Yokana 8

Dako kame Komako di tie Timo Adote

1Do Yesu oko ot i moru me Olibeti. 2Odiko sek Yesu bobo oko ot i tempulo; jo dedede oko bino bute, di en eko bedo piny eko pwonyo gi. 3Jopwony me Iswil kede Iparisayon oko kelo dako kame oudo komako di tie timo adote, di kiko kete i dier jo. 4Gin kiko waco ne Yesu be, “Apwony, wan omako dako noni di tie timo adote. 5#Jolebi 20.10; Iswilia 22.22-24I Iswil wan, Musa ociko wa be poore odidipo epone me mon kame timo kamano kede kide tuno to. Nan in iwaco kop nyo iye?” 6Gin bin kiwaco kop noni pi kino kop ki dog Yesu, tetekeny kiud kop moro kame kiromo pide iye. Yesu oko luro piny di eko wandiko kop piny kede lwete.

7Kakame gin kimeede kede pepenyo Yesu, en eko kiar di eko waco ne gi be, “Wek ngatamoro kikom wu kalikame tie kede dub moro bed dano me agege me uco kidi i kom dako no.” 8Yesu bobo oko luro di eko wandiko kop piny kede lwete. 9Do kakame kiwinyo kede kop mere, kiko cako ot tenge acelacel, cako kibut joadongo. Yesu oko dong kene di dako nono cungo i nyime. 10Yesu oko tingo wange di eko waco ne dako nono be, “Ani gin? Benyo, likame tie ngatamoro kongolo ni kop?”

11Dako nono oko dwoko be, “Rwot, likame tie.”

Yesu oko waco ne be, “Akadi ada likame abino ngolo ni kop; oti, do kur bobo itim dub.”

Yesu en Lero me Piny

12 # Matayo 5.14; Yokana 9.5 Yesu bobo oko waco ne gi be, “Ango en lero me piny; ngat kame luba likame bino ot di etie i colo, do ebino bedo kede lero me kuo.”

13 # Yokana 5.31 Di do Iparisayon oko waco ne be, “In itie jurere keni, do ijura nin likame tie kop me ateni.”

14Yesu oko dwoko be, “Akadi bed bala ango ajurere kena, do ijura na tie kop me ateni, pien ango angeo kakame ango awok kiye kede kakame atie ot iye. Do wun likame ingeunu kakame ango awok kiye arabo kakame atie ot iye. 15Wun ingolunu kop iekite me dano, do ango likame angolo ne ngatamoro kop. 16Do akadi bed bala ango angolo kop, ngolo kop nango tie me ateni, pien udo likame ango kena en kame atie ngolo kop, do ango karacel kede ngat kame oora. 17#Iswilia 19.15Kowandiko i Iswil wu be ijura me jo are tie me ateni. 18Ango amio ijura i koma kena, doko da Papa ngat kame oora mio ijura i koma.”

19Pi mano, gin kiko waco ne Yesu be, “Ani bo Papa ni?”

Yesu oko dwoko ne gi be, “Wun likame ingeanu, akadi ngeno kiton Papa na da. Koto di oudo ingeanu, oudo koto ingeunu kiton Papa na da.”

20En ewaco kope nogi di oudo etie pwony i agola me kano lim i tempulo; do likame ngatamoro oko make, pien esawa mere oudo pwodi likame otuno.

Likame Itwerunu Ot kakame Ango atie Ot iye

21Yesu bobo oko waco ne gi be, “Ango ayaro ot tenge di wun ikounu donyo mona, do ibinunu to i dub wu, pien kakame ango atie ot iye wun likame itwerunu bino iye.”

22Di do Iyudayan oko waco be, “Icuo ni mam bino nekere kene komio ewaco be, ‘Kakame ango atie ot iye wun likame itwerunu bino iye’?” 23En eko waco ne gi be, “Wun iwokunu ki piny, do ango awok ki malo; wun ibedunu jo me piny kan, do ango likame dano me piny kan. 24Ango oudo awaco ne wu be ibinunu to i dub wu, doko ibinunu to i dub wu, kwanyo ka iyeunu be ango inononi.”

25Gin kiko penye be, “In en ngai?”

Yesu oko waco ne gi be, “Man en gikame atieko waco ne wu cako ki agege. 26Atie kede kope atot me ayama i komu, kede gi atot kame apoore waco ne wu raco iye; do ngat kame oora tie kede ateni, doko ango atie waco ne jo me piny gikame ango awinyo kibute.”

27Gin oudo likame kiko niang be Yesu oudo owaco ne gi kop kame mako Papa. 28Di do Yesu oko waco ne gi be, “Ka itiekunu kiarao Wot ka dano i kom musalaba, ibinunu ngeno be ango inononi, kede be likame ango atimo gimoro i akarunikin nango kena, do ayamo gikame Papa opwonya iye. 29Doko ngat kame oora tie keda; likame eweka kena; pien ango nakanaka atimo gikame yomo cunye.”

