Mbete Matiye 24
24
1Zezu ti̧h ke ɓil ila vul kani Ŋgerzah ƴo tɔrna bale, nzuk-dih fal yeri loh ma ta̧w ye sɔk ni ke ko vulri ké na ɓil ila vul kani Ŋgerzah ɓahri, fe mbohna-u ndu̧y su mbamba#24.1 Ku mboh vul kani Ŋgerzah ke baw kasaw a pukiri kú-u fel. Pehna kasaw a haniri peh mah metere 12, gaŋna-u mah metere 4, ahna-u mah metere 6. Ku roŋ falu ke lari lɔr hi̧ vulaw ndu̧y su kona mbamba..
2Mí Zezu el ke ɓayu hi̧ niri ɓahri : « I ko ra ko-ko gaŋ le wo ? Kasaw-mboh vuluri ké su kona luki-aw ra, mi ƴo ɓah ɓayay hi̧ wuri, nzukri ɓay haw riw ku̧ siɓa. Kasaw mbew ké ɓay toŋ síɓa ta-a. »
3Ku ka̧h tul kasaw Oliveh. Zezu kaɓ siɓa bale, nzuk-dih fal yeri loh ma ta̧w ye. Ku ɓahri : « Mú ɓah tehɓayu hi̧ na, náh lah. Seh suŋ mí vulri-aw ɓay ɓeɓu le ? Fe sɔkna fe mí ɓay sɔk na gina wo le ? A fe mí ɓay sɔk na ɓahri, sew a ɔh tɔr sewri ka̧h da le ? »
4Zezu yih nzak woyri ɓahri : « Í ko-ko rɔkɔ nzuk ɓá hi̧ wuri í reh ful, 5ɓayu ké nzukri ɓa ŋgi̧-u ɓay mbi riŋ ɗina bi ɓahri, a woyri ku ɓa Ŋgermbay. Mí ku ɓay ra̧h keni daɓa nzukri. 6I ɓay lah ɓay ŋgermuri ma gini ma sa̧. Í ko tul woiri. Í hi̧ law woiri ɓá lu ya. Na ani ani gaŋ kara ŋgermu ɓay laɓu. Keni-aw kara sew a ɔh tɔr sewri ta-a ɓáy. 7Sa̧wnzukri ɓay ur ruh ŋgermu ke sa̧wnzuk a ɓoruri. Puh laknari ɓay ruh ŋgermu ke puh lakna a ɓoruri pi. Ɗaka ɓay lih puhri, tusiɓa ɓay laŋ yik yik ke gelri ɓoɗ ɓoɗ. 8Kosehri-aw ɓa titil fe munu ɓay na kandɔk mahɓil ké kaɓ peŋe ɓay mbuŋna kaŋ. 9A woiri ba, ku mgbá wuri ɓay laɓ wuri koseh. Ku í wuri. Sa̧wnzuk a ɓoruri ɓay fu̧y wuri ɓayu ké i ƴo tul riŋ bi. 10Riŋ bi ba, ɓay na ɓa fe zi̧rma daɓa nzukri. Ku ɓay te haniri, ku ɓay fu̧y haniri.
11Daɓa nzukri ɓay sɔk mun woyri ɓa gun nzak pihna Ŋgerzahri, mí ku ɓa gun nzak pihna Ŋgerzah a fohri, ku hí̧ daɓa nzukri reh ful. 12Ɓay tul fe laɓna-saŋ Ŋgerzahri ké ɓay ya̧ gel ya̧h ya̧h, mí law sana daɓa nzukri ɓay el voh ɗeŋ ɗeŋ. 13Mí nzukay ké su̧h law ye ké tul riŋ bi si ka̧h hul ye le, ke ti̧h ke ndɔk hul. 14Kandɔkaw mí ɓaysuki lák mbay Ŋgerzah ɓay seh hi̧ sa̧wnzukri riw ké gelri gbam ɓá lah ɓayu dara mí sew a ɔh tɔr tukala ɓá ka̧h ɓáy.
