'omuntu, baitu mucwege emisango omu bwinganiza.”

Abantu nibeekaguza ha ndugirro ya Kristo

25Abantu abamu aba Yerusaalemu baakaguzangana bati: “Omusaija onu tinuwe barukuserra kwita? 26Darawe naabaza bbwa, kandi tibaina eki bamugambiire! Rundi abalemi bananukire kwo onu nkooku ali Kristo? 27Ningira itwe nitumanya onu nambere aruga; baitu Kristo obu aliija, busaho n'omu alimanya nambere arukuruga.” 28Nubwo Yesu, ow'akaba naayegesa omunju ya Ruhanga, yagambire n'iraka likooto ati: “Ego, nyowe mummanyire, kandi nimumanya nambere naarugire. Ntaije habwange nyenka baitu haroho ayantumire, Ogu w'amazima, kandi inywe timurukumumanya. 29Nyowe mmumanyire, habwokuba nkaruga hali Uwe, kandi nuwe yantumire.” 30Aho baaserra kumukwata; baitu busaho n'omu ayamutaireho engaro, habwokuba akasumi ke kakaba katakahikire. 31Obu, abantu baingi bakamwikiriza nibagamba bati: “Mara Kristo obu aliija, alikora ebyamahano ebirukukira eby'onu?”

Abalinzi nibatumwa kukwata Yesu

32Abafalisaayo bakahurra abantu nkooku barukumubazaaho obuntamantama. Ekyarugiremu: banyakatagara abakuru n'Abafalisaayo nukwo kutuma abalinzi b'Enju ya Ruhanga bamukwate. 33Nubwo Yesu yagambire ati: “Nkyali na inywe okumara akasumi kake; nukwo ngaruke hali Ogu ayantumire. 34Mulinserra, timulinzoora; kandi nambere ndi timulisobora kuhikayo.” 35Abayudaaya nukwo kukaguzangana bati: “Onu naagonza kugenda nkaha nambere tutalimuzoora? Naayenda kugenda omu Bayudaaya abaararangiire omu Bagiriiki nukwo ayegese Abagiriiki? 36Naaba naamanyisa ki obu arukugamba ati: ‘Mulinserra, timulinzoora’; kandi ati: ‘Nambere ndi timulisobora kuhikayo’?”

Yesu nuwe nsoro y'amaizi ag'obwomeezi

37 # Lev 23:36. Ha kiro kikuru eky'okumalirra obugenyi, Yesu akeemerra mu bantu naagamba n'iraka likooto ati: “Obu haraaba haroho anyakwina iroho, aije nambere ndi, anywe. 38#Ezek 47:1; Zek 14:8.Anyakunyikiriza, nk'Ebihandiiko Ebirukwera oku bigamba: ‘Obwambu bw'amaizi g'obwomeezi buligera niburuga omunda ye.’” 39Eki akakigamba ha Mwoyo Ahikiriire, abarukumwikiriza ou bakaba bali b'okutunga. Omu kasumi ako Mwoyo akaba atakagabirwe, habwokuba Yesu akaba atakanyumiziibwe.

Nibongera kuhakana ha ndugirro ya Kristo

40Obu baahuliire ebigambo ebi, abamu muli bo baagamba bati: “Onu nuwe kwo murangi oli,” 41Abandi bati: “Onu nuwe Kristo.” Baitu abandi baakaguza bati: “Mara Kristo w'okuruga Galiraaya? 42#2 Sam 7:12; Mik 5:2.Ebyahandiikirwe tibirukugamba ngu, Kristo ali w'okuruga omu ruganda rwa Daudi, kandi omu Betelehemu, ekyaro Daudi eki yaikairemu?” 43Nahabweki haabaho okwebaganiza omu bantu hali uwe. 44Abamu bakagonza kumukwata, baitu busaho n'omu ayamutaireho engaro.

Nikodemo naatonganirra Yesu

45Nubwo abakuru b'abalinzi baagarukire hali baanyakatagara abakuru n'Abafalisaayo; abo baabakaguza bati: “Ekibatangire kumuleeta kiki?” 46Abakuru b'abalinzi baabagarukamu bati: “Busaho n'omu arabalize nk'omuntu ogu!” 47Abafalisaayo nukwo kubakaguza bati: “Kandi na inywe muhabisiibwe? 48Omu balemi rundi omu Bafalisaayo harumu abaramwikiriize? 49Ekitebe kinu ky'abantu ekitamanyire Biragiro, ky'okukyenwa.” 50#Yoh 3:1,2.Baitu omu omuli bo, nuwe Nikodemo ayaizire hali Yesu kara, yabakaguza ati: 51“Ebiragiro byaitu bisingisa omuntu omusango batabandize kumutonganiza n'okumanya eki yakozire?” 52Baamugarukamu bati: “Ntamanya na iwe oli Mugaliraaya? Serra, oraarora Galiraaya nkooku etali y'okurugwamu omurangi.” 53Bbo baagenda, buli muntu yakwata ogw'owaabu.

Atualmente Selecionado:

Yoh 7: BRR2008

Destaque

Copiar