MATIU 27

E Zeriji Jisus pu Pɛilat

(Mak 15:1; Luk 23:1,2; Jon 18:28-32)

1Aka na ti iyi heri nu uvwungwa dididi, ehiu onongbo kpaaŋ, tu n-nyarɛ ma atwamwa, njɛ ushaura iwɛ Jisus maa a kwụnɛ bụ. 2Aka na te e umpi bu, ee zeriji bu pu Pɛilat na shɛ ugwomina.

Tu'wo tu Judas Iskariot

(Ugo 1:18,19)

3Aka na tu go Judas na senji Jisus ne tidere, kwụbɛ maa e peni Jisus n-ndumwa-tụwụma, baa jɛshɛrɛjɛ-ahaŋsa, bee peni ehiu onongbo keeni n-nyarɛ ma ata azụrụfa ebe talacɛ.#Ụban 21:32 4Bɛɛ hiɛŋ, N njɛ iwɛwɛ, iwɛnɛ ti Ngee senji bụtụ na zasa n-ndumwa-tụwụma me elele.

Ama ɛ hiɛŋ bụ, Imbe ta shɛ inee tuu? Yalaga iŋ ni ikɛnyi bụ.

5Nazhɛ go Judas 'wɛŋ azụrụfa ata nu Umwono wa Agwatana, bee beni bee hwuri bee meme sweci.

6Nazhɛ ehiu onongbo suji azụrụfa ata, ɛɛ hiɛŋ, Undwa leni shi ya maa e zweni uŋ nu umwono-ukwuribi na namɛ nu Umwono wa Agwatana o, iwɛnɛ tu waa shɛ ulumo mehieŋ #Undwa 23:18 7Ibɛ po aa njɛ ushaura abaaba, ee suji uŋ oo so cɛnjɛ to bumo-bu-nkwasha, iwɛ maa o no no agaiŋ apata. 8Ibɛ po oo po cɛnjɛ ta ata izeci, ɛɛ hiɛŋ, Cɛnjɛ te Mehieŋ tutu ta hwayɛ.

9Nazhɛ iwɛ nɛ gɛ Jɛrɛmia bigesere dumwa la sɛ, inɛ bɛɛ hiɛŋ, E suji azụrụfa ata talacɛ anaa na shɛ ulumo bụtụ ata ee lumeni atwa, ubwa shɛ bụtụ ata umeseyi uko miaụŋ mi Isrɛl mi lumeni atwa.#Jɛrɛ 32:6-15; 18:2,3; Zɛka 11:12,13 10Ee suji uŋ, oo so cɛnjɛ to bumo-bu-nkwasha, gana na ta Agwangwama m peni-unu.

Ge Jisus na Pɛilat

(Mak 15:2-5; Luk 23:3-5; Jon 18:33-38)

11Ge Jisus shikeni ya na agba ugwomina, ugwomina unseni bu, bɛɛ hiɛŋ, Gabụ suu bɛ shɛ Agwuma Eju?

Ge Jisus jishijɛ bụ, bɛɛ hiɛŋ, Gabụ du bɛ jɛmɛ iŋ ya. 12Aka na te ehiu onongbo keeni n-nyarɛ ma patangana bụ ụshɛrɛya, bɛ jɛshɛjɛ shɛ aŋ iwɛ ye elele o.

13Ibɛ po ga Pɛilat hiɛŋ bụ, Bu hwụjɛ shɛ suu tiseyida tu ga ee sweji kpaaŋ iwɛ bụ?

14Ama ge Jisus jɛshɛjɛ shɛ bụ n-ndumwa okwo mu ko gba o. Ibɛ po yaa dama ugwomina tebiye.#Mat 26:62; Mak 14:60; Luk 23:9; 1 Timo 6:13

Ga Pɛilat Gengeni Aŋ Jisus maa e Tegeni bu Nrɛ nụ ụ'wụ'wụ-ubatanɛ

(Mak 15:6-15; Luk 23:13-25; Jon 18:39—19:16)

15Ugwomina wa shana waa bacɛngana ufwugwo wa atwa ata bujama bu umwono-tishi, bu naa na aa jala, na aka Isene Tɛkashɛka. 16Bụtụ bu ko namba la na ashashɛ ajama, na ee kepi nu umwono-tishi na aka ata, na ɛɛ hiɛŋ, ge [Jisus] Barabas.#27:16 Jisus Barabas: Tɛjɛshɛrɛga tu ufwugwo tu zasa Jisus, semi ta Barabas kiri. 17Aka na ta a ụlwatagwụ, ga Pɛilat heŋteni aŋ, bɛɛ hiɛŋ, Gaaba ahia jala maa ma hiɛ bacɛnganɛɛ? Ge [Jisus] Barabas suu, okwo ge Jisus ata ɛɛ hiɛŋ Krast? 18Iwɛnɛ ti bee mepi du maa ni isɛbwɛngwɛ, aa shapɛ Jisus ee peni bu.

