MATIU 23

Ge Jisus Tɛtaganɛ Aŋ Unu iwɛ Embisegeni Undwa Keeni Afarisi

(Mak 12:38,39; Luk 11:43,46; 20:45,46)

1Nazhɛ ge Jisus jɛmɛ iwɛ na atwa ata ofwugwo keeni eseshi-iyi ubwa, 2bɛ hiɛŋ aŋ, Embisegeni Undwa keeni Afarisi gɛgajɛ na ajɛjɛ Moses. 3Iyi elele nɛ oo hi mbiso maa hi untangana, untangana iŋ ma, maa hi na nda, ama ta na nda ma tuba gana ata aa nda o, iwɛnɛ ta a njɛ shɛ iyi nɛ aa ananga. 4O umpo i'wɛŋnɛ nɛ zhineni,#23:4 zhineni: Tɛjɛshɛrɛga tu ko ti keeni maa inɛɛ nɛ gwụmɛ tu'waŋna. Aa patangana atwa no shitutu, ama e jeri shi kaa maa e mbiyeni atwa i'wɛŋnɛ ɛtɛ tinice okwo na buvwa ba aba o.#Ugo 15:10 5A nda ugondu wa aba kpaaŋ, iwɛ maa atwa na kwụba aŋ. Iwɛbɛ po aa nda nlayɛ ma aba maa mi helenji, a nda shizeje sho tugwuno ta aba te gembenji.#Ụban 13:9; Tɛrɛ 15:38; Undwa 6:8; Mat 6:1,5,16 6O lubo ofwo ebiye na ajɛjɛ iyimɛyɛ nsono tiya, keeni ajɛjɛ ụjɛrụma no shimwono shɛ tụ'ụlwatagwụ, 7keeni a'walụ nu ugba udukwo, maa atwa nɛ hiɛŋ aŋ, E-mbisegeni.

8Ama to lono ma maa atwa na hi suyana maa, Bimbisegeni o, iwɛnɛ te Bimbisegeni hiŋ namɛ bu ko gba, ama hiɛ shɛ ya tuba miaụŋ-mo-bino hwɛɛ hiŋ. 9Ta na suyana ma bụtụ be elele maa, bishi hiŋ nu unyizo ga o, iwɛnɛ te bishi hiŋ namɛ bu ko gba, bu namɛ kaa na azuba. 10To lono ma maa atwa na hi suyana maa, a'yagajɛ o, iwɛnɛ ta Bi'yagajɛ hiŋ namɛ bu ko gba, ubwa shɛ ga Krast. 11Ama bụtụ na hwuri atwa vwɛ na ashashɛ hiŋ, ubwa zhɛ ba sha yɛu-ugondu hiŋ.#Mat 20:26,27; Mak 9:35; 10:43; Luk 9:48; 22:26 12Bụtụ na meme-mungicinji, ɛ zhɛ e zucinje bu, bụtụ na kaa meme-zucinje, ɛ zhɛ o mungicingo bu.#Mat 18:4; Luk 14:11; 18:14; 1 Pita 5:6

Ge Jisus Peni Atwa na a Nda Iyi Tɛnda-te-eshe N-ndumwa-Tụwụma

(Mak 12:40; Luk 11:39-42,44,52; 20:47)

13Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ahia kapana atwa uhwaŋna Cɛnjɛ-ta-tugwama ta azuba. Ahiɛba ni ikɛnyi hiŋ, hi teni shi o, hi leneni shi kaa atwa na a jala tutono maa e teni o. 14[Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ehi suji i'wɛŋnɛ yo olulo ahiɛ yɛ,#23:14 ehi suji i'wɛŋnɛ yo olulo ahiɛ yɛ: Tɛjɛshɛrɛga tu ko tu zasa buwala ga bu 14. gunu ata hio kwuno adua ụnjɛswa tɛnda maa atwa ihi kwụbɛ. Iwɛbɛ po ɛɛ zhɛ ma hi pana hwuŋ n-ndumwa-tụwụma mụ 'wụtụ uhwuri atwa vwɛ.] 15Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ohio rungo ofwo ofwo ni itekwu keeni cɛnjɛ, maa hi mbɛ bụtụ bu ko no ofwo hiŋ, aka na ɛhi mbɛ bụtụ ata, hia nda bụ yɛu ukwokwo ulwa ihi hwuri gana na ahiɛ shɛ kpalụ yebi.

