SEFANIAH 2
2
1Kuga tum̃amu piragi saisai ki mu, io, kuga saisai, nimu nalauna O, waina ku dika ki namaliereana; 2Pea ki kuga vei tea kopasiluaana pano dapala nap̃olaga, pea ki namaetoana kasua ki Yehovah ega wo pakilina ki mu, pea ki naaleatia ni namaritausuana ki Yehovah ega wo pakilina ki mu. 3Kuga laaga Yehovah, nimu tea matemate maga mamau puti ni maramana, waina ku do mari pataka ni natip̃akiana aneana maga; kuga laaga namarinaleoleanaana, kuga laaga namatemateana: mase ku pe vei tea tasurukiana naaleatia ni namaetoana ki Yehovah. 4Nalakena Casa ega wo pei tea toropusiana, go Ashkelon ega wo pei maso maladi sikai: euga wo kopasi lua narei ni Ashdod doko aleati matua, go Ekron ega wo pei tea vaku‐dakatiana. 5Ai ki mu naatatoko maga ni elau, nalauna ni Kaftor! Navasaana ki Yehovah e dip̃a mu, Kanaan O, navanua ni Filistine maga; aga wo mari puoli ki‐go, naga naatam̃oli ega wo dika. 6Go taleva ni elau ega wo pei napega maga, tea ki tea leo parati ki shiip maga, go loga maga raki navata maga. 7Go elau ega wo pei naveaniana ki namagovai ni nasum̃a ni Yudah; euga wo pagani navata adeada maga asa: doko nasum̃a maga ni Ashkelon euga wo one natano asa doko ragi melu maga; nalakena Yehovah Sup̃e adeada e do midoaki parati ki da, go ega wo moro piragi liliua ki tea vuapavakotoana adeada maga. 8A po dogo navasadaoana ni Moab, go navasapinoakiana maga ki Ammon natuna maga, waina eu po pasa pinoa ki narei aginau asa, po dum̃ada pasa pakavakae dip̃a ra nalo ni kokoi adeada. 9Nalakena tea wanogoe, dapala waina a mauri doko, Yehovah ki taua maga, Sup̃e ki Israel, e noa e, lomau Moab ega wo dakiusi Sodom, go Ammon natuna maga dakiusi Comorrah, navanua sikai ni nataputea vivitip̃a go m̃oru natasimena maga, go maso maladi sikai pa pa po du mau du: namagovai ni narei aginau euga wo mari sa sa ki da, go namagovai ni nalauna aginau euga wo peani ra. 10Tea wanogoe ega wo pakilina ki da, nalakena nap̃op̃ovakilagiana adeada, nalakena eu po pasa pinoa po pasa pakavakae dip̃a narei ki Yehovah ki taua maga. 11Yehovah ega wo pei tea ni namatakuana warua paki da: nalakena nae ega wo mari m̃oli ki sup̃e maga mamau puti ni maramana. Go naatam̃oli maga euga wo lotu ki nia, euga sikasikai doko tokora adeada, navanua maga mamau puti ni nalauna maga. 12Go nimu ma, tea ni Ethiopia O, kuga wo pei tea atugiana ki lova aginau. 13Go ega wo sai ki nam̃elearuna dip̃a north, po mari sa sa ki Assiria; po mari Nineveh ega wo pei maso maladi sikai, ega wo garagara dapala masop̃alo sikai. 14Go navata maga euga wo one natano m̃aleoputo kakana, nalo mila maga mamau puti ni namalasi: pelikan go porkupaine eroga wo lawo doko elagi ni nakau walagoto kakana maga: tipaga ega wo do p̃asasa namata leoduru maga; reven ega wo do p̃iri nakau tuasila maga: nalakena e po mari nawosiana ni nakau sidar e doko m̃oli doko. 15Tea wanogoe e pei natokoana ni nalaelaeaana waina e doko m̃oli doko, waina e noa doko nap̃op̃ona, Kinau a doko, go tea p̃ota e da doko mau waina e pei kerua kakagu: nae e po pei maso maladi sikai, tokora waina nalo mila maga ni namalasi eu do one natano asa! Sara naata waina eu do surata liu sa pano, eu do pasa saudoa po do puluvulua ki nam̃elearuda.
Atualmente Selecionado:
SEFANIAH 2: NTB
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Bible Society of the South Pacific