MATIU 9

Ge Jisus Nɛnjɛ Bụtụ na Tu'waba tu Bwa tu 'Wegeni

(Mak 2:1-12; Luk 5:17-26)

1Ti ge Jisus teni ụhaŋtụ, bee keshi itekwu ɛtɛ, bee zhe nụ ụshɛpwụ ubwa.#9:1 nụ ụshɛpwụ ubwa: Ibɛ shɛ Kapanaum. Kwụba 4:13 2Aa shapɛrɛganɛ bụ bụtụ bu ko na tu'waba tu bwa tu 'wegeni, na kaa bo woto no ogodo. Aka na ti ge Jisus kwụbɛ rishe-tɛtɛtana ra atwa na 'waŋnɛ bụ, bɛɛ hiɛŋ bụtụ ata tu'waba tu bwa tu 'wegeni, Ɛ-yɛu mi, ta nda inyɛsɛ o! O bu gongwonuo iwɛwɛ bụ.#Mat 9:22; Mak 6:50; Luk 7:48; Ugo 23:11

3Nazhɛ embisegeni Undwa oko mama hiaŋnụ, Bụtụ ga ba dumangana Agwatana n-ndumwa mụ wɛ!

4Ti ge Jisus mepi#9:4 Mepi: Abayiburu oko angwụshɛ hiɛŋ, kwụbɛ. iyi nɛ aa haŋsa na shɛmɛ sha aba, bɛɛ hiɛŋ aŋ, Iwɛmbe po ahia haŋsa shihaŋsa shụ wɛ na shɛmɛ shi hiiŋ? 5Inɛ nɛɛ zasa iwɛ maa Mɛ hiɛɛŋ? Maa Mɛ hiɛŋ bụ suu, E bi gengeni iwɛwɛ bụ, okwo maa Mɛ hiɛŋ bụ, Ishijɛ, zhe tahaŋnụ? 6Ama iwɛ maa hi mepi maa Yɛu Bụtụ 'yajɛ ụhwada nu unyizo ga, maa gangana bụtụ iwɛwɛ ibwɛ. Nazhɛ bɛɛ hiɛŋ ya bụtụ ata tu'waba tu bwa tu 'wegeni, Ishijɛ shepi ogodo bu, maa hwuri ujiyo ni ihwɛ bụ. 7Bụtụ ata ishijɛ ga, bee hwuri ujiyo ni ihwɛ ibwɛ. 8Aka na ta atwa ata kwụbɛ ijɛ, igɛhi#9:8 igɛhi: Kwo kaa inyɛsɛ shɛ aŋ. 'imɛ aŋ, aa shɛtanɛ Agwatana na peni atwa ga ụhwada gana ga.

Ge Jisus Suyanɛ Matiu

(Mak 2:13-17; Luk 5:27-32)

9Ti ge Jisus beni apata, bɛɛ zhɛ tɛkashɛka, baa kwụbɛ bụtụ bu ko na ɛɛ hiɛŋ izeci ibwɛ ga Matiu, tu baa jɛjɛ nu umwono na aa la ụdalụ, bɛɛ hiɛŋ bụ, N 'wa. Ga Matiu ishijɛ ga, baa 'wa bụ.

10Aka na ti ge Jisus ba ya iyimɛyɛ nu umwono Matiu, ibɛ ele-ụdalụ ofwugwo, keeni atwa-iwɛwɛ zhajɛ, aa gɛgajɛ no ofwo ata ge Jisus ba ya iyimɛyɛ ne eseshi-iyi ubwa.#Luk 15:1,2 11Aka na ta Afarisi oko kwụbɛ iŋ, ɛɛ hiɛŋ eseshi-iyi ubwa, Iwɛmbe po bimbisegeni hiŋ ba ya iyimɛyɛ ne ele-ụdalụ keeni atwa-iwɛwɛɛ?