16Ahiɛba a'yagajɛ a na shɛ sholubo, hi zhɛ hia nda hwuŋ adangboo! Iwɛnɛ ɛhi hiɛŋ, Yaa shɛ bụtụ to Umwono wa Agwatana, asha inɛ ɛtɛ shɛ shɛ iyi elele o, ama yaa shɛ bụtụ to ụzhɛnarɛya Umwono wa Agwatana, asha nazhɛ baa 'yajɛ tijama. 17Ahiɛba shɛlagwụ no sholubo! Inɛ nɛ gembi uhwuri inyɛɛ? Ụzhɛnarɛya suu okwo Umwono ata wa Agwatana, na wa nda ụzhɛnarɛya ata maa ụ shɛ ụzhɛnarɛya u tijilo? #Ụban 30:29 18Ɛhi hiɛŋ sasana, Yaa shɛ bụtụ to utukwu-ụrụpɛ, asha inɛ ɛtɛ shɛ shɛ iyi elele o, ama yaa shɛ bụtụ to upwaŋ ata patanɛ nu utukwu-ụrụpɛ, asha nazhɛ baa 'yajɛ tijama. 19Ahiɛba sholubo! Inɛ nɛ gembi uhwuri inyɛɛ? Upwaŋ ata suu, okwo utukwu, na wa nda upwaŋ ata maa ụ shɛ upwaŋ u tijilo? 20Bụtụ be elele na to utukwu-ụrụpɛ, asha bu to du iyi elele nɛ patanɛ nu bwa. 21Bụtụ be elele na kaa to Umwono wa Agwatana, asha bu to du bụtụ ata namɛ na amɛ ubwa.#1 Shɛgwu 8:13; Shɛzu 26:8 22Bụtụ be elele na to azuba, asha bu to du idwɛtwɛ ya Agwatana keeni bụtụ ata jɛjɛ ni bɛ.#Ayiz 66:1; Mat 5:34

23Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ohio dwotwogonu tugombwo, no ongwoyi keeni tụmadụ orubwo umpwa, ahia pana Agwatana urubwo uko, ama hi 'wa sụ kaa iwɛ iyi Undwa nɛ uhwuri inɛ ɛtɛ o. Ibɛ shɛ ụshɛrɛya, ni inyɛmɛnyɛmɛ tihioko keeni rishe-tɛtɛtana. Inɛ ɛtɛ ahi ga shɛ hia nda hiiŋ, hiɛ shɛ shɛ kaa du hia ganga inɛ ebe tɛnda o.#Liv 27:30 24Ahiɛba a'yagajɛ a na shɛ sholubo! Hio susogo meni iwɛ awaŋ, ama hi eri kaa hia twala okwo irihende!

25Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ahia nyashɛnga aba ukwopi keeni aba ikele shɛshɛshɛ, ama tuhwulo keeni eshe-iyi kaa shini na amɛ ibɛ. 26Gabụ Bufarisi na lubeni! Nyashɛnga tugwo amɛ ukwopi shɛshɛshɛ, nazhɛ aba ubwa zhɛ a nama du shɛshɛshɛ.

27Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ahiɛ shɛ gana e'uye na aa shananjɛ ụhwụla, a na kaa zhɛmɛ igbɛtɛtɛ no tupohondo, ama o'umpwo atwa na 'wi keeni iyi elele nɛ kaa zasa shɛshɛshɛ shini na amɛ aba.#Ugo 23:3 28Gobwonu du ahi mama nda atwa tiririri ne eshe atwa, ama tɛnda-te-eshe keeni undwa tubwada kaa shini na shɛmɛ shi hiŋ.#Shɛzu 5:9

Ge Jisus Jɛmɛ Tigesere tu N-ndumwa mu na mi Zhɛ ma Wụma Aŋ

(Luk 11:47-51)

29Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ahia ma e'uye egesere, ahia nda a na atwa tiririri tisemberi. 30Ɛhi hiɛŋ, Yaa shɛ atu ga namba la na aka eshi tu cala, ti ga zha shɛ ta nama na aba, na tụkwụna tu na aa kwụnɛ la egesere ata o. 31Ama kaa hi meme le tiseyida, maa ahiɛba hiɛ shɛ miaụŋ ma atwa ata kwụnɛ la egesere ata. 32Mizha hwaŋzhɛnga ma ya ugondu ata eshi hiŋ kwunuo la tɛnda. 33Ahiɛba ahwa! Ahiɛba miaụŋ me egbezhi, gana na ehi eri hia banangana ụshɛrɛya ata ukwokwo ulwaa? #Mat 3:7; 12:34; Luk 3:7 34Iwɛbɛ po Ngɛɛ zhɛ ma hi tumwananɛ egesere, na atwa ti'inta keeni Embisegeni Undwa. Ama hi zhɛ hia kwụna atwa aba oko, ɛhi zhɛ hia tagana atwa aba oko nrɛ nụ ụ'wụ'wụ-ubatanɛ, ɛhi zhɛ hio kwuto atwa aba oko no shimwono shi hiŋ shɛ tụ'ụlwatagwụ, ɛhi zhɛ hi na shɛka aŋ nụ ụshɛpwụ ụshɛpwụ.#Mat 10:17,23 35Iwɛ maa ga tijama te mehieŋ ma atwa tiririri mu na ehi dudweji nu unyizo ga, ti kezhe no ohiuhiu hiŋ, te kwune ne Ebɛl na shɛ bụtụ bi tiririri, uuwa i ci mehieŋ mu Zakaria yɛu Barakia, ata ahiɛ kwụnɛ na ashashɛ ohwolu tijilo nu utukwu-ụrụpɛ.#Umoz 4:8; 2 Shɛrụ 24:20,21; Ehib 11:4 36Iwɛ-tɛkana Omo hi mbiso maa, ijɛ kpaaŋ, zhɛ ye kezhe no ohiuhiu atwa uwaŋnɛ ga.

Ge Jisus Lubi Jɛrusalɛm

(Luk 13:34-35)

37Oo Ahiɛba atwa Jɛrusalɛm, Ahiɛba atwa Jɛrusalɛm, ahiɛba akwụnɛ egesere, ahiɛba etegeni atwa na aa hiɛ tumwananɛ atayɛ, kpalụ gembi ufwugwo Ama jala la maa mo sotulonu miaụŋ mi hiŋ pi mi, gana na ta alụma a hwakana oywoywo ubwa na apiambɛ ubwa, ama hi jeri shi gana ata o! 38Hioko ma, o hi gongwonuo umwono hiŋ, waa shɛ ya osombo.#23:38 osombo: Tɛjɛshɛrɛga tu ko tu zasa osombo. #1 Shɛgwu 9:7; Jɛrɛ 22:5 39Mo hi mbiso maa, te kwuni na aka ga, hi zha shɛ hi ma n kwụba ya o, uuwa i ci aka na ɛhi zhɛ hiɛ hiɛŋ hwuŋ,

Zhemonjino ma bụtụ ata be ci ni izeci ya Agwangwama.#Mat 21:9; Shɛzu 118:26

Atualmente Selecionado:

MATIU 23: RBT

Destaque

Copiar