SEKARIAH 1
1
1Atelagi kelatolu, natau kerua ki Darius, navasaana ki Yehovah e umai paki Sekariah natu ni Berekiah, natu ni profeta Iddo, 2e naga, Yehovah e maeto p̃arua ki tamamu maga. 3Nalakena tea wanogoe p̃a noa ki da, Yehovah ki taua maga e pasa dapala nea: Kuga moro liliu umai punusi au, Yehovah ki taua maga e noa e, go kinau aga wo moro liliu punusi mu, Yehovah ki taua maga e noa e. 4Kuga ta dakiusi tamamu maga mau, waina profeta vea maga eu pioso paki da, po naga, Yehovah ki taua maga e noa dapala nea, Kuga liliu ragi waia pa dua ki napua sa animu maga, go pa dua ki natomariana sa animu maga: ma eu da daki dorogo mau, kite dogo parati ki nau mau, Yehovah e noa e. 5Tamamu maga nara wai? Go profeta maga, nara euga wo mauri pa pa po du mau du, kite? 6Ma navasaana aginau maga, go natawonakiana aginau maga, waina a pitip̃aki asa paki tea suasua aginau profeta maga, nara eu da pa parati ki tamamu maga, kite? Go eu maradoa, po naga, Dapala waina Yehovah ki taua maga e midoaki nia naga ega mari paki gami asa, pataka ni napua aginami maga, go pataka ni natomariana aginami maga, dapala nogoe e po mari a paki gami.
7Naaleatia kerualima dua tamate pati ni atelagi kerualima sikai tamate sikai, waina e pei atelagi Shebat, natau kerua ki Darius, navasaana ki Yehovah e umai paki Sekariah natu ni Berekiah, natu ni profeta Iddo, 8e naga, A punusi doko p̃ogi, go p̃a leo, naatam̃oli sikai e do sakesaake horse miala sikai; go e lawodu m̃aleoputo ni nakau nasara maga waina eu doko etano; go horse maga eu doko natakuna, tea miala, go tea mimiala, go tea tare. 9Go a naga, Yehovah aginau O, tea maga waia eu pei nasava? Go agelo waina e pasa ki nau, e naga, Aga wo pisei ki‐go tea maga waia eu pei nasava. 10Go naatam̃oli waina e lawodu m̃aleoputo ni nakau nasara maga, e pasadara po naga, Tea maga waia eu pei tea maga waina Yehovah e dip̃aki lua ra umai naga euga surata papiliu usuraki maramana. 11Go eu pasadara agelo ki Yehovah waina e lawodu m̃aleoputo ni nakau nasara maga, po naga, Au surata papiliu usuraki maramana, go p̃a leo, maramana mamau e du dorogo, go e dam̃ate doko. 12Go agelo ki Yehovah e pasadara po naga, Yehovah ki taua maga O, pa pa paki seve ragi p̃a wo da peani namaritadodomiana paki Yerusalem, go paki natokoana maga ni Yudah, naga ku peani namaritausuana dip̃a ra natau rualima larua waia? 13Go Yehovah e pasadara agelo waina e pasa ki nau, ki navasaana wia maga, eu pei navasapakavakaleana. 14Go agelo waina e pasa ki nau, e noa ki nau, e naga, P̃a vioso, po naga, Yehovah ki taua maga e noa dapala nea: Kinau a dotowo kasua nalo ni Yerusalem, go nalo ni Sion, ki natotowo‐kasua‐ana warua. 15Go a maeto p̃arua ki nalauna maga waina eu dam̃ate doko: nalakena a pea maeto kiki ma nara eu mari au a maeto p̃arua. 16Nalakena tea wanogoe Yehovah e noa dapala nea: Kinau a moro liliu paki Yerusalem pilake namaritadodomiana maga; nasum̃a aginau ega wo pei tea tavagiana asa, Yehovah ki taua maga e noa e, go natali totowo sikai ega wo pei tea saikiana pano elagi ni Yerusalem. 17P̃a moro pioso, po naga, Yehovah ki taua maga e noa dapala nea: Natokoana aginau maga euga wo moro disu p̃ia po p̃arua; go Yehovah ega wo moro pakavakale Sion, go ega wo moro matadoa Yerusalem.
18Go a sike namatagu maga po leo punusi, go p̃a leo, napati nap̃au eu pati. 19Go a noa ki agelo waina e pasa ki nau, a naga, Tea maga waia eu pei nasava? Go e pasadara au, po naga, Tea maga waia eu pei napati nap̃au maga waina eu daperavera ki Yudah, go ki Israel, go Yerusalem. 20Go Yehovah e pisei ki nau mataisau eu pati. 21Go a naga, Tea maga waia eu rumai naga euga mari nasava? Go e pasa, po naga, Tea maga waia eu pei napati nap̃au maga waina eu daperavera ki Yudah, dapala waina te naata sikai e da sike nap̃auna mau: ma tea maga waia eu rumai naga euga kopasi lua ra, naga euga nadi ki lua napati nap̃au ni nalauna maga, waina eu sike napati nap̃auda dip̃a navanua ni Yudah naga euga taperavera ki nia.
Atualmente Selecionado:
SEKARIAH 1: NTB
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Bible Society of the South Pacific