ZƐKARIA 14
14
AGWANGWAMA Bicinji Jɛrusalɛm
1Hioko ma, aka AGWANGWAMA e ci ba, aka na ɛɛ zhɛ o sugo i'wɛŋnɛ hiŋ, ɛɛ zhɛ kaa o dwotwogonu iŋ na ashashɛ hiŋ. 2N zhɛ mo sotulonu edenji elele, maa a sukakanɛ Jɛrusalɛm nu ujasa, ɛ zhɛ a lashɛga ụshɛpwụ ata, ɛɛ zhɛ o sugo i'wɛŋnɛ no shimwono, ɛ zhɛ o sugo eyikwo aba ni iji, ashashɛ atwa ụshɛpwụ ata zhɛ zha na ti'ima, ama a zha shɛ a bacɛnga atwa na vwɛ nụ ụshɛpwụ ata o. 3Nazhɛ AGWANGWAMA zhɛ a banɛ ba nda ujasa ne edenji ata gana na boo joswo la nụ ụjita ujasa. 4Aka ata ci hwuŋ, bi zhɛ bo shikono ni Ishɛmɛ Buta ɛtɛ namɛ nu umbe Jɛrusalɛm geri bu uwaŋna-banụ uuwa i ci uwaŋna-twonuo. Ibɛ po Ishɛmɛ ɛtɛ Buta zhɛ ya bagwụ na ashashɛ, i zhɛ ya 'yaga ulomu na heri, ashashɛ ishɛmɛ ɛtɛ ike zhɛ tuzuba, ashashɛ ibɛ iyebi zhɛ tuta. 5Hi zhɛ hio gozhigo hio dulo ulomu nshama mi mi, iwɛnɛ tu wɛɛ zhɛ wa ta tuhwulo tutu Azɛl. Hi zhɛ hio gozhigo gana ala ehi gezhiji la ta cɛnjɛ ti zhingotu na aka Uzia Agwuma Juda. Nazhɛ AGWANGWAMA na shɛ Agwatana mi#14:5 AGWANGWAMA na shɛ Agwatana mi: Gana Rihib rɛ jɛmɛ ta du. Ama tɛjɛshɛrɛga tu ko ti hiɛŋ, AGWANGWAMA na shɛ Agwatana bụ. zhɛ a zhagajɛ na atwa ubwa#14:5 na atwa ubwa, kwo kaa nu bwa: ubayiburu uko hiɛŋ, na bụ. tijilo kpaaŋ.
6Aka ata ci hwuŋ, okwo mpiala kwo kaa oholobwo zha shɛ a nama o. 7Uhioko-uhwaŋna tuba zhɛ wa nama tutu, AGWANGWAMA kiri mepi aka na yɛɛ zhɛ ya sha gana ata, ụjita zha shɛ wo sho, uwaŋna kaa zha shɛ wa banɛ o, okwo uhioko-uhwaŋna zhɛ na ta okwo nụ ụjita tutu, tishi ti zha shɛ ta nama ya o.
8Aka ata ci hwuŋ, meni mu uraiŋ mi zhɛ ma banɛ nu Jɛrusalɛm mu na fwunga. Ashashɛ muba mu ko mi zhɛ mu na fwunga geri bi itekwu uwaŋna-banụ, ashashɛ mu na mi yebi mi zhɛ mu na fwunga geri bi itekwu uwaŋna-twonuo, mi zhɛ ma ta tuhwulo ta tufwunga nu ubwaza gana na mɛɛ zhɛ mu na fwunga nu ushwo.#Izik 47:1; Jon 7:38; N-ndu 22:1
Agwuma Juda Ubwa Shɛ Agwuma na Hwuri Kpaaŋ
9AGWANGWAMA ubwa kaa zhɛ ba sha Agwuma na cɛnjɛ tu unyizo kpaaŋ. Aka ata ci hwuŋ, AGWANGWAMA oko kiri bụtụ be elele zhɛ na zhɛba. Izeci ɛtɛ ibwɛ ike ike du kaa ɛɛ zhɛ a mapa bụ.
