Matius 9

I Yesus nompakabelo topunggu ala rasani ntopanggeni agama Yahudi Ia nakuasa nombaampungi dosa

Markus 2:1-12; Lukas 5:17-26

1Naupu haitu nesavi sakayamo i Yesus ante anaguruNa nanjili hau ri sambote rano, sampe nakava ri ngata niponturora. 2Hamai naria bara sako-ndua tona nombakova roara hau nte i Yesus. Roara haitu napunggu bo naturu ri ompa paturuna. Nanggita karoso nu pomparasayara, nangulimo i Yesus ka topunggu haitu, “AnaKu, pakaroso raramu. Dosamu niampungimo.”

3Bara sako-ndua guru agama hamai nompekiri riara ntaira, “Nadaa mpuu tona hitu! Ia nompakasimbayu karoNa ante Alatala, apa aga Alatala namala nombaampungi dosa!”

4Tapi nisani i Yesusmo pekirira. Haitu sampe niuliNa ka ira, “Nakuya rara ntaimiu nompekiri nadaa? 5Natantumo ledo nakaja manguli ‘Dosamu niampungimo.’ Nakajapa manguli ‘Peanggamo bo polipamo!’#9:5 Namura nanguli ‘dosamu niampungi’ apa ledo rakita ntona bara majadi bara ledo. Tapi ane rauli ‘Peanggamo bo polipamo!’ rakita ntonamo bara majadi bara ledo. 6Tapi Kupopakita ka komiu Yaku, Ana nu Manusia, nakuasa ri dunia hitu nombaampungi dosa nu manusia.” Jadi nituduNa topunggu haitu, “Peanggamo! Anggataka ompa paturumu bo panjilimo!” 7Nangepe haitu neangga mpuumo topunggu haitu, bo nanjilimo ia ri banuana mboto.

8Nanggita kajadia haitu naekamo rara ntodea ri sia. Bo nitoiyara Alatala sabana nidekeiNa kuasa nambaso eva haitu ka manusia.

I Yesus nompokio i Matius majadi anaguruNa

Markus 2:13-17; Lukas 5:27-32

9Naupu haitu nalaimo i Yesus lako ri sia. Nolipa-lipamo Ia, nikitaNa saito topesingara balasitee nonturo riara kantoro ntopesingara balasitee. Sangana i Matius. Nanguli i Yesus ka ia, “Kaimo! Oseakamo Yaku!” Nangepe haitu neanggamo i Matius bo hau nangoseaka i Yesus.

10Naupu haitu i Yesus ante anaguruNa hau nangande ri banua i Matius. Bo nadea topesingara balasitee bo tona ntanina anu nireke ntoYahudi tona nadosa#9:10 tona nadosa: tona ledo nangoseaka Atura-atura agama Yahudi niuli ntoYahudi tona nadosa., nakava nangande nosanggani-nggani ante ira. 11Sampanggita haitu, nangulimo bara sako-ndua toFarisi ka anaguru i Yesus, “Nakuya gurumiu nangande nosanggani-nggani ante topesingara balasitee bo tona nadosa?”

12Niepe i Yesus tesara haitu. Jadi niulikaNa, “Tona ledo nadua ledo nomparaluu pakuli nu dokutoro. Aga tona nadua paraluu rapakulisi. 13Koi pegurumo batuana tesa nu Alatala anu nanguli ivei:

‘NipokonoKupa maasi matamiu manggita roamiu

pade manggeni binata-binata rapesomba ka Yaku.’

Hosea 6:6

Yaku nakava ri dunia ledo mompokio tona anu nanguli karora nanoa,#9:13 tona nanoa: nantuntuni panggava ntodea toYahudi, tona nanoa haitumo tona anu nangoseaka atura-atura agama Yahudi. tapi mompokio tona nadosa majea lako ri dosara.”

Anaguru nompekutana popuasa

Markus 2:18-22; Lukas 5:33-39

14Naupu sia, bara sako-ndua topangoseaka i Yohanes Topediu nakava nte i Yesus. Nekutanamo ira, “Kami bo toFarisi nasaro nopuasa nangoseaka ada-ada agamata. Nuapa sabana anaguruMiu ledo nopuasa?”

15Nesanamo i Yesus ka ira, “Ledo masipato torata ri posusa poboti masusa rara bo mopuasa tempo boti langgai da mosanggani ante ira. Tapi kana makava tempona boti langgai raala lako nte ira. Tempo haitumo pade mopuasa ira. Ivesia muni anaguruKu masusa rara bo mopuasa ane Yaku raala lako nte ira.”