15Kaŋ dale nam ké i ko fe ra̧m#24.15 Ɓay tu ɓay fe ra̧m í ki̧ Mbete Daniel 7.20-21, 24-25; 11.40-45 ke Mbete 2 Tesaloniri 2.3-10 ke Mbete Ten sa̧wɓay 11.7; 12.9. ké mah kona ya mí nzukri si kan ɓil vul kani ké gel ƴona Ŋgerzah kandɔk ké Danyel gun nzak pihna Ŋgerzah vbeh ɓayu lewsa̧ ra le, nzuk ké ƴo ki̧ mbete-ay ɓá tu ɓa teh-u, 16nzukri ké ƴo tusiɓa Zude#24.16 Vul kani Ŋgerzah na Zurusalem ké tusiɓa Zude. ɓá ɗuk ma tul kasawri wara. 17Nzuk ké ƴo tul vul ɓá ɗuk fe ye kiriŋ#24.17 Ziɓri mboh vul le, ku laɓ tul vul ɓa ah-u ɓa gel kaɓna ɓay ɔk mun.. Ké lu kerɓay-fa̧h fe yeri ké ɓil vul. 18Nzuk ké ƴo waka ba, ɓá el gi puh ɓay mbi mah gar ye ya. 19Kúy. Namaw ra mah ɓilri ke mah gun nzak pamri ɓay ko seh mbamba. 20Kaŋ le í goŋ Ŋgerzah ɓay rɔkɔ fe-u ɓá laɓ ke ɓil belem, ɓay rɔkɔ fe-u ɓá laɓ ke nam ɔkna pi#24.20 Sa̧w nzak ɓahri, few gel telri Ké tusiɓa Zude, gel ɗukna se se ɓay mbih ke bɔbɔɗe ké few gel telri, mí nah vbeh belem ɓay hi̧ karaŋri ɓá lah ɓahri, ɗukna se-se., 21ɓayu ké koseh ɓay kal ŋgɔŋ. Ur ke titilu ké Ŋgerzah laɓ nunmbam ke tusiɓa gi ka̧h guri-ay, sam koseh a kandɔkaw laɓ nzukri bɔk mbew ya ɓáy, mí ta laɓ nam a ɓoru mba wu̧m wara. 22Ŋgerzah hi̧ nam koseh-awri el fal ya le, nzuk mbew ta tí̧h ke ndɔk hul ya. Mí ɓay tul nzukri ké Ŋgerzah lu ɓa sa̧w ye le, ke ɓay hi̧ namuri el fal.
23Wara mí nzuk a suŋ suŋ ké ɓahri, í ko, Ŋgermbay mí ƴo-ay, mini, ke ƴo sa̧-aw, le, í ya̧ ɓay ye ya, 24ɓayu ké nzuk nzak rɔknari ɓay sɔk mun woyri ɓa Ŋgermbay ya le, ɓa gun nzak pihna Ŋgerzah. Ku ɓay laɓ fe saŋ a bawu bawuri ke feri ké mah kona ya hi̧ nzukri reh ful. Ku ɓay leh ŋgerna woyri ɓay hi̧ nzukri ké Ŋgerzah lu niri ɓa sa̧w ye ɓá reh ful. 25Í ko, mi ɓah ɓayu hi̧ wuri i lah pol da. 26Kaŋaw ba, gelke nzuk gi ɓah hi̧ wuri ɓahri, í ko, Ŋgermbay ti̧h ƴo ɓil lawkɔr le, í si ri ya. Ku ɓah hi̧ wuri ɓahri, ke kaɓ ɓil vul ké gbu̧h gel sa̧-aw kara í ya̧ ɓayu ya pi, 27ɓayu ké gina gun nzuk pirmatul ké tul nzukri ra ɓay na kandɔk mbam. Mbam sak yela ké fál tí̧h seh kpu̧ru ka̧h fál ríŋ seh hi̧ nzukri riw ko. 28Gel ké hul ɓu ri, sa gelaw mí tamiri mbu̧h ri hani.
29Fal koseh-awri le, seh ɓay sih nduŋ. Few ta teh gel mba pi. Gunwu̧y nunmbamri ɓay ga̧y ku̧ siɓa. Ŋgerna fe nunmbamri#24.29 Ɓay tu ɓay fe nunmbam a ŋgeruri le í ki̧ Mbete Esaïe mah-u 34 gel ki̧na 4 ke mah-u 13 gel ki̧na 10. ɓay laŋ yik yik. 30Wara mí fe ké sɔk ɓay tul gun nzuk pirmatul ɓay ti̧h ké nunmbam hi̧ nzukri ko dale, sa̧wnzuk tusiɓari gbam, ku vbá̧ haŋ woyri zaɗ zaɗ vuh rew keni. Ku kó gina gun nzuk pirmatul ɓil ɗikmambam ke ŋgerna mbay ye ɓil riŋ ɗina a luki. 31Ke píh tem nzak pihna yeri ul baw ti̧w ké mgbe. Ku mbú̧h nzukri ké-e lu ɓa sa̧w ye ke ti̧w tusiɓa ké niŋay gbam ur ke fál tí̧h seh si ka̧h fál ríŋ seh. Ku mbú̧h niri ur ke tusiɓa gbam si ka̧h gel a gbu̧h-u ké nunmbam sa̧.