19Ti ga Pɛilat jɛjɛ ni idwɛtwɛ ụshɛrɛya, biyikwo bwa tumwanɛ butumwa pu bwa, bɛɛ hiɛŋ bụ, To tumongono bụtụ ata zasa n-ndumwa-tụwụma o. Iwɛnɛ tu Ngaa nduwa ụbaụta iwɛ ubwa duwa nụ ụwalabụ na Ngee wetegeni hwayɛ ga nụ ụjita.#Luk 23:4

20Ama ehiu onongbo keeni n-nyarɛ ụranjɛ atwa ata maa ga shɛ ga Barabas ɛɛ bɛcinjɛ, maa tuba a kwụnɛ Jisus Krast.

21Ugwomina heŋteni aŋ sasana, bɛɛ hiɛŋ, Gaaba ahia jala maa ma hiɛ bacɛnganɛ na ashaashɛ atwa ga eyebii? Ɛɛ jishijɛ bụ, ɛɛ hiɛŋ, Ga Barabas.#Ugo 3:13,14

22Ga Pɛilat heŋteni aŋ, bɛɛ hiɛŋ, Imbe tuba ahia jala maa Ma nda Jisus ga ɛɛ hiɛŋ Krastii? Ɛɛ jishijɛ bụ kpaaŋ aba, ɛɛ hiɛŋ, Ge tegeni bu nrɛ nụ ụ'wụ'wụ-ubatanɛ!

23Ama ugwomina heŋteni aŋ, bɛɛ hiɛŋ, Iwɛmbe poo? Imbe kwuŋ shɛ iyi iwɛ nɛ baa njɛɛ?

Ama a ụranjɛ n'ungwa duwa, ɛɛ hiɛŋ, Ge tegeni bu nrɛ nụ ụ'wụ'wụ-ubatanɛ.

24Aka na tu ga Pɛilat kwụbɛ maa iwɛ nɛ baa njɛ zana bu eshe o, ama ti'nyama kwakwa ta kaana ugombo, bee shepi meni, boo sukwutwo i'ɛlɛ ibwɛ, ne eshe atwa ata kpaaŋ, bɛɛ hiɛŋ, N zasa n-ndumwa-tụwụma ne mehieŋ ma bụtụ ga bi tiririri o, yalaga iŋ ma du ni ikɛnyi hiŋ.#27:24 bụtụ ga bi tiririri o: Kwo kaa bụtụ ga zasa n-ndumwa-tụwụma. #Undwa 21:6-9; Shɛzu 26:6

25Atwa ata jishijɛ bụ, hwɛɛ aba, ɛɛ hiɛŋ, Ga tijama te mehieŋ mu bwa ti kezhe no ohiuhiu tu, ta miaụŋ mu tu hwɛɛ.#Josh 2:19; Ugo 5:28

26Ga Pɛilat bacɛnganɛ aŋ Barabas, bee lwepi tuba Jisus nu udugwu, nazhɛ bee shepi bu bee peni aŋ maa e tegeni bu nrɛ nụ ụ'wụ'wụ-ubatanɛ.

Asaza Njɛ Jisus Asada

(Mak 15:16-20; Jon 19:2,3)

27Nazhɛ asaza ugwomina shepi Jisus nu umwamwa ugwomina, aa suyaganɛ asaza elele kpaaŋ, aa ụlwatagwụ maa a sukakanɛ bụ. 28Ee ushiji bu tugwuno tu bwa, nazhɛ ee urigeni bu utogwo uduhwa ushenje. 29Ee pieci esepi adanya, aa njɛ ụdara, ee peteni bu nu uhiuhiu, ee hwuŋteni bu du bininjidegbe nu u'ala ubwa ubiye. Nazhɛ ee kwuzhi nɛ ɛvwɛvwɛjɛ ubwa, aa nda bụ asada, ɛɛ hiɛŋ, Zaacɛ Tumaka, Agwuma Eju! 30Ee zwegeni bu mecemi, nazhɛ ee shepi bininjidegbe ebe, oo po bu nu uhiuhiu. 31Aka na te e hwuwi bu asada tɛnda hwɛɛ, ee hwucici bu utogwo ebe uduhwa ushenje, nazhɛ ee hwuŋteni bu una ubwa. Ee zeriji bu maa e tegeni bu ya nrɛ nụ ụ'wụ'wụ-ubatanɛ.

