NAHUM 1
1
1Naveanoasaiana sikai nalo ni Nineveh. Tusi ni navunusiana ki Nahum, naatam̃oli ni Elkosh. 2Yehovah e pei Sup̃e totowo kasua sikai go e pei tea sikosiko; Yehovah e do sikosiko go e pura ki namaritausuana; Yehovah e do mari nasikosikoana paki tea maga waina eu do mari dip̃a e, go e do pavaigoro namaritausuana raki tea kokona ki nia maga. 3Yehovah e daliali namaetoana, go e lapalapa nakasuaana, go ega wo da midoakikorokoro namarinaleotageleana mau: Yehovah napua aneana e doko suitaviro go e doko nalagi atu, go napopouru maga eu pei nam̃otam̃ota ni nam̃ele natuana. 4E pasa kasua ki natasi, po mari a e garagara, e mari noaisara maga mamau puti eu dap̃a; Bashan go Karmel ero kokolo, go napum̃a ni Lebanon e kuku. 5Tava warua maga eu duruuru naraena, go tava sula maga eu sara; go natano e pei tea marisakiana kivea ki nia, io, maramana go tea mamau puti waina eu doko asa doko. 6Sei e mariatae lawodugoro namaritausuana aneana? Go sei e mariatae doko navivitinuana ni namaetoana aneana? Namaritausuana aneana e pei tea takiana pano dapala nakapu, go vatu maga eu pei tea nadi‐ki‐kotoviana pae asa. 7Yehovah e p̃ia, e pei tokora ni nasavasiliana sikai naaleatia ni nariesokiana; go e atae tea maga waina eu pavatu asa. 8Ma ega wo mari sa sa ki puti tokora wanogoe ki natave warua po lelep̃esi, go ega wo kopasi lua tea kokona maga ki namaligo. 9Ku midoaki p̃otae dip̃a Yehovah nasava? Nae ega wo mari sua tea mamau puti: nariesokiana ega wo da moro duleana sala kerua mau. 10Eu pe tapala namalasi vivitip̃a, po pei tea vueana ki tea munuana adeada, ma euga wo pei tea kani‐dinomiana dapala stro garagara. 11Sikai e doko waina e m̃elu ako pano, waina e do midoaki p̃otae tea sa dip̃a Yehovah, waina e do midoaki p̃otae ki nasigisigileoana. 12Yehovah e noa dapala nea: Eu pe kasua p̃ia po laapa, ma euga wo pei tea taeluaana po pano puoli. A po mari ko narogokitesaana, ma aga wo da moro mari ko narogokitesaana mau. 13Go ragi waia aga wo mari kotovi nakau nanoa aneana m̃elu dua ki‐go pano, go aga wo mari kotovi natali solisoli anigo maga. 14Go Yehovah e dip̃aki natip̃akiana nalo kakam̃a, naga nagisam̃a ega ta moro pei tea sapurakiana mau: aga wo daelua nasup̃e taeana go nasup̃e takiana m̃elu dua ki nasum̃a ki sup̃e anigo maga; aga wo mari matigom̃a; nalakena nigo ku loa. 15P̃a leo, nam̃ele maga ni tea waina e do dape narogorogoana wia umai, waina e do dogorogo ki natam̃ateana, ero doko tava warua maga! Yudah O, p̃a vavaigoro nasaisaiana tatutakiana anigo maga, p̃a vakavuro nasaiana anigo maga: nalakena tea mari‐sa‐ki ega wo da moro umai dip̃a ko mau; e pei tea mari‐puoli‐ki‐ana sua.
Atualmente Selecionado:
NAHUM 1: NTB
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Bible Society of the South Pacific