AMOS 4
4
1Kuga rogo navasaana waia, nimu kau maga ni Bashan, waina ku doko tava ni Samaria, waina ku diesoki tea rogokitesa, waina ku mari p̃oroworosi tea tika, waina ku noa ki nawota animu maga, ku naga, Kuga tape umai, naga tuga kanikani. 2Yehovah Sup̃e e pivisa doko natapuana aneana naga p̃a leo, naaleatia maga euga wo pa parati ki mu, ragi waina euga wo puati lua mu pano ki tagau maga, go namatarau animu waina euga wo edakugoro mu, ki tagau maga ni naika. 3Go kuga wo dave pae malo mari‐p̃oraeana maga po pano, sara naata kakamu kivea ki mu; go kuga wo pei tea nadikiana paki Harmon, Yehovah e noa e.
4Kuga umai paki Beth‐el, po dapiri; go paki Cilcal, po moro dapiri p̃arua; go kuga tape naviriana animu maga umai malip̃ogi, go kekerualima animu maga matamai ki nia; 5Po dap̃ara ki naviriana sikai ni navasadodom̃atakiana ki tea waina leven e doko asa, po noasai navituaana suasuakiana maga po dogorogo ki da: nalakena naleo wanogoe ku masau p̃arua ki nia, nimu Israel natuna maga O, Yehovah Sup̃e e noa e. 6Go kinau a dua mu natautauana ni napatimu maga usuraki natokoana animu maga mamau puti, go natikaana ni navinaga usuraki tokora animu maga mamau puti: ma ku da maradoa liliu paki nau mau, Yehovah e noa e. 7Go a mauti usa pa dua ki mu, ragi waina atelagi dolu eu ko puoli ki ragi ni nalolovaeana: go a mari usa e p̃owo natokoana sikai, po mari a e da p̃owo mau natokoana kerua: matele sikai usa e p̃owo asa, go matele waina usa e da p̃owo asa mau, e kokolo. 8Go tea ni natokoana dua kite dolu eu surata darataara paki natokoana sikai maau naga euga munu noai, ma namadouana adeada e da pei tea vuepunueana mau: ma ku da maradoa liliu paki nau mau, Yehovah e noa e. 9Kinau a atugi mu ki namakukuana go ki navusivusigaana: a mari sa ki roara animu maga go roara ni vaine animu maga; uraasi e gani puoli ki nakau napuliva animu maga go nakau oliva animu maga: ma ku da maradoa liliu paki nau mau, Yehovah e noa e. 10A dip̃aki lua nasasanaana ni namateana paki m̃aleoputo kakamu, dapala waina e pei tea mariana Ityipt: a mari punuvunue natureai animu maga ki lova, go a dape pavakoto horse animu maga; go a mari nap̃oaana ni tokora ni nam̃enakiana animu e sake umai paki nagisumu: ma ku da maradoa liliu paki nau mau, Yehovah e noa e. 11A dap̃olosiwo ki te seara kakamu, dakiusi waina Sup̃e e dap̃olosiwo ki Sodom go Comorrah, go ku doko dapala naseati waina e pei tea vualuaana m̃elu dua ki nakapu vavaga: ma ku da maradoa liliu paki nau mau, Yehovah e noa e. 12Nalakena tea wanogoe aga wo mari ega tapala nogoe paki‐go, Israel O: go nalakena aga wo mari ega tapala nogoe paki‐go, p̃a mari m̃ata naga p̃a wo sua Sup̃e anigo, Israel O. 13Nalakena p̃a leo, nae waina e lawo ki tava maga, po dawona ki nalagi, po mari pakasa ki namidodoana ki naatam̃oli, waina e mari namarama go namaligo, po pasi tokora vakilagi maga ni maramana; Yehovah, Sup̃e ki taua maga, e pei nagisana.
Atualmente Selecionado:
AMOS 4: NTB
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Bible Society of the South Pacific