E Tegeni Jisus Nrɛ nụ Ụ'wụ'wụ-ubatanɛ

(Mak 15:21-32; Luk 23:26-43; Jon 19:17-27)

32Aka na te e ci ụbanụ, aa kwụbɛ bụtụ bu ko bu Sareni, na ɛɛ hiɛŋ izeci ibwɛ, ga Saimon. Aa 'imɛ bụ, aa njɛ bụ ni iji maa ga 'waŋna ụ'wụ'wụ-ubatanɛ Jisus. 33Aka na te e ci ofwo oko na ɛɛ hiɛŋ, Golgota, (ecilo Golgota ata shɛ Ofwo Ukokolo-uhiuhiu.) 34Apata ee peni bu meni mụ tụ'walụ ta afwafwa, mu na mi hiŋci ni ingɛyi maa swa. Ama aka na tu baa hunganɛ mụ, baa lacɛ mụ tuswa.

35Aka na ee tegeni Jisus nrɛ nụ ụ'wụ'wụ-ubatanɛ, nazhɛ aa 'wɛŋ ya icɛcɛ, maa o dwotwogonu tugwuno tu bwa abaaba.#27:35 o dwotwogonu tugwuno tu bwa abaaba: Tɛjɛshɛrɛga tu ko ti keeni maa, iwɛ nɛ egesere 'nyeci sɛ, inɛ hiɛŋ, O dwotwogonu tugwuno ti mi abaaba, aa 'wɛŋ icɛcɛ iwɛ i'wɛŋ mi i tu'urugono. #Shɛzu 22:18 36Aa jɛjɛ apata, aa ngbarakacɛ bụ. 37Ee 'nyeci iyi nɛ ɛɛ hiɛŋ maa bɛ njɛ, ee peteni iŋ na azuba uhiuhiu ubwa nụ ụ'wụ'wụ ata ubatanɛ, ti'nyeci ta ata ti hiɛŋ, GE JISUS AGWUMA EJU NA.

38E tegeni du ashɛrɛ eyebi nrɛ nụ ụ'wụ'wụ-ubatanɛ nu bwa, bu ko namɛ nu u'ala ubiye, bu ko namɛ nu u'ala ugwulwo ubwa.

39Atwa na a kashaka apata, a dumangana bu du n-ndumwa mụ wɛ, oo zhingoto ohiuhiu aba, #Shɛzu 22:7,8; 109:25 40ɛɛ hiɛŋ, Gabụ ga bo hwuŋzo Umwono wa Agwatana, maa meeneni uŋ na amɛ ijitɛ itɛtu! Yaa shɛ gabụ bɛ shɛ Yɛu ya Agwatana gom, asha meme bicinji, maa kezhe nụ ụ'wụ'wụ-ubatanɛ ga! #Mat 26:61; Jon 2:19; Ugo 6:14

41Gobwonu du ehiu onongbo, ne embisegeni Undwa keeni n-nyarɛ njɛ bụ asada, ɛɛ hiɛŋ, 42Bi bicinji anya atwa, bi eri shi kaa momo bicingo. Agwuma ga Isrɛl ta! Ge kezhe nụ ụ'wụ'wụ-ubatanɛ ga hwuwayɛ go, nazhɛ ɛti zhɛ ta tɛtana bụ rishe! 43Baa tɛtanɛ Agwatana rishe gom, yaa shɛ amɛ Agwatana kaa du lemi nu bwa, asha go bicingo bu hwuwuyɛ go. Iwɛnɛ tu baa shana bɛɛ hiɛŋ, Gamba n shɛ Yɛu ya Agwatana.#Shɛzu 22:8

44Gobwonu du ashɛrɛ ata ee tegeni nrɛ nụ ụ'wụ'wụ-ubatanɛ nu bwa, twagajɛ bụ.

Tu'wo ti Jisus

(Mak 15:33-41; Luk 23:44-49; Jon 19:28-30)

45Te kwuni nu uwaŋna tishikoko, tishi tu layɛ nu unyizo kpaaŋ, uuwa i ci uwaŋna ụrụmɛ. 46Aka na tu uwaŋna shɛ ụrụmɛ, ge Jisus uganɛ duuwa, bɛɛ hiɛŋ, Elɛi, Elɛi, lama sabakitani? (Ecilo ibɛ shɛ, Agwatana mi, Agwatana mi, iwembe po ebi n jinecii?) #Shɛzu 22:1 47Aka na atwa oko na ashashɛ atwa na shikekeeni apata hwụjɛ iwɛ ɛtɛ, ɛɛ hiɛŋ, Bwoonu ba suyana Elaija. 48Gunu ata bụtụ bu ko na ashashɛ aba gezhiji, bee shepi ụhwụŋkwụ, bee shidinji uŋ ne meni mu tụ'walụ ta afwafwa mu na mi sembi, bee hwuŋteni uŋ ne bininjidegbe, bee peni Jisus maa swa.#Shɛzu 69:21

49Ama atwa vwɛ ubwa hiɛŋ bụ, Ganga bụ, ti zhɛ ta kwụba okwo ge Elaija ata zhɛ ba zhajɛ maa bicingo bu.