30Kakame ewaco kede kope nogi, jo atot oko yei en.

Ateni bino Gonyo Wu

31Yesu oko waco ne Iyudayan kame oyei en be, “Ka imeedenu kede lubo kop na, udo wun ibedunu jo kame luba me ateni, 32doko ibinunu ngeno ateni, di ateni ko bino gonyo wu.”

33 # Matayo 3.9; Luka 3.8 Gin kiko dwoko ne be, “Wan ikwae ka Aburaam, doko pwodi wan likame obedo ipasoi ka ngatamoro. Dwong kop nyo komio in iwaco be, ‘Kobino gonyo wu’?”

34Yesu oko dwoko ne gi be, “Ateteni, ateteni awaco ne wu be, ngat acelacel kame dubo, en edoko epasoit me dub. 35Epasoit likame dong bedo i paco atwal, do awobi kame konywalo i paco dong bedo i paco atwal. 36Aso, ka Wod gonyo wu, ibinunu bedo jo kogonyere ateteni. 37Ango angeo be wun ibedunu ikwae ka Aburaam, do di doko imounu neka, pien idagunu kop na. 38Ango awaco ne wu gikame aneno kibut Papa na, do wun itimunu gikame iwinyunu kibut papa wu.”

39Gin kiko dwoko ne be, “Papa wan en Aburaam.”

Yesu oko waco ne gi be, “Koto wun idwe ka Aburaam, oudo koto itimunu gikame Aburaam bin otimo. 40Do wun nan itienu mono neka, ango dano kame awaco ne wu kop me ateni kame awinyo kibut Rubanga; likame man en gikame bin Aburaam otimo. 41Wun itienu timo gikame papa wu bin otimo.” Gin kiko waco ne be, “Wan likame nywal me epae; wan otie kede Papa wa acel, en Rubanga.”

42Yesu oko waco ne gi be, “Koto Rubanga en Papa wu, oudo koto imaranu, pien ango awok kibut Rubanga; likame ango abino i mit na kena, do en kame eora. 43Pinyo komio likame itienu niang gikame ango awaco? Etie kamanoni pien wun likame iyeunu kop na. 44Papa wu en Sitani, doko cunyu mito timo gikame papa wu mito. Cako i kare me agege en ebedo nganek, doko likame ecungo i ateni, piento en eli kede ateni. Kame etie ngalo, udo etie waco gikame enao timo, piento en ebedo ngat kame ngaangalo, doko en won angalo. 45Do wun idagunu yei ango, pien ango atie waco ne wu gi me ateni. 46Ngai kikom wu kame karuno nyuto dub kame ango atimo? Do pinyo komio ka ango awaco ne wu kop me ateni likame iromunu yei ango? 47Ngat kowok kibut Rubanga winyo kope ka Rubanga; wun likame iwinyunu kope kame ango awaco ne wu, pien wun likame iwokunu kibut Rubanga.”

Yesu kede Aburaam

48Iyudayan oko dwoko ne Yesu be, “Mam etie gi me ateni ka wan owaco be in Ngasamaria, doko itie kede jwogi?”

49Yesu oko dwoko be, “Ango ali kede jwogi; ango aworo Papa na, do wun likame iworanu. 50Do di ango likame amo deyo pira kena, do tie ngat kame tie mono, doko en kame ebino bedo ngangolkop. 51Ateteni, ateteni awaco ne wu be, ngat kame yei kop na likame ebino bilo to atwal.”

52Iyudayan oko waco ne be, “Nan wan otieko ngeno do be, ateteni in itie kede jwogi. Aburaam oto bala bin inabin da, do doko di in itie waco be, ‘Ngat kame yei kop na likame ebino bilo to.’ 53Iparo be in piri dwong kalamo Aburaam, kame da bin oto? Akadi inabin da oto. Iparo be in do ngai?”

54Yesu oko dwoko be, “Ka ango amio deyo i koma kena, deyo na udo kony mere li. Ngat kame miango deyo en Papa na, en nono kame wun iwacunu be Rubanga wu. 55Wun likame ingeunu en, do ango angee. Ka koto oudo awaco be likame angee, koto abedo ngat kame ngalo bala wun. Do ango angee doko alubo kop mere da. 56Papa wun Aburaam bin olelo be ebino neno kare me bino na; da en eko neno di cunye oko bedo yom.”

57Iyudayan oko waco ne be, “Pwodi likame ber mwaka nin oromo ot kany da, in do kong ineno Aburaam ki tuai?”

58Yesu oko waco ne gi be, “Ateteni, ateteni awaco ne wu be, di pwodi Aburaam oudo li, ango oudo atie.”

59Kikano, gin kiko kwanyo kide di kimito didipo en kede; do Yesu gire oko pwono, di eko yai tenge ki tempulo.

Atualmente Selecionado:

Yokana 8: BILKDC13

Destaque

Copiar