10Cɛnjɛ te elele ti zhɛ ta jɛshɛrɛga ta sha udadarɛ kpaaŋ, te kwune nu Gɛba uuwa i ci Rimon ata namɛ tuta tu Jɛrusalɛm. Ama Jɛrusalɛm zhɛ wa shana ashɛpwụ na rungwutwonu uŋ ashɛkpa, te kwune no Odubo Bɛnjamin uuwa i ci Odubo ata Angwụshɛ, uuwa i ci Odubo Tiringeni, te kwune sasana na Ashɛkpa Hananɛl uuwa i ci ofwo ata oo higo mayaga ma agwuma. 11Atwa zhɛ a nama apata, iwɛnɛ tu unu-tukalana zha shɛ wa nama ya, Jɛrusalɛm kaa zhɛ wa nama ya suu.
12Igwumɛgwumɛ nɛ AGWANGWAMA zhɛ a patana atwa na a sukakana Jɛrusalɛm nu ujasa na: tu'waba ta aba ti zhɛ to fwoso buumwa buumwa, eshe aba zhɛ o fwoso no okwusokwuso aba, irɛtu ya aba zhɛ yo fwoso no onu aba.
13Aka ata ci hwuŋ, inyɛsɛ ya AGWANGWAMA zhɛ ya ima aŋ, tusukwutogwu ti zhɛ ta namana aŋ, ibɛ po bụtụ bụtụ zhɛ ba ima binya bwa, ɛɛ zhɛ mama sukakanụ. 14Okwo atwa Juda, ɛ zhɛ a twagwụ Jɛrusalɛm ifelu, ɛɛ zhɛ a lashaga aduciya edenji elele na rungwutwonu aŋ hwɛɛ, ta azhɛnarɛya, ta azụrụfa keeni otogwo na gembi ufwugwo duwa.
15Ụngwụ ụwɛ gana ata uko uko zhɛ wa ima idɛkwɛ, tu nruhondo, tu nrakwumi, tu nzhinyacɛ keeni iyimabiga ye elele nɛ eri ya nama nu ugba ata wa atwa i'ime. 16Nazhɛ bụtụ be elele na benengeni na ashashɛ edenji ata a na sukakanɛ la Jɛrusalɛm, zhɛ no mungo uywa uywa maa a na zhɛba Agwuma, na shɛ AGWANGWAMA na Hwuri Kpaaŋ maa a na nda isene shidulo.#Liv 23:39-43 17Yaa shɛ kaa edenji elele na namɛ na cɛnjɛ tu unyizo zhe shi Jɛrusalɛm maa a na zhɛba Agwuma na shɛ AGWANGWAMA na Hwuri Kpaaŋ, asha eshilo zha shɛ o ngbono aŋ o. 18Yaa shɛ kaa atwa Ijipti zhe shi maa a njɛ isene ɛtɛ, asha igwumɛgwumɛ ɛtɛ AGWANGWAMA peteni edenji na zhe shi maa a njɛ isene ɛtɛ i shidulo zhɛ yo jitono aŋ du. 19Inɛ ɛtɛ ibɛ zhɛ ya sha ulwapɛ na ɛɛ zhɛ a pana atwa Ijipti keeni edenji elele na lacɛ maa e zhe isene ɛtɛ i shidulo.
20Ɛ zhɛ a 'nyata hwuŋ no ogogolo idɛkwɛ na aka ata, ɛɛ hiɛŋ, Iyi tijilo nɛ ee shileni AGWANGWAMA na, ibɛ nkwasha mu na mu namɛ nu umwono wa AGWANGWAMA mi zhɛ ma sha iyi tijilo gana agbamgbam na ee sheji nu umbe utukwu-ụrụpɛ. 21Ibɛ po ɛɛ zhɛ o shilo ikwɛshɛ ye elele nɛ namɛ nu Jɛrusalɛm keeni Juda swooŋ iwɛ tɛzhɛba ta AGWANGWAMA na Hwuri Kpaaŋ, na muba atwa zhɛ no shitogo usunda wa aba ụrụpɛ. Bihinya be elele zha shɛ ba nama ya nu umwono wa AGWANGWAMA na Hwuri Kpaaŋ na aka ata o.
Atualmente Selecionado:
ZƐKARIA 14: RBT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rubassa Bible © Bible Society of Nigeria, 2008