50Ge Jisus uganɛ sasana duuwa, nazhɛ baa dwa ihwungwɛ.

51Gunu ata ibɛgɛlɛ tugwuno nɛ ee kepi odubo Umwono wa Agwatana bagwụ, te kwune ni ihiŋhiŋ tutu uvwi, unyizo zhingotu, atayɛ a'wụtụ 'wụtụ bagatagwụ, #Ụban 26:31-35; Mat 28:2; Ehib 9:8; 10:19 52e'uye kapashangwụ, ibɛ atwa tijilo ofwugwo a na go loyo la malabụ hiɛ aa bananjɛ. 53Aka na ta a bananjɛ, ne e'uye, na aba tihiɛ ti Jisus, ee teni nụ ụshɛpwụ ata tijilo, aa bananɛ atwa ofwugwo caakwụ. 54Aka na tu uhiu wa asaza dipi-yebi keeni atwa na namba apata nu bwa, a na ngbaracɛ Jisus, kwụbɛ ta cɛnjɛ to zhingotu keeni iyi inyɛ nɛ tenenji hwɛɛ, ibɛ po inyɛsɛ shɛ aŋ duwa duwa. Ɛɛ hiɛŋ, Iwɛ-tɛkana, bụtụ ga shɛ ga Yɛu ya Agwatana.#Mat 3:17; 17:5

55Eyikwo ofwugwo a na banɛ nu Galili a na 'wa la Jisus a ndana bụ iyi, a namba du apata, ee shikekeni taa dụlụ, aa ngbaracɛ bụ. 56Eyikwo na namba na ashashɛ aba shɛ, ge Meri biyikwo ata bu Magdala, ne Meri bino Jemis keeni Josɛf, no bino bu miaụŋ mu Zɛbɛdi.#Luk 24:10

E Ni Ru'wo ri Jisus

(Mak 15:42-47; Luk 23:50-56; Jon 19:38-42)

57Aka na tụ ụrụmɛ shɛ, bɛzhɛgba bu ko na banɛ Arimatia, na ɛɛ hiɛŋ izeci ibwɛ go Josɛf, zhajɛ, bɛ shɛ du biseshi-bi-iyi Jisus. 58Bee zhe no ofwo Pɛilat, baa lụpɛ ru'wo ri Jisus. Nazhɛ ga Pɛilat peni atwa unu maa ge peni bu ru. 59Aka na tu go Josɛf shepi ru, bee pipi ru no tugwuno tu ko ti ilinɛn ti tishɛshɛshɛ. 60Bee shiri ru nu u'uye ubwa uko, na bee te hini tufwo tufwo nu utayɛ uko ụ'wụtụ. Bee jirinji utayɛ uko ụ'wụtụ, bee urigeni unu u'uye ata, nazhɛ bee hwuri. 61Ge Meri biyikwo ata bu Magdala, keeni Meri yebi, a namba apata, aa jɛjɛ geri-be-eshe bu u'uye ata.

A'iywa Ngbaracɛ U'uye ata

62Ti iyi heri, tɛ ɛ hiɛŋ Ụjita Tumama imanga wenebe, ibɛ po ehiu onongbo keeni Afarisi ụlwatagwụ no ofwo Pɛilat, 63ɛɛ hiɛŋ bụ, Iyɛri, ti teyinje maa bihelekeci ga, ba shana baa duma tu baa ta hwungwa, bɛɛ hiɛŋ, N zhɛ mɛ hiɛ na aba ijitɛ itɛtu.#Mat 16:21; 17:23; 20:19; Mak 8:31; 9:31; 10:33,34; Luk 9:22; 18:31-33 64Iwɛ ecilo ata, pana atwa unu, maa a ngbaraka u'uye ata tebiye, uuwa i ci waŋnabeyiko, shibwonu eseshi-iyi ubwa zhɛ a zhajɛ o zundo bu, iwɛ maa o no mbiso atwamwa maa, Bi hiɛ. Nazhɛ tuhalakaka tu umɛwɛɛ ti zhɛ ta wụmangwụ to hwulo me ti ti hiiŋ.

65Ga Pɛilat hiɛŋ aŋ, Hi 'yajɛ kaa angbaracɛ, zhaga ta uŋ ma ikɛnyi. Hi mepi#27:65 Hi mepi: Gana du tɛjɛshɛrɛga tu ko tɛ jɛmɛ ta, ama tɛjɛshɛrɛga tu ko ti hiɛŋ, Gana na ehi eri. kaa gana na maa hiɛ njɛ.

66Ee zhe ga, oo to u'uye ata ikɛnyi, ee sweni utayɛ ata mɛrɛɛ, nazhɛ ee shikicinji angbaracɛ.#Mat 27:60; 28:11-15

Atualmente Selecionado:

MATIU 27: RBT

Destaque

Copiar