Rongaya porapa mompakalanto pepatuduki i Yesus nabaru ledo mamala raposigalo ante ada-ada agama Yahudi

16Nanguli munimo i Yesus, “Ledo ria tona notampala baju naranta ante kae nabaru. Sabana kae baru haitu mekonjo bo mombabitesi baju ranta sampe mantambai kabitena baju haitu. 17Ivesia muni ante uve anggur. Ledo ria tona nombaisi uve anggur nabaru riara kuli njae anu domo nagini.#9:17 Pomboli uve anggur nipake tempo haitu nipovia lako ri kuli binata, eva kulimba ntovau. Ane natuamo, nakaa kuli, domo nagini. Sabana ane radika ri pomboli njae, uve anggur baruna morende bo mevoya mompakapasa pombolina haitu sampe mabubu uve anggur, bo marugi pombolina. Uve anggur nabaru kana raisi riara pomboli baruna muni. Ane ivesia mabelo puramo uve anggur bo pombolina.”

Tesa ngana mombine nipakatuvu mpanjili bo mombine nadua anu nanggabe baju i Yesus

Markus 5:21-43; Lukas 8:40-56

18Da notesa i Yesus, nakavamo saito pakeni ri banua petupu ntoYahudi. Nantaputumo ia ri ngayo i Yesus bo nerapi tulungi ante mpuu-mpuu rara. Niulina, “Dako namate anaku mombine. Kamai, kita hau ri banuaku. Tuu paleMiu ri karona ala matuvu mpanjili ia.” 19Nangepe haitu, neanggamo i Yesus hau mantuntuni tuama nu ngana haitu. Bo anaguruNa muni hau nosanggani nte Ia.

20Ri tatanga dala naria saito mombine anu sapulu rompaemo nasimbunga njuu. Ia nanggaparai puri i Yesus bo nikabena doe baju i Yesus, 21apa nipekirina, “Nau aga doe nu bajuNa kukabe, tantu mabelomo duaku hitu.”

22Neilimo i Yesus nompeinta mombine haitu. Bo niuliNa ka ia, “Anaku, pakaroso raramu! Mabelomo iko sabana iko nomparasaya.” Bo eva nisuka, nabelo mpuumo mombine haitu.

23Naupu sia napolamo i Yesus hau ri banua nu pakeni ri banua petupu pangane. Nakava hamai nikitaNa nadea tona nantavusi suli bo notumangi ka tomate ante suara namangga. 24Nanguli i Yesus ka ira, “Palaimo komiu pura-pura. Ngana haitu ledo namate. Ia aga namonjo.” Nangepe tesa haitu, aga nipongirikara i Yesus. 25Naupu ira nipopalai, nesuamo i Yesus riara tombi nu ngana mombine. NikangisiNa pale nu ngana bo kaliu-liu nembangumo ia. 26Naupu haitu, kajadia haitu natolele sampe ri pura-pura ngata ri njumangu bagia haitu.

Randua toburo nipakabelo i Yesus

27Tempo i Yesus nompapola polipaNa, naria randua toburo nantuntuni Ia bo nongare-ngare, “Muli Magau Daud! Poasimo kami!”

28I Yesus nesua riara banua, bo nesua munimo toburo randua haitu bo nanggaparai Ia. Nekutanamo Ia “Niparasayamiu Yaku nakuasa mompakabelo matamiu?”

Nesana ira, “Iyo, Pue. Niparasaya kami.”

29Jadi i Yesus nombatui matara bo nanguli, “Mabelomo matamiu, eva niparasayamiu majadi!” 30Kaliu-liu nabelomo matara randua. Bo i Yesus nantagi ira ante mpuu-mpuu. NiuliNa, “Nee ntoto ratesa ka tona ntanina anu najadi nte komiu hitu.” 31Tapi nalaimo ira bo nompatolele kareba i Yesus ri pura-pura ngata ri njumangu bagia haitu.

I Yesus nompakabelo tobobo

32Dako nalai toburo randua pangane, naria saito tobobo nikeni ntona hau nte i Yesus. Tona haitu nabobo sabana nipesua nu seta. 33Jadi tempo seta haitu nipopalai i Yesus lako nte ia, namalamo ia notesa. Nanggita kajadia haitu nokumaa mpuumo todea. Nanguli ira, “Dopa sanggania nikita kami kajadia eva hitu ri tana Israel!” 34Tapi nanguli toFarisi hamai, “Bai! Tona hitu aga nompopalai seta ante kuasa lako nte Magau nu Seta mboto!”

I Yesus nompatuduki anaguruNa (9:35-11:1)

Naasi mata i Yesus nanggita todea anu ledo nomparasaya

35I Yesus hau nompesayoki ngata dea. Ia nompatuduki ri banua-banua petupu bo nompatolele kareba Poparenta nu Alatala. Bo nipakabeloNa tona nadua mpengaya-ngaya. 36Nanggita todea, naasi mpuumo mataNa, sabana nasesamo ira bo ledo ria tona nantulungi ira, nasimbayu eva bimba ledo ria topoevuna. 37Bo nanguli i Yesus ka anaguruNa, “Nadeamo tona nasadia mantarima Kareba Belo. Ira nasimbayu eva pae natasamo, nasadiamo rakato. Nadea mpuu pae nasadiamo rakato, tapi topokato ledo nadea. 38Jadi perapimo nte Alatala tupu ntalua, ala ratuduNa tona hau mokato ri taluaNa.”

Atualmente Selecionado:

Matius 9: TLEDOV

Destaque

Copiar