လံာ်တၢ်ကဲထီၣ်အခီၣ်ထံး 5
5
စီၤအၤဒၣ်အစၢၤအသွဲၣ်တဖၣ်
(၁ကွဲး. ၁:၁-၄)
1အအံၤမ့ၢ်တၢ်ကွဲးနီၣ်ဘၣ်ဃးစီၤအၤဒၣ်အစၢၤအသွဲၣ်န့ၣ်လီၤ. (ဖဲကစၢ်ယွၤတ့လီၤပာ်လီၤပှၤဟီၣ်ခိၣ်ဖိန့ၣ်မၤဝဲဒ်အဂီၤဒၣ် ဝဲအသိးန့ၣ်လီၤ. 2အဝဲတ့လီၤတ့ၢ်အီၤပိာ်ခွါဒီးပိာ်မုၣ်ဝံၤဆိၣ်ဂ့ၤအီၤဒီး ယုၢ်န့ၢ်အမံၤလၢ, “ပှၤဟီၣ်ခိၣ်ဖိ” န့ၣ်လီၤ.) 3ဖဲစီၤအၤဒၣ်အသးအိၣ်ဝဲအနံၣ်တကယၤသၢဆံန့ၣ်အဝဲထီၣ်ဖိ အဖိခွါလၢအလီၤဂာ်ဒီးအီၤဒီးယုၢ်န့ၢ်ဝဲအမံၤလၢစီၤၡ့သး န့ၣ်လီၤ. 4အန့ၣ်ဝံၤအလီၢ်ခံစီၤအၤဒၣ်အိၣ်မူကဒီးအနံၣ်ဃိးကယၤန့ၣ်လီၤ. အဝဲအိၣ်ဒီးအဖိအဂုၤအဂၤတဖၣ်, 5ဒီးသံဝဲဖဲအသးအိၣ်အနံၣ်ခွံကယၤသၢဆံန့ၣ်လီၤ.
6ဖဲစီၤၡ့သးအသးအိၣ်အနံၣ်တကယၤယဲၢ်နံၣ်န့ၣ်ထီၣ်ဖိအဖိခွါ တဂၤလၢအမ့ၢ်စီၤအနိၣ်န့ၣ်လီၤ. 7ဒီးအိၣ်မူကဒီးဝဲအနံၣ်ဃိးကယၤနွံနံၣ်န့ၣ်လီၤ. အဝဲထီၣ်ဖိအဖိအဂုၤအဂၤတဖၣ် 8ဒီးသံဝဲဖဲအသးအိၣ်ခွံကယၤတဆံခံနံၣ်န့ၣ်လီၤ.
9ဖဲစီၤအနိၣ်အသးအိၣ်အနံၣ်ခွံဆံန့ၣ်ထီၣ်ဖိအဖိခွါစီၤက့ၤနၣ်န့ၣ်လီၤ. 10ဒီးအိၣ်မူကဒီးဝဲအနံၣ်ဃိးကယၤတဆံယဲၢ်နံၣ်န့ၣ်လီၤ. အဝဲထီၣ်ဖိအဖိအဂုၤအဂၤတဖၣ် 11ဒီးသံဝဲဖဲအသးအိၣ်ခွံကယၤယဲၢ်နံၣ်န့ၣ်လီၤ.
12ဖဲစီၤက့ၤနၣ်အသးအိၣ်အနံၣ်နွံဆံန့ၣ်ထီၣ်ဖိအဖိခွါစီၤမၤ ဟလၤလ့လးန့ၣ်လီၤ. 13ဒီးအိၣ်မူကဒီးဝဲအနံၣ်ဃိးကယၤလွံၢ်ဆံန့ၣ်လီၤ. 14အဝဲထီၣ်ဖိအဖိအဂုၤအဂၤတဖၣ်ဒီးသံဝဲဖဲအသးအိၣ်အနံၣ်ခွံ ကယၤတဆံန့ၣ်လီၤ.
15ဖဲစီၤမၤဟလၤလ့လးအသးအိၣ်ဃုဆံယဲၢ်နံၣ်န့ၣ်ထီၣ်ဖိအဖိခွါ တဂၤလၢအမ့ၢ်စီၤယၤရ့းန့ၣ်လီၤ. 16ဒီးအိၣ်မူကဒီးဝဲအနံၣ်ဃိးကယၤသၢဆံန့ၣ်လီၤ. အဝဲထီၣ်ဖိအဖိအဂုၤအဂၤတဖၣ် 17ဒီးသံဝဲဖဲအသးအိၣ်ဃိးကယၤခွံဆံယဲၢ်နံၣ်န့ၣ်လီၤ.
