Logotipo da YouVersion
Ícone de Pesquisa

SEKARIAH 9

9
1Naveanoasaiana ni navasaana ki Yehovah doko navanua ni Hadrak, go Damaseko ega wo pei tokora tokoana aneana: nalakena namata ni naatam̃oli go ni nalauna maga mamau puti ni Israel, e do leo paki Yehovah: 2Go Hamath ma, waina e doko nadigina: Tair ma Sidon, nalakena nae e manumatua liu. 3Go Tair e dum̃ana maneana davagi nasum̃a ni p̃aaka sikai, go e pila daua ki silver e dapala nam̃otam̃ota, go kold wia e dapala nalepa ni napua maga. 4Ma p̃a leo, Yehovah ega wo kopasi lua e, po nadi ki nakasuaana aneana paki natasi; go nakapu ega wo gani a. 5Ashkelon ega wo punusi a po mataku; go Casa ma, go ega wo dogokitesa p̃arua; go Ekron, nalakena naleogoroana aneana ega wo pinovinoi: go nawota ni Casa ega wo mate puoli, go naatam̃oli ega wo da moro doko Ashkelon mau. 6Go narei ni natu ni navanakoana ega wo doko Ashdod, go aga wo daelua nap̃op̃ovakilagiana ki Filistine maga. 7Go aga wo dape lua nadana pa dua ki nawokana, go tea mamaragokiana aneana maga pa dua ki namawota ni napatina maga; go nae ma ega wo pei namagovai agi Sup̃e anigida: go ega wo dakiusi nawota sikai doko Yudah, go Ekron ega wo dakiusi naatam̃oli sikai ni Yebus. 8Go aga wo m̃enaki nasum̃a aginau dapala tea vavaigoro, naga te naata sikai ega ta surata papiliu mau: go tea riesoki ega wo da moro pa parati ki da mau: nalakena ragi waia namatagu ero do leo punusi a.
9P̃a laelaea p̃arua, Sion natuna nagoroi O; p̃a kola laelaea, Yerusalem natuna nagoroi O: p̃a leo, nawota aginau ega wo umai punusi ko: nae e leana, go e pilake namautipauriana; tea vakitano, e do sakesaake doko ass sikai, ass tureai sikai natu ni ass. 10Go aga wo daelua kariot pa dua ki Efraim, go horse pa dua ki Yerusalem, go naasu ni navakalo ega wo pei tea taeluaana; go ega wo pasa natam̃ateana paki nalauna maga: go namarakiana aneana ega vae natasi paki natasi, go pae Noaisara pa pa paki namatap̃ago maga ni maramana. 11Go nigo ma, nalakena nada ni nanoasokisokiana anigo, a dip̃aki lua tea vuapavakoto anigo pano m̃elu dua ki m̃orutano waina e dap̃a. 12Kuga liliu paki nasum̃a ni p̃aaka, nimu tea vuapavakotoana maga ni naleogoroana: naaleatia waia a noasai naga aga wo lagati dua ko ega vaka rua. 13Nalakena a maginau p̃elua ki Yudah dapala naasu aginau, go a mari Efraim e pei nalua kakana; go aga wo pulevule natum̃a naanoai maga, Sion O, dip̃a natum̃a naanoai maga, Yavan O, po mari ko p̃a wo dakiusi lova ki m̃aau sikai. 14Go Yehovah ega wo pei tea vunusiana elagi ki da, go nalua aneana ega wo pano dakiusi navila: go Yehovah Sup̃e ega wo sui paiga, po pano pilake suitaviro maga ni sauth. 15Yehovah ki taua maga ega wo mauti ra; go euga wo dinomi po marimatua ki vatu nadi‐ki‐ana maga; go euga wo munu nadada dakiusi waine: go euga wo pei tea vakavuroana dakiusi siloa maga, dakiusi naweluki maga ni wede ni naviriana. 16Go Yehovah Sup̃e adeada ega wo mauti ra naaleatia wanogoe, nalakena eu pei navata ni narei aneana: euga wo dakiusi vatu wia maga ni vauvau sikai, euga wo maramalagati navanua aneana. 17Nawiaana aneana e p̃arua, go naleom̃atakiana kakana e p̃ia pa! Korn ega mari natureai maga euga wo siria, go waine vau naatara maga.

Atualmente Selecionado:

SEKARIAH 9: NTB

Destaque

Compartilhar

Copiar

None

Quer salvar seus destaques em todos os seus dispositivos? Cadastre-se ou faça o login