ZƐKARIA 10
10
Tibicingo ta Atwa Agwatana
1Lụpa ma AGWANGWAMA eshilo ugbama, AGWANGWAMA ubwa ba nda cilwo, keeni ɛbɛrɛ, Ubwa du bo ngbono atwa eshilo ɛhɛnɛnɛyɛ, baa ndaanana kaa maa iyi sebi ni itimɛ. 2Atwa ata a zhagana tuwa tu na ta duma n-ndumwa mu tusashɛ, ashɛjɛ a kwụba shizobu shɛ ụzagwụ, ewetegeni ata awalabụ, a duma awalabụ ụzagwụ, aa ingatanga atwa ti'ingatanga to ohondo. Ibɛ po atwa ata o rungo gbom gana agwụdụ, a sukakana aŋ iwɛ uzawa bi'iywa.#Mat 9:36; Mak 6:34
3Isɛbwɛ mi ishijɛ na a'iywa ata, N zhɛ ma pana a'yagajɛ#10:3 a'yagajɛ: Tɛjɛshɛrɛga ti nya ti hiɛŋ, epi. aba ulwapɛ, atwa ihwɛ Juda aba shɛ iyimabiga mi, AGWANGWAMA na Hwuri Kpaaŋ zhɛ o shiyono aŋ eshe. Ɛ zhɛ a sha gana idɛkwɛ nɛ 'yajɛ ukpahiŋ ujasa. 4Na amɛ Juda, ibɛ utayɛ usugwulumi zhɛ wa banɛ, na amɛ ubwa kaa igbɛlu umwono tugwuno zhɛ ya banɛ, na amɛ ubwa uta ujasa zhɛ wa banɛ, na amɛ ubwa kaa ehiu na zhɛ a 'yagaga atwa mi zhɛ a banɛ. 5Atwa Juda zhɛ a sha atwa ukpahiŋ na lasụ nu ujasa, ɛ zhɛ o idongono atwa i'ime ya aba nu udwodwo ihwɛŋnɛ ụshɛpwụ, iwɛnɛ ta AGWANGWAMA namɛ na aba. Ɛ zhɛ du kaa a lasụ asụcɛ idɛkwɛ ya atwa i'ime ya aba.
6N zhɛ ma ta atwa Juda ikɛnyi,
Ngɛɛ zhɛ mo bicingo atwa ihwɛ Josɛf.
N zhɛ me gwuricinje aŋ, iwɛnɛ Ngaa 'yajɛ uwanyi wa aba.
Ibɛ po ɛɛ zhɛ a sha gana atwa na Ngee te jineci shi la kwukwuŋ.
Iwɛnɛ Ngaa shɛ AGWANGWAMA Agwatana aba,
Ngɛɛ zhɛ kaa mɛ jishijɛ du shidua sha aba.
7Nazhɛ atwa Ifrem zhɛ a sha gana ejeshi ukpahiŋ,
ɛɛ zhɛ a 'yaga unyasa gana atwa na a swa
meni mụ tụ'walụ ta afwafwa,
Miaụŋ ma aba mi zhɛ me teyinje iŋ,
nazhɛ ɛɛ zhɛ a bwada unyasa,
ɛɛ zhɛ a ndana AGWANGWAMA unyasa ụ'wụtụ
na shɛmɛ sha aba, iwɛ iyi nɛ baa ndanɛ aŋ.
8N zhɛ ma suyana aŋ maa mo sotulonu aŋ urubwo uko.
N zhɛ me gwube aŋ,
Ngɛɛ zhɛ ma nda maa e gembi ufwugwo gana ala aa namɛ cala.
9Okwo ti Ngee gereteji aŋ na ashashɛ edenji,
ɛ tɛ zhɛ me n teyinje waa okwo nu u'una ata ụdụlụ,
ɛ zhɛ a ya uraiŋ ta miaụŋ ma aba, e jiye hwɛɛ aba.
10N zhɛ mɛ bɛcinjɛ aŋ na cɛnjɛ ti Ijipti,
maa me jicinje aŋ,
N zhɛ mɛ bɛcinjɛ aŋ na Asiria maa mo sotulonu aŋ urubwo uko,
Ngɛɛ zhɛ me suje aŋ maa e zhe na cɛnjɛ ti Giliad keeni Lɛbanon,
uuwa i ci aka na ee shini cɛnjɛ ta ata, ohwolu 'nyananɛ aŋ ya.
11Ɛ zhɛ a kashɛka itekwu Ijipti nɛ shɛ ụsụbwa ụbaụta,
adanga itekwu ɛtɛ zhɛ o gwurusono,
Ngɛɛ zhɛ ma hwuŋcɛnga Nayɛl ɛtɛ iri.
Atwa Asiria zhɛ a ima ilɛmɛ na tubusa ta aba,
atwa Ijipti zhɛ a vwunga ukpahiŋ wa aba.
12N zhɛ ma nda aŋ maa a 'yaga ikɛnyi na amɛ AGWANGWAMA,
nazhɛ ɛɛ zhɛ no rungo#10:12 ɛɛ zhɛ no rungo: Tɛjɛshɛrɛga tu ko ti hiɛŋ, ɛ zhɛ a 'yaga ụjɛrụma, kwo kaa ɛ zhɛ ma n zhɛba, kwo kaa ɛ zhɛ ma n 'wa. ni izeci ibwɛ, AGWANGWAMA ubwa dumwa.
Atualmente Selecionado:
ZƐKARIA 10: RBT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rubassa Bible © Bible Society of Nigeria, 2008