12Aka na ti ge Jisus hwụjɛ iwɛ ɛtɛ, bɛɛ hiɛŋ aŋ, Ukekeshi buwa-bi-inibi te shi atwa na namɛ lapiya o, semi atwa na a gwumanga kiri. 13Zhaga soso ma ijɛ, inyɛmɛnyɛmɛ Ama jala, ama shɛ ụrụpɛ o. N zhe shi maa ma suyana atwa tiririri o, semi atwa-iwɛwɛ.#Hos 6:6; Mat 12:7

E Heŋteni Jisus iwɛ Ezumi Tɛnda

(Mak 2:18-22; Luk 5:33-39)

14Nazhɛ eseshi-iyi Jon zhajɛ pi Jisus, ee heŋteni bu, ɛɛ hiɛŋ, Iwɛmbe po ata nda ezumi ɛgbɛ ɛgbɛ#9:14 ezumi ɛgbɛ ɛgbɛ: Ezumi ga i shɛ Rugwenyi, aka oko tɛ hiɛn unu-tukapa na kaa shɛ Rugara. Ecilo ijɛ hwɛɛ i shɛ uzawa iyimɛyɛ tiya, na aka na ta amɛ-tụhaŋtụ zhajɛ kwo kaa ta bụtụ 'weni bụtụ, keeni aka bụtụ ba nda adua iwɛ ecilo oko ticinji. Tɛjɛshɛrɛga tu ko tu zasa ɛgbɛ ɛgbɛ na buwala ga o. na Afarisi, eseshi-iyi bu tuba njɛ shɛɛ?

15Ge Jisus jishijɛ aŋ, bɛɛ hiɛŋ, Eyejilo bwolo-be-eyikwo a nda hwuŋ suu ezumi na aka na to bwolo-be-eyikwo ta namɛ na aba? Ama aka zhɛ o to, tɛ ɛ zhɛ a shapa bwolo-be-eyikwo no olugwo aba, aka ata nazhɛ ɛɛ zhɛ a nda ezumi.

16I zasa bụtụ zha jaja tugwuno tu ufwo maa swana utogwo ụngwụshɛ o, iwɛ aka na tugwuno ta ata ti zhɛ ta kaana utogwo ata ti'ingicinga. 17E zweni shi hwuŋ meni mụ tụ'walụ ta afwafwa mu ufwo no otutu angwụshɛ o, shibwonu otutu ata zhɛ o puswo, nazhɛ meni ma ata mụ tụ'walụ ta afwafwa mi zhɛ mo dudugwo; otutu ata kaa du zhɛ a nda ya ufwu. Ama o zwono hwuŋ meni mụ tụ'walụ ta afwafwa mu ufwo no otutu ofwo, nazhɛ mɛɛ zhɛ me ilogogo hwɛɛ to otutu ata.

Iwɛ Yɛu nɛ 'Wi, Keeni Biyikwo na ba Bana Mehieŋ

(Mak 5:21-43; Luk 8:40-56)

18Ti ge Jisus mbishi aŋ inɛ ɛtɛ, nazhɛ uhiu uko zhajɛ eshigiri, wee kwuzeni bu, bɛɛ hiɛŋ bụ, Yɛu mi yo o 'wi ba hwuwayɛ hwuwayɛ go, zhajɛ kaa maa timengeni bu maa hiɛ.

19Ge Jisus ishijɛ ga, te eseshi-iyi ubwa hwɛɛ aa 'wa bụ.

20Na aka ata, ibɛ biyikwo bu ko na ba bana mehieŋ shiywa umpwa-na-shɛba-shi-yebi, ringeni geri ba aba ubwa, bee timengeni izhɛmi utogwo ubwa swɛɛ.#Mat 14:36; Mak 3:10 21Iwɛnɛ po biyikwo ata mɛmɛ hiɛŋ, Okwo utogwo ubwa ubaba Ngee timengeni hwayɛ, N zhɛ ma zhɛmanana.

22Ti ge Jisus jishirijɛ mabaaba, baa kwụbɛ biyikwo ata, bɛɛ hiɛŋ bụ, Ɛ-yɛu mi, ima-isɛbwɛ! Rishe rụ bụ tɛtɛtana rụ bụ nɛnjɛ. Ibɛ po biyikwo ata zhɛmananɛ te kwuni na aka ata.#Mat 9:29; 15:28; Mak 10:52; Luk 7:50; 17:19

23Aka na ti ge Jisus teni ihwɛ uhiu we ebe, baa kwụbɛ atwa ofwugwo, ta atwa na o hwulo akpasana, ta atwa na a nda rundu, 24bɛɛ hiɛŋ aŋ, Bana ma epe. Yɛu gɛ kaa 'wi shi, malabụ kwakwa yoo woto. Ama atwa ata hiɛnjɛ bụ ilɛtu ya asada. 25Aka na ta atwa ata bananjɛ hwɛɛ, nazhɛ ge Jisus teni ya na amɛ umwono ata yɛu ɛtɛ weci, bɛɛ imɛ u'ala yɛu ɛtɛ, nazhɛ yɛu ɛtɛ ishijɛ. 26Unabarɛ iwɛ ɛtɛ mburusonu na cɛnjɛ ta ata kpaaŋ.

