Luka 17

Akisech

(Matayo 18:6-7,21-22; Mariko 9:42)

1Tolimok Yesu ngirukitos keng tama, “Iteni dir epote ngakiningioto na epedorete akitosech ngitunga, nakaneni etioko nginyas eanyuni itwaan ni eyauni ngakiro nguna! 2Ejoikinit eenikinio akiries lomosiring tachakakinae nanam, akidwang ngesi akitosech ipei aluuchik kalu. 3Tochoikinos kanguna isubete esi!

“Ani kisechakini iyong lokaatokon, kikilak ngesi, ani kelimo tolung ngasechesea, torimak ngesi. 4#Mat 18:15 Ani kisechak ngesi iyong ngasechakinet ngakan-kaarei akolongit apei, sodi bu nikon ngabunet ngakan-kaarei tama, ‘Alimo ayong ngasechesea kang alung, ejoikinit iyong irimakini ngesi.’ ”

Anupit

5Tolimokis ngimeanara Ekapolon tamasi, “Kitunupae sua noi.”

6Tatachak Ekapolon kesi tama, “Ani kedit anupit kus ketia echokit a ekoropus, ilimokinete esi ekitoe lo tamasi, ‘Toditun anaten, sodi min torup ananam!’ Nakaneni ikokini neni.

Ngitichisio a ekasuban etich

7“Ani keyei ipei kus ni eyei ekasuban etich lo itae kori iyoki ngamesekin. Na ebunio ngesi alomana, itamari iyong ngesi kiboikin kwap atipei kimuj a? 8Mam jik! Erai ilimokini iyong ngesi tama, ‘Kidorok akimuj, tanap eworu lokipoet sodi kiyuun ayong ibore daang, kidarou mono atorumo ayong akimuj ka akimat ngakipi, ani erumor kimuj iyong ka akimat ngakipi.’ 9Nakaneni nyebuakinio ekasuban etich ngolo alakara ana asub ngesi, kori ai? 10Ikote neni tani anikus, na irumoreta esi nguna daang kilimokinio atamar tosuba, tamasi, ‘Kirai sua ngikasubak etich lupasiek, kisub sua na kichamakinitae kisubi.’ ”

Etangalekini Yesu ngitunga ngitomon lu adeakasi enomokere

11Na alosio Yesu atenea Yerusalem, kitor kiding Samaria ka Galilaya. 12Na alomarea ngesi nadakar ache, kiriamun ngesi ka ngitunga ngitomon lu adeakasi enomokere, awaasi kesi echadakina. 13#Lawi 14:1-32 Kiremasi tamasi, “Ekapolon Yesu! Kisienoi kare sua!”

14Na engolikinea Yesu kesi tolimok tama, “Kapesi esi sodi kisemoto ngimurok a akai a Akuj.”

Na anangeta lorot eloose, apot tangalekis tojokearos. 15Nakaneni epei kech na ayenea atamar angaleki edeke keng, tobongo ipuro Akuj irema. 16Abu tadakakin kwap nakejen a Yesu, tolimok Yesu atamar alakara ngesi noi. Arai itwaan ngini Esamariat. 17Tolimok Yesu tama, “Meere takae ngikiliok ngitomon kesi etojokio a? Nyaalu tokona lukan-koomwon? 18Nyoni eraakar itwaan a akwap anache bon ngesi ebonguni abuakin Akuj alakara?” 19Tolimok Yesu ngesi tama, “Tonyou tolot ijoker iyong ani inupitor.”

Abunere a Apolou a Akuj

(Matayo 24:23-28,37-41)

20Kingita Ngiparisayo ngiche Yesu tamasi, “Kori ebunio Apolou a Akuj,” abu tatachak kesi tama, “Nyebuni Apolou a Akuj kotere ngakitoodikinet sodi toyenere. 21Mam itwaan ni etamari, ‘Kingolik nyelo kane!’ kori, ‘Nyeye kaama!’ kainyo eyei Apolou a Akuj nikus.”

22Sodi tolimok Yesu ngirukitos keng tama, “Enangi ngirwa lu isaketa esi akingolikin akolongit tani apei a Lokookeng a Itwaan, nakaneni nyingolikinete jik. 23Epete lu kilimokinete esi tamasi, ‘Kingolikisi ama!’ kori ‘Kingolikisi nege!’ Nakaneni nyiilot kori nyiiwapakis kesi. 24Kainyo ikoni abunere a Lokookeng a Itwaan eger lo imiliaunea niakwaan alowae a epei tanang lowae loche sodi tokwangik adis daang. 25Nakaneni ejoikinit ngesi mono eboliare lokojokon, nabo tongero ngitunga a ngirwa kalu. 26Ikwaanikinosi ngakiro a ngirwa a Lokookeng a Itwaan ka nakolong a ngirwa a Noa. 27Emuji itwaan daang tamasi, eutanarete ngikiliok nabo epotonorio ngapesur kuutae, tanang akolongit na alomarea Noa tooma natubwa dio tomunyasi ngakipi ngitunga luche daang. 28Ikwaanikinosi ka ngirwa lukolong a Loti, emujete ngitunga daang tamaase, agielete nabo togielanarete, etaate nabo todukete. 29Nakaneni akolongit na arotokinio Loti alo Sodom sodi totiyaun akim ka akibirit anadis, tarama loger a akiru dio tomunyasi kesi daang. 30#Siak 6:5-8 Ikokinete ngakiro neni na etakanunea Lokookeng a Itwaan. #Siak 7:6-24 #Siak 18:20–19:25 #Mat 24:17-18; Mar 13:15-16 #Siak 19:26 #Mat 10:39; 16:25; Mar 8:35; Luk 9:24; Yoa 12:25

31“Akolongit ngina nyejoikinit itwaan ni eyei kidiama kai etiyaun alemun ngiboro keng lu eya tooma kai. Kongina pei, itwaan ni eyei mana dang, nyejoikinit ngesi ebongori kai. 32Kitamutu aberu a Loti! 33Itwaan cha daang ni esaki akirichun akiyar keng, ebukori, ni ejali akiyar keng, irichuni. 34Kalimokinit ayong esi atamar, akolongit ngina nakwaare, eperete ngitunga ngiarei alokitanda a epei: elemario ipei, kimiekinae niche. 35Eriamunio ngaberu ngaarei iriete aapei: elemario apei, kimiekinae nache. [ 36Eriamunio ngikiliok ngiarei esubete etich, alomana: elemario epei kimiekinae loche.”]

37Kingita ngirukitos keng ngesi tamasi, “Aliwae Ekapolon?”

Tatachak Yesu tama, “Ni eyei ibore nikatoan ngesi iudakina ngataruk.”

Atualmente Selecionado:

Luka 17: ABIBILIA

Destaque

Copiar