SEKARIAH 6
6
1Go a moro sike namatagu maga, po leo punusi, go p̃a leo, kariot eu pati eu dave pae namawota ni tava warua dua umai; go tava warua maga wanogoe ero pei tava warua ni brass. 2Horse miala maga eu puati kariot vea; go horse loa maga eu puati kariot kerua; 3Go horse tare maga eu puati kariot ketolu; go horse kapukaapu maga eu puati kariot kevati. 4Go a pasa po noa ki agelo waina e pasa ki nau, a naga, Nawota aginau, tea maga waia eu pei nasava? 5Go agelo e pasadara po noa ki nau, e naga, Tea maga waia eu pei nalagi pati ni nakoroatelagi, waina eu do lawodu narae ni Yehovah ni maramana mamau, po do dave pano. 6Kariot waina horse loa maga eu puati a ega wo dave pano paki navanua ni north; go tea tare eu dave po dausi ra pano; go tea kapukaapu eu m̃elu pano po paki navanua ni sauth. 7Go tea miala eu m̃elu pano, go eu maridogo naga euga vano naga euga surata papiliu usuraki maramana: go e naga, Kuga vano, kuga surata papiliu usuraki maramana. Go eu pano po surata papiliu usuraki maramana. 8Go e pioso paki nau po noa ki nau, e naga, P̃a leo, tea maga waina eu do pano paki navanua ni north, eu mari namaetoana aginau e pakitano navanua ni north.
9Go navasaana ki Yehovah e umai paki nau, 10e naga, P̃a tape lua ki tea vua pavakotoana maga ki Heldai, go ki Tobiyah, go ki Yedaiah; go p̃a umai naaleatia sikai maau wanogoe, po sili nasum̃a ki Yosiah natu ni Sefaniah, tokora waina eu doko asa waina eu pae Babelon umai; 11Go p̃a tape lua kiada silver go kold, po mari vauvau sikai, po sawa ki nia ega toko nap̃au ni Yoshua natu ni Yehosadak, tea viri warua liu; 12Go p̃a vasa paki nia po naga, Yehovah ki taua maga e pasa dapala nea, e naga, P̃a leo, naatam̃oli waina nagisana e pei Arana; go ega wo siria m̃elu tokora aneana, go ega wo davagi piri nasum̃a tapu ki Yehovah: 13E pei nae waina ega wo davagi piri nasum̃a tapu ki Yehovah; go nasamasamaana ega wo doko asa, go ega wo dasake malo tasake aneana po pei tea maramara; go ega wo pei tea viri sikai doko malo tasake aneana: go navusum̃akiana ni natam̃ateana ega wo doko namawota kakada. 14Go vauvau wanogoe ega wo magi Heldai, go Tobiyah, go Yedaiah, go Hen natu ni Sefaniah, pei tea ni namidoakilagati‐ana sikai doko nasum̃a tapu ki Yehovah. 15Go tea maga waina eu doko uvea euga wo umai po silae natavagi‐piri‐ana ni nasum̃a tapu ki Yehovah, go kuga wo atae naga Yehovah ki taua maga e dip̃aki lua au umai punusi mu. Go tea wanogoe ega wo pakilina, waina ku pe wo dogo parati ki m̃ata ki nadaleo ni Yehovah Sup̃e animu.
Atualmente Selecionado:
SEKARIAH 6: NTB
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Bible Society of the South Pacific