GENESISE 8
8
Bokhutlo jwa morwalela
1Modimo wa gopola Noa le sengwe le sengwe se se tshedileng, le diruiwa tsotlhe tse o nang natso mo ntlong e e kokobalang; Modimo wa fokisa phefo mo lefatsheng, metsi a kokobela. 2Metswedi ya boteng le yone ya thibala le dithoba tsa legodimo, le pula e e tswang legodimong ya kgaodiwa. 3Metsi a nna a boa a fokotsega mo lefatsheng ka metlha yotlhe; morago, malatsi a a 150 a sena go feta, metsi a ngotlafala. 4Ya re ka kgwedi ya bosupa, ka letsatsi la lesome le bosupa la kgwedi, ntlo e e kokobalang ya ema mo dithabeng tsa Ararate. 5Metsi a nna a ngotlafala ka metlha yotlhe go ya go fitlha mo kgweding ya lesome; ka kgwedi ya lesome, le ka letsatsi la ntlha la kgwedi, ditlhora tsa dithaba tsa bonala.
6Ga dirala ya re malatsi a le 40 a sena go feta, Noa a bula fensetere ya ntlo e e kokobalang e o neng a e dirile. 7A ntsha mohukubu, mme wa tswa wa dikologa dikologa, ga tsamaya metsi a kgala mo lefatsheng. 8A ba a ntsha lephoi, go bona gore a metsi a setse a ngotlegile mo lefatsheng. 9Mme lephoi la se ka la fitlhela gope fa le ka bayang monoto wa lone gone, la boela kwa go ene kwa ntlong, gonne metsi a ne a sa ntse a bipile lefatshe lotlhe fela; a ntsha seatla sa gagwe, a le tsaya, a le busetsa mo go ene, mo ntlong. 10A nama a sa tlhotse malatsi a mangwe a supa, a ntsha lephoi mo ntlong gape. 11Lephoi la boela kwa go ene maitseboa mme la bo le hupile mo molomong wa lone letlhare la motlhware. Jalo Noa a itse fa metsi a setse a ngotlegile mo lefatsheng. 12A fela a tlhotse malatsi a supa gape, a ba a ntsha lephoi gape mme la se ka la tlhola le boela kwa go ene.
13Ga dirala, ya re ka ngwaga wa 601, ka kgwedi ya ntlha, le ka letsatsi la ntlha la kgwedi, metsi a bo a kgadile mo lefatsheng. Noa a tlosa sekhurumelo sa ntlo, a okomela, mmu wa bo o omile. 14E rile ka kgwedi ya bobedi ka letsatsi la 27, lefatshe la bo le omeletse.
15Modimo wa raya Noa, wa re: 16“Tswa mo ntlong e e kokobalang, wena, le mosadi wa gago, le bomorwao, le basadi ba bomorwao. 17O bo o tswe le sengwe le sengwe sa tse di tshedileng tse o nang natso, sa ditshedi tsotlhe; dinonyane, le diruiwa, le sengwe le sengwe se se gagabang mo lefatsheng, gore di tle di tsale thata, di ate, di ntsifale mo lefatsheng.” 18Noa a tswa, le bomorwawe, le mosadi wa gagwe, le basadi ba bomorwawe. 19Phologolo nngwe le nngwe le sebatana, se se gagabang sengwe le sengwe, le nonyane nngwe le nngwe, sengwe le sengwe se se tsamayang mo lefatsheng ka fa ditshikeng tsa tsone, tsa tswa mo ntlong e e kokobalang.
Noa o ntsha setlhabelo
20Noa a agela Jehofa sebeso: a tsaya ga ditshedi le phologolo nngwe le nngwe e e itshekileng, le ga nonyane nngwe le nngwe e e itshekileng, a isa ditshupelo tsa phiso mo sebesong. 21Jehofa a dupa monko o o monate, Jehofa a ithaya a re: “Ga nketla ke tlhola ke hutsa mmu gape ka ntlha ya motho, ka gobo go akanya ga pelo ya motho go le bosula go tswa bokaung jwa gagwe; le gone ga nketla ke tlhola ke laila dilo tsotlhe tse di tshelang jaaka ke dirile. 22E tlaa re ka metlha yotlhe lefatshe le sa ntse le leyo, ga go ketla go khutla letsema le thobo, serame le mogote, lotlhabula le mariga, motshegare le bosigo.”
Atualmente Selecionado:
GENESISE 8: TSW08NO
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Bible Society of South Africa 1992. Used with permission. All rights reserved.
