KA BUKE MUA A MOSE, I KAPA ʻIA KINOHI 7
7
MOKUNA VII.
1 No ke komo ʻana o Noa mā a me nā holoholona i loko o ka hale lana. 11 ʻO ke kai a Kahinaliʻi.
1¶ ʻĪ maila ʻo Iēhova iā Noa, “E komo aʻe ʻoe me kāu ʻohana a pau i loko o ka hale lana; no ka mea, ʻo ʻoe nō o kēia hanauna kaʻu i ʻike ai, he pono i mua oʻu.
2“ʻO nā holoholona maʻemaʻe a pau, e lawe pāhiku aku ʻoe iā lākou me ʻoe, i ke kāne a me kāna wahine; a ʻo nā holoholona maʻemaʻe ʻole, e pāpālua he kāne me kāna wahine.
3“E pāhiku ʻia nō hoʻi nā manu o ka lewa, ke kāne, ka wahine, e hoʻōla i kumu hoʻolaha ma luna o ka honua a pau.
4“No ka mea, ʻehiku lā e koe, a laila e hoʻoua iho ai au ma luna o ka honua he kanahā lā a me nā pō; a e luku ana au i nā mea ola a pau aʻu i hana ai, mai ke alo o ka honua aku.”
5Hana ihola ʻo Noa i nā mea a pau a Iēhova i kauoha mai ai iā ia.
6¶ ʻEono haneri nā makahiki o Noa i ka wā i hiki mai ai ke kai a Kahinaliʻi ma luna o ka honua.
7Komo akula ʻo Noa me nā keiki kāne āna, a me kāna wahine, a me nā wāhine a kāna mau keiki kāne i loko o ka hale lana, no ke kai a Kahinaliʻi.
8ʻO nā holoholona maʻemaʻe a me nā holoholona maʻemaʻe ʻole, a ʻo nā manu, a me nā mea kolo a pau ma luna o ka honua.
9Komo pāpālua akula lākou i loko i o Noa lā, ke kāne, ka wahine, me kā ke Akua i kauoha mai ai iā Noa.
10A hala aʻela nā lā ʻehiku, hiki mai ke kai a Kahinaliʻi ma luna o ka honua.
11I ka makahiki ʻeono haneri o ko Noa ola ʻana, i ka lua o ka malama, a ma ka lā ʻumikumamāhiku o ua malama lā, ia lā nō, huahuaʻi maila nā pūnāwai a pau o ka hohonu nui, a hāmama aʻela nā puka wai o ka lani.
12Hoʻokahi kanahā lā a me nā pō o ka ua ʻana ma luna o ka honua.
13¶ Ia lā hoʻokahi nō, komo aʻela ʻo Noa, a ʻo Sema, a ʻo Hama, a ʻo Iapeta, nā keiki kāne a Noa, a me ka wahine a Noa, a me nā wāhine ʻekolu a kāna mau keiki kāne me lākou, i loko o ka hale lana.
14ʻO lākou me nā holoholona hihiu a pau ma ko lākou ʻano iho, a me nā holoholona laka a pau ma ko lākou ʻano iho, a me kēlā mea kolo kēia mea kolo, e kolo ana ma luna o ka honua ma kona ʻano iho, a me nā manu a pau ma ko lākou ʻano iho, ʻo nā mea ʻēheu a pau, o kēlā ʻano kēia ʻano.
15Komo pāpālua aʻela lākou i o Noa lā i loko o ka hale lana, ʻo nā mea ʻiʻo a pau e hā ana i ka hanu ola.
16He kāne he wahine o nā mea ʻiʻo a pau ka poʻe i komo aku i loko, me kā ke Akua i kauoha mai ai iā ia; a papani aʻela ʻo Iēhova i ka puka ma hope ona.
17Hoʻokahi kanahā lā o ke kai a Kahinaliʻi ma luna o ka honua; māhuahua aʻela ka wai, a hoʻolana aʻela i ka hale lana, a ua kaʻikaʻi ʻia aʻela ia ma luna o ka honua.
18Lanakila aʻela ka wai a māhuahua loa aʻela ma luna o ka honua; a holo akula ka hale lana ma luna o ka wai.
19Lanakila loa aʻela ka wai ma luna o ka honua; a uhi ʻia aʻela nā kuahiwi kiʻekiʻe a pau loa ma lalo o ka lani.
20He ʻumikumamālima nā kūbita o ke kiʻekiʻe o ka wai ma luna; a uhi ʻia aʻela nā kuahiwi.
21A make ihola nā mea ola a pau i holo ma luna o ka honua: ʻo nā manu, ʻo nā holoholona laka, ʻo nā holoholona hihiu, a ʻo nā mea kolo a pau e kolo ana ma luna o ka honua, a me nā kānaka a pau.
22ʻO ka poʻe a pau nona ka hanu ola i loko o nā puka ihu, ʻo nā mea a pau ma ka ʻāina maloʻo, make ihola lākou.
23A pau loa ihola nā mea ola ma luna o ka honua i ka make, ʻo nā kānaka, me nā holoholona, a me nā mea kolo, a me nā manu o ka lewa; a ua hoʻopau ʻia lākou mai ka honua aku; ʻo Noa wale nō kai koe, a me ka poʻe me ia i loko o ka hale lana.
24A lanakila aʻela ka wai ma luna o ka honua, hoʻokahi haneri nā lā a me kanalima.
Atualmente Selecionado:
KA BUKE MUA A MOSE, I KAPA ʻIA KINOHI 7: KBH
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Ka Baibala Hemolele © Partners Development Foundation, 2018.
