Малахия 2
2
Бипатывакирэ Рашая́
1“И акана́, рашаялэ, дава́ припхэныбэ́н исын тумэ́нгэ. 2Ко́ли тумэ́ на явэ́на тэ шунэ́н, и ко́ли тумэ́ на прилэ́на илэ́са, соб (кай) тэ барьякирэ́н Миро лав,” – ракирэ́ла янголэ́нгирэ-болыбна́скиро Рай Дэвэ́л, – тэды Мэ бичхава́ва прокошыбэна (арманя) пэ тумэ́ндэ, и Мэ кэра́ва прокошыбэна (арманя) пэ тумаро́ бахтякирибэ́н: чачо́, Мэ акана́ кэрдём прокошыбэ́н (арман), пал-дова́, со тумэ́ на прилэ́на илэ́са Миро лав. 3Акэ, Мэ отлава псико́ тумэ́ндыр [штылякирава тумаро́ ро́до-ю.о.], и Мэ росчхурдава ґнэё пэ тумарэ́ муя́, ґнэё тумарэ́ свэнкэндыр; и тумэн лыджа́на криг кхэтанэ́ ґнэёса. 4И тумэ́ тэды явэ́на тэ джинэ́н, со Мэ бичхадём дава́ припхэныбэ́н тумэ́нгэ, соб (кай) Миро Завето Левиёса/тэ рикирэлпэ (тэ зракхэлпэ) дурэды́р”, – пхэндя́ янголэ́нгирэ-болыбна́скиро Рай Дэвэ́л. 5“Миро Завето лэ́са сыс ваш джиибэ́н и рама́нё, и Мэ дыём дава́ завето лэ́скэ, соб (кай) ёв тэ поддарэл Ма́ндыр, и соб (кай) ёв тэ рикирэ́л хор паты́в анги́л Миро лав. 6Тэ явэ́л Зако́но чачипна́скиро, пэ лэ́скири чиб, и соб (кай) тэ на латхэ́н начачипнаскирэ лава́ пэ лэ́скирэ ушта́, нэ соб (кай) ёв тэ псирэ́л пир Миро лав дро рама́нё и ровнонэ (вортонэ) дромэ́са, и, соб (кай) ёв тэ рискирэ́л бутэн дрэ риг грэхэ́ндыр. 7Пал-дова́ со рашаскирэ уштэнгэ трэй тэ приракхэн джиныбэ́н, соб (кай) мануша́ тэ родэ́н джиныбэ́н пал Дэвлэ́стэ лэ́скирэ уштэндыр; пал-дова́ со ёв исын звесь/заня́ – яныбнаскиро (вестнико), янголэ́нгирэ-болыбна́скирэ Ра́стыр-Дэвлэ́стыр. 8Нэ тумэ́ дуринэ (отгинэ́) дромэ́стыр; тумэ́ кэрдэ́ адя́кэ, со бут мануша́ дынэпэ дукха́ пир Зако́но, тумэ́ отлыджинэпэ бипатывакирэс Левиёскирэ Заветоса”, – ракирэ́ла янголэ́нгирэ-болыбна́скиро Рай Дэвэ́л. 9“Палдава́ Мэ адя́кэ кэрдём тумэн накутякирдэ (презреннонэ) и джунгалэ́ манушэ́нца анги́л сарэ́ манушэ́ндэ, адя́кэ сыр тумэ́ на ракхнэ Мирэ́ дрома́, и тумэ́ прилэнас манушэ́нгири риг дро Зако́но Дэвлэ́скиро.”
Юда́скирэ Грэхи
10Ци нанэ Екх Дад тумэ́ндэ? Ци на Екх Дэвэ́л создыя́ амэн? Со́скэ да амэ кэра́са нахратыма (ячаса сыр напатяибнытка екх проти екхэ́стэ), ке́ли амэ магираса завето дадэ́нгиро? 11Юда кэрдя́ нахратэс (напатяибныткэс), и джунгалэ́ рэ́нды (де́лы) кэрэ́напэ дро Израилё и Ерусалимо: О Юда кэрдя́ бипатыв Ра́скирэ-Дэвлэ́скирэ свэнтонэ́ штэтоскэ, саво́ лэс притырдыя, ке́ли ёв лыя́ джувля́ пэ́скэ родо́стыр, саво́ кэрэ́ла паты́в чужонэ́ дэвлорэскэ. 12Мэк тэ хасякирэ́л Рай Дэвэ́л манушэ́н Яково́скирэ шатрэндыр, кон кэрэ́ла дава́: одолэ́с, саво́ исын пэ стрэ́га (кон сыклякирэ́ла дава́, и одолэ́с, саво́ сыклёла лэ́стыр); и кодолэ́с, кон янэ́ла свэ́нто дыибэ́н янголэ́нгирэ-болыбна́скирэ Ра́скэ-Дэвлэ́скэ. 13И со ишчо (инкэ́) тумэ́ кэрэ́на: тумэ́ учхакирэна Ра́скирэ-Дэвлэ́скиро алта́рё ясвэ́нца, рови и дыи го́дла, пал-дова́ со Ёв буты́р на кутякирэла свэ́нто дыибэ́н, и на прилэ́ла яныбэ́н ласкаса тумарэ́ вастэ́ндыр. 14Нэ тумэ́ ракирэ́на: “Пал со?” Дава́ исын палдова́, со о Рай Дэвэ́л исыс якхи́тко (свидетелё) машки́р ту́тэ и ромня́тэ тырэ́ тэрныпнастыр, конэ́с ту ячкирдян бипатывакирэс; нэ ёй исын тыри́ малны (подруга) джиибна́скирэ-дромэскири, ёй исын тыри́ ромны́ пир зако́но. 15Ци на создыя́ Дэвэ́л тут и тырэ́ ромня́ сыр екх, савэ́ндэ исын екх ду́хо? Со́скэ жэ екх? Ёв камдя́, соб (кай) лэ́стэ тэ явэ́л ро́до Дэвликанэ чхавэ́ндыр. Палдава́ рикирэ́н тумаро́ ду́хо, и мэк ние́кх тэ на кэрэ́л напатяибныткэс ромня́са пэ́скирэ тэрныпнастыр. 16“Пал-дова́ со Мэ нашты́ тэ дыкха́в пэ розлыджаибэн [ко́ли ту на камэ́са ла, то отмэк-р.с.],’ – ракирэ́ла Рай Дэвэ́л, Дэвэ́л Израилёскиро,” – ‘пал-дова́ со кадасаво́ ману́ш учхакирэ́ла пэс нахратымаса сыр идяса, палдава́ рикирэ́н тумаро́ ду́хо, соб (кай) тумэ́ тэ на кэрэ́н напатяибныткэс. 17Тумэ́ кхинякирдэ [холякирэна-р.с.] кэ холы́ Рас-Дэвлэ́с тумарэ́ лавэ́нца, ке́ли пхучэна тумэ́: “Со́са амэ кхинякирдям Лэс?” Акэ, ке́ли тумэ́ ракирэ́на: “Кажно (сва́ко), кон кэрэ́ла биба́хт (холы́), исын лачхо́ ваш Ра́скэ-Дэвлэ́скэ, и Ёв древа́н радынэ́лапэ лэ́ндыр,” ці, “Кай исын чачипна́скиро Дэвэ́л?”
Atualmente Selecionado:
Малахия 2: ROMBALT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
maintained by the United Bible Societies for the Baltic Romani Mission