Ioane 13
13
1A TIGA ca bijeûâ paseka, ke a wâ Iesu a ga o but ûen he ka he but ka Kamen ûheny ang hmeledrany, ke a hia but hnyokâ lahanen eang hmeledrany, me e ame hnyoki ödra ke ne o but obiny. 2Haba hnyi ûen han sahac, ke a hia but diabolo ip hnyi hnyeku Juda Isakariota nöku Simona he ka alecuâ e, 3ke a wâ but Iesu a gʼ ame hia but hna ta je ûnyi hia ka hnyi hnyamen hnen Kamen, ke ûheny unyin Khong, kʼ ame he ka hmetu ka Khong, 4awe e ame todrö hnyi hna han, me uny jut anyin je ûkhaû, me hom ecmano me weikâ. 5Ke e ame hingâlâ köiö ka hnyi kaia, me hwân he ka hneû je li can laten, me köt ge ecmano ame weikâ. 6Me e ame he but kö Simona Peteru. Me e ame ha, ka kabe, Than lö, u me he bi ka hneû li cak? 7Iesu ame thu kâu, ka habe, Haba ûnyi oge me ânyâ, me ca khanö u walang ang, ke u me he ka wâhmakhmetoâ nyiele. 8Haingö Peteru kâu, ka habe, U me ca he bala ka hneû li cak. Iesu ame thu kâu, ka habe, Oge ne ca osûö u, me ba jekhom unyik. 9Haba Simona Peteru ame ha kâu, ka habe, Than lö, ca hake li cak thibi, ke so minya li hnyamok me bök minya. 10Iesu ame ha kâu, ka habe, Haba at adre me osûâ, me ûcû he ka hneû li can thibi, me ame he ka tha kalaöt hia but: öbun e kalaöt ut ke ca öbun hia bi. 11Anyin a e ame wâhmakhmetoâ at ame he ka alecuâ e; waleling me me ha, ka habe, Öbun ca kalaöt hia bi.
12A hia but hneû je li cadrin, e ame hom hmetu je ûkhaûen, me laba hmetu ju, me e ame ha ködrin ka habe, Hawa öbun e wâhmakhmetoâ hnok hna ânyâ köbun? 13Öbun e hawo nya, ka habe, At ûne me Than: ke so hnobun hna ha, anyin a eke. 14Oge ne Than me At ûne, ke oge hia but osûâ je li cabun, me ûcû köbun he ka ûösûâköuâ je li cabun. 15Anyin oge hia but ham köbun tulut, me öbun e he ka ânyâ helâ me hnok hna ânyâ köbun. 16E hnathu, e hnathu, inya oge me ha köbun, ka habe, E ca gan aten hon tuhan; ke ca gan minya at adre kunâ hon at a kunâ e. 17A ne khanʼ öbun ta je ûnyi e, hnobun hnahic öbun e ne he ka ânyâ e. 18Oge me ca hai öbun hia: e khanö nya hnok je hna ûca: ke so bi me me hwâdâ hna sihnalimen, ka habe, Haba at ame an ök jeû me ame hûki nya ge ohmâiny can. 19Oge me ha ang köbun ke tiga ca hwâdâ bi, hobi kâu e ka hwâdâ thö, mʼ öbun e he ka labageju a inya e. 20E hnathu, e hnathu, inya oge me ha köbun, ka habe, Haba at ame kap at oge kunâ, me e ame köp nya minya; ke haba at ame köp nya, me e ame kap minya at a kunö nya.
21Ke a hia but Iesu ha e, e ame hmak hnyekon, me thumetu me ha, ka habe, E hnathu, hnathu, oge me ha köbun ame he ke at gabun ka alecuo nya. 22Haba laten ödrin e ibweleköu, me ûcetköuâ hnen hna ha gan. 23Ke wale ke aten ame laba hnyi ûlai Iesu, ame hnyok kâu Iesu. 24Haba Simona Peteru ame atmemâkâ e, me ha kâu, ka habe, Ha thö at e ame ha. 25Me e ame hwio hnyi ûlai Iesu me ha kâu, ka habe, Than lö, ia? 26Me Iesu ame thu, ka habe, Haba at oge me he ka ham ûjeû kâu iny ka hia but hneû. Ke a hia but hneû, e ame hom me ham kö Juda nöku Simona Isakariota. 27Ke hwaban dö ujeû, ame didrö Satana eû hnyi hnyekon. Haba Iesu ame ha kâu, ka habe, Haba ûnyi u me he ka ânyâ, me ânyâ mweimweiâ thö. 28Kʼ ame ca wâhmakhmeto ke at gadrin ödrin e laba hnyi laulau ge can e ame ha hofuc eling kâu. 29Haba keihen ödrin e ûnykûme anyin a e unyi Juda tang, me ame ha kâu Iesu, ka habe, Ûco thö ûnyi ae ûcû otin ka hnyi bijeû; kʼ ame ne ha la, he ka ha omjehen ta je theduoc. 30A hia but kap ujeû e ame ie didrut: ka lit ut.
31E ame didrut, kʼ ame ha Iesu, ka habe, Adre me ogânâ walang ang Nokon at, ke adre me ogânâ Khong ûnyi gan; 32ke ame he Khong ka ogânâ e a ka ûnyi gan, kʼ ame he ka ie ogânâ e. 33Lakuk lö, e ca beû biju ûök unyibun. Öbun e he ka elöm nya: ke haba hnok hna ha ka at Juda, me oge me ha minya walang ang köbun, ka habe, E ca khanʼ öbun he ka he ka hnyi dok oge me he ka hnyin. 34Inya oge me ham köbun hnanyibu a teb ûnyi, a öbun e he ka ibetengiököu; oge hia but betenge köbun, e so öbun e be ka helâe wale he ka ibetengiököu öbun. 35Wale me me he tavat hia thitbö ka wâhmakhmetoâ a latök öbun, hnyi hnobun hna ibetengiököu.
36Haba Simona Peteru ame ha kâu, ka habe, Taböny Than, u me he kâ? Iesu ame thu, ka habe, E ca khanö u walang ang he ka he hotuk ka hnyi dok oge me he ka hnyin; ke u me he ka he hotuk nyiele. 37Haingö Peteru kâu, ka habe, Than lö, anyin a ieû ae ca khanö nya he ka be hotom walang ang? oge me he bi ka ham anyik möt hnân hobi köu. 38Iesu ame thu, ka habe, Hawa u me he ka ham ânyâm möt hobi könya? E hnathu, e hnathu, inya oge me ha köu, ka habe, Ame tiga ca he bi ka kokok khoto, me u me he bi ka ibi okun ivinö nya.
Atualmente Selecionado:
Ioane 13: IAAI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
maintained by the British and Foreign Bible Society