Ge Jisus Nɛnjɛ Sholubo shi Yebi

27Ti ge Jisus beni apata, ibɛ sholubo shi ko shi yebi shɛ 'wa bụ, shaa ugaga duwa, shɛɛ hiɛŋ, Gabụ Yɛu Devid, hioko inyɛmɛnyɛmɛ tu!

28Aka na ti ge Jisus teni nu umwono, sholubo sha ata shɛ zhajɛ pu bwa. Ge Jisus heŋteni aŋ, bɛɛ hiɛŋ, Hiɛ tɛtanɛ suu rishe maa N eri ma nda ijɛ? Ɛɛ hiɛŋ bụ, Agwangwama, Iiŋ!

29Nazhɛ ge Jisus timengeni shishe sha aba, bɛɛ hiɛŋ aŋ, Ga ihi shanɛ gana na ta ahiɛ tɛtanɛ-rishe. 30Nazhɛ shishe sha aba shi ushogwu ga. Nazhɛ ge Jisus tɛtaganɛ aŋ unu duwa duwa, bɛɛ hiɛŋ aŋ, Kwụba ma, ta nda ma maa bụtụ be elele mepi iwɛ gɛ o.

31Ama te e beni apata, ee zhe oo mburusonu unabarɛ ubwa na cɛnjɛ ta ata kpaaŋ.

Ge Jisus Nɛnjɛ Igwureni

32Ta a zha tahaŋnụ ta aba, ibɛ atwa oko shapɛrɛganɛ Jisus igwureni ike nɛ butumwa-bi-ibiri namɛ na amɛ ubwa. 33Aka na ti ge Jisus becinji butumwa ata bi ibiri, nazhɛ igwureni ɛtɛ dumanɛ iwɛ. Yaa dama atwa elele na namba apata, ɛɛ hiɛŋ, Tu ta kwụbɛ shɛ la iyi gɛnɛ gɛ kwukwuŋ na cɛnjɛ ti Isrɛl.

34Ama Afarisi hiɛŋ, Nu ukpahiŋ uhiu wa atumwa-ibiri ibɛ bụtụ ga ba bacɛnga atumwa-ibiri.#Mat 10:25; 12:24; Mak 3:22; Luk 11:15

Ge Jisus Hieci Inyɛmɛnyɛmɛ ya Atwa ofwugwo

35Ge Jisus rungwutwonu ashɛpwụ a'wụtụ a'wụtụ keeni ashɛpwụ na gwụmwatangwụ turungo, boo mbisogono atwa iyi no shimwono shɛ tụ'ulwatagwụ sha aba, baa ananga kaa Anabarɛ Ebiye Cɛnjɛ-ta-tugwama, baa nɛnga du kaa atwa ni igwumɛgwumɛ gɛnɛgɛnɛ keeni tulwogogo te elele.#Mat 4:23; Mak 1:39; Luk 4:44

36Aka na tu baa kwụbɛ atwa ofwugwo, ibɛ po inyɛmɛnyɛmɛ ya aba shɛ bụ, iwɛnɛ ti iyi ya zuga aŋ na shɛmɛ sha aba, a zasa kaa bụtụ maa mbiyono aŋ o, a shɛ gana agwụdụ na zasa bi'iywa.#Tɛrɛ 27:17; 1 Shɛgwu 22:17; 2 Shɛrụ 18:16; Izik 34:5; Zɛka 10:2; Mak 6:34 37Nazhɛ ge Jisus hiɛŋ eseshi-iyi ubwa, Iyimɛyɛ nɛ i nɛ tugwubo gembi ne ehilo tebiye, ama anjɛ-ugondu twa sụ ufwugwo.#Luk 10:2 38Iwɛ ecilo ata na tabwa ma Agwangwama iyi-tugwubo maa tumwanɛ anjɛ-ugondu ne ehilo iyi ibwɛ tugwubo.#Jon 4:35

Atualmente Selecionado:

MATIU 9: RBT

Destaque

Copiar