32Í ko kpuh nzu̧y, kpuh nzu̧y ƴo sɔk fe ɓay í tu. Gelke kpuh nzu̧y tuŋ mí el loŋ gay dale, i tu ɓahri se, nzak mbam ka̧h da. 33Kaŋ pi mí gelke i ko feri-aw riw ti̧h le, í tu ɓahri, gun nzuk pirmatul ka̧h nzakful da. 34Ɓa ketina. Mi ƴo ɓah hi̧ wuri ɓahri, gun tukala-ayri ta kal ya, feri-aw gbam ɓá ti̧h dara ɓáy. 35Nunmbam ke tusiɓa ɓay ka-kal, mí ɓay biri ba, ɓay na kpatara.
36Ɓay tu ɓay nam gina gun nzuk pirmatul mini sa̧wseh-u, nzuk mbew ta tu ya. Tem nzak pihna Ŋgerzahri ké ƴo nunmbam kara ta tu ya, gun kara ta tu ya pi. Ɓa baah ke hȩk mí tu,
37ɓayu ké fe ké laɓ ke sew Nuwe ra ɓay laɓ seh-aw ké gun nzuk pirmatul ɓay ti̧h tul nzukri kaŋ pi.
38Dara mbih ɓá ya̧ tusiɓa ra, nzukri toŋ su̧ fe, toŋ nzo fe, wo̧rori ƴo ya̧ wu̧y, bah gunri ƴo hi̧ gun woyri ya̧ wo̧ro, mí fe-u laɓ kaŋ kaŋ si ka̧h nam ké Nuwe rih vul tul mbih.
39Mí ku tu ya kpu̧ru ka̧h nam ké mbih ya̧ niri.
Seh ti̧hna gun nzuk pirmatul ké tul nzukri kara ɓay na kaŋ pi.
40Wara mí nzukri seɗe ɓay ƴo waka. Ku mbí nzuk a mbewu ba, poŋ nzuk a mbewu ba. 41Wu̧yri seɗe ɓay ƴo gel-naŋ fe. Ku mbí wu̧y a mbewu ba, poŋ wu̧y a mbewu ba.
42Kaŋaw mí í ƴo tul bɔk ɓay fe le,
i tu nam ké Gaŋ woiri ɓay el gi keni ya.
43I tu ɓahri, nzuk puh tu ra sa̧wseh ké riɓa ɓay gi rih fe ye le, ke ta na nam ya. Se-se ɓay ké hi̧ riɓa ɓá haw vul ye.
44Sa̧wu mí a woiri kara í ƴo tul bɔk ɓay fe le, i ta tu sa̧wseh ké gun nzuk pirmatul ɓay gi keni ya.
45Mí-aw le gun-laɓ pihna ké ker law, ké law ye ƴo mbew ke bahgaŋ ye, ke na ani le ? Bahgaŋ ye hi̧ ni ke ko tul bɔh-laɓ pihna yeri, mí ke wal fe su̧na hi̧ niri ke sa̧wseh-uri gbam. 46Pol tehna ɓay na tul ye, a ye ké bahgaŋ ye el gi ziŋ ni ké tul pihna. 47Ɓa ketina. Mi ƴo ɓah hi̧ wuri ɓahri se, bahgaŋ ye ɓay el ndoh fe ziŋna yeri gbam ku̧ ndɔk ye.
48Gun-laɓ pihna a suya-u ba, ker ɓahri, bahgaŋ ye ra doro-u ɓay ɗih sal sal. 49Mí ke ti vba̧ bɔh-laɓ pihna yeri pi, su̧ ɓil ye pi, toŋ nzo yim ziŋ nzuk-ta yimri pi. 50Bahgaŋ ye ɓay ti̧h tul ye kpur ke nam ké-e tu ya. 51Bahgaŋ ye ra ɓay vba̧ ni nun hul, ke mbú̧h ni ziŋ nzuk-mu̧h ketinari ma kala. Gelaw mí ke vúh rew ke mbihnun darara darara. Ke sú̧ sel ye ŋger ŋger.
Atualmente Selecionado:
Mbete Matiye 24: SIAFNK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