18ဖဲစီၤယၤရ့းအသးအိၣ်တကယၤဃုဆံခံနံၣ်န့ၣ်ထီၣ်ဖိအဖိခွါ တဂၤလၢအမ့ၢ်စီၤဃနိာ်န့ၣ်လီၤ. 19အန့ၣ်ဝံၤဒီးအိၣ်မူကဒီးအနံၣ်ဃိးကယၤန့ၣ်လီၤ. အဝဲထီၣ်ဖိအဖိအဂုၤအဂၤတဖၣ်, 20ဒီးသံဝဲဖဲအသးအိၣ်ခွံကယၤဃုဆံခံနံၣ်န့ၣ်လီၤ.
21ဖဲစီၤဃနိာ်အသးအိၣ်ဃုဆံယဲၢ်နံၣ်န့ၣ်ထီၣ်ဖိအဖိခွါတဂၤလၢ အမ့ၢ်စီၤမသူၤၡလၤန့ၣ်လီၤ. 22အန့ၣ်ဝံၤအလီၢ်ခံစီၤဃနိာ်ရ့လိာ်သကိးအသးဒီးကစၢ်ယွၤအနံၣ် သၢကယၤဒီးထီၣ်ဖိအဖိအဂုၤအဂၤတဖၣ်န့ၣ်လီၤ. 23စီၤဃနိာ်အိၣ်မူဝဲသၢကယၤဃုဆံယဲၢ်နံၣ်လီၤ.
24အဝဲအိၣ်မူတ့ၢ်ဝဲလၢတၢ်ရ့လိာ်အသးဒီးကစၢ်ယွၤအပူၤ, ဝံၤဒီးတၢ်တထံၣ်အီၤလၢၤဘၣ်. အဂ့ၢ်ဒ်အံၤ, ယွၤစိာ်ထီၣ်ကွံာ်အီၤန့ၣ်လီၤ.
25ဖဲစီၤမသူၤၡလၤအသးအိၣ်တကယၤဃိးဆံနွံနံၣ်န့ၣ်ထီၣ်ဖိအဖိ ခွါစီၤလ့ၤမ့းန့ၣ်လီၤ. 26ဒီးအိၣ်မူကဒီးဝဲအနံၣ်နွံကယၤဃိးဆံခံနံၣ်န့ၣ်လီၤ. အဝဲထီၣ်ဖိအဖိအဂုၤအဂၤတဖၣ်, 27ဒီးသံဝဲဖဲအသးအိၣ်အနံၣ်ခွံကယၤဃုဆံခွံနံၣ်န့ၣ်လီၤ.
28ဖဲစီၤလ့ၤမ့းအသးအိၣ်အနံၣ်တကယၤဃိးဆံခံနံၣ်န့ၣ်အဝဲ ထီၣ်ဖိအဖိခွါ 29ဒီးစံးဝဲဒၣ်, “ဖိသၣ်အံၤကဟဲစိာ်န့ၢ်ပှၤတၢ်ထူၣ်ဖျဲးလၢ ကယဲၢ်ပတၢ်မၤအကီအခဲလၢဟီၣ်ခိၣ်လၢယွၤပာ်တၢ်ဆိၣ်အၢတမံၤအဖီခိၣ် န့ၣ်လီၤ.” လၢတၢ်န့ၣ်အဃိယုၢ်န့ၢ်ဝဲအမံၤလၢစီၤနိအၤန့ၣ် လီၤ. 30စီၤလ့ၤမ့းအိၣ်မူကဒီးဝဲအနံၣ်ယဲၢ်ကယၤခွံဆံယဲၢ်နံၣ်န့ၣ် လီၤ. အဝဲထီၣ်ဖိအဖိအဂုၤအဂၤတဖၣ် 31ဒီးသံဝဲဖဲအသးအိၣ်နွံကယၤနွံဆံနွံနံၣ်န့ၣ်လီၤ.
32စီၤနိအၤအိၣ်မူဝဲအနံၣ်ယဲၢ်ကယၤဝံၤအလီၢ်ခံထီၣ်ဖိအဖိခွါ သၢဂၤလၢအမ့ၢ်စီၤၡ့ၣ်, စီၤဃၣ်ဒီးစီၤယ့ဖ့းသးတဖၣ်န့ၣ်လီၤ.
Atualmente Selecionado:
လံာ်တၢ်ကဲထီၣ်အခီၣ်ထံး 5: KSWC
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Sgaw Karen Common Bible © Bible Society of Myanmar, 1992.
